Trowe grontapoe dren, feti a baka troesani foe a Kownoekondre

„Tan soekoe dan a Kownoekondre nanga en regtfardikifasi, èn ala den tra sani disi joe sa kisi a tapoe.” — MATEUS 6:33.

1. Sortoe warskow a Wortoe foe Gado e gi ini a tori foe na agersi ati, èn san na wan foe den moro prenspari fasi fa a e kori wi?

„KIBRI joe ati, moro leki ala tra sani di de foe kibri, bika na foe drape den fonten foe libi e bigin” (Odo 4:23). Foe san ede a ben de fanowdoe gi a koni Kownoe Salomo foe gi a warskow disi? Foe di „na ati de feradelek moro leki wan tra sani èn a no e loekoe pasa noti” (Jeremia 17:9). Wan foe den moro prenspari fasi fa na agersi ati foe wi kan kori wi, na foe di a e meki wi gi wisrefi abra na grontapoe dren. Ma san na dren? Den sani disi na denki di no man kon troe, switidren di e dren nanga opo-ai, sidon prakseri soso sani. Te den switidren disi di e dren nanga opo-ai, tron grontapoe dren, dan den a no lasiten wawan, ma den e doe sma ogri srefisrefi toe. Foe dati ede wi moesoe trowe den krinkrin. Foe taki en leti, efoe wi no wani si kroektoedoe na ai, so leki fa Jesus ben doe, dan wi sa kibri na ati foe wi foe no gi wisrefi abra na grontapoe dren. — Hebrewsma 1:8, 9.

2. San na grontapoe dren, èn foe san ede wi moesoe trowe den?

² Ma san na grontapoe dren? Den sani disi na dren di de wan eigifasi foe a grontapoe disi di didon ini a makti foe Satan. Foe a tori disi na apostel Johanes ben skrifi: „Ala sani di de ini grontapoe — a lostoe foe skin èn a lostoe foe ai èn a meki bigi nanga den sani foe tan a libi di wan sma abi — no feni den bigin na a Tata, ma na grontapoe” (1 Johanes 2:16; 5:19). Foe san ede kresten moesoe trowe grontapoe dren? Foe di den sortoe dren disi e wiki gridi lostoe ini sma prakseri èn ati. Switi dren di e dren nanga opo-ai, foe a doe foe san fowtoe, kan de wan oefen ini a prakseri foe san wan sma sa doe te foe kaba. A disipel Jakobus e warskow wi: „Ibriwan sma e kisi tesi foe di en eigi lostoe e hari en èn e kori en. Baka dati na lostoe e tjari, te a meki froktoe, sondoe; a sondoe foe en sei, te a doe, e tjari dede kon.” — Jakobus 1:14, 15.

Eksempel di de wan warkow

3. A kefal foe soema e gi a moro prenspari eksempel, di de wan warskow, foe na ogri di gridi dren kan doe?

³ Meki wi go loekoe eksempel, di e sori foe san ede wi moesoe trowe grontapoe dren. A kefal foe Satan Didibri e gi a moro prenspari eksempel foe na ogri di kan de a bakapisi, foe a gi di sma e gi densrefi abra na dren pe a e soekoe en eigi boen nomo. A ben gi pasi taki firi foe si ensrefi leki toemoesi prenspari, gro so fara ini na ati foe en, taki a ben djaroesoe na tapoe a toemoesi aparti posisi foe Jehovah leki na Universeel Soeverein èn a ben wani foe sma anbegi en (Lukas 4:5-8). A ben de wan dren di no ben man kon troe? Foe troe disi ben de so! Dati sa sori sondro degedege taki a de troe te den tai Satan doesoen jari langa èn spesroetoe te den e trowe en na ini „a bigi se foe faja”, a di foe toe dede. — Openbaring 20:1-3, 10.

