Wan heri boen eksempel foe kresten zendingwroko
„Tron sma di e waka na mi baka, so leki mi e waka na Krestes baka.” — 1 KORENTESMA 11:1.
1. San na wan toe fasi di Jesus ben gi wan toemoesi aparti eksempel na ini gi den bakaman foe en foe waka na en baka? (Filipisma 2:5-9)
FA JESUS ben de wan toemoesi aparti eksempel gi den disipel foe en! Nanga ala prisiri a ben libi en hemel glori foe saka kon na grontapoe èn libi na mindri sondoe libisma. A ben de klariklari foe njan hebi pina foe froeloesoe libisma èn, san de moro prenspari, foe meki a nen foe en hemel Tata kon santa (Johanes 3:16; 17:4). Di Jesus ben tanapoe na fesi kroetoe gi en libi, sondro frede a ben froeklari: „Na foe disi mi gebore èn na foe disi mi kon na grontapoe, foe gi kotoigi foe a waarheid.” — Johanes 18:37.
2. Foe san ede a Jesus di ben opo baka, ben man gi den disipel foe en a komando foe go doro nanga a wroko di a ben bigin?
2 Bifo a dede foe en, Jesus ben gi den disipel foe en toemoesi boen skoro, so taki den ben kan go doro nanga a wroko foe gi kotoigi foe a Kownoekondre waarheid (Mateus 10:5-23; Lukas 10:1-16). So boen, baka na opobaka foe en, Jesus ben man foe gi a komando: „Go . . . èn meki disipel foe sma foe ala nâsi, dopoe den na nen foe a Tata èn foe a Manpikin èn foe a santa jeje èn leri den foe ondrow ala sani san mi ben komanderi oenoe.” — Mateus 28:19, 20.
3. Fa a wroko foe meki disipel ben bradi ensrefi, ma na ini sortoe kontren a ben e doe moro foeroe?
3 Den dri nanga afoe jari baka dati, den disipel foe Jesus ben gi jesi na a komando disi, ma den ben meki disipel soso na mindri den djoe, djoe proselietsma, nanga Samariasma di ben besnij. Ne Gado ben gi a komando taki na ini 36 G.T., a boen njoensoe ben moesoe preiki na Kornelius, wan man di no ben besnij, nanga na osofamiri foe en. Na ini a tinjari di ben kon na baka, tra heiden ben tjari kon ini a gemeente. Ma a ben sori taki foeroe foe a wroko ben doe soso na den kontren foe na owstoesei foe a Mindrikondre Se (a se di de na mindri Afrika nanga Europa). — Tori foe den Apostel 10:24, 44-48; 11:19-21.
4. Sortoe toemoesi aparti sani ben pasa na wan ten foe 47-48 G.T.?
4 Wan sani ben de fanowdoe foe boeweigi den kresten noso meki den man foe meki disipel foe djoe nanga heiden ini den kontren di ben de moro fara. So boen, na wan ten foe 47-48 G.T., den owroeman foe a gemeente foe Siria Antiokia, ben kisi a boskopoe disi foe Gado: „Poeroe gi mi na mindri ala sma, Barnabas nanga Saulus gi a wroko di mi ben kari den foe doe” (Tori foe den Apostel 13:2). Loekoe taki den ben sabi Paulus na a ten dati na a nen di a ben abi fosi, Saulus. Loekoe toe, taki Gado ben kari Barnabas bifosi Paulus, kande foe di na a ten dati den ben si Barnabas leki a moro owroewan foe den toe.
5. Foe san ede a tori foe a zendingwaka foe Paulus nanga Barnabas abi foeroe waarde gi kresten ini a ten disi?
5 A finifini tori foe a zendingwaka foe Paulus nanga Barnabas de wan bigi deki-ati gi Jehovah Kotoigi, spesroetoe gi zendeling nanga pionier di froisi gowe foe a foto pe den ben libi, foe dini Gado ini wan freimde libimakandra. Moro fara, wan sjatoe loekoe foe Tori foe den Apostel kapitel 13 nanga 14, foe troe sa boeweigi moro sma foe waka na Paulus nanga Barnabas baka èn meki a prati di den abi ini a toemoesi prenspari wroko disi foe meki disipel, kon moro bigi.
