Leri di gi nanga wan marki

„Gi sabi na wan regtfardiki sma èn a sa gro ini sabi.” — ODO 9:9.

1. San Jehovah e froewakti foe den foetoeboi foe en ini a tori foe sabi?

JEHOVAH na „wan Gado foe sabi” (1 Samuèl 2:3). A e gi leri na den foetoeboi foe en. Moses ben taki na fesi taki sma foe a ten foe en ben sa taki foe Israèl: „A bigi nâsi disi sondro degedege na wan koni pipel di abi froestan” (Deuteronomium 4:6). Troe kresten na a srefi fasi moesoe sabi sani boen. Den moesoe de boen studenti foe a Wortoe foe Gado. Na apostel Paulus ben sori a marki foe so wan studie, di a ben skrifi: „Wi . . . no ben tapoe foe begi gi oenoe èn foe aksi taki oenoe kan kon foeroe nanga a soifri sabi foe a wani foe en ini ala koni nanga froestan foe sani na jeje fasi, so taki oenoe kan waka na wan fasi di e fiti Jehovah, foe prisi en dorodoro, ala di oenoe e tan tjari froktoe ini ibri boen wroko èn e tan gro ini a soifri sabi foe Gado”. — Kolosesma 1:9, 10.

2. (a) San de fanowdoe so taki wi kan kisi wan soifri sabi foe Gado? (b) Fa a Tiri Skin foe Jehovah Kotoigi ben taki foe a tori disi?

² Studeri nanga a prakseri foe kisi wan soifri sabi foe Gado nanga den prakseri foe en, e aksi awansi fa no fa, taki sma kisi wan pikinso leri. Ma foeroe sma di ben kon sabi a waarheid foe a Wortoe foe Gado, e libi na ini kondre pe den ben abi pikinso noso no wan enkri okasi foe kisi joisti grontapoe leri. Den ben de ini wan situwâsi di no ben de boen. Foe wini a problema disi, a Tiri Skin foe Jehovah Kotoigi foeroe jari kaba gi ordroe taki, pe disi de fanowdoe, klas foe leri leisi nanga skrifi moesoe orga ini den gemeente. Moro leki 30 jari pasa kaba, a Brasjon koranti Diário de Mogi ben tjari wan artikel kon na doro di ben nen „Jehovah Kotoigi e feti nanga a man di sma no man leisi nanga skrifi”. A ben taki: „Wan bekwaam leriman . . . nanga foeroe pasensi e bigin leri trawan foe leisi nanga skrifi. . . . Den studenti, leki wan bakapisi foe soso den omstandigheid kaba, di e gi den deki-ati leki bedinari foe Gado, moesoe meki a sabi foe den foe a tongo, gro, so taki den kan hori takimakandra.” Doesoendoesoen sma na heri grontapoe na so fasi ben man tron boen studenti foe a Wortoe foe Gado. Den ben teki a fondamenti leri disi nanga wan moro hei marki na prakseri.

Bekwaamfasi de fanowdoe foe de boen bedinari

3, 4. (a) Foe san ede troe kresten abi belangstelling foe kisi leri? (b) San ben de a situwâsi na Israèl èn sortoe fondamenti leri de fanowdoe srefisrefi ini wi gemeente ini a ten disi?

³ Troe kresten abi belangstelling foe kisi leri, no soso foe di den e prisiri taki den kisi leri, ma foe tron moro bekwaam foetoeboi foe Jehovah. Krestes ben gi ala kresten a wroko foe „meki disipel foe sma foe ala den nâsi, . . . e leri den foe doe ala den sani di mi ben komanderi” (Mateus 28:19, 20). Foe gi leri na trawan, dan densrefi moesoe kisi leri fosi èn disi e aksi boen fasi foe studeri. Den moesoe abi a bekwaamfasi foe ondrosoekoe den Boekoe finifini (Tori foe den Apostel 17:11). Foe doe a wroko di den kisi foe doe, den moesoe man leisi sondro foe aka-aka. — Loekoe Habakuk 2:2; 1 Timoteus 4:13.