4. Fa Satan ben kori Eva?

⁴ Wi abi wan tra eksempel, di de wan warskow, ini a kefal foe a fosi oema, Eva. Ini den moeiti foe Satan foe meki a gridi wani foe en kon troe, a ben kori Eva foe di a ben tjari kon na en fesi, a dren taki efoe a ben o njan foe a froktoe, di den no ben mag njan, Eva no ben o dede, ma a ben o de leki Gado, foe di a ben o sabi boen nanga ogri. A dren disi no ben man kon troe, wan sani pe sma e soekoe den eigi boen nomo? Ija, foe troe a ben de so, so leki wi kan si foe a kroetoe strafoe di Jehovah gi Eva nanga a masra foe en, Adam, di Jehovah ben e hori wan kroetoe nanga den. Leki wan bakapisi foe dati, den ben lasi, gi densrefi èn gi ala onvolmaakti bakapikin foe den, a reti foe libi na ini wan Paradijs. — Genesis 3:1-19; Romesma 5:12.

5. San ben meki bepaalde engel manpikin foe Gado fadon, èn nanga sortoe bakapisi gi den?

⁵ Wi abi na eksempel toe, di de wan warskow, foe son engel manpikin foe Gado (Genesis 6:1-4). Na presi foe abi satisfaksi nanga den blesi di den ben njanboen foe den na ini a hemel denoja foe Jehovah, den ben dren foe oema na grontapoe èn o prisiri a ben sa de foe abi seks demakandra nanga den. Foe di den ben doe wan sani tapoe den dren disi, meki den skotoe den trangajesi engel now foe de ini a doengroe, na jeje fasi, foe Tartarus, ala di den e wakti tapoe a pori foe den na a kaba foe a Doesoen Jari Tiri foe Jesus Krestes. — 2 Petrus 2:4; Judas 6; Openbaring 20:10.

Trowe grontapoe dren

6, 7. Foe san ede grontapoe dren di abi foe doe nanga goedoe na skin fasi kan doe sma ogri èn e kori sma?

⁶ Meki wi go loekoe now na wan foe den moro bekènti èn moro kefarlek dren di Satan e pristeri. Nanga jepi foe ibri sortoe media (koranti, radio nanga telefisi), wi e kisi a tesi foe gi wisrefi abra na grontapoe dren. Disi e kon foeroe tron foe wan angri foe goedoe. Foe ensrefi noti no fowtoe na a abi foe goedoe. Abraham, Job nanga kownoe David, di ben dini Gado, ben goedoe srefisrefi, ma den no ben angri foe goedoe na skin fasi. Dren foe abi goedoe na skin fasi ben boeweigi sma foe wroko tranga jari langa foe kan kisi goedoe. Den sortoe dren disi ben meki den gi pasi toe na ala sortoe fasi foe dobbel, so leki a bèt tapoe asi èn a bai foe lotrei. No meki wi abi no wan dren di abi foe doe nanga goedoe. Efoe wi e denki taki goedoe na skin fasi sa gi wi seikerfasi, prakseri dan foe na odo disi di de troe: „Sani di abi foeroe warti no sa jepi na a dei foe atibron, ma regtfardikifasi srefi sa froeloesoe sma foe dede” (Odo 11:4). Ija, goedoe na skin fasi no sa de foe no wan boen foe pasa a „bigi banawtoe” libilibi. — Mateus 24:21; Openbaring 7:9, 14.

⁷ Goedoe na skin fasi kan kori wi makriki. Foe dati den e froeteri wi: „Den warti sani foe a goedoesma na a tranga foto foe en, èn ini en prakseri den de leki wan skotoe di e kibri en” (Odo 18:11). Ija, soso „ini en prakseri”, foe di goedoe na skin fasi e gi pikinso kibri ini ten pe sma no man hori ai moro tapoe a lasi di moni e lasi en waarde, broko fadon foe na ekonomia, politiek refo, noso siki di den no man dresi. Jesus Krestes ben warskow gi a donfasi foe poti wi froetrow ini goedoe na skinfasi (Lukas 12:13-21). Wi abi den wortoe foe Paulus toe di e warskow: „Lobi gi moni na wan roetoe foe ala sortoe ogri sani, èn foe di sma ben feti a baka a lobi dati, meki sonwan ben lasi komoto na bribi èn boro densrefi ala pe nanga foeroe skin-ati.” — 1 Timoteus 6:10.

