Kolokoe foe den wan di e tan na ai!
„Loekoe! Mi e kon leki wan foefoeroeman. Kolokoe foe a sma di e tan na ai èn e tan weri en tapoesei krosi.” — OPENBARING 16:15.
1. San wi kan froewakti, foe di a dei foe Jehovah de krosibei?
A BIGI dei foe Jehovah de krosibei, èn dati wani taki orlokoe! Na ini wan fisjoen, na apostel Johanes ben si „wortoe [di gersi todo] di e kon foe den ogri jeje”, èn di e go na ala den „kownoe”, noso tiriman foe grontapoe. Foe doe san? We, „foe tjari den kon na wán na a orlokoe foe a bigi dei foe Gado na Almaktiwan”! Johanes ben taki moro fara: „Den ben tjari den kon na wán na a presi di den e kari Har–Mágedon na ini a Hebrewtongo.” — Openbaring 16:13-16.
2. Soema na Gog foe Magog, èn san sa pasa te a e opo kon foe doe a pipel foe Jehovah ogri?
2 Djonsro Jehovah sa meki a politiek elementi foe a sistema disi pori Babilon a Bigiwan, a grontapoemakti foe falsi relisi (Openbaring 17:1-5, 15-17). Dan Gog foe Magog, Satan Didibri di den trowe kon na ini a birti foe grontapoe, sa orga den legre foe en èn sa opo kon nanga ala en makti foe doe wan bigi ogri na a pipel foe Jehovah di lobi vrede èn di gersi taki no wan sma e feti gi den (Esekièl 38:1-12). Ma Gado sa doe wan sani foe froeloesoe a pipel foe en. Dati sa de a bigin foe „a bigi èn frede dei foe Jehovah”. — Joèl 2:31; Esekièl 38:18-20.
3. San joe ben sa taki foe den sani di e pasa, soleki fa Esekièl 38:21-23 ben taki na fesi?
3 Ija, Jehovah sa froeloesoe en pipel èn sa pori ibri lasti fortresi foe a sistema foe Satan te wi e doro a situwâsi na grontapoe di den e kari Har—Mágedon noso Armagedon. Leisi den profeiti wortoe di skrifi na Esekièl 38:21-23, èn proeberi foe si a situwâsi na ini joe prakseri. Jehovah e gebroiki en makti foe meki hebi alen fadon kon di tron liba, a e meki pisipisi ijs fadon kon di e tjari pori kon, faja e koti, èn pestsiki de di abi dede leki bakapisi. Heri grontapoe e broeja te den legre foe Gog no sabi moro san foe doe, èn e feti nanga makandra. Iniwan feanti foe na Almakti Gado di tan na libi, e dede, ala di Jehovah e gebroiki wondroe foe kibri den foetoeboi foe en. Te a „bigi banawtoe” di den ben taki na fesi foe dati, kon na wan kaba, dan noti sa tan abra foe a godelowsoe seti foe Satan (Mateus 24:21). Ma srefi te a dede joeroe foe den godelowsoesma doro, den sa kon sabi soema de frantiwortoe gi a takroe ten di kon abra den. Wi Gado di wini, srefi e taki: „Den sa moesoe sabi taki mi na Jehovah.” Den toemoesi aparti sani disi sa pasa na ini a ten foe wi, na a ten foe Jesus en denoja.
E kon leki wan foefoeroeman
4. Na sortoe fasi Jesus sa kon foe pori a godelowsoe seti foe sani disi?
4 A glori Masra Jesus Krestes ben taki: „Loekoe! Mi e kon leki wan foefoeroeman.” Te wan foefoeroeman e kon, dan dati ben sa de wantronso, na wan ten di sma no e froewakti, te moro foeroe sma de na sribi. Te Jesus e kon leki wan foefoeroeman foe pori a godelowsoe seti foe sani disi, dan a sa meki den wan di de na ai troetroe, tan na libi. A ben taigi Johanes: „Kolokoe foe a sma di e tan na ai èn di e tan weri en tapoesei krosi, so taki a no sa waka nanga soso skin èn sma e si a sjen foe en” (Openbaring 16:15). San den wortoe dati wani taki? Èn fa wi kan tan na ai na jejefasi?
