Soema Gado e feni boen?

WI ALAMALA wani taki den kompe foe wi lobi wi. Gi wan kresten wan krinkrin moro tranga lostoe de taki Gado feni en boen. Psalm 84:11 e taki foe Jehovah Gado: „Boen nanga glori na san a e gi. Jehovah srefi no e hori no wan sani na baka gi denwan di e waka sondro foe meki fowtoe.” Di Jesus ben gebore, a prisiri babari foe den engel foe hemel ben pramisi „vrede na grontapoe gi libisma di a feni boen!” — Lukas 2:14, Moffatt.

Ma soema Gado e feni boen? Den markitiki foe Gado de a srefi leki di foe libisma? Wi kan froestan taki, dati no de so, leki fa den ben sori ini na artikel di ben de na fesi. Foe taki en leti, foe di kresten e kisi froemane foe „waka baka Gado”, dan ibriwan foe wi ben sa doe boen foe aksi: Mi e sori taki mi e feni sma boen di Gado e feni boen, noso mi abi a firi foe waka baka den markitiki foe grontapoe ini a kroetoe di mi e kroetoe sma? (Efeisesma 5:1) Foe meki Jehovah feni wi boen, wi moesoe sorgoe taki wi e si sani na a fasi fa en e si sani.

Den moro hei markitiki foe Gado

„Gado no e teki sma partèi”, na apostel Petrus ben taki, „ma na ini ibri nâsi a sma di e frede en èn e doe regtfardikifasi a e feni en boen.” Moro fara na apostel Paulus ben kotoigi taki Gado „ben meki ibri nâsi foe sma komoto foe wán sma” (Tori foe den Apostel 10:34, 35; 17:26). A de soso wan reidelek sani foe kon na a bosroiti foe dati ede, taki ala libisma de a srefi ini den ai foe Gado awansi san na den eigifasi foe den na skinsei. Foe di dati na a kefal, dan a no ben sa fiti gi wan kresten foe feni wan sma boen soso foe di a sma dati komoto na wan spesroetoe kontren noso foe di a abi wan seiker skinkloroe noso foe di a de foe wan tra ras. Na presi foe dati, a ben sa doe heri boen efoe a e waka baka na Eksempel foe en, Jesus Krestes, di den feanti srefi ben erken taki a no ben teki sma partèi. — Mateus 22:16.

Sma e gebroiki den wortoe „no moro dipi leki a skin” sontron foe taki foe wan pikin sani noso wan sani di no prenspari. Na so a de nanga skinkloroe; a de soso wan pikin sani. A kloroe foe wan sma en skin na no wan fasi e sori fa a sma tan noso san na den inisei eigifasi foe en. Te wi moesoe bosroiti nanga soema wi sa abi demakandra, nanga soema wi sa njan noso seki anoe, dan troetroe wi no moesoe loekoe spesroetoe na a skinkloroe. Memre taki a jongoewenke, di ben taki wan toe foe den moro moi èn lobi poewema di ben skrifi wan ten, ben taki foe ensrefi: „Wan blaka oemapikin mi de, ma mi moi, . . . mi blakablaka, bika son ben kon kisi mi na ai” (Heisingi 1:5, 6). No ras, no kloroe na wan boen fondamenti foe sori taki joe e feni wan sma boen. A de moro prenspari na disi, efoe wan sma e frede Gado èn e doe reti.

Fa Gado e firi foe den foeroe goedoe na skin fasi? Foe ala den sma di Gado lobi èn e feni boen, a lobi a Manpikin foe en, Jesus Krestes, moro alamala. Tokoe di Jesus ben de na grontapoe, a „no ben abi no wan presi srefi foe poti en ede” (Mateus 8:20) A no ben abi no wan goedoe, oso, gron, froktoebon, noso meti. Ma tokoe Jehovah ben gi en grani èn ben gi en wan posisi di hei moro iniwan tra sma ini na universum boiti Gado srefi. — Filipisma 2:9.

