Tan na ai ini a „ten foe a kaba”
„Tan loekoe, tan na ai, foe di joe no sabi oten a fasti ten de.” — MARKUS 13:33.
1. San wi moesoe doe ala di span sani e tjari kon a krin ini a „ten [disi] foe a kaba”?
FA KRESTEN moesoe doe foe di span sani e tjari a krin ini a „ten [disi] foe a kaba”? (Danièl 12:4) Den no e libi den na doengroe. Jesus Krestes ben taki foe a profeititori di ben abi foe doe nanga a marki di abi difrenti pisi èn di ben kon troe na ini a di foe twenti jarihondro disi. A ben froeteri a fesi foe den foeroe sani di ben o marki a pisi ten disi foe sensi 1914 leki wan aparti ten. Foe di Jesus ben sabi a profeititori foe Danièl di ben abi foe doe nanga „a ten foe a kaba”, meki a ben go doro nanga en eigi bigi profeititori, foe di a ben gi den disipel foe en a deki-ati foe „tan na ai”. — Lukas 21:36.
2. Foe san ede wan bigi fanowdoe de foe tan na ai na jeje fasi?
2 Foe san ede sma moesoe tan na ai? Foe di a ten disi de a moro ogri ten ini libisma historia. Efoe kresten ben sa firi foe sribi na jeje fasi ini a ten disi, dan disi ben sa kan tjari rampoe kon gi den. Efoe wi ben sa de satisferi nanga a fasi fa wi de noso e hebi na ati nanga den broko-ede foe a libi, dan wi ben sa de na ini kefar. Jesus Krestes ben warskow ini Lukas 21:34, 35: „Poti prakseri na oensrefi, taki oen ati no e kon hebi noiti nanga njanjan pasa marki èn hebi dringi èn den broko-ede foe a libi, èn a dei dati no kon wantronso, ini wan momenti, na oenoe tapoe leki wan trapoe. Bika a sa kon na tapoe ala sma di e libi na a heri grontapoe.”
3, 4. (a) San Jesus ben wani taki di a ben taki, dati a dei foe Gado en atibron ben sa kon wantewante na tapoe sma „leki a trapoe”? (b) Foe di Gado no e seti trapoe gi sma, dan foe san ede a dei dati sa kon onfroewakti na tapoe sma ini algemeen?
3 Nanga boen reide Jesus ben taki, dati a dei foe Jehovah sa kon ’ini wan momenti na wi tapoe leki wan trapoe di seti’. Nofotron wan trapoe abi wan stròp, èn den e gebroiki en foe kisi fowroe èn pikin meti. A trapoe abi wan kaka, èn ibriwan sma di e waka go na ini en e hari a kaka. A trapoe e naki tapoe èn den kisi a sma. Ala disi e pasa toemoesi onfroewakti. Na a srefi fasi Jesus ben taki, dati sani sa kon onfroewakti na den sma tapoe di de inaktief na jeje fasi èn Gado „dei foe atibron” sa kon a den tapoe wantronso. — Odo 11:4.
4 Na Jehovah Gado na a wan di e seti trapoe gi sma? Nôno, a no e wakti nomo foe kisi sma onfroewakti foe pori den. Ma a dei dati sa kon wantronso a den sma ini algemeen tapoe, foe di den no e poti prakseri ini a fosi presi, tapoe a Kownoekondre foe Gado. Den e waka den eigi pasi ini a feti di den e feti na baka den afersi foe a libi, èn den no wani sabi san den sani di e pasa lontoe den, wani taki. Ma disi no e kenki a schema foe Gado. A abi en eigi fasti ten foe e seti afersi. Èn foe di a de nanga sari-ati fasi, a no e meki a libisma famiri tan sondro foe sabi foe a kroetoe foe en di e kon. — Markus 13:10.
5, 6. (a) Foe di a kroetoe e kon, dan sortoe lobi sani na Mekiman ben seti gi libisma mekisani, ma nanga sortoe bakapisi ini algemeen? (b) San wi sa go loekoe foe jepi wi foe tan na ai?
5 A warskow disi a fesi, na wan lobi seti foe a sei foe a bigi Mekiman, di abi belangstelling gi a boen foe den libisma mekisani dja tapoe en foetoestoeroe na agersi fasi (Jesaja 66:1). A e boboi den sma di e libi na a presi pe den e taki, dati den foetoe foe en e rostoe. So boen nanga jepi foe den sma foe en di e teki presi gi en na grontapoe èn den fesiman foe en, a e warskow den foe den sani di de a den fesi (2 Korentesma 5:20). Ma, awansi ala den warskow di ben gi, dan tokoe den sani dati di sa pasa sa kon netso onfroewakti tapoe a libisma famiri leki te den ben poti foetoe na ini wan trapoe. Foe san ede? Foe di moro foeroe sma e sribi na jeje fasi (1 Thesalonikasma 5:6). Soso wan pikin nomroe, te joe e teki en gersi nanga den trawan, e gi jesi na a warskow èn sa pasa libilibi go na ini Gado njoen grontapoe. — Mateus 7:13, 14.
