Sortoe sma joe e feni boen?

„WI E SOEKOE WAN TROWMISI. A skin foe en moesoe weti èn a no moesoe fatoe, a moesoe de foe kisi diploma noso a moro boen te a abi en kaba. A moesoe de foe wan hei famiri di abi goedoe. A moro boen efoe a de foe a srefi kaste (aparti sociaal groepoe).”

NA SO a skrifi na ini wan aparti advertensie foe feni trowpatna, di joe ben sa kan si na ini wan koranti na India. Kande joe kan si wan srefi sortoe sani na foeroe tra pisi foe grontapoe. Na India a de moro foeroe a papa nanga mama foe a man di o de wan trowmasra, di e seti a mofo dati. Te sma e piki, den kan seni toe a fowtow foe wan oema di weri wan redi sari di e brenki nanga wan lo gowtoe sani na en skin. Efoe a famiri foe a boi feni en boen, dan takimakandra di abi a marki foe seti wan trow e bigin.

Den markitiki di sma gwenti

A de wan gwenti na India foe aksi foe wan trowmisi di skin weti. Disi de foe di wan bribi, di roetoe dipi, de taki den sokari moro lagi kaste foe a Hindoe libimakandra, abi wan skin di doengroe. No so langa pasa, wan programa di ben de na telefisi na India, ben froeteri wan tori foe toe oemapikin, a skin foe a wan ben weti, a trawan ben doengroe. A weti oemapikin ben de wan ogri-ati pikin èn a no ben abi maniri; a doengroe pikin ben abi switifasi èn a ben safoe. Wan kenki nanga jepi foe towfroewroko ben feni presi èn leki wan strafoe a weti pikin ben kon doengroe, ala di a doengroe pikin ben kon weti. A krin taki a dipi foe a tori ben de, taki ala di boen-ati te foe kaba ben wini, wan weti skin na wan paiman di sma wani srefisrefi.

Den sortoe firi disi, foe si son ras moro hei leki trawan nofotron roetoe moro dipi leki wan sma ben sa kan froestan kande. Foe eksempel, wan man foe Asia kan fisiti wan kondre na a Westsei pisi foe grontapoe èn e kragi taki den no ben handri boen nanga en foe a kloroe foe en skin ede noso a skoinsi fasi fa den ai foe en e tanapoe. Den sortoe fasi foe doe disi e broeja en èn a e firi taki sma e disko en. Ma te a e drai go baka na en eigi kondre, a kan doe a srefi fasi nanga sma foe wan tra ras groepoe. Srefi ini a ten disi skinkloroe nanga ras background e plèi wan bigi ròl ini a fasi fa foeroe sma e si a waarde foe wan tra sma.

„Moni na san e teri na ini ala sani”, kownoe Salomo foe owroeten ben skrifi (Preikiman 10:19). Fa dati troe! Goedoe abi krakti toe tapoe a fasi fa sma e si trawan. Foe pe a moni komoto pikinmoro noiti sma e go ondrosoekoe. Wan man ben kon goedoe foe di a wroko tranga noso a doe en wroko boen noso foe di a no ben eerlijk? Dati no e teri srefisrefi. Goedoe, efoe sma kisi disi na wan fasi di no eerlijk noso na wan tra fasi, e meki taki foeroe sma, nanga jepi foe moi wortoe, e soekoe foe kisi a boen foe a sma di abi a goedoe.

Sma e poti moro hei leri toe na wan moro hei presi ini a grontapoe disi di foeroe nanga streilibi. So esi leki wan pikin gebore, papa nanga mama e hasti densrefi foe poti foeroe moni na wan sei foe gi a pikin leri. Te a pikin abi toe noso dri jari, den e broko den ede foe poti en na a joisti prei-skoro noso josijosi-skoro leki a fosi stap foe wan langa pasi foe go kisi wan diploma foe universiteit. Son sma denki kande taki wan hei diploma e tjari nanga en taki den abi a reti foe trawan feni den boen noso foe a kisi lespeki foe den.

Ija, skinkloroe, leri, moni, ras background — den sani disi ben tron den markitiki di foeroe sma e gebroiki foe kroetoe trawan noso, foe taki en moro betre, e denki sani na fesi foe wan tra sma sondro foe abi leti. Disi na den sani di e meki den bosroiti soema den sa feni boen èn soema den no sa feni boen. Fa a de nanga joe? Soema joe e feni boen? Joe e prakseri taki wan sma nanga moni, wan weti skin noso wan moro hei skoro e froedini en foe sma feni en moro boen èn lespeki en? Efoe dati de so, dan na wan serjoesoe fasi joe moesoe go loekoe a fondamenti foe den firi foe joe.