8. Te o fara grontapoe dren di abi foe doe nanga seks eigifasi panja ensrefi èn sortoe kefar disi e tjari?

⁸ Tra dren abi foe doe nanga seks di no mag. A marki na ini san a sondoe libisma natuur lobi tan denki foe seks dren, wi kan si na a barinen foe den fisti sani di sma e taki, di joe kan jere te joe e drai bepaalde telefon nomroe èn e arki na boskopoe di abi foe doe nanga doti seks. Na Amerkankondre, dial-a-porn (a doti seks disi di sma kan arki nanga jepi foe telefon), na wan bisnis di e meki foeroe miljard dala. Efoe wi e meki a prakseri foe wi tan denki seks di no mag, dan wi no ben sa de hoigriman, di e doe neleki wi de krin kresten? Èn a kefar no de taki den sortoe dren disi kan abi hoeroedoe demakandra leki bakapisi? Disi ben pasa èn ben abi leki bakapisi taki wan toe sma ben sluit uit foe a kresten gemeente, foe di den ben doe hoeroedoe nanga soetadoe. Nanga Jesus wortoe ini Mateus 5:27, 28 na prakseri, a no de so taki ala sma di doronomo e gi densrefi abra na den sortoe dren disi abi fowtoe, foe di den doe soetadoe ini na ati foe den?

9. Sortoe toemoesi boen rai den Boekoe abi na ini foe warskow wi gi grontapoe dren?

⁹ Foe feti nanga a firi foe wi sondoe ati foe gi pasi na den sortoe dren disi, wi moesoe hori a warskow foe Paulus na prakseri: „Èn no wan mekisani de, di no de foe si gi den ai foe [Gado], ma ala sani e didon krin foe si èn sondro foe kibri wan sani, gi den ai foe en di wi moesoe gi frantiwortoe” (Hebrewsma 4:13). Wi moesoe wani foe de ala ten leki Moses, di „ben tan tanapoe kánkan neleki a ben si a Sma di sma no man si” (Hebrewsma 11:27). Ija, wi moesoe tan taigi wisrefi taki grontapoe dren no e plisi Jehovah èn kan abi soso ogri leki bakapisi gi wisrefi. Wi moesoe feti foe kweki ala den froktoe foe Gado jeje, spesroetoe a dwengi foe wisrefi, foe di wi no man lon gi a troe foe a tori, taki te wi e sai nanga a skin na prakseri, wi sa koti pori foe a skin. — Galasiasma 5:22, 23; 6:7, 8.

Den troesani foe a Kownoekondre

10, 11. (a) Sortoe troetori e horibaka gi a troefasi foe a Mekiman? (b) Sortoe boeweisi de, taki bijbel na troetroe a Wortoe foe Gado? (c) Sortoe boeweisi de, foe a troefasi foe a Kownoe foe a Kownoekondre foe Gado?

¹⁰ A moro boen fasi foe kakafoetoe gi grontapoe dren na foe tan feti a baka den troesani foe a Kownoekondre. Den troesani, foe a Kownoekondre, èn di Gado meki, de heri trafasi leki grontapoe dren. Gado de troetroe? Degedege no de taki Gado de. Mekisani di sma man si, e boeweisi taki disi de so (Romesma 1:20). Den e memre wi foe san ben taki moro leki wan hondro jari pasa ini a boekoe A plan foe Gado foe den jarihondro (The Divine Plan of the Ages), di a Waktitorengenootschap ben tjari kon na doro. A ben taki: „A sma di kan loekoe na loktoe nanga wan telescoop, noso srefi nanga en eigi ai wawan, èn e si drape a bigi foe den sani di Gado meki, a de di ala sani de ini balansi, a moi, na òrdefasi, a wánfasi èn a difrentifasi foe den, èn tokoe e degedege taki a Mekiman foe den sani disi moro hei srefisrefi ini koni èn makti leki en, noso soema kan prakseri foe wan momenti taki so wan òrdefasi na kon a ben kon so, sondro wan Mekiman, ben lasi a man di a man taki-go-taki-kon so foeroe noso ben hori ensrefi don, taki a e fiti foe prakseri foe en leki fa bijbel e kari en, wan donman (wan sma di de na ini don noso di no man taki-go-taki-kon).” — Psalm 14:1.