6 Fa, dan, wi kan tan na ai ini a ten disi foe a kaba, so taki den feni wi na mindri den sma di sa kisi kibri? Jehovah e gi wi a fanowdoe jepi. Meki wi go loekoe seibi sani di wi kan doe.
Feti nanga sani di e poeroe wi prakseri
7. Sortoe warskow Jesus ben gi ini a tori foe sani di e poeroe wi prakseri?
7 Ini a fosi presi wi moesoe feti nanga sani di e poeroe wi prakseri. Jesus ben taki ini Mateus 24:42, 44: „Tan na ai foe dati ede, bikasi oenoe no sabi sortoe dei oen Masra e kon. Sori taki oenoe so srefi de klariklari, bikasi a Manpikin foe libisma e kon na wan joeroe di oenoe no e prakseri.” Den wortoe di Jesus ben gebroiki dja, e sori taki na ini a moeilek ten disi foeroe sani ben sa de di e poeroe wi prakseri, èn sani di e poeroe wi prakseri kan tjari pori leki bakapisi. Ini den dei foe Noa, foeroe sani ben de di ben teki den sma abra krinkrin. Leki wan bakapisi, dan den sma di sani ben poeroe a prakseri foe den, „no ben poti prakseri” tapoe san ben e pasa, èn a Froedoe ben figi den alamala poeroe. Na a srefi fasi Jesus ben warskow: „Na so a denoja foe a Manpikin foe libisma sa de”. — Mateus 24:37-39.
8, 9. (a) Fa den normaal fanowdoe foe a libi kan poeroe wi prakseri na wan kefarlekfasi? (b) Sortoe warskow Paulus nanga Jesus ben gi wi?
8 Hori na prakseri toe, taki na ini a warskow foe en na Lukas 21:34, 35, Jesus ben e taki foe den gewoon afersi foe libi, so leki njanjan, dringi èn a broko di sma e broko den ede foe wroko foe moni. Den sani disi, na sani di ala sma sabi, so srefi den disipel foe Masra Jesus. (Teki gersi Markus 6:31.) Foe densrefi den sani disi no abi foe de ogri, ma efoe wi e gi den pasi, dan den kan poeroe a prakseri foe wi, den kan teki wi abra krinkrin, èn na so fasi den kan meki wi fadon go na ini wan kefarlek firi foe sribi na jeje fasi.
9 Foe dati ede, no meki wi misi foe doe a moro prenspari sani — a meki di wi moesoe meki Gado feni wi boen. Na presi foe den sortoe sani disi teki wi heri libi, meki wi gebroiki den soso na wan marki di skotoe èn di de fanowdoe foe horibaka gi wi (Filipisma 3:8). Den no moesoe poesoe Kownoekondre afersi poti na wan sei. So leki fa Romesma 14:17 e taki, dan „a kownoekondroe foe Gado no wani taki njanjan èn dringi, ma a wani taki regtfardikifasi èn vrede èn prisiri nanga santa jeje”. Prakseri den wortoe foe Jesus di a ben taki: „Tan soekoe dan fosi a kownoekondre nanga en regtfardikifasi èn ala den tra sani disi den sa gi oenoe a tapoe” (Mateus 6:33). Moro fara Jesus ben froeklari na Lukas 9:62: „No wan sma di poti en anoe na wan proegoe èn e loekoe na den sani di de na en baka, fiti boen gi a kownoekondre foe Gado.”
10. Sortoe kefar de efoe wi no e tan hori wi ai loekoe langalanga go na a marki na wi fesi?
10 Efoe wi bigin foe proegoe, te wi e taki en na agersifasi, dan wi moesoe tan hori wan leti-opoe lin. Wan sma di e proegoe èn di e loekoe go a baka, no sa koti a gron opo leti-opoe. Sani poeroe en prakseri èn wan toe sani di de na pasi kan meki a go makriki na wan seipasi noso kan meki a stòp. Wi no moesoe de leki a wefi foe Lot, di ben loekoe go na baka èn di noiti ben kisi kibri. Wi moesoe tan hori wi ai e loekoe langalanga go a fesi na a marki. Foe doe dati wi moesoe feti nanga sani di e poeroe wi prakseri. — Genesis 19: 17, 26; Lukas 17:32.