Na èilanti Ciprus
6. Sortoe eksempel den zendeling ben gi na Ciprus?
6 Sondro draidrai den zendeling ben loesoe nanga boto foe a lanpresi foe Siria foe Selisia, go na a èilanti Ciprus. Baka di den stòp na Salamis, den no ben komoto na a pasi di den ben teki, ma „ben bigin meki a wortoe foe Gado bekènti na ini den snoga foe den djoe.” Foe di den ben waka na baka a model foe Krestes, a no ben boen na den foe tan na ini a foto dati èn wakti den sma foe na èilanti foe kon na den. Na presi foe dati, den ben wroko „tapoe a heri èilanti.” Sondro degedege disi ben wani taki toe wan lo waka èn a kenki di den ben moesoe kenki sribipresi ibritron baka, foe di Ciprus na wan bigi èilanti èn a waka foe den ben tjari den go langalanga na a moro bigi pisi foe na èilanti. — Tori foe den Apostel 13:5, 6.
7. (a) Sortoe toemoesi aparti sani ben pasa na Pafos? (b) Gi sortoe fasi foe doe a tori disi e gi wi deki-ati?
7 Na a kaba foe a tan di den ben tan drape, den toe man ben kisi pai nanga wan toemoesi moi ondrofeni ini a foto Pafos. A tiriman foe na èilanti, Sergius Paulus, ben arki a boskopoe foe den èn „ben tron wan bribiman” (Tori foe den Apostel 13:7, 12). Paulus ben skrifi baka ten: „Oenoe e si a kari foe Gado, brada, taki Gado no ben kari foeroe koniwan na skin fasi, no foeroe maktiwan, no foeroe foe hei gebortoe” (1 Korentesma 1:26). Ma tokoe, na mindri den maktiwan di ben arki èn doe wan sani, joe ben abi Sergius Paulus. Na ondrofeni disi moesoe gi alasma deki-ati, spesroetoe den zendeling, foe abi wan positief loekoe tapoe a gi foe kotoigi na hei lantiman, neleki fa 1 Timoteus 2:1-4 e gi wi a deki-ati foe doe. Man di abi makti ini wan kondre ben gi foeroe jepi sontron na foetoeboi foe Gado. — Nehemia 2:4-8.
8. (a) Sortoe kenki ben sori ensrefi na ini a demakandra na mindri Barnabas nanga Paulus foe sensi a ten dati? (b) Na sortoe fasi Barnabas ben de wan moi eksempel?
8 Na ondro a krakti foe a jeje foe Jehovah, Paulus ben abi a moro bigi prati ini a drai di Sergius Paulus ben drai en libi (Tori foe den Apostel 13:8-12). So srefi, sensi a ten disi a e sori taki Paulus ben teki fesi. (Teki gersi Tori foe den Apostel 13:7 nanga Tori foe den Apostel 13:15, 16, 43.) Disi ben de ini akroederi nanga a wroko di Paulus ben kisi foe Gado na a ten di a ben drai en libi (Tori foe den Apostel 9:15). Kande so wan fasi fa sani waka ben tesi a sakafasi foe Barnabas. Ma na presi foe si a kenki disi leki wan afrontoe di den ben afrontoe en, dan so leki fa a sori, Barnabas ben gi grani na san a nen foe en wani taki, „Manpikin foe trowstoe” èn na wan loyaalfasi a ben jepi Paulus a heri zendingwaka èn baka ten di son djoe kresten ben kroetoe a diniwroko di Paulus nanga Barnabas ben doe na den heiden di no ben besnij (Tori foe den Apostel 15:1, 2). Fa disi na wan moi eksempel gi wi alamala, so srefi gi den sma di e libi ini zending-oso nanga Bethel-oso! Ala ten wi moesoe de klariklari foe meki kenki na theokrasia fasi èn gi ala wi jepi na denwan di den poti foe teki fesi na oenoe mindri. — Hebrewsma 13:17.