5. Sortoe seti foe a tempel diniwroko ben de di Jesus ben de na grontapoe?
5 A gwenti no de taki den e poeroe den krosi foe wan waktiman efoe a fadon na sribi di a ben de na wroko. Ma dati ben pasa troetroe na a tempel na Jerusalem di Jesus ben de na grontapoe èn groepoe priester nanga Leifisma ben dini na a tempel na Jerusalem. A ben de na ini a di foe 11 jarihondro b.G.T. di kownoe David ben seti den hondrohondro priester èn den doesoendoesoen Leifi jepiman, na ini wan organisâsi di ben abi 24 groepoe (1 Kroniki 24:1-18). Ibriwan foe den groepoe foe moro leki wán doesoen bekwaam wrokoman ben doe den difrenti sani di abi foe doe nanga a tempel diniwroko no moro mendri leki toe tron wan jari, ibri leisi wan heri wiki langa. Ma na a Wiwirikampoe-fesa, ala den 24 groepoe ben de drape foe wroko. Moro jepi ben de fanowdoe toe na a Paskafesa.
6. San Jesus ben abi na prakseri kande di a ben taki: „Kolokoe foe a sma di e tan na ai èn e tan weri en tapoesei krosi”?
6 Di Jesus ben taki: „Kolokoe foe a sma di de na ai èn di e tan weri en tapoesei krosi”, dan kande a ben abi wan gwenti na prakseri di den ben abi na a ten dati ini a tori foe waktiman wroko di ben doe na a tempel. A djoe Misjna e taki: „Den priester ben hori wakti na dri presi na a tempel: na ini a Kamra foe Abtinas, na ini a Kamra foe a Flam, èn na ini a Kamra foe a Brantmiri; èn den leifisma na toetenti na wán presi: feifi na den feifi doro foe a Tempelbergi, fo na den fo oekoe na inisei, feifi na den feifi doro foe a Tempel Djari, fo na den fo oekoe na dorosei, èn wán na ini a Kamra foe den Ofrandi, èn wán na ini a Kamra foe a Garden, èn wán na bakasei foe a presi foe a tapoen foe na ark foe froebontoe [dorosei foe a bakasei skotoe foe a Moro Santapresi]. A fesiman foe a Tempelbergi ben abi a gwenti foe waka lontoe go na ibri waktiman, ala di a ben hori flambo di ben leti, na en fesi, èn efoe wan waktiman no ben opo tanapoe èn taigi en: ’O fesiman foe a Tempelbergi, vrede de nanga joe!’ èn a ben de krin taki a [waktiman] ben sribi, dan a [fesiman] ben o naki en nanga en tiki, èn a ben abi a reti foe bron den krosi foe [a waktiman].” — A Misjna, Middoth („Marki”), 1, paragraaf 1 nanga 2, di Herbert Danby ben vertaal.
7. Foe san ede den priester nanga Leifisma di ben hori wakti na a tempel ben moesoe tan na ai?
7 Den foeroe Leifisma nanga priester foe a groepoe di ben dini, ben tan na ai a heri neti foe hori wakti èn foe sorgoe taki no wan sma di no ben de krin ben o kon na ini den tempel fesidjari. Foe di „a fesiman foe a Tempelbergi”, noso „a kapten foe a tempel”, ben waka lontoe e loekoe ala den 24 presi na a ten di den ben hori wakti te neti, meki ibri waktiman ben moesoe tan na ai na a postoe foe en efoe a no ben wani taki den kisi en e sribi na presi foe a doe en wroko. — Tori foe den Apostel 4:1.
