Froeloesoe na ini wan ten foe rampoe
A BIGI wenkri di hei feifi sodro, na ini Seoel, Korea, ben fadon broko wantronso, èn a fasi hondrohondro sma na inisei! Wrokoman di e jepi sma, ben wroko tranga dei nanga neti foe froeloesoe so foeroe libi leki den kan. Ala di den dei ben e pasa, den tjans di ben de foe feni moro sma di tan na libi èn di beri na ondro a hei ipi foe ston nanga isri, ben e kon moro mendri.
Leti fa no wan howpoe no ben de moro foe feni moro sma di tan na libi, wan froewondroe sani ben pasa. Den ben jere wan swaki, sari krei na ondro na ipi ston. Jepiman ben diki fajafaja nanga den soso anoe foe man fri wan oema di abi 19 jari èn di ben beri 16 dei langa libilibi. Wan gang foe wan lift di ben fadon, ben libi wan pisi opo di ben de leki wan skotoe na en tapoe, èn a ben kibri en gi doesoendoesoen kilo ston di ben e fadon kon na gron. Ala di a ben kon drei srefisrefi èn a ben abi foeroe koti, tokoe a no ben dede!
Na ini a ten disi, pikinmoro ibri moen, njoensoe de foe wan rampoe, awansi a de wan gronseki, wan ogri bigi winti, wan vulkaan di ben soetoe, wan ongolokoe, noso wan angriten. Èn kefalek span tori foe a jepi di sma ben jepi trawan, èn foe sma di ben tan na libi, e hari a prakseri foe miljoenmiljoen sma di e arki a njoensoe. Ma moro foeroe sma no e poti prakseri na tapoe a warskow gi wan rampoe di e kon — wan moro bigi wan leki iniwan tra rampoe na ini a historia foe libisma (Mateus 24:21). Bijbel e taki foe a sani disi di e kon, nanga den wortoe disi: „Loekoe! Wan rampoe e go foe a wan nâsi na a tra nâsi, èn wan bigi winti srefi sa opo na den moro farawe pisi foe grontapoe. Èn na a dei dati, den sma di Jehovah kiri sa didon seiker foe a wan kabapisi foe grontapoe te na a tra kabapisi foe grontapoe. Sma no sa krei gi den, èn den no sa poti den na makandra noso beri den. Leki mest na tapoe a gron den sa tron.” — Jeremia 25:32, 33.
Den wortoe foe Jeremia e gi foe frede! Ma tra fasi leki den rampoe foe a natoeroe nanga ongolokoe, a rampoe disi no sa kiri sma sondro foe meki difrenti na den mindri. Foe taki en leti, sma man tan na libi — joe man tan na libi!
Wan ten di de toemoesi serjoesoe
Foe man froestan a troetori disi krinkrin, wan sma moesoe froestan fosi foe san ede a grontapoe rampoe disi, sa feni presi. Troetroe, a de a wan-enkri troe loesoe gi den problema foe a libisma famiri. Wan toe sma nomo na ini a ten disi e firi densrefi veilig èn seiker. Ala di sabidensi e doe ala moeiti, tokoe infektie siki e tan rigeri libisma na tapoe grontapoe. Orlokoe di ben bigin foe relisi, lo, nanga politiek kesekese ede, e teki a libi foe doesoendoesoen sma. Angriten e gi moro sari nanga pina na man, oema, nanga pikin-nengre di no doe noti. A go di a moraal e go na baka, e meki taki a fondamenti foe a libimakandra kon swaki safrisafri; srefi pikin kon pori.
Na wan kefalek soifri fasi, wan profeititori foe bijbel di ben skrifi moro leki 1900 jari pasa, e taki foe a situwâsi foe wi. A e taki: „Joe moesoe froestan taki na ini den lasti dei, den ten sa abi foeroe kefar.” — 2 Timoteus 3:1, The New Testament in Modern English, foe J. B. Phillips; teki gersi Mateus 24:3-22.
A de wan logis sani gi joe taki wan lobi Gado ben sa sori mi-no-kefasi gi a takroe situwâsi foe wi? Bijbel e taki: „En a troe Gado, a Sma di seti grontapoe èn a Mekiman foe en . . . , no kria en foe soso, di ben seti en foe sma libi na tapoe” (Jesaja 45:18). Ija, na presi taki A e gi pasi meki a moi planeiti disi pori èn ala den sma di e libi na tapoe e kon na wan kaba, Gado sa kon na ini a tori. Na aksi na: Fa a sa doe dati?
Froekisi libi!
Bijbel e piki na ini Psalm 92:7: „Te den godelowsoewan e sproiti leki sani di e gro na gron èn ala den sma di e doe ogri e gi bromki, dan dati na foe di den sa kisi pori foe têgo.” A loesoe foe Gado gi den problema foe grontapoe, na taki a sa koti godelowsoefasi poeroe. A de wan prisiri taki disi no wani taki dati ala sma moesoe koti poeroe. Psalm 37:34 e gi wi a djaranti: „Howpoe tapoe Jehovah èn hori a pasi foe en, èn en sa hei joe so taki joe kan kisi grontapoe. Te den sa koti godelowsoewan poeroe, dan joe sa si disi.”
Den wortoe disi e sori taki wan okasi de foe tan libi pasa a moro bigi rampoe disi di sa kon na tapoe a libisma famiri. Gado gi wi wan okasi foe froekisi. Den wortoe di Moses ben gebroiki foe froemane den Israèlsma di den ben sreka densrefi foe go na ini a Pramisi Kondre, e fiti so srefi gi wi na ini a ten disi: „Mi poti libi nanga dede na joe fesi, blesi nanga floekoe; èn joe moesoe froekisi libi so taki joe kan tan na libi, joe nanga joe bakapikin” (Deuteronomium 30:19). Ma fa wan sma e „froekisi libi” èn kan kisi froeloesoe? San troetroe froeloesoe wani taki troetroe?
[Sma di abi a reti foe a prenki na tapoe a kafti]
KAFTI: Wan bom di soetoe: Copyright © Gene Blevins/Los Angeles Daily News
[Sma di abi a reti foe a prenki na tapoe bladzijde 3]
Yunhap News Agency/Sipa Press