⁴ So leki fa wi ben si ini na artikel na fesi, dan boen reide de foe bribi taki, moro foeroe, srefi jongoe sma na Israèl foe owroeten ben sabi fa foe leisi nanga skrifi (Kroetoebakra 8:14; Jesaja 10:19). Kresten bedinari ini a ten disi moesoe skrifi sani na wan moi en krin fasi te den e gi kotoigi oso foe oso. Den e skrifi brifi, e skrifi sani di taki na den konmakandra èn e skrifi na ini a sani di den e studeri. Gi ala den sani disi wan anoeskrifi di de makriki foe leisi, de fanowdoe. Foe skrifi sani poti tapoe den raport nanga formulier ini a kresten gemeente, e meki a de fanowdoe, awansi fa no fa, foe abi wan fondamenti sabi foe reken.

Den wini foe skoro di fiti

5. (a) San na a roetoe foe a wortoe „skoro”? (b) Sortoe okasi jongoe sma moesoe gebroiki dorodoro?

⁵ A de wan moi sani foe si taki a wortoe „skoro” komoto na a Griki wortoe skho·leʹ, san biginbigin ben wani taki „fri ten” noso a gebroiki foe fri ten gi wan toe serjoesoe sani, so leki leri. Baka ten a ben kon bodoi a presi pe sma ben kisi so wan leri. Na a srefi ten disi e sori taki soso a groepoe di ben kisi spesroetoe grani — na Grikikondre èn na moro foeroe tra kondre — ben abi a fri ten foe teki leri. Den wrokoman moro foeroe ben tan sondro foe sabi sani. Ini a ten disi, ini moro foeroe kondre pikin-nengre nanga jongoe sma e kisi ten foe leri. Jongoe Kotoigi foe troe moesoe bai a joisti ten foe kon sabi sani boen èn foe tron bekwaam foetoeboi foe Jehovah. — Efeisesma 5:15, 16.

6, 7. (a) San na wan toe wini foe boen skoroleri? (b) Na sortoe fasi a leri foe wan freimde tongo kan de wan boen sani? (c) San na a situwâsi ini a ten disi na mindri foeroe jongoe sma te den e kaba nanga skoro?

⁶ Wan fondamenti sabi foe historia, aardrijkskunde (sabidensi di e ondrosoekoe a grontapoe nanga den sani di e libi na tapoe), natuursabidensi (sabidensi di e ondrosoekoe den wet ini a natuur) èn so moro fara, sa meki jongoe Kotoigi tron bedinari di de ini balansi. A skoroleri di den e kisi no wawan sa leri den foeroe tori ma so srefi a fasi fa foe leri sani. Troe kresten no e tapoe foe teki leri èn foe studeri te den kaba nanga skoro. Ma san den man leri foe a studie foe den, sa anga boen foeroe foe a sabi di den sabi fa foe studeri. Grontapoe leri nanga leri di sma e kisi ini a gemeente, ala toe kan jepi den foe meki a man di den man denki, kon moro boen (Odo 5:1, 2). Te den e leisi dan den sa man foe si moro krin san de prenspari, san den moesoe skrifi èn san den moesoe hori na ede.

⁷ A leri foe wan freimde tongo, foe eksempel, no wawan sa meki a man di jongoe sma man gebroiki a froestan foe den, gro, ma sa meki taki den kan gebroiki den moro boen ini na organisâsi foe Jehovah. Na son bijkantoro foe a Waktitoren genootschap, wan lo jongoe brada ben feni en wan wini taki den ben man taki noso leisi Ingrisitongo sondro foe aka-aka. Boiti dati, ala kresten bedinari moesoe doe moeiti foe man taki a mamatongo foe den boen. A boen njoensoe foe a Kownoekondre e froedini foe sma e taki en na wan krin fasi di de joisti akroederi den regel foe a gramatika. Troe tori e sori taki ini grontapoe foe a ten disi foeroe jongoe sma te den e kaba nanga skoro, abi moeiti ete foe skrifi èn taki na wan joisti fasi èn den abi problema srefi foe meki a moro koemakriki rekensom; èn den sabi soso pikinso foe historia nanga aardrijkskunde.

