„Un musu de srekasreka”
1 Na ini a tumusi aparti profeititori di ben abi fu du nanga a kaba fu a seti fu sani disi, Yesus ben warskow fu no poti prakseri doronomo na den broko-ede fu na aladei libi disi (Mat. 24:36-39; Luk. 21:34, 35). Fu di a bigi banawtu kan kon ibri momenti, meki a de tranga fanowdu fu poti prakseri na a warskow fu Yesus: „Un musu de srekasreka tu, bika a Manpikin fu libisma o kon na wan yuru di unu no ben prakseri” (Mat. 24:44). San kan yepi wi ini a tori disi?
2 Feti teige den broko-ede nanga tra sani di kan bruya wi: Wan fu den trapu na yeye fasi nanga san wi musu luku bun na „den broko-ede fu a libi” (Luk. 21:34, futuwortu). Na ini son kondre a tranga fu feni den sani di wan sma abi fanowdu fu man tan na libi fu di sma e pina, fu di sma no man feni wroko, èn fu di ala sani diri. Na ini tra kondre, a de wan aladei sani fu kisi materia gudu. Efu wi e bigin broko wi ede tumusi furu nanga materia gudu, dan a kan pasa taki wi no e si moro o prenspari Kownukondre afersi de (Mat. 6:19-24, 31-33). Den Kresten konmakandra e yepi wi fu tan si o prenspari Kownukondre afersi de. A de a marki fu yu fu go na ala den konmakandra?—Hebr. 10:24, 25.
3 A grontapu fu tide lai nanga sani di kan hari un prakseri èn di kan nyan wi ten. A computer kan de leki wan trapu te wan sma e go furu tapu na internet fu leisi èn fu seni E-mail gi sma, noso fu prei computer games. Wi kan lasi furu ten tu fu luku telefisi, felem, fu du sani di wi lobi, fu leisi buku fu grontapu, èn fu du sport. Ala den sani disi e meki wi no abi furu ten noso krakti moro gi yeye afersi. Aladi prisiriten nanga wan ten fu rostu kan meki wi kisi krakti baka fu wan pisi ten, toku a studeri di wi e studeri Bijbel nanga wisrefi èn nanga na osofamiri e tyari wini kon di de fu têgo (1 Tim. 4:7, 8). Yu e bai ten gi yusrefi fu denki dipi fu Gado Wortu aladei?—Ef. 5:15-17.
4 Wi kan de nanga tangi na ati taki na organisâsi fu Yehovah sreka wan programa di e gi wi rai fu yepi wi fu „pasa ala den sani disi di sa feni presi seiker, èn fu tanapu na fesi a Manpikin fu libisma”! (Luk. 21:36) Meki wi gebroiki a yeye programa disi bun èn ’meki wi de srekasreka’ so taki a bribi fu wi ’kan kon de wan sani di sa meki wi kisi prèise nanga glori nanga grani te Yesus Krestes o sori ensrefi.’—1 Petr. 1:7.