8. San na den agersi tapoesei krosi foe wan kresten?
8 Salfoe kresten nanga den kompe foetoeboi foe den moesoe tan na ai na jejefasi èn weri den agersi tapoesei krosi foe den. Disi na den marki di e sori taki wi poti na wroko foe doe a diniwroko na Jehovah en jeje tempel. Foe di disi de so, meki wi abi Gado en santa jeje, noso wrokokrakti, foe jepi wi doe den wroko foe wi nanga den grani di wi e kisi leki Kownoekondre preikiman. Foe fadon na sribi na wi postoe leki bedinari foe Gado, ben o tjari wi kon ini a kefar taki Jesus Krestes, a Kapten foe a bigi jeje tempel, kisi wi. Efoe wi ben de na sribi na jejefasi na a ten dati, dan na wan agersi fasi den ben o hari wi krosi poeroe na wi skin èn den ben o bron den agersi krosi foe wi. So boen, fa wi kan tan na ai na jejefasi?
Fa wi kan tan na ai
9. Foe san ede wan studie foe bijbel nanga a jepi foe kresten poeblikâsi de so prenspari?
9 Wan fajafaja studie foe den Boekoe foe bijbel nanga a jepi foe kresten poeblikâsi na wan sani di e poesoe wan sma foe tan na ai na jejefasi. So wan studie sa meki wi de bekwaam gi a diniwroko, a sa jepi wi foe kakafoetoe gi problema, èn a sa sori wi a fasi foe abi têgo kolokoe (Odo 8:34, 35; Jakobus 1:5-8). Wi moesoe doe a studie foe wi dorodoro èn wi moesoe leri wan sani foe en (Hebrewsma 5:14–6:3). Boen njanjan di wi e njan na fasti ten, kan jepi wi foe tan na ai èn foe de klariklari. A kan meki taki wi no de sribisribi san kan de wan marki di e sori taki wan sma no e njan nofo. Wi no abi reide foe no njan nofo na jejefasi èn foe de sribisribi, bika Gado e seti sani foe gi njanjan na jejefasi bogobogo nanga jepi foe a salfoe „getrow èn koni srafoe” (Mateus 24:45-47). Foe njan njanjan na jejefasi na fasti ten nanga jepi foe wi persoonlijk studie èn osofamiri studie, na wán fasi foe tan na ai èn foe de „gosontoe ini a bribi”. — Titus 1:13.
10. Fa kresten konmakandra, bigi konmakandra, nanga kongres e jepi wi foe tan na ai na jejefasi?
10 Kresten konmakandra, bigi konmakandra, nanga kongres e jepi wi foe tan na ai na jejefasi. Den e gi deki-ati èn okasi foe „gi makandra deki-ati foe sori lobi èn doe boen wroko”. Spesroetoe wi moesoe kon makandra doronomo, foe di wi „e si a dei e kon krosibei”. A dei dati troetroe de krosibei now. A de „a dei foe Jehovah”, te a sa regtfardiki en soevereiniteit. Efoe a dei dati troetroe de prenspari gi wi — èn dati moesoe de so — dan wi no sa „libi a kon di wi e kon makandra”. — Hebrewsma 10:24, 25; 2 Petrus 3:10.
11. Foe san ede wi kan taki dati a kresten diniwroko de prenspari foe tan na ai na jejefasi?
11 Efoe wi wani tan na ai na jejefasi, dan a de prenspari foe teki prati na a kresten diniwroko nanga wi heri ati. Te wi abi wan fajafaja prati doronomo, na a wroko foe preiki a boen njoensoe, dan dati e meki wi de klariklari. A diniwroko foe wi e gi wi foeroe okasi foe taki nanga sma foe Gado Wortoe, en Kownoekondre, èn den sani di a abi na prakseri. A e gi satisfaksi foe gi kotoigi oso foe oso, foe tjari gobaka, èn foe hori oso-bijbelstudie na ini den poeblikâsi leki Sabi di e tjari joe go na têgo libi. Owroeman na Efeise foe owroeten ben kan kotoigi taki Paulus ben gi den leri „na poebliki èn oso foe oso” (Tori foe den Apostel 20:20, 21). A no de foe taki, dati son getrow Kotoigi foe Jehovah abi serjoesoe problema nanga den gosontoe di e hendri a diniwroko foe den pikinso, ma den e feni fasi foe taki nanga trawan foe Jehovah èn en kownoemakti èn a e gi den foeroe prisiri te den e doe disi. — Psalm 145:10-14.
