Jehovah e gi pardon foeroe
„Meki na ogri sma libi en pasi èn a man foe takroedoe den prakseri foe en; èn meki a drai go baka na Jehovah, . . . bika na en sa gi pardon foeroe.” — JESAJA 55:7.
1. Nanga san sma di kisi pardon foe Jehovah, blesi now?
JEHOVAH e gi pardon na sma di doe fowtoe èn di abi berow èn a e meki den njanboen now foe wan vrede foe a jeje ini wan paradijs na jeje fasi. Disi de so foe di den e doro den markitiki disi: „Soekoe Jehovah oen pipel, ala di oenoe kan feni en. Kari en, ala di a sori taki a de krosibei. Meki a gadolowsoeman libi a pasi foe en èn a man foe takroedoe den prakseri foe en; èn meki a drai go baka na Jehovah, di sa sori en sari-ati èn na wi Gado, bika na en sa gi pardon foeroe.” — Jesaja 55:6, 7.
2. (a) San a wani taki foe ’soekoe Jehovah’ èn ’foe drai go baka na en’, so leki fa den e taki na Jesaja 55:6, 7? (b) Foe san ede djoe di ben de ini katibo na Babilon ben moesoe drai go baka na Jehovah èn san ben pasa nanga wan toe foe den?
2 Foe „soekoe Jehovah” èn kari en nanga bribi, wan ogri sma moesoe libi a fowtoe pasi foe en èn ibri prakseri foe doe trawan ogri. A fanowdoe foe „drai go baka na Jehovah” e sori taki a sma di doe fowtoe ben libi Gado, di a ben abi wan krosibei matifasi nanga en, wan leisi kaba. Dati ben de a kefal nanga den sma di ben libi na a kondre foe Juda, di a getrow di den no ben de getrow na Gado, te foe kaba ben abi katibo na Babilon leki bakapisi. Den djoe di ben de na ini katibo, ben moesoe drai go baka na Jehovah, foe di den ben e sori berow foe den fowtoe doe foe den, di ben abi a go di den ben go na ini katibo na Babilon leki bakapisi èn san den ben froeteri na fesi kaba, a tan di a kondre foe den ben sa tan sondro libi 70 jari langa. Ini 537 bifo G.T., wan fikapisi foe djoe, di ben frede Gado èn di wan lantiwet ben fri den foe Babilon, ben go libi baka ini a kondre dati (Esra 1:1-8; Danièl 9:1-4). So bigi a krakti foe a meki kon njoen baka dati ben de, taki den ben agersi a kondre dati foe Juda nanga a Paradijs foe Eden. — Esekièl 36:33-36.
3. Fa a fikapisi foe Israèl na jeje fasi ben abi wan ondrofeni leki a di foe den sma foe Juda di ben de na ini katibo èn di ben frede Jehovah?
3 Israèlsma na jeje fasi ben abi wan ondrofeni leki di foe den djoe di ben frede Gado èn di ben drai go baka na Juda baka a katibo na Babilon (Galasiasma 6:16). A fikapisi foe Israèl na jeje fasi ben tjari wan toe kenki kon ini a fasi èn a prakseri foe den, leti baka a Fosi Grontapoefeti. A jari 1919 ben de wan marki foe a kaba foe a katibo di den ben de na ini foe di den ben komoto krinkrin foe a boen wani foe Gado èn ben go na ini a kontren foe Babilon a Bigiwan, a grontapoe tiri foe falsi relisi. Foe di den ben abi berow foe sondoe di ben abi foe doe nanga frede gi libisma èn a doe di den no ben doe wroko ini a dienst foe Jehovah, a ben fri den foe Babilon a Bigiwan, ben tjari den kon baka na den joisti presi na jeje fasi èn ben gebroiki den baka foe preiki a Kownoekondre boskopoe. Wan paradijs na jeje fasi ben gro moi na mindri a pipel foe Gado sensi a ten dati, foe gi a santa nen foe en grani (Jesaja 55:8-13). Na Israèl foe owroeten nanga en disi ten prenki, foe dati ede, e gi wi krin boeweisi taki blesi e kon baka di Gado gi pardon èn taki Jehovah foe troe e gi pardon foeroe na sma di abi berow.