Begi na ala serjoesoe fasi
11. San Jesus ben tjari kon a krin baka di a ben warskow wi foe a kefar foe sani di e poeroe wi prakseri?
11 Ma moro sani de, di wi kan doe foe tan na ai. Wan di foe toe prenspari sani na: Begi na ala serjoesoe fasi. Baka di Jesus e warskow wi gi a kefar foe a poeroe di sani e poeroe wi prakseri, foe di wi e feti na baka den aladei sani foe a libi, a ben gi a rai disi: „Tan foe dati ede na ai, seni ala ten tranga begi taki oenoe sa man foe lon gi ala den sani disi di de foe pasa èn foe tanapoe na fesi a Manpikin foe libisma.” — Lukas 21:36.
12. Sortoe fasi foe begi de fanowdoe, èn nanga sortoe bakapisi?
12 Foe dati ede seni doronomo tranga begi di abi foe doe nanga a kefar foe a situwâsi pe wi de na ini èn a fanowdoe foe wi de na ai. So boen meki wi nanga ala di wi e begi, go na Gado nanga serjoesoe tranga begi. Paulus e taki na Romesma 12:12: „Horidoro ini begi.” Èn na ini Efeisesma 6:18 wi e leisi: „Nanga ibri sortoe foe begi, nanga tranga begi . . . oen tan begi ini jeje na ibri okasi. Èn tan foe dati ede na ai nanga ala fasi foe horidoro.” Disi no de soso wan kefal foe tjari begi neleki a ben de wan afersi foe wawan leisi nomo di no abi bigi bakapisi. Wi heri libi de ini kefar. Foe dati ede wi moesoe aksi jepi foe Gado na wan serjoesoefasi. (Teki gersi Hebrewsma 5:7.) Na a fasi dati wi sa tan na a sei foe Jehovah. No wan sani sa moro boen foe jepi wi foe doro a marki disi, dan foe wi ’seni ala ten tranga begi.’ Dan Jehovah sa tan jepi wi foe man hori boen na ai pe na owroe grontapoe disi e go. O prenspari a de foe dati ede foe horidoro ini begi!
Tan krosibei na a organisâsi foe Gado èn a wroko foe na organisâsi
13. Sortoe demakandra de fanowdoe foe tan na ai?
13 Wi wani foe lon gi ala den sani disi di sa kon na tapoe grontapoe. Wi wani tanapoe na fesi a Manpikin foe libisma, foe a feni wi boen. Foe dati ede wan di foe dri sani de di wi kan doe: Hori fasti na a theokrasia organisâsi foe Jehovah. Sondro foe wi hori wan sani na baka, wi moesoe kon moksi wisrefi nanga na organisâsi foe Jehovah èn teki prati na den wroko di a e doe. Na a fasi disi, wi sa meki sma kon sabi wi sondro degedege leki kresten di de na ai.
14, 15. (a) Foe abi prati na ini sortoe wroko sa jepi wi foe tan na ai? (b) Soema e bepaal oten a preikiwroko kaba, èn fa wi moesoe firi foe a preikiwroko disi? (c) San wi sa si krin baka a bigi banawtoe te wi e loekoe baka na a Kownoekondre preikiwroko di ben doe?
14 Wan di foe fo sani di kan jepi wi foe tan na ai abi foeroe foe doe nanga disi: Wi moesoe de na mindri den sma di e warskow sma foe a kaba di e kon foe a seti foe sani disi. A krinkrin kaba foe na owroe seti foe sani disi no sa feni presi te leki „a boen njoensoe disi foe a kownoekondre” preiki na a heri grontapoe, so leki fa Gado abi na prakseri (Mateus 24:14). Jehovah Kotoigi a no den sma di e bosroiti oten a preikiwroko kon na wan kaba. Jehovah e hori a reti dati gi ensrefi (Markus 13:32, 33). Ma wi abi a fasti bosroiti foe wroko so tranga leki wi man èn so langa leki a de fanowdoe, foe preiki foe a moro boen tirimakti di a libisma famiri ben kan abi, a Kownoekondre foe Gado. A bigin foe a „bigi banawtoe” sa kon ala di wi e doe a wroko disi ete (Mateus 24:21). Na ini ala a ten di moesoe kon ete, den sma di kisi kibri sa man foe loekoe na baka èn sa taki nanga den heri ati taki Jesus Krestes no ben de wan falsi profeiti (Openbaring 19:11). A preikiwroko sa doe na wan marki di moro bigi krinkrin leki san den sma, di e teki prati na ini, ben froewakti.
