Wi e tan na ai—E wai pasi gi sani di e poeroe wi prakseri?
1 Jesus ben gi wan warskow: „Tan na ai, . . . taki oenoe kan pasa” den rampoe di ben sa kon seiker (Luk. 21:36). Wi e libi na ini a moro kefarlek ten na ini a historia foe libisma. Rampoe e wakti den sma di e meki taki sani meki den djonko na jejefasi. Disi e tjari wan kefar kon gi ibriwan foe wi. Jesus ben kari njan, dringi, nanga den broko-ede foe na aladei libi. Foe san ede Jesus ben kari den sani disi? Bikasi srefi den sani disi ben kan teki ala prakseri foe wi, ben kan tron sani di e poeroe wi prakseri èn na so wan fasi den ben kan meki wi bigin djonko na jejefasi, èn dati ben kan de wan kefar gi wi.
2 Gewoon sani di e poeroe wi prakseri: Son sma ben gi ala foe den gi ontspanning di no boen srefisrefi, èn den e tron srafoe foe telefisi srefi. A no de foe taki, dati foe soekoe fosi a Kownoekondre no wani taki, dati wi moesoe wai pasi gi ala sortoe foe ontspanning. Te wi de reidelek èn te wi de bescheiden, dan ontspanning kan de wan sani di e gi wi winimarki. (Teki gersi 1 Timoteus 4:8.) Ma a kan de wan sani di e poeroe wi prakseri, te wi e meki en tron wan toemoesi prenspari sani na ini wi libi, èn te a e teki foeroe foe wi ten, den sani di wi abi, noso a prati di wi abi na ini a Kownoekondre preikiwroko.
3 Wan tra gewoon sani di e poeroe wi prakseri èn di e meki sma djonko na jejefasi, na a wani di sma wani abi materia goedoe di no de fanowdoe. Disi e aksi taki wan sma moesoe gi moro ten na a grontapoe wroko foe en èn taki a sma no e feti fajafaja moro na baka jeje afersi. Son wan no man si marki na jejefasi moro, foe di den kon abi so foeroe foe doe foe kisi moro materia goedoe, so taki den kan doro wan moro switi fasi foe libi. Ala di wi abi „njanjan, krosi nanga wan tanpresi” fanowdoe, tokoe wi moesoe de na ai foe no kweki wan lobi gi moni, bika dati kan meki wi lasi wi bribi (1 Tim. 6:8-10). Foe di wi no e tan hori wi ai na tapoe Kownoekondre afersi, dati meki wi ben kan kisi wan mi-no-ke fasi ini a sorgoe di wi moesoe sorgoe gi den jeje sani di wi osofamiri abi fanowdoe, èn wi ben kan misi foe doe wi diniwroko.—1 Tim. 5:8; 2 Tim. 4:5.
4 Ete trawan e meki den ’ati e kon hebi nanga den broko-ede foe a libi’ teleki den doro a penti taki den e fadon na sribi na jejefasi (Luk. 21:34). Son tron, sma e broko den ede nanga den problema di den abi nanga a gosontoe foe den, noso sani na ini na osofamiri di e broko den saka. Ma den sortoe persoonlijk broko-ede disi, no moesoe meki wi tapoe a sabi di wi sabi taki a kaba foe a seti foe sani disi e kon krosibei esi-esi.—Mark. 13:33.
5 No wan tra sani ben sa plisi Didibri moro dan foe meki wi dren, taki wi e feti na baka wan sortoe foe grontapoe fantasia. Wi moesoe strei foe tan na ai na jejefasi. Wi sabi taki ’Jehovah en dei e kon leki wan foefoeroeman’, èn a de prenspari taki wi „tan na ai èn hori wi prakseri na wán” (1 Tes. 5:2, 6). Efoe wi e si marki di e sori taki wi e djonko, dan a de tranga fanowdoe taki wi „poeroe den wroko di de foe a doengroe”.—Rom. 13:11-13.
6 Jepisani di kan jepi wi foe tan na ai: San na den jepisani disi? A de prenspari foe begi. Wi moesoe begi doronomo (1 Tes. 5:17). Efoe wi e tan waka skinskin nanga a kresten gemeente, dan dati sa ’gi wi tranga foe sori lobi èn foe doe toemoesi boen wroko’ (Hebr. 10:24). Efoe wi e ondrosoekoe wisrefi doronomo èn na wan eerlijkfasi, dan dati kan jepi wi foe tan na ai gi a de di a de fanowdoe foe wini den swakifasi foe wi (2 Kor. 13:5). Wan boen gwenti foe persoonlijk studie sa jepi wi „foe teki den wortoe foe bribi leki njanjan” (1 Tim. 4:6). Efoe wi de fajafaja, dan wi kan abi na overtoigi taki wi sa man wai pasi gi sani di e poeroe wi prakseri, ’tan na ai, èn tan tanapoe kankan na ini bribi’.—1 Kor. 16:13.