¹¹ Wi e leri ala sani foe a Kownoekondre ini Bijbel. Bijbel de troetroe a skrifi Wortoe foe Gado? Foe troe a de so srefisrefi, so leki wi kan si na a wánfasi foe en, a taki di a e taki sani finifini ini akroederi nanga sabidensi, èn a krakti foe en foe kenki sma libi èn spesroetoe foe di den profeititori na ini e kon troe.a San de foe taki foe a Kownoe foe a Kownoekondre foe Gado, Jesus Krestes? A ben de troetroe? Den evangeliumtori èn den brifi foe den kresten Griki Boekoe di skrifi nanga jepi foe Gado en santa jeje, e boeweisi a historiafasi foe Jesus Krestes krin èn nanga overtoigi. Ini a tori foe a historiafasi foe Jesus, joe abi toe a kotoigi foe a djoe Talmud, di e taki foe en leki wan sma. Na so djoe nanga Romen historia skrifiman foe a fosi jarihondro G.T., e kotoigi foe en toe.

12, 13. Sortoe troetori e gi kotoigi foe a troefasi foe a Kownoekondre foe Gado?

¹² San de foe taki foe a troefasi foe a Kownoekondre srefi? Na ala sei a krestenhèit de na ini don ini a tori foe a Kownoekondre, so leki fa disi e sori ini a kragi disi foe wan prenspari Presbiterianman: „A ben de foe troe moro leki dritenti jari sensi mi ben arki wan domri di ben proeberi foe froeklari gi a pipel foe en a troefasi foe a Kownoekondre.” Ma tokoe, a meki kon santa foe Jehovah nen nanga jepi foe a Kownoekondre na a thema foe a Wortoe foe en. Gado srefi ben doe a fosi Kownoekondre pramisi: „Mi sa poti feantifasi a mindri joe nanga na oema èn na mindri joe siri èn en siri. A sa masi joe na ini na ede èn joe sa masi en na ini en bakafoetoe” (Genesis 3:15). A nâsi Israèl ben prenki a Kownoekondre a fesi, spesroetoe ini a ten foe a tiri foe kownoe Salomo (Psalm 72). Moro fara, a Kownoekondre ben de a thema foe a preiki foe Jesus (Mateus 4:17). A ben poti en na ini foeroe foe den agersitori foe en, so leki denwan ini Mateus kapitel 13. Jesus ben froeteri wi foe begi gi a Kownoekondre èn foe tan soekoe en fosi (Mateus 6:9, 10, 33). Foe taki en leti, dan den e kari a Kownoekondre foe Gado pikinmoro 150 tron ini den kresten Griki Boekoe.

¹³ A Kownoekondre na wan troetroe tiri, nanga krakti èn tirimakti, èn a sa meki ala reti froewakti kon troe. A abi wan heri ipi wet, di de foe feni ini bijbel. A Kownoekondre ben meki foeroe sani kon troe kaba. A abi loyaal sma di poti densrefi na en ondro — moro leki 4.000.000 Kotoigi foe Jehovah. Na 211 kondre den e preiki a boen njoensoe foe a Kownoekondre foe Gado, leki wan kontroe foe Mateus 24:14. Ini a dienstjari foe den, foe 1991, den ben gebroiki 951.870.021 joeroe foe preiki a Kownoekondre boskopoe. A wroko disi e gi bakapisi foe ala ten, di joe kan si, foe di ipi-ipi sma e leri a „soifri tongo” foe bijbel waarheid. — Sefania 3:9.