Teki nofo leri

8. Sortoe tekst de prenspari ini a tori foe grontapoe leri èn a man di wan sma man sorgoe ensrefi?

⁸ Foe dati ede meki disi e sori taki a de wan boen ten foe go loekoe a fasi fa kresten moesoe si grontapoe leri. Sortoe bijbel gronprakseri de prenspari ini a tori disi? Ini a fosi presi, na moro foeroe kondre a saka di sma moesoe saka densrefi na wan joisti fasi na „kèiser” ondro, e aksi foe kresten papa nanga mama foe seni den pikin foe den go na skoro (Markus 12:17; Titus 3:1). Foe a sei foe jongoe Kotoigi, den moesoe memre ini a tori foe a skorowroko foe den, Kolosesma 3:23, pe skrifi: „Èn ala sani disi oenoe e doe, oenoe moesoe doe nanga oen heri sili leki gi Jehovah èn no gi libisma.” Wan di foe toe gronprakseri di de ini a tori, de taki kresten moesoe man sorgoe densrefi, srefi te den de foeroeten pionier bedinari (2 Tesalonikasma 3:10-12). Efoe wan man trow, dan a moesoe man sorgoe boen gi en wefi nanga iniwan pikin di den sa kisi kande, nanga wan ekstra sani foe gi na den wan di de ini nowtoe èn foe horibaka gi a preikiwroko foe a presi pe a e libi nanga foe a heri grontapoe. — Efeisesma 4:28; 1 Timoteus 5:8.

9, 10. (a) San gersi taki a de moro foeroe so na foeroe kondre? (b) San wan pionier bedinari moesoe si leki wan moni di nofo?

⁹ Omeni skoro wan jongoe kresten abi fanowdoe, so taki a man poti prakseri tapoe den bijbel gronprakseri disi èn doe en kresten froeplekti? Na ibri kondre disi de tra fasi. Ma moro foeroe, a sori taki na foeroe kondre a de moro foeroe so, taki a marki foe skoroleri di de fanowdoe foe wroko fatsoendroekoe moni, de moro hei now leki a ben de wan toe jari pasa kaba. Raport di wi kisi foe bijkantoro foe a Waktitoren genootschap na difrenti pisi foe grontapoe, e sori, taki na foeroe presi a moeilek foe feni wroko di e pai fatsoendroekoe moni, baka te den kaba soso nanga a moro lagi skoro di a wet e aksi, noso na son kondre srefi baka te den kaba nanga mulo noso middelbaar skoro.

¹⁰ San „fatsoendroekoe moni” wani taki? Disi no e sori tapoe wroko di e pai foeroe moni. Webster’s Dictionary e taki foe „fatsoendroekoe” ini a tori disi, leki „san nofo, san e gi satisfaksi.” San sma kan kari „san nofo”, foe eksempel, gi den wan di e winsi foe de pionier bedinari foe a boen njoensoe? Den wan dati moro foeroe abi pisi ten wroko fanowdoe foe tan farawe foe poti „wan lai di diri”, na den brada noso den famiri foe den tapoe (1 Tesalonikasma 2:9). Sma kan taki foe a moni foe den leki „san nofo” noso „san e gi satisfaksi”, efoe san den e wroko e gi den pasi foe libi na wan fatsoendroekoe fasi, ala di nofo ten nanga krakti e tan abra gi den foe doe a kresten diniwroko foe den.

11. Foe san ede son jongoe sma ben tapoe nanga a pionierwroko èn sortoe aksi e kon na fesi?

¹¹ San de nofotron a situwâsi ini a ten disi? Wi ben kisi foe jere taki na son kondre foeroe jongoewan di ben meine en boen, ben libi skoro, baka di den ben kaba nanga a moro lagi skoro di lanti aksi, so taki den ben kan tron pionier. Den no ben sabi no wan vak èn no ben abi no wan papira foe grontapoe. Efoe den papa nanga mama foe den no ben jepi den na moni sei, dan den ben moesoe soekoe pisi ten wroko. Sonwan ben moesoe teki wroko di ben aksi foe den wroko boen foeroe joeroe foe abi nofo moni foe libi. Foe di den ben kon weri na skin fasi, meki den ben tapoe nanga a pionier diniwroko. San den sma dati e doe foe sorgoe densrefi na moni sei èn go baka na ini a pionier diniwroko?