4. Sortoe frede son foetoeboi foe Jehovah abi?
4 Den disi ten foetoeboi foe Jehovah kan froetrow foe dati ede na tapoe a gi di a e gi pardon. Tokoe sonwan foe den lasi-ati krinkrin foe fowtoe di den ben meki èn a firi taki den fowtoe pikinmoro e moro den. Den no e firi densrefi warti foe tan ini a paradijs na jeje fasi. Te joe loekoe en boen, dan sonwan frede taki den doe wan sondoe di no abi pardon èn taki noiti den sa kisi pardon foe Jehovah. Dati troe?
Son sondoe no abi pardon
5. Foe san ede wi kan taki, dati son sondoe no abi pardon?
5 Son sondoe no abi pardon. Jesus Krestes ben taki: „Gi ala sondoe èn gongosa, sma sa kisi pardon ma gi a gongosa kontrari a jeje sma no sa kisi pardon” (Mateus 12:31). So boen, gi a gongosa kontrari a santa jeje foe Gado, noso en wroko krakti, sma no sa kisi pardon. Na apostel Paulus ben abi so wan sondoe na prakseri di a ben skrifi: „A no man moro foe meki den sma kisi berow, di foe wantron èn foe ala ten ben abi a leti . . . , ma di ben fadon komoto na bribi, bika gi densrefi den e anga a Manpikin foe Gado baka na wan postoe èn e meki a kisi sjen na poebliki.” — Hebrewsma 6:4-6.
6. San e meki taki wan sondoe abi pardon efoe no?
6 Gado wawan sabi efoe wan sma ben doe a sondoe di sma no e kisi pardon foe en. Ma Paulus ben tjari a tori disi kon na krin di a ben skrifi: „Efoe wi e doe sondoe foe espresi, baka di wi kisi a soifri reti sabi foe waarheid, dan no wan srakti ofrandi gi sondoe e tan abra, ma wan seiker toemoesi takroe froewakti foe kisi kroetoe [de]” (Hebrewsma 10:26, 27). Wan sma di e doe sani foe espresi sabi heri boen san a e doe noso na wan „tranga-edefasi èn foeroetron na wan tranga-jesifasi a wani foe doe san en wani” (Webster’s New Collegiate Dictionary). Ibriwan sma di foe espresi èn na wan tranga-edefasi e go doro foe doe sondoe, baka di a ben sabi waarheid no e kisi pardon. Foe dati ede, a no a sondoe someni srefi ma na a kondisi foe na ati, o foeroe espresi de ini a tori, dati na a sani di e bepaal efoe a sondoe na wan di abi pardon efoe no. Na a tra sei, san de kande a kefal te wan kresten di doe fowtoe, broeja srefisrefi foe a fowtoedoe foe en? A broko di a e broko en ede so foeroe e sori kande taki a no ben doe, te joe e loekoe en boen, wan sondoe di no abi pardon.
Den sondoe foe den ben de denwan di no abi pardon
7. Foe san ede wi kan taki, dati sonwan foe den relisi gensman foe Jesus ben doe sondoe di no abi pardon?
7 Son djoe relisi tiriman di ben gens Jesus ben doe espresi sondoe, so boen sondoe di no abi pardon. Ala di den ben si a wroko foe a santa jeje foe Gado nanga jepi foe Jesus, di a ben doe boen sani èn ben doe wondroe, den kerki fesiman dati ben taki, dati a krakti foe en ben kon foe Belsebub, noso Satan Didibri. Den ben sondoe, ala di den ben sabi heri boen taki a no ben kan de tra fasi taki a ben de a jeje foe Gado di ben e wroko. So boen den ben doe sondoe di no ben abi pardon, foe di Jesus ben taki: „Ma efoe wan sma e taki sani kontrari a santa jeje, a no sa kisi pardon foe disi, nôno, no ini a seti foe sani disi, no ini a wan di e kon.” — Mateus 12:22-32.
