Go fisi foe kisi libisma na ini den watra na heri grontapoe
„Efoe mi e meki now a boen njoensoe bekènti, dan dati no de wan reide gi mi foe skepi, bika a fanowdoe den poti a mi tapoe. Foe troe, heloe foe mi efoe mi no e meki a boen njoensoe bekènti!” — 1 KORENTESMA 9:16.
1, 2. (a) Soema ben miti a tjalensi troetroe di den ben e taki foe en na 1 Korentesma 9:16, èn foe san ede joe e piki so? (b) Sortoe frantiwortoe Jehovah Kotoigi ben teki?
SOEMA ini a di foe twenti jarihondro disi miti a tjalensi troetroe di Paulus wortoe na tapoesei e pristeri? Soema go na doro nanga miljoenmiljoen sma, na ini grontapoe foe go fisi foe kisi man nanga oema di „e froestan san na a jeje nowtoe foe den”? (Mateus 5:3) Soema teki a tjans taki sma ben kan poti den na strafoe-oso èn taki den ben kan dede, èn soema njanpina foe den sani disi ini foeroe kondre, foe di den e doe a komando foe Krestes di skrifi na Mateus 24:14?
2 A tori e piki: Jehovah Kotoigi. A jari di pasa wawan, dan moro leki fo miljoen Kotoigi ben go oso foe oso foe ’meki a boen njoensoe bekènti’ na 211 kondre èn kontren èn ini moro leki 200 tongo. Den disi no ben de soso wan groepoe foe zendeling di den ben skoro èn piki poeroe na mindri trawan. Nôno, ala Kotoigi foe Jehovah e firi wan frantiwortoe foe preiki èn gi sma leri oso foe oso èn na ibri okasi di fiti. Foe san ede den e firi a fanowdoe dati foe prati den bribi foe den nanga trawan? Foe di den e erken taki sabi e tjari frantiwortoe kon. — Esekièl 33:8, 9; Romesma 10:14, 15; 1 Korentesma 9:16, 17.
Go fisi foe kisi libisma, wan tjalensi na heri grontapoe
3. Te o fara a fisiwroko ben moesoe bradi go?
3 A bigi fisiwroko disi no skotoe, foe taki en so, foe sma doe dati na wan toe liba noso bigi watra noso srefi wán se wawan. Nôno, so leki fa Jesus ben gi a komando, dan a moesoe doe „na ala nâsi” (Markus 13:10). Bifo Jesus ben go na hemel baka na en Tata, a ben taigi den disipel foe en: „Go foe dati ede èn meki disipel foe sma foe ala nâsi, dopoe den na nen foe a Tata èn foe a Manpikin èn foe a santa jeje èn leri den foe ondrow ala sani di mi ben komanderi oenoe. Èn loekoe! mi de nanga oenoe ala dei te na a bosroiti foe a seti foe sani.” — Mateus 28:19, 20.
4. (a) San ben moesoe froewondroe den fosi djoe bakaman foe Jesus? (b) Fa Jehovah Kotoigi e si a bradi foe a preikiwroko foe den?
4 Gi den djoe bakaman foe Jesus dati ben moesoe de wan ordroe di ben skreki den. A ben taigi den djoe disipel foe en taki den ben moesoe go now na den hèidensma, „di no ben krin”, foe ala den nâsi èn gi den leri. Disi ben aksi foe a sei foe den, taki den ben abi foe fiti a prakseri foe den foe man teki a hebi slag foe a toewijzing disi èn foe handri akroederi dati (Tori foe den Apostel 10:9-35). Ma den no ben man doe tra fasi; Jesus ben taigi den ini wan agersitori taki „a gron na grontapoe”. Foe dati ede, Jehovah Kotoigi ini a ten disi e si heri grontapoe leki a presi pe den abi a reti foe fisi na ini. No wan „territoriaal watra” [wan pisi watra fesi a sjoro foe ala kondre, di bradi 20 km èn di de wan pisi foe den watra foe a kondre dati] no de, di e skotoe na ordroe di Gado gi den. Sontron a de fanowdoe foe gebroiki koni foe si sani, pe fri foe anbegi no de. Ma tokoe, den e fisi nanga wan firi foe tranga fanowdoe. Foe san ede dati de so? Foe di den sani di e pasa na grontapoe èn a kontroe foe bijbel profeititori e sori taki wi de ini a lasti pisi foe a fisiwroko na heri grontapoe. — Mateus 13:38; Lukas 21:28-33.