Feti a baka troesani foe a Kownoekondre

14. Fa wi kan meki a warderi foe wi kon moro bigi gi a troefasi foe a Kownoekondre?

¹⁴ Fa dan, wi kan feti a baka troesani foe a Kownoekondre? A howpoe foe wi moesoe abi en fondamenti troetroe tapoe wan tranga overtoigi. A njoen grontapoe di Gado pramisi moesoe de wan troesani gi wi (2 Petrus 3:13). Èn wi moesoe abi bribi ini a pramisi, taki Gado „sa figi ala watra-ai poeroe foe den ai [foe wi], èn dede no sa de moro, no wan sari, èn no wan babari èn no wan skin-ati no sa de moro” (Openbaring 21:4). Fa wi kan de seiker taki disi no de wan dren? Wi kan de seiker taki a sa kon troe ini a ten di Gado poti, foe di a no man lei (Titus 1:1, 2; Hebrewsma 6:18). Wi moesoe prakseri dipi foe den pramisi disi. Foe si wisrefi ini Gado njoen grontapoe èn foe njanboen foe den blesi foe a njoen grontapoe, a no wan dren di no man kon troe, ma na wan sori foe bribi. So leki fa Paulus e taki en, dan „bribi na a seiker froewakti foe sani di sma e howpoe a tapoe, a krin boeweisi foe troesani ma di sma no e si” (Hebrewsma 11:1). Meki wi tranga a bribi foe wi, foe di wi e njan doronomo foe a Wortoe foe Gado èn den kresten poeblikâsi di e jepi wi foe froestan èn foe doe san de ini Gado Wortoe. Èn omoro ten wi e gi foe froeteri trawan foe a Kownoekondre, oso-foe-oso èn na okasi, omoro wi e tranga a bribi foe wi èn e meki a howpoe foe wi ini a Kownoekondre kon moro krin.

15. Sortoe froeplekti wi abi ini a tori foe a kresten diniwroko?

¹⁵ Wi moesoe wroko toe ini wánfasi nanga troesani foe a Kownoekondre, foe di wi e meki a fasi foe wi diniwroko kon moro boen. Fa wi kan doe disi, foe di foeroe de foe doe ete? (Mateus 9:37, 38) Na odo troe taki, wan sma no owroe toemoesi noiti foe leri wan sani. Awansi omeni jari wi ben abi wan prati na a kotoigi wroko, wi kan doe a wroko disi moro boen. Efoe wi man handri a Wortoe foe Gado na wan moro boen fasi, dan wi man jepi trawan moro betre foe jere a sten foe a Kownoe, Jesus Krestes. (Teki gersi Johanes 10:16.) Te wi e hori na prakseri taki a têgo libi foe sma de ini a tori, dan wi moesoe wani foe wroko a gebied foe wi finifini, so taki wi kan gi den sma ibri tron baka na okasi foe sori sortoe sei den e teki, di foe den „skapoe” noso di foe den „bokoboko” (Mateus 25:31-46). A no de foe taki, dati disi wani taki foe skrifi ala den nen finifini foe den sma di no ben de na oso èn spesroetoe foe den wan di abi belangstelling gi a Kownoekondre boskopoe.

Tan feti a baka a Kownoekondre

16. Soema ben gi a toemoesi boen eksempel ini a feti di den ben feti a baka troesani foe a Kownoekondre, èn fa den e „graboe” a Kownoekondre?