8. Foe san ede a sondoe foe Judas Iskariòt no ben abi pardon?
8 A sondoe foe Judas Iskariòt no ben abi pardon toe. A tori di a ben tori Jesus ben de na espresi heimarki, foe wan waka nanga libi foe hoigrifasi èn wan fasi foe no de eerlijk, ala di a ben sabi heri boen san a ben doe. Foe eksempel, di Judas ben si Maria e salfoe Jesus nanga diri oli, a ben aksi: „Foe san ede den no ben seri a switismeri oli disi foe drihondro dinari èn gi dati na den pôtisma?” Na apostel Johanes ben taki moro fara: „Ma [Judas] ben taki disi, no foe di a ben broko en ede nanga den pôtiwan, ma foe di a ben de wan foefoeroeman èn a ben abi a monikisi èn a ben gwenti foe poeroe a moni di den ben poti na ini.” No langa baka dati, Judas ben tori Jesus foe 30 solfroe moni (Johanes 12:1-6; Mateus 26:6-16). A troe, taki Judas ben tan abi wan hebi firi foe konsensi fonfon èn ben kiri ensrefi (Mateus 27:1-5). Ma a no ben kisi pardon, foe di a waka nanga libi foe en, doronomo ben sori taki a ben e prakseri ensrefi nomo èn a doe foe en foe tori Jesus, ala di a ben sabi heri boen san a ben doe, ben sori taki a sondoe kontrari a santa jeje. Fa a ben joisti taki Jesus ben moesoe kari Judas „a manpikin foe pori”! — Johanes 17:12; Markus 3:29; 14:21.
Den ben kisi pardon foe den sondoe foe den
9. Foe san ede Gado ben gi David pardon foe den sondoe foe en, di ben abi foe doe nanga Batseiba?
9 Espresi sondoe de heri tra fasi leki den fowtoe foe den sma di kisi pardon foe Gado. Teki kownoe David foe Israèl leki eksempel. A ben doe soetadoe nanga Batseiba, a wefi foe Uria èn baka ten a ben meki Joab seti en so, taki Uria ben dede ini wan feti (2 Samuèl 11:1-27). Foe san ede Gado ben sori David sari-ati? Na a fosi presi foe a Kownoekondre froebontoe ede, ma so srefi foe David en eigi sari-atifasi nanga en opregti berow. — 1 Samuèl 24:4-7; 2 Samuèl 7:12; 12:13.
10. Foe san ede Gado ben gi Petrus pardon ala di a ben sondoe serjoesoe?
10 Prakseri na apostel Petrus toe. A ben sondoe serjoesoe di a ben taki ibritron baka taki a no ben sabi Jesus. Foe san ede Gado ben gi Petrus pardon? Tra fasi leki Judas Iskariòt, Petrus ben de eerlijk ini a dienst foe Gado èn Krestes. Na apostel disi en sondoe ben doe foe di a ben swaki na skin fasi èn ben abi troetroe berow èn „ben krei hebi”. — Mateus 26:69-75.
11. Fa joe ben sa taki foe „berow” èn san wan sma ben sa moesoe doe efoe a abi troetroe berow?
11 Den eksempel di wi kari na fesi e sori taki srefi wan sma di doe bigi sondoe, kan kisi pardon foe Jehovah Gado. Ma fa na ati foe wan sma moesoe de foe a man kisi pardon? Troetroe berow de prenspari efoe wan kresten di doe sondoe wani kisi pardon foe Gado. Foe abi berow wani taki „a drai di wan sma e drai baka gi sondoe, foe di a abi dipi sari èn na wan sakafasi e sori taki a ben doe fowtoe” noso „firi sari noso na ati di a e ati wan sma dipi foe san a ben doe noso no ben doe” (Webster’s Third New International Dictionary). Wan sma di abi troetroe berow ben sa sori doronomo firi foe hebi konsensi fonfon foe ibri sjen, sari, noso problema di a sondoe foe en ben tjari tapoe a nen foe Jehovah nanga en organisâsi. A sma di doe fowtoe èn di abi berow ben sa sori froktoe toe akroederi a berow dati, doe wroko di e fiti na berow (Mateus 3:8; Tori foe den Apostel 26:20). Foe eksempel, efoe a ben foefoeroe wan sma, a ben sa teki reidelek stap foe pai a lasi di a meki a sma lasi (Lukas 19:8). So wan kresten di abi berow abi boen reide foe bijbel, foe abi a froetrow taki Jehovah sa gi en pardon foeroe. San na den reide disi?
