Dini Jehovah sondro foe meki tra sani poeroe joe prakseri
1 „Kolokoe a pipel di abi Jehovah leki Gado!” (Ps. 144:15) Den wortoe disi foe Kownoe David de troe ete, srefi ini den ogri dei disi? (Ef. 5:16) Ija! Kresten e feni prisiri ete ini a dini foe Jehovah. Sani no de makriki gi wi ala ten. Satan e tjari problema kon gi wi ini den „tranga ten” disi, ma tokoe wi no lasi-ati (2 Tim. 3:1, 2). Den situwâsi di e kon moro ogri, na moro boeweisi taki a ten de krosibei gi Gado Kownoekondre foe figi poeroe na owroe grontapoe disi di e go na baka èn foe poti wan krin njoen grontapoe na ini en presi (2 Petr. 3:13). A doengroe foe a grontapoe disi no e meki a faja foe wi kolokoe howpoe kon dòf noso e kiri en; na presi foe dati, a Kownoekondre howpoe foe wi e skèin moro krin leki ini wan ten. Joe no breiti foe dini Jehovah leki wan tjariman foe leti ini a doengroe grontapoe disi? — Fil. 2:15.
2 Leki sma, wi moesoe loekoe boen doronomo fa wi e dini Jehovah. Foe san ede? Bika Satan na wan Sma di de heri boen ini a poeroe di a e poeroe sma prakseri. Wan wortoeboekoe e taki foe „poeroe sma prakseri” leki „drai poeroe”, „hari noso tjari (wan sma prakseri) go na wan tra sani noso na difrenti sei na a srefi ten”, èn „soetoe faja noso broeja nanga jepi foe firi noso motief di de kontrari makandra”. Sensi den ben fringi Satan kon na a grontapoe disi, a ben man foe „kori” a libisma famiri. A e gebroiki foeroe triki sani foe drai a prakseri foe libisma gowe foe den troe afersi foe a ten foe wi (Openb. 12:9). Ala di Kotoigi foe Jehovah ben doe moeiti foe preiki a Kownoekondre ini den hondro jari di pasa, dan omeni sma e warderi den moro prenspari afersi foe a santa di a nen foe Gado moesoe santa èn a regtfardiki foe a reti di a abi foe tiri nanga jepi foe Gado Kownoekondre? Efoe joe agersi omeni, dan a no de foeroe (1 Joh. 5:19). Efoe Satan man poeroe a prakseri foe miljardmiljard sma na a grontapoe disi, dan a kefar di de ala ten, na dati a kan poeroe a prakseri foe wi, noso hari wi prakseri so taki wi e drai wi baka gi a diniwroko foe Jehovah. A de wan sari sani taki wan toe foe wi brada kon broeja foe den sani di Satan e gebroiki foe poeroe wi prakseri. Den gi pasi meki sani hari den prakseri go na difrenti sei. Ini a ten disi foeroe sortoe sani de di e poeroe wi prakseri. Loekoe wan toe foe den nomo.
3 Ekonomia problema èn lobi gi sani na skin fasi: Ini moro foeroe kondre na grontapoe, a feni di wan sma no man feni wroko èn den hei prijs foe sani foe tan na libi e tjari broko-ede kon. A de troe, wi moesoe sorgoe gi njanjan, krosi, nanga tanpresi gi wisrefi nanga gi wi osofamiri. Ma efoe wi e gi pasi meki wi e broko wi ede toemoesi nanga den sani di wi abi fanowdoe ini a libi, dan den sorgoe disi sa de ini wi prakseri nomonomo. Foe tan na libi na skinfasi kan kon tron a moro prenspari sani ini libi, na presi foe wi e hori baka gi Kownoekondre afersi. Na apostel Paulus ben gi rai ini a tori disi na Hebrewsma 13:5, 6. Jesus Krestes e gi wi a djaranti, taki denwan di e soekoe a Kownoekondre fosi, no abi foe broko den ede; Jehovah e sorgoe gi den sani di wi abi troetroe fanowdoe (Mat. 6:25-34). Den pionier nanga tra foeroeten dinari na heri grontapoe kan taki dati disi de troe.