12, 13. Foe san ede wi moesoe loekoe boen taki wi no e njan èn e dringi pasa marki?
12 Efoe wi e loekoe boen taki wi no e njan èn e dringi pasa marki, dan dati sa jepi wi foe tan na ai na jejefasi. Di Jesus ben taki foe en denoja, dan a ben gi den apostel foe en tranga: „Poti prakseri na tapoe oensrefi, taki noiti oen ati moesoe kon hebi nanga njan pasa marki èn dringi pasa marki èn den broko-ede foe a libi, èn a dei dati wantronso, na wán momenti e kon na oen tapoe leki wan trapoe. Bika a sa kon na tapoe ala den sma di e libi na grontapoe” (Lukas 21:7, 34, 35). Foe njan èn foe dringi pasa marki èn droengoefasi no de akroederi den bijbel markitiki (Deuteronomium 21:18-21). Odo 23:20, 21 e taki: „No kon de na mindri sma di e dringi win pasa marki, na mindri den wan di e njan meti na wan gridi fasi. Bika wan droengoeman nanga wan tapoe-ala sa kon pôti, èn a firi foe sribi, sa meki taki a sa weri soso broko krosi.” — Odo 28:7.
13 Ma srefi efoe njan èn dringi pasa marki no e kon so fara, tokoe dati kan meki taki wan sma kon de sribisribi, èn e kon lesi srefi èn a e lasi a doe foe Gado wani na prakseri. A no de foe taki, dati a sma sa broko en ede nanga sani di abi foe doe nanga na osofamiri libi, a gosontoe, èn go so doro. Ma wi sa de kolokoe te wi e poti Kownoekondre afersi na a fosi presi na ini wi libi èn abi a froetrow taki wi hemel Tata sa sorgoe wi (Mateus 6:25-34). Efoe wi no e doe dati, dan „a dei dati” sa kon na wi tapoe leki „wan trapoe”, kande leki wan trapoe di wi no kan si èn di sa kisi wi sondro foe wi froewakti dati noso leki wan trapoe di e kori wi, soleki den wan di e kori meti foe kisi den sondro taki den ben froewakti dati. Disi no sa pasa efoe wi tan na ai, èn froestan heri boen taki wi e libi na ini „a ten foe a kaba”. — Danièl 12:4.
14. Foe san ede wi moesoe begi opregti?
14 Opregti begi na wan tra jepi foe tan na ai na jejefasi. Na ini en bigi profeititori, Jesus ben gi moro tranga: „Tan na ai, èn begi ala ten taki oenoe kan pasa ala den sani disi di sa feni presi seiker, èn foe tanapoe na fesi a Manpikin foe libisma” (Lukas 21:36). Ija, meki wi begi taki wi kan de na Jehovah sei ala ten èn abi wan boen posisi na en fesi te Jesus, a Manpikin foe libisma, e kon foe pori a godelowsoe seti foe sani disi. Gi a boen foe wi èn gi a boen foe kompe bribiman di wi e begi gi den, wi moesoe ’tan na ai na ini begi’. — Kolosesma 4:2; Efeisesma 6:18-20.