Reide foe abi froetrow ini a gi di Gado e gi sma pardon
12. Tapoe a fondamenti foe san Psalm 25:11 e sori taki wan sma di abi berow kan begi foe kisi pardon?
12 Wan sma di doe fowtoe èn di abi berow kan begi nanga a froetrow foe kisi pardon tapoe a fondamenti foe Jehovah nen. David ben begi: „Foe joe nen ede, O Jehovah, joe moesoe gi mi pardon srefi foe a fowtoe foe mi, bika a bigi srefisrefi” (Psalm 25:11). So wan begi, makandra nanga berow foe ibri sjen di a sma di doe fowtoe tjari tapoe a nen foe Gado, moesoe wroko toe leki wan tapoe-skreki gi bigi sondoe ini a ten di e kon.
13. Sortoe ròl begi abi ini a gi di Gado e gi pardon?
13 Jehovah Gado e gi piki tapoe na opregti begi foe den foetoeboi foe en di doe fowtoe ma di abi berow. Foe eksempel, Jehovah no ben gi David dofoesei, di a ben begi nanga en heri ati, baka di a ben kon froestan o bigi a sondoe foe en ben de, di ben abi foe doe nanga Batseiba. Foe taki en leti, den wortoe foe David na Psalm 51 e sori den dipi firi foe foeroe sma di e begi serjoesoe. A ben begi: „Sari foe mi, O Gado, akroederi a lobi boen-atifasi foe joe. Figi den fowtoe foe mi poeroe akroederi a de di den sari-ati foe joe de pasa marki. Wasi den fowtoe foe mi poeroe krinkrin èn krin mi srefi foe den sondoe foe mi. Den srakti-ofrandi gi Gado na wan jeje di broko; wan ati di broko èn masi, o Gado, joe no sa wisiwasi mi.” — Psalm 51:1, 2, 17.
14. Fa den Boekoe e gi a djaranti taki Gado e gi pardon na den sma di abi bribi ini a froeloesoe-ofrandi foe Jesus?
14 Gado e gi pardon na den sma di e sori bribi ini a froeloesoe ofrandi foe Jesus. Paulus ben skrifi: „Nanga jepi foe en wi abi a froeloesoe nanga a loesoeprèis nanga jepi foe a broedoe foe en, ija, a pardon foe wi sondoe, akroederi a goedoe foe en no-froedini boenfasi” (Efeisesma 1:7). Nanga a srefi sani na prakseri na apostel Johanes ben skrifi: „Mi jongoe pikin, mi e skrifi oen den sani disi, foe oen no doe wan sondoe. Èn srefi efoe wan sma doe wan sondoe, dan wi abi wan jepiman na a Tata, Jesus Krestes, wan regtfardikiwan. Èn a de wan soen-ofrandi foe wi sondoe, ma no wawan foe di foe wi, ma so srefi foe a heri grontapoe.” — 1 Johanes 2:1, 2.