Go a fesi ini a fisiwroko na heri grontapoe
5. Sortoe sma e doe wan sani tapoe a fisiwroko na heri grontapoe?
5 Moro foeroe foe den salfoe erfgenaam foe a Kownoekondre den ben „kisi [leki fisi]” na ini den nâsi bifo 1935, so boen a heri nomroe foe den pikinmoro doro en marki krinkrin. Foe dati ede, spesroetoe foe sensi 1935 Jehovah Kotoigi ben soekoe den sakafasi sma dati di wi ben sa kan taki foe den leki „safoe-atisma” di „sa abi grontapoe” (Psalm 37:11, 29). Den disi na sma di „e soktoe èn e geme foe ala den tegoe sani di sma e doe.” Den e doe wan sani foe a boen foe Gado en Kownoekondre tiri bifo a „bigi banawtoe” sa naki Satan en pori èn kroektoe seti foe sani broko èn den e seni den anbegiman foe en go na „a faja onfoe” noso a lasti pori. — Ezekièl 9:4; Mateus 13:47-50; 24:21.
6, 7. (a) Sortoe stap den ben teki ini 1943 ini a tori foe a preikiwroko? (b) San ben de den bakapisi?
6 A fisiwroko na heri grontapoe ben abi te so fara boen bakapisi? Meki den troe tori taki foe densrefi. Na ini 1943, a di foe toe Grontapoefeti ben e feti hebi ete, den getrow salfoe brada na a grontapoe edekantoro foe Jehovah Kotoigi na Brooklyn, New York, ben si tokoe a fesi taki wan bigi fisiwroko ben sa moesoe doe na grontapoe. So boen sortoe stap den ben teki?a — Openbaring 12:16, 17.
7 Na ini 1943 a Waktitorengenootschap ben opo wan zendeling skoro di den ben kari Gilead (Hebrewtongo, „Ston-ipi leki kotoigi”; Genesis 31:47, 48), di ben bigin skoro wanhondro zendeling ibri siksi moen, so taki den ben kan seni den go leki agersi fisiman na heri grontapoe. Na a ten dati, soso 126.329 Kotoigi ben fisi fajafaja foe kisi libisma na 54 kondre. Na ini tin jari den nomroe dati, te joe loekoe fini, ben djompo go na 519.982 Kotoigi na 143 kondre! Foe troe, a Gilead Skoro ben e meki deki-ati fisiman nanga fisi-oema, di ben de klariklari foe go na den koeltoeroe foe doroseikondre èn fiti densrefi na njoen watra pe fisi de foe kisi. Leki wan bakapisi, doesoendoesoen opregti sma ben doe wan sani tapoe dati. Den zendeling dati èn den Kotoigi foe den kondre pe den ben wroko, ben poti wan fondamenti gi a toemoesi moi gro di e feni presi now.
8, 9. (a) Sortoe eksempel wi kan kari foe toemoesi aparti zendingwroko? (b) Fa zendeling si toemoesi aparti gro ini a veld foe den? (Loekoe toe a Jariboekoe foe 1992 foe Jehovah Kotoigi.)
8 Foeroe getrow owroe zendeling foe den fosi klas dati foe Gilead e dini ete ini den toewijzing foe den na doroseikondre, srefi ala di now, den pasa a libimarki foe 70 noso 80 jari. Wan eksempel di e prenki foeroe foe den, na di foe a 82 jari owroe Eric Britten nanga a wefi foe en, Krestina, di ben komoto na a di foe 15 klas foe Gilead ini 1950 èn e dini ete na Brasion. Di den ben go dini na Brasion, dan moro mendri leki 3000 Kotoigi ben de ini a kondre dati. Now moro leki 300.000 de! Foe troe, a ’pikinwan ben tron wan makti nâsi’ na Brasion foe di a fisiwroko ben hari foeroe kon na sjoro. — Jesaja 60:22.
9 Èn san wi kan taki foe den zendeling na Afrika? Moro foeroe foe den ben fiti densrefi na wan heri tra koeltoeroe èn ben kon lobi den Afrikansma. Wan aparti eksempel na den brada John èn Eric Cooke nanga den wefi foe den, Kathleen èn Mirtel, di e dini now na Zuid-Afrika. John èn Eric ben komoto na a di foe aiti klas na ini 1947. Den kondre pe den brada disi dini, a wan noso a trawan, na Angola, Simbabwe, Mosambik, nanga Zuid-Afrika. Son zendeling dede na Afrika foe siki ede, èn trawan foe orlokoe ede èn froefolgoe so leki Alan Battey nanga Arthur Lawson, di ben dede na ini a borgroefeti di ben feti no sa langa pasa na Liberia. Ma tokoe, den Afrikan watra ben sori taki den abi foeroe na ini srefisrefi. Now moro leki 400.000 Kotoigi panja na a bigi pisi dati foe grontapoe.