Wan balansi fasi foe si a teki foe leri

12. (a) Sortoe toe fasi foe si sani di krinkrin de boen fara foe makandra, ini a tori foe teki leri, wan kresten moesoe tan farawe foe den? (b) Sortoe marki a teki di den foetoeboi foe Jehovah di gi densrefi abra, e teki leri, moesoe abi gi den èn den pikin foe den?

¹² Wan balansi fasi foe si a teki foe leri kan jepi. Gi foeroe jongoe sma foe grontapoe, a kisi foe leri na wan marki foe bigi nen, wan sani foe jepi den foe kren moro hei na sociaal sei, a sroto foe abi wan fasi foe libi pe sani e go boen èn pe den abi foeroe sani na skin fasi. Gi trawan, a teki foe skoroleri na wan froefeiri sani di den moesoe kaba so esi leki den man. No wan foe den fasi disi foe loekoe sani de joisti gi troe kresten. San dan wi kan kari „wan balansi fasi foe loekoe sani”? Kresten moesoe si a teki foe leri leki wan fasi di den e gebroiki foe doro a sani di den e winsi. Ini den lasti dei disi, a marki foe den de foe dini Jehovah so boen èn so foeroe leki den man. Efoe, ini a kondre pe den e libi, soso a moro lagi skoro noso srefi middelbaar skoroleri no sa gi den pasi foe feni wroko di sa gi den nofo moni foe sorgoe densrefi leki pionier, dan den kan prakseri foe teki moro leri noso lès. Disi den sa moesoe doe nanga a spesroetoe marki foe a foeroeten diniwroko na prakseri.

13. (a) Fa wan sisa na den Filipijnkondre ben man go doro nanga a pionierwroko foe en, ala di a ben doe den osofamiri froeplekti foe en? (b) Sortoe warskow fiti djaso srefisrefi?

¹³ Sonwan ben teki lès di ben opo okasi foe wroko gi den èn di ben meki den man go ini a foeroeten diniwroko noso go baka na ini dati. Wan sisa na Filipijnkondre ben de a sma di ben e wroko moni gi na osofamiri, ma a ben wani foe pionier. A bijkantoro e skrifi: „A ben man doe disi foe di a ben kisi ekstra leri foe kon bekwaam leki wan accountant (wan sma di e hori boekoe foe monitori)”. A srefi bijkantoro raport e taki: „Wi abi wan bigi nomroe sma di e teki leri èn na a srefi joeroe ben man seti a schema foe den so, taki den man pionier. Nofotron den e tron moro boen preikiman, foe di den gridi foe leri efoe den no e go feti toemoesi na baka grontapoe sani.” A lasti sani di taki moesoe gi wi reide foe go prakseri sani boen. Sma no moesoe frigiti a marki foe kisi ekstra skoroleri, pe disi sori taki a de fanowdoe noso a marki no moesoe kenki kon tron wan marki foe kisi sani na skin fasi.

14, 15. (a) Foe san ede no wan fasti markitiki moesoe poti ini a tori foe a teki di wan sma e teki leri? (b) Sortoe grontapoe leri son frantiwortoe brada ben kisi, ma san den ben kisi na presi foe dati?

¹⁴ Na wan toe kondre, mulo skoro e leri joe wan vak èn dati kan sreka wan jongoe kresten foe doe wan wroko na a ten te a kisi en papira. Srefi te disi no de so, dan na son kondre jongoe sma di de fajafaja èn klariklari foe doe wroko èn di kisi soso lagi skoro leri, e feni pisi ten wroko di e meki den man wroko nofo moni foe pionier. So boen a no wan spesroetoe markitiki moesoe poti efoe ekstra leri mag noso no mag.

¹⁵ Foeroe sma di e dini now na ini frantiwortoe posisi leki opziener di e rèis, na a edekantoro foe a genootschap, noso ini wan foe den bijkantoro, ben go soso na wan lagi skoro. Den ben de getrow pionier, noiti ben tapoe foe teki leri, ben kisi lès èn ben kisi moro bigi frantiwortoe. Den no e sari foe a bosroiti di den ben teki. Na a tra sei, wan toe foe den speri foe den ben bosroiti foe teki leri na wan universiteit èn den ben tapoe foe go na fesi na jeje sei, foe di filosofie di e pori a bribi nanga a „koni foe a grontapoe disi”, ben wini den. — 1 Korentesma 1:19-21; 3:19, 20; Kolosesma 2:8.