15. San wan sondoeman di abi berow moesoe doe foe tan njanboen foe a sari-ati foe Gado?
15 A sari-ati foe Jehovah e gi a sma di doe fowtoe èn di abi berow, wan fondamenti foe abi a froetrow taki Gado kan gi en pardon. Nehemia ben taki: „Joe na wan Gado, foe doe foe gi pardon, foe boen-ati èn sari-ati, joe ati no e bron esi-esi èn joe abi lobi boen-atifasi pasa marki.” (Nehemia 9:17; teki gersi Exodus 34:6, 7.) A no de foe taki, dati te a sma di doe sondoe wani foe njanboen doronomo foe a sari-ati foe Gado, a moesoe feti foe doe a wet foe Gado. Neleki fa a psalm singiman e taki, „meki den sari-ati foe joe kon na mi, so taki mi kan tan libi go doro; bika a wet foe joe mi lobi sote. Den sari-ati foe joe foeroe, o Jehovah. Akroederi den kroetoe bosroiti foe joe, o hori mi na libi.” — Psalm 119:77, 156.
16. Sortoe trowstoe de ini a tori taki Jehovah e hori wi sondoe fasi na prakseri?
16 Foe di Jehovah e hori a sondoe kondisi foe wi na prakseri, dan disi e gi wan sma, di doe fowtoe ma di abi berow, trowstoe toe èn reide foe begi nanga a froetrow taki Gado sa gi en pardon (Psalm 51:5; Romesma 5:12). A psalm singiman David ben gi djaranti di e gi trowstoe, di a ben froeklari: „A [Jehovah Gado] no ben doe srefi nanga wi akroederi den sondoe foe wi, èn a no tjari na wi tapoe akroederi den ogridoe foe wi san wi e froedini. Bika so leki den hemel de moro hei leki grontapoe, na so en lobi boenfasi de moro hei gi den di e frede en. So fara leki na son-opo de foe a sondongo, na so fara a ben poeroe den sondoe foe wi poti gowe. So leki wan papa e sori sari-ati gi en manpikin, na so Jehovah sori sari-ati gi den di e frede en. Bika ensrefi sabi heri boen fa den meki wi, foe di a e hori ini prakseri taki wi de stòf” (Psalm 103:10-14). Ija, wi hemel Tata abi srefi moro sari-ati èn e gi srefi moro trowstoe leki wan libisma papa noso mama.
17. Sortoe waarde a nen di wan sma meki foe getrow dienst gi Gado, abi ini a tori foe kisi pardon?
17 Wan sondoeman di abi berow kan begi foe kisi pardon nanga a froetrow taki Jehovah no sa frigiti a nen di a meki foe getrow dienst. Nehemia no ben begi foe kisi pardon, ma a ben taki: „Prakseri mi, o mi Gado, foe boen” (Nehemia 13:31). Wan kresten di abi berow kan feni trowstoe ini den wortoe: „Gado no de onregtfardiki, so taki a ben sa frigiti a wroko foe joe èn a lobi di joe sori gi en nen.” — Hebrewsma 6:10.
Jepi foe owroeman
18. San moesoe doe te a sondoe foe wan kresten siki en na jeje fasi?
18 Ma fa a de efoe wan kresten e firi taki a no e fiti foe tan ini a paradijs na jeje fasi noso a no man begi, foe di den sondoe foe en ben siki en na jeje fasi? „Meki a kari den owroeman foe a gemeente kon èn meki den begi gi en foe di den e lobi en nanga oli ini a nen foe Jehovah”, a disipel Jakobus ben skrifi. „Èn a begi foe bribi sa meki a sma di no e firi ensrefi boen, kon betre èn Jehovah sa opo en. Èn efoe a ben doe sondoe, a sa gi en pardon.” Ija, gemeente owroeman kan begi nanga boen bakapisi nanga èn gi wan kompe bribiman di abi berow ini a howpoe foe meki a kon kisi wan boen gesontoe baka na jeje fasi. — Jakobus 5:14-16.