Den alamala abi wan prati
10. Foe san ede èn na sortoe fasi pionier e doe wroko di joe kan prèise den foe dati?
10 Ma, wi moesoe erken taki ala di a nomroe foe den zendeling foe doroseikondre de wan toe doesoendoesoen, den preikiman foe a kondre pe den e wroko èn den pionierb kon de miljoenmiljoen. Den e doe a moro bigi pisi foe a preikiwroko na heri grontapoe. Ini 1991 wan gemiddelde foe moro leki 550.000 pionier èn opziener di e rèis ben de. Fa a nomroe disi e naki wi ati, te wi e denki foe ala den getrow Kotoigi disi di e meki spesroetoe moeiti foe abi wan prati na a bigi fisiwroko èn abi wan gemiddelde foe 60 te 140 joeroe foe preiki ibri moen awasi pe den de. Foeroe e doe disi ala di den e tjari bigi persoonlijk òfer èn e abi foeroe kostoe. Ma foe san ede? Foe di den lobi Jehovah a Gado foe den nanga den heri ati, prakseri, sili èn krakti èn den lobi den sma na den sei leki densrefi. — Mateus 22:37-39.
11. Sortoe seiker boeweisi de taki a jeje foe Jehovah e wroko na mindri a pipel foe en?
11 San wi kan taki foe den moro leki dri nanga afoe miljoen tra Kotoigi di no de ini a foeroeten diniwroko, ma di tokoe e gi ala den krakti ini a dienst foe Jehovah, so leki fa den omstandigheid e gi pasi foe dati? Sonwan na trow-oema, srefi mama di e sorgoe gi njofi pikin, ma di tokoe e gi pikinso foe a warti ten foe den na a fisiwroko na heri grontapoe. Foeroe foe den na trow-masra noso papa nanga wan foeroeten grontapoe wroko; tokoe den e poti ten na wan sei na a kaba foe den wiki èn na mofoneti foe leri freimdesma a waarheid. Dan joe abi a bigi ipi foe man nanga oema di de den wawan sondro foe trow èn jongoewan di abi wan prati na a preikiwroko èn di e rikomanderi a waarheid nanga a waka nanga libi foe den. Sortoe tra kerkigroepoe abi moro leki fo miljoen friwani wrokoman di no e kisi moni, èn di e preiki a boen njoensoe foe Gado en Kownoekondre tiri ibri moen? Foe troe disi e boeweisi taki a jeje foe Jehovah e wroko! — Psalm 68:11; Tori foe den Apostel 2:16-18; teki gersi Sakaria 4:6.
San e sorgoe foe a gro disi
12. Foe san ede sma e doe wan sani tapoe a waarheid èn san na a nomroe foe den?
12 A bigi preikiwroko disi e tjari toemoesi froewondroe bakapisi ibri jari. Ini 1991 moro leki 300.000 njoen Kotoigi ben dopoe foe di den ben doekroen den krinkrin go na ondro watra. Dati na a srefi leki 3000 gemeente di abi 100 Kotoigi ibriwan foe den! Fa den ben man doe ala den sani disi? Meki wi memre san Jesus ben taki: „No wan sma no kan kon na mi efoe na Tata di seni mi no e hari en; . . . Ini den profeiti a skrifi: ’Èn Jehovah sa leri den alamala.’ Ibriwan di ben jere èn leri en foe a Tata, e kon na mi.” Foe dati ede a no soso nanga jepi foe a moeiti foe libisma taki wan sma e doe wan sani tapoe a fisiwroko na heri grontapoe. Jehovah e si a kondisi foe na ati èn e hari den sma disi di warti kon na en. — Johanes 6:44,45; Mateus 10:11-13; Tori foe den Apostel 13:48.
13, 14. Sortoe toemoesi boen fasi foe handri foeroe Kotoigi sori?
13 Ma, libisma fisiman na den wrokoman di Jehovah e gebroiki foe hari sma kon na en. Foe dati ede a fasi fa den de nanga sma èn nanga a kontren pe den e fisi, de prenspari. Fa a e gi deki-ati foe si taki a moro bigi pisi foe den gi jesi na den wortoe foe Paulus gi den Galasiasma: „Meki foe dati ede wi no tapoe foe doe san boen, bika na a reti ten wi sa koti efoe wi no kon weri.” — Galasiasma 6:9.