4 A grontapoe foe Satan e gi deki-ati foe lobi sani na skinfasi. Foe kisi moro goedoe noso foe kibri den, na a krakti di e poesoe ini a libi foe miljoenmiljoen sma. Den srefi sani disi di e poeroe sma prakseri, ben de ini den dei foe Jesus. Wan jongoe goedoe tiriman ben aksi Jesus san a ben moesoe doe foe kisi têgo libi. Jesus ben piki en: „Efoe joe wani de volmaakti [noso, boen doronomo], dan go seri den sani di joe abi èn gi na den pôtiwan èn joe sa abi goedoe na ini hemel, èn kon, tron mi bakaman” (Mat. 19:16-23). A de krin taki, den foeroe sani na skinfasi di a jonkoeman disi ben abi, ben poeroe a prakseri foe en foe dini Jehovah nanga en heri ati. En ati ben drai go na den goedoe foe en. Jesus ben sabi taki a jonkoeman ben o kisi wini, efoe a ben poeroe den hebi disi di ben poeroe en prakseri. Den sani ben hori en na baka foe de boen dorodoro ini a gi di a ben gi ensrefi na Gado. Fa a de nanga joe? Joe e gi moro ten na grontapoe wroko soso foe tan libi na a fasi di joe gwenti? A de so taki disi ben abi krakti tapoe a diniwroko foe joe gi Jehovah? Den sani na skinfasi di joe abi e teki so foeroe ten nanga krakti foe joe, so taki noti e tan abra gi Kownoekondre afersi? (Mat. 6:24) Joe kan meki a libi foe joe kon moro eenvoudig, foe gi moro ten na jeje afersi?
5 Den normaal afersi foe na aladei libi: Efoe wi no e loekoe boen, dan den normaal afersi foe a libi kan teki so foeroe ten foe wi, taki wi no e ke moro nanga den sani na jeje fasi di wi moesoe feti na baka. Prakseri foe den sma ini den dei foe Noa. Den ben abi so foeroe foe doe nanga afersi foe a libimakandra, njanjan nanga dringi, trow èn meki den pikin foe den trow, so taki den no ben poti prakseri tapoe a warskow foe Noa gi a Froedoe di ben de krosibei. Bifo den ben kisi den srefi, a Froedoe ben kon èn a ben figi den alamala poeroe. Den sani di ben poeroe den prakseri ben tjari pori gi den. Jesus ben taki: „Na so a denoja foe a Manpikin foe libisma sa de” (Mat. 24:37-39). Foe troe, moro foeroe sma ini a ten disi abi toemoesi foeroe foe doe nanga den eigi libi, taki den no man poti prakseri tapoe a warskow boskopoe di wi e tjari gi den. Den e sori wan mi-no-ke fasi srefisrefi gi jeje afersi.
6 A de so taki wroko di abi foe doe nanga a libisma libimakandra e teki so foeroe ten ini joe libi, so dati jeje afersi e kisi moro nanga moro mendri prakseri? Na wán okasi, Jesus ben kisi wan kari foe fisiti Marta nanga Maria ini den oso. Maria ben arki boen na san Jesus ben abi foe taki. Na tra sei, Marta ben meki taki „foeroe wroko di a ben abi foe doe, ben poeroe en prakseri”. Marta ben broko en ede toemoesi foe de wan boen ososma gi a fisitiman. A no ben froestan a fanowdoe foe gi ten foe arki Jesus. Na wan switi fasi Jesus ben sori Marta taki a no ben de fanowdoe foe sorgoe gi sani nanga foeroe moeiti; wi moesoe poti moro prakseri tapoe jeje afersi. A de fanowdoe taki joe e fiti a rai dati ini joe libi? (Luk. 10:38-42) Jesus ben warskow toe taki wi moesoe poti prakseri tapoe wisrefi so taki wi no e njan pasa marki èn dringi hebi, èn na so fasi e meki a froestan foe wi e kon lesi. Na ini a toemoesi moeilek joeroe disi foe a libisma historia, wi moesoe tan na ai dorodoro. — Luk. 21:34-36.
7 A feti na baka prisiri: Wan foe den moro bigi sani di Satan e gebroiki foe poeroe wi prakseri foe a Kownoekondre afersi, na a feti baka prisiri. Miljoenmiljoen sma ini krestenhèit poti prisiri ini a presi foe Gado. Den e froekisi foe kisi prisiri foe wan sani di e poeroe den prakseri, na presi foe den abi serjoesoe belangstelling gi a Wortoe foe Gado (2 Tim. 3:4). A no de foe taki, dati boen ontspanning nanga prisiriten srefi no fowtoe. Ma, foe gi ten pasa marki ibri wiki na sani so leki telefisi, kino, video, sport, grontapoe boekoe, noso hobby, kan gi pasi foe kweki wan bedrigi ati èn hari wi poeroe foe Jehovah (Jer. 17:9; Heb. 3:12). Fa dati kan pasa? Na a ten foe den kresten konmakandra kande joe e si taki joe e prakseri tra sani; kande joe e winsi srefi taki a konmakandra ben sa kaba, so dati joe kan go baka foe feti baka prisiri. Heri esi joe e soekoe reide foe tan na oso na presi foe fisiti konmakandra noso foe teki prati ini a velddienst. Now na a ten foe kon sabi krin efoe den sani disi di sma e feti na den baka, kon tron sani ini joe libi di e poeroe joe prakseri (Luk. 8:14). Joe no ben kan gebroiki wan toe foe den prenspari joeroe di joe e gebroiki gi ontspanning, foe gro na jeje fasi?