19. San wan sma di sluit uit moesoe doe foe kisi pardon èn foe den teki en baka ini a gemeente?
19 Srefi te wan kroetoekomte e sluit uit wan sondoeman di no abi berow, a no abi foe de so taki a doe wan sondoe di no abi pardon. Ma efoe a wani foe kisi pardon èn foe den teki en baka ini a gemeente, a moesoe gi jesi na den wet foe Gado na wan sakafasi, sori froktoe di e fiti na berow èn aksi den owroeman foe meki den teki en baka ini a gemeente. Baka di wan hoeroedoeman ben sluit uit foe a gemeente ini Korente foe owroeten, Paulus ben skrifi: „A strafoe disi di a moro bigi pisi foe den sma ben gi, nofo gi so wan sma, so taki kontrari foe dati now, oenoe moesoe gi en pardon èn trowstoe en na wan switifasi, so taki na a wan ofoe tra fasi a sari di so wan sma e sari pasa marki, no e moro en. Foe dati ede mi e froemane oenoe foe oenoe sori taki oenoe lobi en.” — 2 Korentesma 2:6-8; 1 Korentesma 5:1-13.
Gado e gi krakti
20, 21. San sa man jepi wan sma di e ondrofeni brokoskin foe a doe di a doe wan sondoe kande, di a no e kisi pardon foe dati?
20 Efoe den sani leki wan swaki gesontoe noso banawtoe e meki sma e broeja foe di den abi a firi taki den doe sondoe di no abi pardon, dan a kisi foe boen rostoe èn sribi kan de wan jepi. Ma spesroetoe joe moesoe memre den wortoe foe Petrus: „Trowe ala oen sorgoe na [Gado] tapoe, bika a e sorgoe gi oenoe.” Èn no meki Satan meki joe lasi-ati noiti, foe di Petrus ben taki moro fara: „Hori joe prakseri na wan, de nanga opo-ai. A feanti foe joe, Didibri, e go lontoe leki wan krasi lew, di e soekoe foe swari wan sma. Ma kakafoetoe gi en, fasti ini bribi, foe di oenoe sabi taki densrefi sortoe sani na a fasi foe pina e pasa ini a heri gemeenschap foe oen brada ini grontapoe. Ma baka te oenoe pina wan sjatoe ten, dan a Gado foe ala no-froedini boen-ati . . . ensrefi sa kaba a skoro foe oenoe, a sa meki oenoe tanapoe kánkan, a sa meki oenoe kon tranga.” — 1 Petrus 5:6-10.
21 So boen efoe joe abi dipi berow, ma joe ben foeroe nanga frede taki joe abi fowtoe foe di joe doe wan sondoe di no abi pardon memre taki den fasi foe Gado de koni, regtfardiki èn nanga lobi. Foe dati ede begi en ini bribi. Tan teki njanjan na jeje fasi di a e gi nanga jepi foe „a getrow èn koni srafoe” (Mateus 24:45-47). Abi demakandra nanga kompe bribiman èn abi wan doronomo prati ini a kresten diniwroko. Disi sa tranga a bribi foe joe èn sa fri joe foe ibri frede taki Gado no ben sa gi joe pardon gi a sondoe foe joe.
22. San wi sa go loekoe now?
22 Sma di e libi ini a paradijs na jeje fasi, kan kisi trowstoe foe di den sabi taki Jehovah e gi pardon foeroe. Ma tokoe a libi foe den no de sondro tesi ini a ten disi. Kande, den e firi broko saka, foe di wan lobiwan dede noso wan boen mati siki hebi. So leki wi sa si, na ini disi èn tra omstandigheid, dan Jehovah e jepi èn e tjari a pipel foe en nanga jepi foe en santa jeje.
San na den piki foe joe?
◻ Sortoe boeweisi de taki Jehovah ’e gi pardon foeroe’?
◻ Sortoe sondoe no abi pardon?
◻ Ondro sortoe omstandigheid wan sma kan kisi pardon foe en sondoe?
◻ Foe san ede wan sma di doe fowtoe èn di abi berow kan abi a froetrow ini a gi di Gado e gi pardon?
◻ Sortoe jepi sma di doe fowtoe ma di abi berow kan kisi?
[Prenki na tapoe bladzijde 20]
Joe sabi foe san ede David nanga Petrus ben kisi pardon ma Judas Iskariòt no ben kisi dati?
[Prenki na tapoe bladzijde 22]
Jepi foe gemeente owroeman kan doe foeroe foe jepi wan kresten na jeje fasi