¹⁶ Serjoesoe moeiti de fanowdoe foe tan feti a baka den troesani foe a Kownoekondre. Wi no e kisi deki-ati foe a fajafaja eksempel foe a fikapisi foe den salfoe kresten? Tintin jari langa den ben feti a baka den troesani foe a Kownoekondre. Den ben skrifi foe a feti disi di den ben feti a baka troesani foe a Kownoekondre, ini den wortoe foe Jesus: „Foe den dei foe Johanes a Dopoeman te leki now, a kownoekondre foe hemel na a marki di libisma e poesoepoesoe foe doro en, èn den wan di poesoepoesoe foe doro en, e graboe en” (Mateus 11:12). Dja a prakseri a no di foe feanti di e graboe a Kownoekondre. Na presi foe dati, disi e abi foe doe nanga a wroko foe den wan di o de foe a Kownoekondre. Wan bijbel sabiman ben taki: „Na a fasi disi den e skrifi foe a faja dati, a feti a baka èn doe moeiti sondro foe sma kan tapoe dati, foe a Mesian kownoekondre di e kon krosibei.” Salfoewan ben doe ala moeiti foe meki a Kownoekondre wan sani foe densrefi. Den srefi sortoe faja moeiti de fanowdoe foe a sei foe den „tra skapoe”, so taki den kan feni den boen foe de sma na grontapoe èn di e saka densrefi na ondro a hemel Kownoekondre foe Gado. — Johanes 10:16.

17. San sa de a lòt foe den di e feti a baka grontapoe dren?

¹⁷ Foe troe, wi e libi ini wan spesroetoe pisiten foe grani. Den sma di e feti a baka grontapoe dren den ai sa kon opo wan dei foe si fa sani de troetroe. Den skrifi heri boen foe a lòt foe den nanga den wortoe disi: „A sa moesoe pasa neleki te wan sma di abi angri e dren èn loekoe, a e njan, èn a e wiki troetroe èn a sili foe en leigi; èn neleki te wan sma di watra e kiri en e dren, èn loekoe, a e dringi, èn a wiki troetroe èn loekoe, a weri èn a sili foe en kon drei” (Jesaja 29:8). Wi kan de seiker, taki den dren foe grontapoe noiti sa gi wan sma satisfaksi èn meki en kolokoe.

18. Nanga a troefasi foe a Kownoekondre na ini prakseri, dan sortoe waka nanga libi wi moesoe feti a baka, nanga sortoe howpoe di de a wi fesi?

¹⁸ A Kownoekondre foe Jehovah na wan troesani. A e tiri fajafaja, èn na ogri seti foe sani disi e tanapoe a fesi wan bigi, pori di e tan foe ala ten. Foe dati ede, poti prakseri na tapoe a rai foe Paulus: „No meki wi sribi so leki fa den trawan e doe, ma meki wi tan na ai èn tan hori wi ede na wan” (1 Tesalonikasma 5:6). Meki wi tan meki wi ati èn prakseri, loekoe srapoe go na den troesani foe a Kownoekondre èn njanboen na so fasi foe têgo blesi. Èn meki a de a lòt foe wi, foe jere a Kownoe foe a Kownoekondre dati e taigi wi: „Kon, oenoe di ben kisi blesi foe mi Tata, teki a kownoekondre di ben sreka gi oenoe foe poti den fondamenti foe grontapoe.” — Mateus 25:34.

[Foetoewortoe]

Fa joe ben sa piki?

◻ San na grontapoe dren, èn foe san ede wi moesoe trowe den?

◻ Sortoe eksempel e sori a donfasi foe gi pasi na grontapoe dren?

◻ Sortoe troetori e boeweisi a troefasi foe a Mekiman, en Wortoe di skrifi, Jesus Krestes, nanga a Kownoekondre?

◻ Fa wi kan meki a bribi foe wi ini troesani foe a Kownoekondre kon moro tranga?

[Prenki na tapoe bladzijde 29]

Sma e kisi grontapoe dren moro foeroe foe di den e angri foe kisi goedoe na skin fasi

[Prenki na tapoe bladzijde 30]

Preiki a boen njoensoe na wan fasi foe feti a baka troesani foe a Kownoekondre

[Prenki na tapoe bladzijde 31]

Joe e feti a baka troesani foe a Kownoekondre, foe di joe e studeri a Wortoe foe Gado fajafaja?