Gado ben feni Jesus Krestes boen foe di a ben goedoe no nanga goedoe na skin fasi ma nanga toemoesi boen wroko. (Teki gersi 1 Timoteus 6:17, 18.) A ben froemane den bakaman foe en: „Stòp foe tjari warti sani kon makandra na grontapoe pe motoe nanga froestoe e pori den èn pe foefoeroeman e broko oso èn e foefoeroe. Tjari moro foeroe warti sani kon makandra na ini hemel, pe no motoe èn no froestoe e pori den èn pe foefoeroeman no e broko oso èn e foefoeroe” (Mateus 6:19, 20). So boen, na presi foe sori boen soso na denwan di goedoe nanga grontapoe goedoe, kresten no moesoe loekoe na grontapoe goedoe foe meki difrenti. Den sa soekoe denwan di goedoe ini a tori foe Gado, a no abi bisi efoe den goedoe noso pôti na skin fasi. No frigiti noiti taki „Gado e teki den sma di de pôti ini a tori foe grontapoe èn di goedoe ini bribi èn di de erfgenaam foe a kownoekondre” (Jakobus 2:5). Efoe joe e tan hori a fasi fa Gado e si sani, dan noiti joe sa kon so fara foe doe san sma gwenti foe doe, foe feni wan sma boen noso foe proeberi foe wini a boen foe wan sma di goedoe na skin fasi.

Ini a tori foe leri, bijbel e sori krin taki Gado e gi wi tranga foe soekoe sabi nanga koni èn taki Jesus Krestes ben de a moro bigi leriman di ben waka wan ten na grontapoe (Odo 4:7; Mateus 7:29; Johanes 7:46). Ma a no grontapoe koni noso leri, Gado e feni boen. Na a tra sei, Paulus e froeteri wi taki „no foeroe koniwan na skin den ben kari, . . . ma Gado ben teki den lawsani foe grontapoe foe meki den koniwan firi sjen.” — 1 Korentesma 1:26, 27.

Gado e feni den sma boen di kisi boen leri, no ini grontapoe sani di instituut di e gi moro hei skoro e leri, ma ini a „soifri tongo” foe waarheid, so leki wi kan feni dati ini en Wortoe, bijbel (Sefania 3:9). Foe taki en leti, dan Jehovah srefi e gi leri na a pipel foe en ini a ten disi nanga jepi foe wan leriprograma di panja ensrefi na den moro farawe oekoe foe grontapoe. So leki a profeiti Jesaja ben froeteri na fesi, dan sma foe ala nâsi e doe wan sani na tapoe dati foe di den e taki: „Kon èn meki wi opo go na a bergi foe Jehovah, na a oso foe a Gado foe Jakob èn en sa leri wi foe en pasi èn wi sa waka tapoe en pasi.” Foe dati ede, na presi foe gi glori na grontapoe leri, kresten sa soekoe denwan di sori nanga jepi foe den wortoe èn doe foe den, taki den na troetroe „sma di kisi leri foe Jehovah”. Te den e doe disi, dan den sa njanboen foe a ’vrede pasamarki’ di Gado e gi. — Jesaja 2:3; 54:13.

Wi kan kisi a boen di Gado e feni sma boen

Ija, den markitiki foe Gado foe sori taki a feni trawan boen, de heri tra fasi leki di foe libisma. Ma tokoe wi moesoe proeberi foe meki den pasi foe en tiri wi, efoe wi wani foe kisi a boen di, ini en ai, a e feni wi boen. Dati wani taki, wi moesoe leri foe si trawan na a fasi fa Gado e si den èn no nanga jepi foe libisma markitiki, di a prakseri di den e prakseri densrefi nomo èn a prakseri sani foe sma na fesi sondro foe abi leti, ben sa kan abi krakti na den tapoe. Fa wi kan doe dati?

Jehovah Gado e ondrosoekoe na ati foe wan sma èn e feni den sma boen di e sori den sortoe eigifasi leki lobi, boen-ati, nanga langa pasensi. Wi moesoe doe a srefi (1 Samuèl 16:7; Galasiasma 5:22, 23). Wi moesoe loekoe na a inisei sma, so foeroe leki wi libisma kan doe dati èn no na en skinkloroe noso en ras background. Na presi foe soekoe denwan di goedoe na skin fasi, wi e doe boen foe hori a fasi fa Gado e si goedoe na prakseri èn moesoe doe moeiti foe „de goedoe ini toemoesi boen wroko, lobi foe gi èn foe prati sani” (1 Timoteus 6:18). Foe kisi a boen di Gado e feni sma boen, wi moesoe go doro foe soekoe soifri sabi foe Gado èn foe en Manpikin, Jesus Krestes, foe di wi e kon kisi boen leri ini a soifri tongo foe waarheid (Johanes 17:3, 17). Te wi e doe disi, dan wi toe sa de na mindri denwan di Gado e feni boen.