Foeroe ten no de moro
15. Sortoe bakapisi wi abi foe di wi e doe a diniwroko foe wi leki preikiman foe regtfardikifasi?
15 Tweifri no de taki, ala di wi e wakti tapoe a bigi dei foe Jehovah, dati wi angri foe doe ala san wi man na ini a diniwroko foe en. Efoe wi e begi en na wan opregti fasi foe disi, dan „wan bigi doro di e tjari go na aktiviteit” kan opo gi wi (1 Korentesma 16:8, 9). Na Gado en fasti ten, Jesus sa leisi strafoe èn prati den regtfardiki „skapoe” di warti foe kisi têgo libi foe den godelowsoe „bokoboko” di e froedini en foe kisi têgo pori (Johanes 5:22). Wi a no den wan di e prati den skapoe foe den bokoboko. Ma a diniwroko foe wi leki preikiman foe regtfardikifasi e gi sma na okasi now foe bosroiti foe teki wan libi foe dini Gado èn na so fasi abi a howpoe foe den poti den aparti foe kan kisi libi te Jesus „e doro na ini en glori”. Foe di a ten di tan abra gi a seti foe sani disi sjatoe, e meki a kon de tranga fanowdoe foe doe sani nanga wi heri ati, te wi e soekoe den wan di „abi a joisti jeje gi a têgo libi”. — Mateus 25:31-46; Tori foe den Apostel 13:48.
16. Foe san ede wi moesoe de fajafaja Kownoekondre preikiman?
16 Ten no ben de moro gi a grontapoe foe den dei foe Noa, èn heri esi ten no sa de moro gi a seti foe sani disi. Foe dati ede, meki wi de fajafaja Kownoekondre preikiman. A preikiwroko foe wi e waka boen, bika ibri jari hondro doesoendoesoen sma e teki dopoe foe sori taki den gi densrefi abra na Gado. Den e tron wan pisi foe Jehovah en organisâsi di a blesi — „en pipel èn den skapoe foe en sabana” (Psalm 100:3). Fa a de wan prisiri foe abi wan prati na a Kownoekondre preikiwroko di e tjari howpoe kon gi someni sma bifo „a bigi èn frede dei foe Jehovah”!
17, 18. (a) San wi moesoe froewakti taki son sma sa doe te wi e preiki? (b) San sa pasa seiker nanga spotoeman?
17 Neleki fa a ben de nanga Noa, na so wi abi a jepi foe Gado toe èn a e gi wi kibri. Ija, a pipel, den engel di ben teki libisma skin, èn den Nefilim ben moesoe spotoe nanga a boskopoe foe Noa, ma dati no ben tapoe Noa. Na ini a ten disi, son sma e spotoe te wi e taki nanga den foe den foeroe boeweisi di e sori taki wi e libi na ini „den lasti dei” (2 Timoteus 3:1-5). So wan spotoe de wan kontroe foe bijbel profeititori di e taki foe a denoja foe Krestes, bika Petrus ben skrifi: „Na ini den lasti dei spotoeman sa kon nanga den spotoe foe den, di sa doe sani akroederi den eigi lostoe èn den e taki: ’Pe a denoja disi foe en de di den ben pramisi? Bika sensi den dei di den afo foe wi fadon na sribi ini dede, ala den sani ben tan soifri leki fa a ben de sensi di Gado bigin meki sani’”. — 2 Petrus 1:16; 3:3, 4.
18 Spotoeman na ini a ten disi kan denki: ’Noti kenki sensi di Gado meki sani. A libi e go doro, sma e njan, e dringi, e trow, èn e kweki osofamiri. Srefi efoe Jesus de noja, dan a no sa tjari kroetoe kon na ini a ten foe mi.’ Den no abi leti kwetikweti! Efoe den no e dede foe tra reide ede, dan seiker a frede dei foe Jehovah sa tjari pori kon na den tapoe, foe di den de wan pisi foe a godelowsoe geslakti disi, neleki fa na ogri pori di sma ben kisi na ini a Froedoe ben tjari wan kaba kon na a godelowsoe geslakti na ini den dei foe Noa. — Mateus 24:34.