Na hei platapresi foe Pikin Asia
9. San wi e leri foe a de di Paulus nanga Barnabas ben de klariklari foe rèis go na Pisidia Antiokia?
9 Foe Ciprus, Paulus nanga Barnabas ben loesoe nanga boto go noordsei foe a pisi kondre Asia. Foe wan reide di den no kari, den zendeling no ben tan ini a kontren na sjorosei, ma den ben meki a langa, kefarlek waka foe so wan 180 km go na Pisidia Antiokia, di ben didon na mindri a hei platapresi foe Pikin Asia. Disi ben abi na ini toe a kren di den ben moesoe kren abra wan bergipasi èn saka go na wan pisi kontren di ben de so wan 1.100 m moro hei leki se. Bijbel sabiman J. S. Howson e taki: „Den kroektoe, abani gwenti foe a pipel disi, di ben libi tapoe den bergi dati, di e prati a hei platapresi . . . foe den pisi kondre na a sjoro na zuidsei, ben de bekènti na ini ala pisi foe historia foe owroeten.” Na sei foe dati, sani foe gron, watra nanga loktoe ben meki den zendeling de ini kefar. „No wan distrikt na Pikin Asia”, Howson e taki moro fara, „abi so aparti eigifasi foe den ’watra froedoe’ foe en leki a pisi foe Pisidia di lai bergi, pe liba e broko komoto na den foetoe foe bigi klipston, noso e saka kon na wan werdri fasi komoto na ini smara dipi olo.” Den finifini tori disi e jepi wi foe si na wi fesi den sortoe waka di den zendeling ben de klariklari foe meki foe panja a boen njoensoe (2 Korentesma 11:26). Na a srefi fasi ini a ten disi, foeroe foetoeboi foe Jehovah e kaka foetoe gi ala sortoe hendri, so taki den man miti sma èn prati a boen njoensoe nanga den.
10, 11. (a) Fa Paulus ben hori wán penti di a poebliki foe en ben agri nanga en? (b) Foe san ede foeroe djoe kande ben froewondroe foe jere foe den pina foe a Mesias? (c) Sortoe froeloesoe Paulus ben poti na fesi den arkiman foe en?
10 Foe di wan djoe snoga ben de na Pisidia Antiokia, den zendeling ben go drape fosi, so taki den ben man gi den sma di ben sabi a Wortoe foe Gado moro boen, wan okasi foe teki a boen njoensoe. Di den kari Paulus foe taki, a ben opo tanapoe èn ben hori wan kefarlek moi poebliki taki. Na heri taki, a ben tan hori wan penti di den djoe nanga proselietsma, di ben de na ini a poebliki, ben e agri nanga en (Tori foe den Apostel 13:13-16, 26). Baka den bigin wortoe foe en, Paulus ben loekoe sjatoe a barinen historia foe den djoe èn ben memre den taki Jehovah ben teki den afo foe den na mindri trawan èn baka dati ben froeloesoe den foe Egipti, so srefi fa a ben jepi den foe feti èn wini den sma di ben libi ini a Pramisi Kondre. Baka dati Paulus ben tjari kon na fesi fa Jehovah ben handri nanga David. Den sortoe tori disi ben de prenspari gi den djoe ini a fosi jarihondro bika den ben froewakti taki Gado ben sa opo wan bakapikin foe David leki wan froeloesoeman èn wan têgo tiriman. Ne, sondro frede Paulus ben meki bekènti: „Foe a geslakti foe a man [David] disi, akroederi a pramisi foe en, Gado meki wan froeloesoeman kon gi Israèl, Jesus.” — Tori foe den Apostel 13:17-23.
11 Ma a sortoe froeloesoeman di foeroe djoe ben froewakti, ben de wan sroedati di abi deki-ati èn di ben sa froeloesoe den foe a basi di Rome ben basi den èn di ben sa poti a djoe nâsi moro hei moro ala trawan. Foe dati ede, sondro degedege den ben froewondroe foe jere Paulus e taki, dati den eigi relisi tiriman ben gi a Mesias abra foe den kiri en. „Ma Gado ben opo en foe dede”, Paulus ben froeklari sondro frede. Na a kaba foe a taki foe en, a ben sori a poebliki foe en taki den ben kan kisi wan toemoesi moi sortoe froeloesoe. „Meki oenoe . . . kon sabi disi”, a ben taki, „taki nanga jepi foe a Sma disi pardon foe sondoe e meki bekènti na oenoe; èn taki foe ala sani foe di den no ben man froeklari oenoe foe no abi fowtoe nanga jepi foe a wet foe Moses, ibriwan di e bribi, den e froeklari nanga jepi foe a Sma disi taki a no abi fowtoe.” Paulus ben kaba a taki foe en, foe di a ben gi a poebliki foe en a froemane foe no poti densrefi na mindri den foeroe sma, di Gado ben froeteri na fesi foe den taki den ben sa trowe a toemoesi moi presenti foe froeloesoe. — Tori foe den Apostel 13:30-41.