Teri den kostoe

16. (a) Soema e bosroiti efoe moro hei leri de wan sani di den winsi èn san den moesoe hori na prakseri ini a fosi presi? (b) San den moesoe hori boen na prakseri?

¹⁶ Soema e teki a bosroiti efoe wan jongoe kresten moesoe go moro fara foe teki moro leri noso lès? A bijbel gronprakseri foe a posisi foe wan edeman e kon dja ini a tori (1 Korentesma 11:3; Efeisesma 6:1). Tapoe a fondamenti disi papa nanga mama seiker sa wani foe jepi den pikin foe den foe bosroiti sortoe vak noso wroko foe teki èn nanga dati omeni leri sa de fanowdoe. Na foeroe kondre a sei di wan sma sa teki foe kisi moro skoroleri noso foe leri wan wroko, moesoe doe froekoefroekoe kaba na mulo skoro. Dati na a ten di kresten papa nanga mama nanga jongoewan moesoe soekoe a tiri foe Jehovah foe teki wan koni bosroiti, nanga ini a fosi presi Kownoekondre belang na prakseri. Jongoe sma abi koni fasi nanga talenti. Koni papa nanga mama sa hori den sani disi na prakseri. Ala eerlijk wroko de foe joe respeki, efoe a de anoewroko noso kantorowroko. Ala di grontapoe e poti kantorowroko moro hei kande èn e wisiwasi a wroko di wan sma e wroko nanga anoe, bijbel foe troe no e doe dati (Tori foe den Apostel 18:3). So boen te papa nanga mama nanga jongoe kresten ini a ten disi, baka te den wegi den wini nanga den takroe bakapisi go-kon nanga jepi foe begi, e bosroiti foe studeri noso no studeri moro fara, baka mulo skoro, dan trawan ini a gemeente no moesoe kroetoe den.

17. San son papa nanga mama di de Kotoigi, e teki gi den pikin foe den?

¹⁷ Efoe kresten papa nanga mama e bosroiti na wan frantiwortoe fasi foe sorgoe taki den pikin foe den e kisi moro leri, baka te den komoto na middelbaar skoro, dan dati na den reti. A pisi ten foe den studie disi kan difrenti akroederi a vak noso sortoe wroko di den e teki foe leri. Foe moni reide ede èn foe meki den pikin foe den man go ini a foeroeten diniwroko so esi leki dati kan, meki foeroe kresten papa nanga mama ben teki studieprograma foe sjatoe pisi ten na vak skoro noso tèknis skoro gi den pikin foe den. Ini son kefal a ben de fanowdoe taki jongoe sma go leri wan noso tra vak, ma ala ten nanga wan heri libi foe dienst leki a marki.

18. San sma no moesoe frigiti te den e teki moro lès?

¹⁸ Efoe den e teki lès di e leri moro sani, dan seiker a boeweigi no moesoe de foe brenki neleki a de wan skoromeester noso foe feti baka wan bigi grontapoe wroko. Sma moesoe loekoe boen te den e teki wan lès. A tijdschrift disi ben poti krakti tapoe den kefar foe moro hei leri, èn den abi leti foe doe dati, foe di foeroe foe den skoro di e gi moro hei leri e gens a „gesontoe leri” foe bijbel (Titus 2:1; 1 Timoteus 6:20, 21). Moro fara, sensi 1960 foeroe skoro di e gi moro hei leri ben tron presi foe kroektoedoe nanga hoeroedoe. „A getrow èn koni srafoe” na wan krakti fasi ben meki sma lasi ati foe go na ini den sortoe kontren dati (Mateus 24:12, 45). Ma wi moesoe erken, taki ini a ten disi, jongoe sma e kon tanapoe na fesi den srefi kefar disi na den middelbaar skoro èn a tèknis hei skoro èn srefi na wrokopresi. — 1 Johanes 5:19.a

19. (a) Sortoe sani den sma di e bosroiti foe teki moro lès moesoe sreka na fesi? (b) Fa son sma ben abi foeroe wini foe a leri di den ben kisi?