8 Mendri prenspari afersi di e njan ten: Son sma gi foeroe ten foe doe moeiti foe loesoe den aladei problema ini a disiten libimakandra. Kresten moesoe tan fara foe abi foe doe nanga den hari-taki foe grontapoe di no abi wan kaba, di abi foe doe nanga afersi foe a libimakandra noso a feti di den e feti foe soso foe tjari geregtighèit (Joh. 17:16). Ala den sani disi na sani di Satan meki foe poeroe wi prakseri foe a rai foe bijbel nanga a prenspari troe tori, taki soso wán loesoe de gi wan langa pisi ten — a Kownoekondre foe Gado. Efoe wi pina foe di wan sma doe wi ogri noso foe di wan sma no handri na wan regtfardiki fasi nanga wi, dan wi moesoe loekoe boen foe no teki refensi noso kisi firi foe broeja na so wan fasi, taki wi e frigiti soema wi de — Kotoigi foe Jehovah. San de moro prenspari, na Jehovah den ben doe ogri, èn na en nen wi moesoe santa. — Jes. 43:10-12; Mat. 6:9.
9 Ala di ala sma wani wan boen gosontoe, tokoe, foe poti prakseri pasa marki na tapoe den leri nanga loesoe di den e pristeri di gersi taki den no abi wan kaba, kan meki wan sma e gi ten pasa marki gi afersi di abi foe doe nanga gosontoe. Foeroe sma de di e horibaka gi difrenti fasi ini a tori foe njan, a fasi fa foe handri, èn fa foe dresi problema na skin fasi nanga na emotioneel fasi, di foeroe foe den de kontrari makandra. San wan sma e doe ini afersi foe gosontoe, na wan bosroiti di ensrefi moesoe teki, ma a no moesoe de kontrari den gronprakseri foe bijbel. Meki wi tan poti wi heri froetrow tapoe a Kownoekondre foe Gado leki a troe dresi gi den siki foe a libisma famiri. — Jes. 33:24; Openb. 21:3, 4.
10 Kon de stanfaste, sondro foe seki: Foe di a kaba e kon krosibei, Satan sa doe moro moeiti foe poeroe joe prakseri foe a dini foe Jehovah. „Kakafoetoe gi en, tranga ini a bribi” (1 Petr. 5:9). Fa? Joe moesoe teki den prakseri foe Gado leki njanjan (Mat. 4:4). No meki den sani foe a grontapoe disi, di e poeroe sma prakseri, foefoeroe a ten foe joe nanga foe joe osofamiri, di joe abi fanowdoe foe denki dipi foe a Wortoe foe Gado. Te na osofamiri e njan, taki makandra dan foe ondrofenitori di e gi deki-ati èn foe tra jeje afersi. Tan hori na wan fasti schema gi persoonlijk studie nanga gi a sreka di joe e sreka gi den konmakandra.
11 Te a kefar de taki den broko-ede e broeja joe prakseri, dan trowe joe hebi tapoe Jehovah ini begi. De seiker taki en e broko en ede nanga joe (1 Petr. 5:7). Meki a vrede foe Gado kibri joe ati nanga a krakti foe joe froestan (Fil. 4:6, 7). No meki den sani di e poeroe sma prakseri, meki taki a fasi fa joe e si sani na jeje fasi no de krin moro. Hori Jehovah doronomo na joe fesi so leki fa Jesus ben doe (Tori. 2:25). Hori a fasi fa joe e si sani langalanga na tapoe a marki foe joe, so leki fa Odo 4:25-27 e gi wi deki-ati: „Den ai foe joe, langalanga na fesi den moesoe loekoe go, ija, den eigi brenki ai foe joe moesoe loekoe nanga ala prakseri go na fesi foe joe. Grati a pasi foe joe foetoe, èn meki ala den pasi foe joe poti steifi. No wai go na joe reti-anoesei noso na joe kroektoe-anoesei.”
12 Fisiti ala den konmakandra na wan getrow fasi, èn gi joesrefi tranga leri so taki joe e poti prakseri tapoe den leri di komoto na Gado Wortoe (Heb. 2:1; 10:24, 25). Èn na presi foe soekoe prisiri, di a grontapoe disi di lobi prisiri nomo e pristeri, meki a tron a marki foe joe foe tan hori wan diniwroko di e gi froktoe. Disi na san e tjari têgo prisiri nanga satisfaksi kon (1 Tes. 2:19, 20). Leki lasti, no meki nowan sani noso nowan sma poeroe joe prakseri foe joe santa diniwroko. „Kon de stanfaste, sondro foe seki, ala ten abi foeroe foe doe na ini a wroko foe Masra, sabi taki joe wroko no de foe soso na ini Masra.” — 1 Kor. 15:58.