12. San ben de a bakapisi foe a lezing foe Paulus, èn fa disi moesoe gi wi deki-ati?
12 Fa disi ben de wan taki di ben pristeri na wan boen fasi èn di ben abi en fondamenti tapoe bijbel! San a poebliki ben doe na tapoe dati? „Foeroe foe den djoe èn foe den proselietsma di ben e anbegi Gado ben waka na Paulus nanga Barnabas baka” (Tori foe den Apostel 13:43). Fa disi de wan deki-ati gi wi ini a ten disi! Meki na a srefi fasi wi doe ala san wi man foe pristeri a waarheid na wan boen fasi, awansi a de ini wi poebliki diniwroko noso ini kommentaar nanga lezing na wi gemeente konmakandra. — 1 Timoteus 4:13-16.
13. Foe san ede den zendeling ben moesoe libi Pisidia Antiokia, èn sortoe aksi ben opo ede kon ini a tori foe den njoen disipel?
13 Den sma na Pisidia Antiokia, di no so langa ben kisi belangstelling, no ben man hori a boen njoensoe disi gi densrefi. Leki bakapisi, „a tra sabat pikinmoro a heri foto ben kon makandra foe jere a wortoe foe Jehovah.” Èn heri esi a boskopoe ben panja ini a foto. Foe taki en leti, „a wortoe foe Jehovah ben tan e panja ensrefi ini a heri kondre” (Tori foe den Apostel 13:44, 49). Na presi foe bari a sani disi wan switikon, dan djoe di ben djaroesoe, ben abi boen bakapisi nanga a trowe di den ben meki sma trowe den zendeling dorosei foe a foto (Tori foe den Apostel 13:45, 50). Fa disi ben abi krakti tapoe den njoen disipel? Den ben brokosaka èn ben tapoe nanga a wroko?
14. Foe san ede gensman no ben kan meki wan kaba kon na a wroko di den zendeling ben bigin, èn san wi e leri foe disi?
14 Nôno, foe di disi ben de Gado wroko. So srefi, den zendeling ben poti wan boen fondamenti foe bribi ini Masra Jesus Krestes di ben opobaka. A de krin foe dati ede, taki den njoen disipel ben si Krestes èn no den zendeling leki, a Tiriman foe den. So boen, wi e leisi taki den ben „tan kon foeroe nanga prisiri èn santa jeje” (Tori foe den Apostel 13:52). Fa disi de wan deki-ati gi den zendeling nanga tra sma di e meki disipel ini a ten disi! Efoe wi e doe a pisi foe wi na wan sakafasi èn nanga faja, Jehovah Gado nanga Jesus Krestes sa blesi a diniwroko foe wi. — 1 Korentesma 3:9.
Ikonium, Listra nanga Derbe
15. Sortoe fasi foe doe sani den zendeling ben abi na Ikonium, èn nanga sortoe bakapisi?
15 Paulus nanga Barnabas ben rèis now so wan 140 km zuid owstoesei go na a tra foto, Ikonium. A frede foe kisi froefolgoe no ben tapoe den foe doe a srefi fasi leki na Antiokia. Leki wan bakapisi, bijbel e taki: „Wan bigi ipi foe djoe nanga Grikisma ben tron bribiman” (Tori foe den Apostel 14:1). Agen den djoe di no ben teki a boen njoensoe ben soetoe faja foe gens kan kon. Ma den zendeling ben horidoro èn ben gi foeroe ten na Ikonium foe jepi den njoen disipel. Dan, baka di den ben kon sabi taki den djoe gensman foe den ben o ston den, dan Paulus nanga Barnabas ben lowe gowe na a tra kontren, „Listra nanga Derbe nanga a kontren di de lontoe den”, san ben de wan koni sani foe doe. — Tori foe den Apostel 14:2-6.