15 Foe dati ede, na a toemoesi prenspari ten te a wroko disi sa kon na wan kaba so leki fa Gado feni en boen, dan moro sma sa teki prati na a preikiwroko leki na iniwan ten na fesi! Fa wi sa de grantangi foe ben abi wan prati na a bigi wroko disi! Na apostel Petrus e gi wi a djaranti taki Jehovah „no wani taki wan sma go lasi, ma a wani taki ala sma kon kisi berow” (2 Petrus 3:9). Doronomo a wroko krakti foe na Almakti Gado e wroko moro tranga ini a ten disi leki wan ten èn den Kotoigi foe Jehovah wani foe go doro nanga a wroko disi di a jeje e poesoe go na fesi. Tan foe dati ede krosibei na a organisâsi foe Jehovah, èn tan wroko ini a poebliki diniwroko foe na organisâsi. Disi sa de wan jepi ini a tan di wi e tan na ai.
Go ondroesoekoe joesrefi
16. Foe san ede wi moesoe go ondrosoekoe wisrefi fa wi situwâsi na jeje fasi de now?
16 Wan di foe feifi sani de di wi kan doe foe tan na ai. Leki aparti sma, wi moesoe go ondrosoekoe wisrefi, fa wi situwâsi de now. Disi e fiti now, moro leki wan ten na fesi . Wi moesoe sori na soema sei wi e tanapoe sondro foe degedege. Na Galasiasma 6:4 Paulus e taki: „Meki ibriwan foe wi sori san na en eigi wroko.” Go ondrosoekoe joesrefi ini akroederi nanga den wortoe foe Paulus na 1 Tesalonikasma 5:6-8: „Meki wi no sribi go doro so leki den trawan, ma meki wi tan na ai èn hori wi prakseri na wán. Bika den di e sribi, gwenti foe sribi na neti, èn den di kon droengoe, droengoe moro foeroe na neti. Ma wi di, de foe a dei, meki wi hori wi prakseri na wán, èn abi a borstoewapoe foe bribi nanga lobi èn leki wan fetimoesoe na howpoe foe froeloesoe.”
17. Sortoe aksi wi moesoe poti gi wisrefi, te wi e go ondrosoekoe wisrefi?
17 Fa a de nanga wi? Te wi e ondrosoekoe wisrefi ini a leti foe den Boekoe, wi e si taki wi e tan de na ai, èn abi leki wan fetimoesoe a howpoe foe froeloesoe? Wi na sma di prati wisrefi krinkrin foe na owroe seti foe sani disi èn no e anga moro langa na den prakseri foe en? Wi abi troetroe a jeje foe a njoen seti foe sani foe Gado? Wi sabi dorodoro pe a seti foe sani disi e go? Efoe dati de so, dan a dei foe Jehovah no sa kon na wi tapoe neleki wi ben de foefoeroeman. — 1 Tesalonikasma 5:4.
18. Sortoe tra aksi kan de fanowdoe foe poti gi wisrefi èn nanga sortoe bakapisi?
18 Ma san dan efoe a ondrosoekoe di wi e ondrosoekoe wisrefi e tjari kon a krin taki wi e feti na baka foe abi wan switi, prisiri, boen, èn makriki fasi foe libi? San efoe wi kon si taki den jeje ai foe wi kon so hebi foe sribi ede? A de so taki wi de ini wan situwâsi di gersi wan dren, èn e feti baka wan toe dren foe grontapoe? Efoe disi de so, dan meki wi wiki! — 1 Korentesma 15:34.
Go prakseri dipi foe profeititori di ben kon troe
19. San na wan toe foe den profeititori di wi ben si e kontroe?
19 Now wi doro na wan di foe siksi sani di sa jepi wi foe tan na ai: Go prakseri dipi foe den foeroe profeititori di ben kon troe ini a ten disi foe a kaba. Wi pasa 77 jari kaba sensi den fasti ten foe den nâsi ben kon na wan kaba na ini 1914. Te wi e loekoe den dri foe den fo pisi foe wan jarihondro, dan wi kan si fa a wan profeititori baka a trawan ben kon troe — na poti di den poti a troe anbegi boen baka na en presi; a froeloesoe foe a salfoe fikapisi, makandra nanga den kompe foe den, go na ini wan paradijs na jeje fasi; a preiki foe a boen njoensoe foe a Kownoekondre na a heri grontapoe èn a kon foe si foe a bigi ipi (Jesaja 2:2, 3; kapitel 35; Sakaria 8:23; Mateus 24:14; Openbaring 7:9). Jehovah bigi nen èn universeel soevereiniteit ben kisi glori èn so srefi wan gro foe a pikinwan foe kon tron wan doesoen èn a mendriwan, foe kon tron wan makti nâsi, foe di Jehovah e meki a e go moro esi te na ten kisi (Jesaja 60:22; Esekièl 38:23). Èn den fisjoen foe na apostel Johanes ini a tori foe Openbaring e doro now a heimarki foe den.