Wi troetroe moesoe tan na ai!
19. Fa wi moesoe si a wroko di wi abi foe meki disipel?
19 Efoe wi gi wisrefi abra na Jehovah, dan meki wi noiti fadon na sribi foe prakseri ede di no boen. A ten disi na wan ten foe tan na ai, foe sori bribi na ini den profeititori foe Gado, èn foe doe a wroko di wi kisi foe doe foe „meki disipel foe sma foe ala nâsi” (Mateus 28:19, 20). Foe di a sistema disi e doro en lasti kaba, dan wi no kan abi wan moro bigi grani leki di foe dini Jehovah Gado na ondro a tiri foe Jesus Krestes èn abi wan prati na a wroko di e doe na heri grontapoe foe preiki „a boen njoensoe disi foe a kownoekondre” bifo a kaba e kon. — Mateus 24:14; Markus 13:10.
20. Sortoe eksempre Kaleb nanga Josua ben gi, èn san a fasi fa den ben tjari densrefi e sori wi?
20 Son wan foe Jehovah en pipel dini en someni tenti jari kaba, kande den heri libi langa. Èn srefi efoe no so langa pasa ete wi ben teki a troe anbegi, tokoe meki wi de leki Kaleb foe Israèl di „ben waka na baka Jehovah dorodoro” (Deuteronomium 1:34-36). En nanga Josua ben sreka densrefi boen foe go na ini a Pramisi Kondre sjatoe baka di Israèl ben kon fri foe a katibo foe Egipti. Ma moro foeroe foe den Israèlsma di ben de bigisma kaba, no ben abi bribi èn den ben moesoe waka 40 jari na ini a gran sabana, pe den dede. Kaleb nanga Josua ben horidoro na ondro problema makandra nanga den alamala na a ten dati, ma te foe kaba den toe man dati ben go na ini a pramisi kondre (Numeri 14:30-34; Josua 14:6-15). Efoe wi ’e waka na baka Jehovah dorodoro’ èn e tan na ai na jejefasi, dan wi sa abi a prisiri foe go na ini Gado en pramisi njoen grontapoe.
21. San wi sa ondrofeni efoe wi e tan na ai na jejefasi?
21 Boeweisi e sori krin taki wi e libi na ini a ten foe a kaba èn taki a bigi dei foe Jehovah de krosibei. Disi a no a ten foe kon de sribisribi èn foe lasi a doe foe Gado wani, na prakseri. Wi sa kisi blesi soso te wi e tan na ai na jejefasi èn e tan weri den krosi foe wi di e sori sma taki wi na kresten bedinari nanga foetoeboi foe Jehovah. Meki a de wi fasti bosroiti foe „tan na ai, tanapoe kánkan ini a bribi, tjari [wi]srefi leki mansma, kon tranga” (1 Korentesma 16:13). Foe di wi na foetoeboi foe Jehovah, dan meki ibriwan foe wi tanapoe kánkan èn abi deki-ati. Dan wi sa de wan foe den sma di de srekasreka te a bigi dei foe Jehovah e kon, èn e dini getrow na ini a groepoe foe kolokoe sma di e tan na ai.
San joe ben sa piki?
◻ San joe ben sa taki foe den agersi tapoesei krosi foe wi, èn fa wi kan tan weri den?
◻ San na wan toe fasi foe tan na ai na jejefasi?
◻ Foe san ede wi moesoe froewakti spotoeman, èn fa wi moesoe si den?
◻ Fa wi moesoe si a wroko di wi abi foe meki disipel na ini den lasti dei disi?
[Prenspari pisi na tapoe bladzijde 16]
Kresten abi a santa jeje foe Gado foe jepi den foe tan na ai èn foe doe den plekti di den abi
[Prenki na tapoe bladzijde 15]
Joe abi a fasti bosroiti foe tan na ai na jejefasi èn tan weri joe agersi tapoesei krosi?