16, 17. (a) San ben pasa nanga Paulus na Listra? (b) Fa a fasi fa Gado ben handri nanga na apostel ben abi krakti tapoe wan jonkoeman foe Listra?
16 Na wan deki-atifasi „den ben tan meki a boen njoensoe bekènti” ini a njoen kontren disi di den ben wroko foe a fosi tron (Tori foe den Apostel 14:7). Di djoe na Pisidia Antiokia nanga Ikonium ben jere disi, den ben kon langalanga na Listra èn ben kisi den ipi sma na den sei foe ston Paulus. Foe di Paulus no ben abi ten foe lowe, den ben trowe ston na en tapoe, so taki den gensman foe en ben de overtoigi taki a ben dede. Den ben srepi en go na dorosei foe a foto. — Tori foe den Apostel 14:19.
17 Joe kan prakseri a sari di disi ben gi den njoen disipel? Ma a ben froewondroe den srefisrefi taki, di den ben go tanapoe lontoe Paulus, a opo tanapoe! Bijbel no e taki efoe wan jonkoeman di ben nen Timoteus, ben de wan foe den njoen disipel disi. Ma seiker a ben kon sabi a fasi fa Gado ben handri nanga Paulus na wan noso tra ten èn foe troe a ben abi krakti na tapoe a jongoe prakseri foe en. Paulus ben skrifi ini en di foe toe brifi gi Timoteus: „Joe ben waka sei na sei nanga a leri foe mi, a libi foe mi, . . . den sortoe sani di ben pasa nanga mi na Antiokia, na Ikonium, na Listra, den sortoe froefolgoe di mi kisi; èn tokoe Masra ben fri mi foe den alamala” (2 Timoteus 3:10, 11). Wán noso toe jari so baka di den ben ston Paulus, a ben drai go baka na Listra èn a ben kon si taki a jongoe Timoteus dati ben de wan kresten di ben de wan boen eksempel „èn den brada na Listra èn Ikonium ben taki boen sani [foe en]” (Tori foe den Apostel 16:1, 2). So boen, Paulus ben teki en leki wan kompe foe rèis nanga en. Disi ben jepi Timoteus foe gro na jeje fasi èn baka wan pisi ten a ben de bekwaam foe Paulus seni en go fisiti difrenti gemeente (Filipisma 2:19, 20; 1 Timoteus 1:3). Na a srefi fasi, ini a ten disi, fajafaja foetoeboi foe Gado abi na wan toemoesi moi fasi, krakti tapoe jongoewan di foeroe foe den e gro kon tron warti foetoeboi foe Gado, neleki Timoteus.
18. (a) San ben pasa nanga den zendeling na Derbe? (b) Sortoe okasi ben opo now gi den, ma sortoe pasi den ben teki?
18 Na mamanten di ben kon baka di Paulus ben eskèip dede na Listra, a ben go na Derbe makandra nanga Barnabas. A leisi disi no wan gensman ben kon na en baka èn bijbel e taki, ’den ben meki wan heri ipi disipel’ (Tori foe den Apostel 14:20, 21). Di den ben opo wan gemeente na Derbe, Paulus nanga Barnabas ben moesoe teki wan bosroiti. Wan pasi di den Romesma ben meki èn di sma ben rèis foeroe na tapoe, ben go doro foe Derbe go na Tarsus. A no ben fara foe waka go baka na Siria Antiokia. Kande dati ben de a moro boen pasi foe drai go baka èn den zendeling dati ben kan abi a firi taki now den ben abi wan rostoe fanowdoe. Ma foe di Paulus nanga Barnabas ben waka na baka a Meester foe den, den ben si wan moro bigi fanowdoe. — Markus 6:31-34.
Doe a wroko foe Gado dorodoro
19, 20. (a) Fa Jehovah ben blesi den zendeling, foe di den ben drai go baka na Listra, Ikonium, nanga Antiokia? (b) San disi e leri a pipel foe Jehovah ini a ten disi?