14 Foeroe getrow Kotoigi preiki foeroe pisi ten foe tinjari kaba, ala di den e hori ai boen tapoe fa sani e waka na grontapoe. Den ben si na opo kon èn a fadon foe nazisme, fascisme èn tra sistema pe lanti e doe san den wani èn e kwinsi den borgroe. Sonwan foe den ben de kotoigi foe den foeroe orlokoe di ben feni presi sensi 1914. Den si grontapoe tiriman e poti a froetrow foe den tapoe a Folkoebontoe èn baka dati tapoe den Verenigde Nâsi. Den ben si fa lanti ben tapoe a wroko foe Jehovah ini foeroe kondre èn ben gi pasi baka ten foe a wroko doe baka. Na ini ala den sani disi, Jehovah Kotoigi no tapoe foe doe san de toemoesi boen, so srefi foe dini leki fisiman foe libisma. Fa a de wan toemoesi aparti tori foe soifri retifasi! — Mateus 24:13.
15. (a) Sortoe jepi wi kisi foe fiti wisrefi na den fanowdoe foe a kontren foe wi na heri grontapoe? (b) Fa publikâsi jepi joe ini a wroko di joe kisi foe doe?
15 Tra sani de di ben sorgoe foe a gro disi kon na heri grontapoe. Wán na a fasi foe den fisiman foe libisma foe fiti densrefi na den fanowdoe foe a kontren. Nanga a froisi foe sma foe difrenti koeltoeroe, relisi nanga tongo go na tra kondre, Jehovah Kotoigi bradi a froestan di den abi foe den difrenti fasi disi foe si sani. Èn a gemeente na heri grontapoe ben jepi kefarlek boen foe sreka bijbel nanga bijbel boekoe ini moro leki 200 tongo. A heri Njoen Grontapoevertaling foe den Santa Boekoe, noso wan pisi foe en, de now ini 13 tongo, so srefi ini Tjekisi nanga Slovaaktongo. A brochure Njanboen foe tégo foe a libi na grontapoe! de foe kisi now ini 198 tongo, foe Albaneisitongo te Walisian, ala di den druk 72 miljoen eksemplaar. A boekoe A moro bigi man di oiti ben libi de foe kisi kaba ini 69 tongo. A soekoe di libisma e soekoe Gado, di jari kon a doro ini 29 tongo, e gi inzicht na ini a roetoe èn den bribi foe den moro bigi relisi sistema foe grontapoe èn a e sori taki a de wan toemoesi aparti jepisani ini a fisiwroko na heri grontapoe.
16. Fa wan toe sma ben doe foe jepi nanga den fanowdoe na tra kondre?
16 San moro ben meki a grontapoe fisiwroko go a fesi? Doesoendoesoen sma ben de klariklari foe doe wan sani na tapoe a ’Masedonia kari’. Neleki fa Paulus ben de klariklari foe froisi foe Pikin Asia go na Masedonia ini Europa, di a kisi a kari foe Gado, na so foeroe Kotoigi ben froisi go na kondre èn kontren pe wan moro bigi fanowdoe de gi Kownoekondre preikiman, so boen leki gi owroeman èn dinari ini a diniwroko. Den ben de leki troetroe fisiman di feni taki a watra foe a kontren foe den ben fisi dorodoro èn den ben go na ini watra pe moro mendri boto de èn pe fisi de bogobogo. — Tori foe den Apostel 16:9-12; Lukas 5:4-10.
17. Sortoe eksempel wi abi foe den sma di doe wan sani tapoe a ’Masedonia kari’?
17 Den klas foe a Gilead zendeling skoro di den hori no sa langa pasa, ben abi na ini studenti foe difrenti kondre foe Europa di ben leri Ingrisitongo èn ben òfer densrefi baka dati foe dini na tra kondre nanga koeltoeroe. Na a srefi fasi, nanga jepi foe a Bedinari Skoro, foeroe brada di de den wawan sondro foe trow, e kisi toe moen langa boen skoro èn den e seni den baka dati na tra nâsi foe gi tranga na den gemeente èn den kring. Tra toemoesi aparti fisigron de ini den kontren di e opo now na Owstoe Europa èn san ben de fosi den Sovjet republiek. — Teki gersi Romesma 15:20, 21.
18. (a) Foe san ede pionier moro foeroe de bedinari di kan jepi sma boen? (b) Fa den kan jepi trawan ini a gemeente?