20. Na ini sortoe meki bekènti Jehovah Kotoigi abi prati èn san den ben boeweisi foe de te foe kaba?
20 Foe dati ede, moro leki wan ten a fesi, Jehovah Kotoigi abi a fasti overtoigi taki den abi leti nanga a froestan di den kon froestan san den grontapoe afersi foe sensi 1914, wani taki. Foe di den abi so wan overtoigi, meki den ben sori taki den de boen wrokosani ini na anoe foe a Moro Hei Gado. Den na den sma di troetroe ben kisi a wroko foe tjari a boskopoe di komoto na Gado, na a toemoesi prenspari ten disi (Romesma 10:15, 18). Ija, den wortoe foe Jehovah gi a ten foe a kaba kon troe (Jesaja 55:11). Na a tra sei, disi moesoe poesoe wi foe go doro te leki wi si a lasti kontroe foe ala den pramisi foe Gado nanga jepi foe Jesus Krestes.
Froeloesoe moro krosibei leki di wi ben tron bribiman
21. Sortoe di foe seibi jepisani, foe tan na ai na jeje fasi, wi abi?
21 Leki lastiwan, a di foe seibi jepisani foe meki wi tan na ai: Tan hori na prakseri ala ten taki a froeloesoe foe wi de moro krosibei leki di wi ben tron bribiman no so langa pasa. Moro prenspari, a kon regtfardiki foe na universeel soevereiniteit foe Jehovah èn na kon santa foe en nen de moro krosibei srefisrefi. Foe dati a fanowdoe foe tan na ai de moro prenspari leki wan ten. Na apostel Paulus e skrifi: „Oenoe sabi a joisti ten, taki a joeroe doro kaba di oenoe moesoe wiki foe sribi, bika now a froeloesoe foe wi de moro krosibei leki di wi ben tron bribiman. Neti pasa moi kaba; dei kon krosibei.” — Romesma 13:11, 12.
22. Fa na de di a froeloesoe foe wi de krosibei moesoe abi krakti a wi tapoe?
22 Nanga a froeloesoe foe wi so krosibei srefisrefi, wi moesoe tan na ai! Wi no moesoe meki no wan persoonlijk noso grontapoe afersi de moro prenspari leki a warderi foe wi gi san Jehovah e doe gi a pipel foe en na ini a ten disi foe a kaba (Danièl 12:3). Wi moesoe sori moro horidoro leki wan ten, so taki wi no drai wisrefi poeroe foe a pasi di a Wortoe foe Gado e taki krin gi wi taki wi moesoe waka (Mateus 13:22). A boeweisi e sori krin taki a grontapoe disi de na ini en lasti dei. Heri esi den sa figi en poeroe foe meki presi gi wan njoen grontapoe foe regtfardikifasi. — 2 Petrus 3:13.
23. Na sortoe fasi Jehovah sa jepi wi, èn nanga sortoe blesi bakapisi?
23 Meki wi foe dati ede tan de na ai. Hori na prakseri leki noiti a fesi, pe wi de ini a lon foe a ten. Hori na prakseri, taki ini a tori disi, Jehovah no sa fadon a sribi noiti. Na presi foe dati, a sa jepi wi ala ten foe tan de na ai ini a ten disi foe a kaba. Neti pasa moi kaba. Dei e kon krosibei. Foe dati ede tan na ai! Heri esi wi sa ondrofeni a moro moi wan foe ala den dei, foe di Jehovah Mesian Kownoekondre e meki en pramisi di abi foe doe nanga grontapoe kon troe. — Openbaring 21:4, 5!
San na den piki foe joe?
◻ San Jesus ben wani taki di a ben taki, dati Gado dei foe atibron ben sa kon na tapoe sma „leki wan trapoe”?
◻ Foe san ede wi moesoe feti nanga a poeroe di sani e poeroe wi prakseri, èn fa wi kan doe disi?
◻ Sortoe fasi foe begi de fanowdoe, so taki wi kan tan de na ai?
◻ Sortoe demakandra de prenspari?
◻ Foe san ede wi moesoe foe go ondrosoekoe fa wi situwâsi na jeje fasi de?
◻ Sortoe ròl profeititori e plèi ini a tan di wi e tan de na ai?