Den sani disi na joisti markitiki?

A boekoe Hindu World e taki: „Ala sma foe wan moro lagi kaste di e kiri wan brahmân, den kan gi hebi skin-ati te leki a e dede, den e teki den goedoe foe en èn a sili foe en den e seni go na a têgo pori. Wan brahmân di e kiri wan sma den kan gi wan boetoe nomo èn noiti den e strafoe en nanga dede.” Ala di a boekoe e taki foe owroeten, san de foe taki foe a ten disi? Prakseri sani na fesi foe wan sma foe en ras ede sondro foe abi leti èn druk foe a libimakandra, ben meki broedoe lon leki wan liba, srefi ini a di foe 20 jarihondro. Èn disi no ben de na India wawan. Apartheid na Zuid Afrika di e meki taki a si di sma no wani si trawan na ai èn ogridoe e tan go doro, a denki di sma na Verenigde Staten foe Amerkankondre e denki sani na fesi foe ras, sondro foe abi leti, a denki di sma na ini den Baltis kondre e denki sani na fesi foe nationaliteit, sondro foe abi leti, — a lijst e go nanga langa — alamala e kon foe di sma abi a firi taki den de foe moro hei geborte. Foe troe, so wan feni di wan sma e feni a wan sma moro boen moro a trawan, foe en ras noso nationaliteit ede, no ben tjari boen froktoe foe vrede kon.

San de foe taki foe goedoe? Sondro degedege foeroe sma ben kon goedoe nanga jepi foe eerlijk èn tranga wroko. Ma ogri ondrogronman, bisnisman di e doe bisnis nanga jepi foe bai èn seri sani blaka, sma di e seri drugs, sma di e seri fetisani di no mag, nanga trawan, ben tjari heri ipi goedoe kon na wán. A troe, taki sonwan foe den sma disi e gi moni na stichting di lobi foe doe sma boen noso e horibaka gi plan foe jepi den pôti sma. Ma tokoe den ogri doe foe den ben tjari bigi pina nanga sari kon gi den sma di ben fadon na ini den anoe foe den. Srefi a pikin bidrigiman, te joe e teki en gersi nanga trawan, so leki denwan di e teki tjoekoe noso denwan di abi prati na ini dangra bisniswroko, ben meki a firi taki den bidrigi den ini a froewakti foe den, mankeri nanga dede kon, te den sani di den meki noso san den e doe, no ben boen èn no ben wroko. Ija, na abi foe goedoe, foe ensrefi no de wan fondamenti foe kroetoe wan sma boen noso no boen.

San de foe taki foe leri dan? Wan langa lijst foe diploma nanga titel fesi a nen foe wan sma e djaranti taki a eerlijk èn a de opregti? Disi wani taki, dati sma moesoe feni en boen foe dati? We, wi moesoe taki, dati leri kan bradi a loekoe foe wan sma, èn foeroe sma di ben meki gebroiki foe a leri foe den foe gi wini na trawan, e froedini foe kisi grani nanga lespeki. Ma historia lai nanga eksempel foe a meki di a groepoe di kisi leri ben meki wan fowtoe gebroiki foe a pipel èn ben hori den na ondro. Èn prakseri san e pasa na middelbaar skoro noso na universiteit ini a ten disi. Den djari foe universiteit lai nanga problema foe fowtoe gebroiki foe drugs nanga siki di seks tjari abra tapoe sma èn foeroe studenti e go skrifi den nen na universiteit soso foe di den e feti na baka moni, makti nanga barinen. A leri wawan di wan sma kisi noiti kan de wan sani di joe kan froetrow na en tapoe foe si a troetroe eigifasi foe en.

Nôno, skinkloroe, leri, moni, ras background noso tra sani leki disi no de boen gron foe taki san wan tra sma warti. Kresten no moesoe meki den sortoe afersi disi teki den prakseri abra foe doe moeiti foe kisi a boen foe trawan. Nanga san dan wan sma moesoe broko en ede? Na sortoe markitiki a moesoe hori ensrefi?