18 Wan ekstra jepisani ini a fisiwroko na heri grontapoe na a Pionier Skoro pe den gewoon pionier e go. Na ini den toe wiki foe dipi ondrosoekoe foe a boekoe Skèin leki tjariman foe leti ini grontapoe (Als lichtdragers in deze wereld schijnen), di sreka spesroetoe gi pionier, den e meki a fasi fa den man doe a diniwroko foe den kon moro boen, foe di den e loekoe den sortoe tori disi leki „Feti foe waka a pasi foe lobi”, „Waka baka Jesus leki wan model” èn „Kweki a koni foe gi leri”. Fa ala den gemeente de grantangi foe abi den groepoe disi foe bekwaam oso-foe-oso fisiman di kan skroro foeroe sma ini a bigi fisiwroko disi! — Mateus 5:14-16; Filipisma 2:15; 2 Timoteus 2:1, 2.
Wi kan go a fesi?
19. Fa wi kan go na fesi ini a diniwroko foe wi, neleki na apostel Paulus?
19 Neleki Paulus, wi wani abi wan fasi foe de positief, èn foe poti wi prakseri tapoe a dei foe tamara (Filipisma 3:13, 14). A ben fiti ensrefi na ala sortoe sma èn omstandigheid. A ben sabi fa foe feni penti di sma ben e kroederi nanga en èn fa foe taki-go-taki-kon tapoe a fondamenti foe gwenti èn koeltoeroe foe a presi pe a ben de. Wi kan bigin nanga bijbelstudie, foe di wi hori ai finifini tapoe a fasi fa wan ososma e doe wan sani tapoe a Kownoekondre boskopoe èn dan wi e fiti a pristeri foe wi na den fanowdoe foe na sma. Nanga ala den difrenti bijbel studie jepisani di wi abi, wi kan pristeri a wan di e fiti na a froewakti foe a sma. A fasi fa wi e fiti wisrefi na sma èn a fasi fa wi e hori sani boen na ai de prenspari sani toe foe doe fisiwroko nanga boen bakapisi. — Tori foe den Apostel 17:1-4, 22-28, 34; 1 Korentesma 9:19-23.
20. (a) Foe san ede a fisiwroko foe wi de so prenspari now? (b) San na wi persoonlijk frantiwortoe now?
20 Foe san ede a toemoesi aparti fisiwroko disi de so prenspari now? Bika foe den bijbel profeititori di de foe si ini den sani di ben pasa èn di e feni presi, a de krin taki Satan en grontapoe seti foe sani e go na wan heimarki di o de wan rampoe. So boen, san wi, Jehovah Kotoigi, moesoe e doe? Den dri studie artikel ini a tijdschrift disi ben tjari a frantiwortoe foe wi kon a fesi foe wroko faja èn de fajafaja ini a fisiwroko ini a kontren foe wi foe den watra na heri grontapoe. Wi abi a fasti djaranti foe bijbel taki Jehovah no sa frigiti a fajafaja fisiwroko foe wi. Paulus ben taki: „Gado no de onregtfardiki, so taki a ben sa frigiti a wroko foe oenoe èn a lobi di oenoe ben sori gi en nen, foe di oenoe dini den santa wan èn e go doro foe dini den. Ma wi ben angri taki, ibriwan foe oenoe e sori na srefi faja foe wroko so taki oenoe abi na dorodoro djaranti foe a howpoe te na a kaba.” — Hebrewsma 6:10-12.
[Foetoewortoe]
a Loekoe toe Na openbaring — En moro bigi heimarki de krosibei! (Bakratongo), bladzijde 185 en 186, di na Watchtower Bible and Tract Society of New York, Inc., tjari kon a doro.
b „Pionier preikiman . . . Wan foeroeten wrokoman foe den Jehovah Kotoigi.” — Webster’s Third New International Dictionary.
Joe e memre disi ete?
◻ Foe san ede Jehovah Kotoigi e si heri grontapoe leki a presi pe den kan doe a fisiwroko foe den?
◻ Sortoe blesi a Gilead zendeling skoro ben de gi a fisiwroko?
◻ San na wan toe sani di sorgoe foe a wroko foe Jehovah Kotoigi abi boen bakapisi?
◻ Fa ibriwan foe wi aparti kan meki wi kresten diniwroko kon moro boen?
[Schema/Faki na tapoe bladzijde 30 di e tjari sani kon na krin]
BAKAPISI FOE FISIWROKO NA HERI GRONTAPOE
Jari Kondre Kotoigi
1939 61 71.509
1943 54 126.329
1953 143 519.982
1973 208 1.758.429
1983 205 2.652.323
1991 211 4.278.820
[Prenki na tapoe bladzijde 31]
A wroko foe gi kotoigi e doe ete na mindri den fisiman foe Galilea