19 Na presi foe teki a sjatoe pasi go na oso, dan na wan deki-atifasi den zendeling ben drai go baka èn tjari wan fisiti na den srefi foto agen pe a libi foe den ben de ini kefar. Jehovah ben blesi den foe a broko di den ben broko den ede nanga den njoen skapoe sondro foe prakseri densrefi nomo? Ija, a no de foe taki, foe di a tori e froeteri wi taki den ben abi boen bakapisi ini „a meki kon tranga foe den sili foe den disipel, ala di den ben gi den deki-ati foe tan ini bribi.” Na wan joistifasi den ben taigi den njoen disipel dati: „Wi moesoe ondrofeni foeroe banawtoe foe wi kan go ini a kownoekondre foe Gado” (Tori foe den Apostel 14:21, 22). Paulus nanga Barnabas ben memre den toe na a kari di den ben kisi foe de kompe erfgenaam ini Gado en Kownoekondre di ben o kon. Ini a ten disi, wi moesoe gi a srefi deki-ati na njoen disipel. Wi kan tranga den foe den horidoro na ondro tesi, foe di wi e meki den e si a howpoe foe têgo libi na grontapoe na ondro a tiri foe a srefi Kownoekondre dati foe Gado di Paulus nanga Barnabas ben preiki.
20 Bifo Paulus nanga Barnabas ben gowe libi wan foto, den ben jepi a gemeente foe a foto dati foe orga sani moro boen. A krin, taki den ben skoro bekwaam man èn ben poti den foe teki fesi (Tori foe den Apostel 14:23). Degedege no de taki disi ben jepi taki moro gro kon. Na a srefi fasi, zendeling nanga trawan ini a ten disi, e froisi gowe sontron, baka di den jepi denwan di abi ondrofeni, foe go na fesi te leki den man tjari frantiwortoe èn den e go doro nanga a boen wroko foe den ini tra presi pe a fanowdoe de moro bigi.
21, 22. (a) San ben pasa baka di Paulus nanga Barnabas ben kaba a zendingwaka foe den? (b) Sortoe aksi disi e meki opo kon?
21 Di, te foe kaba, den zendeling ben drai go baka na Siria Antiokia, den ben man firi satisfaksi troetroe. Ija, bijbel tori e froeteri taki den ben „doe” a wroko di Gado ben gi den foe doe „dorodoro” (Tori foe den Apostel 14:26). Wi kan froestan taki a froeteri di den ben froeteri den ondrofeni foe den, ben tjari „bigi prisiri gi ala den brada” (Tori foe den Apostel 15:3). Ma san de foe taki foe a ten di ben de na den fesi? Den ben sa sidon langa den foetoe èn abi satisfaksi foe di sani ben waka boen gi den, so leki fa sma gwenti foe taki en? Nôno, kwetikweti. Baka di den ben fisiti a tiri skin na Jerusalem foe teki wan bosroiti ini a tori foe besnij, den toe man ben go meki zendingwaka baka. A leisi disi den ben go na difrenti sei. Barnabas ben teki Johanes Markus èn ben go na Ciprus, ala di Paulus ben feni wan njoen patna, Silas, èn ben rèis ini Siria nanga Silisia (Tori foe den Apostel 15:39-41). A ben de na a waka disi di a ben teki a jongoe Timoteus na mindri trawan èn tjari en go nanga en.
22 Bijbel no e taki foeroe foe den bakapisi foe Barnabas en di foe toe waka. Ini a tori foe Paulus, a ben go doro ini njoen kontren èn ben opo gemeente ini, awansi fa no fa, feifi foto — Filipi, Berea, Tesalonika, Korente nanga Efeise. San ben de a sroto foe a toemoesi aparti fasi fa sani ben waka boen gi Paulus? Den srefi gronprakseri abi boen bakapisi gi kresten di e meki disipel ini a ten disi?
Joe e memre disi ete?
◻ Foe san ede Jesus de wan toemoesi boen eksempel foe waka na en baka?
◻ Na sortoe fasi Barnabas ben de wan eksempel?
◻ San wi e leri foe a lezing foe Paulus na Pisidia Antiokia?
◻ Fa Paulus nanga Barnabas ben doe a wroko foe den dorodoro?
[Prenki na tapoe bladzijde 12]
A hori di na apostel Paulus ben horidoro na ondro froefolgoe foe ala ten ben naki na ati foe a jonkoeman Timoteus