¹⁹ Efoe a jongoe Kotoigi bosroiti foe kisi moro hei leri, dan a ben sa de wan boen sani gi en, efoe dati kan, foe teki disi, ala di a e libi na oso, so taki a man tan abi den normaal kresten studie gwenti, go na den konmakandra èn doe a preikiwroko. Na a bigin wan boen fasi foe tanapoe kánkan moesoe teki toe, san moesoe abi en fondamenti tapoe bijbel gronprakseri. Wi moesoe memre taki Danièl nanga den dri Hebrew kompe foe en, ben de strafoeman di ben de ini katibo èn di den ben froeplekti foe teki moro leri na Babilon, ma den ben tan hori den soifri retifasi steifisteifi (Danièl, kapitel 1). Ala di jongoe Kotoigi na wan lo kondre e poti afersi na jeje fasi na a fosi presi, den ben teki lès foe sreka densrefi foe de bekwaam foe doe pisi ten wroko leki accountant, bisnisman, leriman, sma di e vertaal, tolkoe, noso tra wroko di ben jepi den boen nofo ini a moro prenspari wroko foe den foe de pionier (Mateus 6:33). Baka ten wan lo foe den jongoewan disi ben tron opziener di e rèis noso friwani wrokoman na Bethel.

Wan pipel di de wán èn di kisi leri

20. Sortoe difrenti di sma e meki ini grontapoe no abi wan presi na mindri a pipel foe Jehovah?

²⁰ Na mindri Jehovah en pipel, efoe a wroko foe sma de now anoewroko, kantorowroko, gronwroko noso wroko di sma e doe gi trawan ala di densrefi no e meki sani, den alamala moesoe de boen studenti foe bijbel èn bekwaam leriman. Bekwaamfasi di den alamala kisi ini leisi, studeri èn gi leri, moro foeroe e poeroe a difrenti poti na wan sei di grontapoe e meki na mindri anoewrokoman èn kantorowrokoman. Disi abi leki bakapisi a wánfasi nanga a lespeki gi makandra di de foe si spesroetoe na mindri den friwani wrokoman na den Bethel-oso èn na den bowprojekt foe a Waktitoren genootschap, pe eigifasi na jeje fasi de a moro prenspari sani di ala sma moesoe abi. Dja bekwaam kantorosma e wroko nanga prisiri nanga anoe-wrokoman di de bekwaam èn alamala e sori lobi nanga warderi gi makandra. — Johanes 13:34, 35; Filipisma 2:1-4.

21. San moesoe de a marki foe jongoe kresten?

²¹ Papa nanga mama, tjari den pikin foe joe go na a marki foe tron wan memre di den kan gebroiki boen ini a njoen grontapoe libimakandra! Oen jongoe kresten, gebroiki den okasi foe oenoe foe teki leri leki wan sani di e sreka joe foe meki wan moro betre gebroiki foe den grani foe oenoe foe dini Jehovah! Leki sma di kisi leri, meki oenoe alamala boeweisi taki oenoe de memre di sreka boen èn di de foe a theokrasia libimakandra, now so srefi foe têgo ini Gado en pramisi „njoen grontapoe”. — 2 Petrus 3:13; Jesaja 50:4; 54:13; 1 Korentesma 2:13.

[Foetoewortoe]

Proeberi a memre foe joe

◻ Foe san ede troe kresten abi belangstelling gi a kisi foe leri?

◻ Foe sortoe toemoesi freimde fasi foe si sani, ini a tori foe a kisi foe leri troe kresten moesoe tan farawe?

◻ Sortoe kefar ini a kisi foe moro leri sma moesoe hori na prakseri èn sortoe sani sma moesoe sreka na fesi?

◻ Sortoe difrenti di sma e meki ini grontapoe no abi presi na mindri a pipel foe Jehovah?

[Prenki na tapoe bladzijde 13]

Te jongoe kresten e studeri fajafaja den kan tron memre di sma kan gebroiki moro boen foe a njoen grontapoe libimakandra

[Prenki na tapoe bladzijde 16]

Moro leri, efoe den e teki dati, moesoe abi leki reide a winsi foe dini Jehovah moro boen