„Tan na Ai”
1 Baka di Yesus ben taki fu den tumusi prenspari sani di ben o de wan marki fu den lasti dei fu a seti fu sani disi, dan a ben gi den disipel fu en tranga fu „tan na ai” (Mark. 13:33). Fu san ede Krestensma musu tan na ai? Bika wi e libi na ini a moro ogri ten ini a historia fu libisma. Wi no kan meki a fowtu fu fadon na sribi na yeye fasi. Efu wi ben sa du dati, dan dati ben sa abi leki bakapisi taki wi no sa man frustan a wroko di Yehovah gi wi fu du na ini a ten disi fu a kaba. Sortu wroko na dati?
2 Yehovah e gi a pipel fu en a komando fu meki a bun nyunsu fu en Kownukondre — a wan-enkri howpu gi a libisma famiri — bekènti na heri grontapu. A wroko di wi e wroko krosibei nanga na organisâsi fu Gado e sori taki wi de trutru Krestensma di e hori a ten na prakseri èn taki wi sabi dati wi musu yepi trawan fu kon yere den „wortu fu têgo libi” (Yoh. 6:68). Te wi e teki prati fayafaya na a tumusi prenspari wroko disi, dan wi e sori taki wi de na ai na yeye fasi.
3 Sani Di E Pusu Wi fu Preiki: Leki Kotoigi fu Yehovah wi musu denki bun fu a diniwroko fu wi. A lobi di wi abi gi Gado nanga sma na wi sei e pusu ibriwan fu wi fu teki prati na a preikiwroko (1 Kor. 9:16, 17). Te wi e du dati, dan wi sa kibri wisrefi èn so srefi den wan di e arki wi (1 Tim. 4:16). Meki a de wi fasti bosroiti fu teki prati so furu leki a kan èn so langa leki a de fanowdu, na a wroko fu preiki fu a moro bun tiri di libisma oiti ben sa kan abi — Gado Kownukondre!
4 Wi e frustan taki a diniwroko fu wi musu du sondro draidrai fu di wi sabi wan prenspari sani — a bigin fu a bigi banawtu sa kon ala di wi e du a wroko disi ete. Fu di wi no sabi a dei nanga a yuru, meki wi musu tan na ai èn de klariklari ala ten, ala di wi e sori na ini den begi fu wi taki wi e frutrow tapu Yehovah (Ef. 6:18). A preikiwroko e kon moro bigi dei fu dei. Ma heri esi a moro bigi kotoigiwroko ini a historia fu libisma sa doro wan heimarki.
5 Gi yesi na wan getrow fasi na a komando fu Yesus fu „tan na ai”. Now moro leki iniwan ten na fesi a de tumusi prenspari taki wi du dati. Meki wi gi yesi na wan fasi di e sori taki a ten seryusu srefisrefi. Meki a de so taki tide nanga ala tra dei, wi e tan fayafaya na ini a diniwroko fu Yehovah èn meki wi tan seryusu na yeye fasi. Iya, meki a de so taki wi „tan na ai èn hori wisrefi”.—1 Tes. 5:6.