Abi prisiri ini wi Gran Mekiman

„Meki Israèl abi prisiri ini en gran Mekiman, den manpikin foe Sion — meki den prisiri ini a Kownoe foe den.” — PSALM 149:2.

1. San na a troetroe situwâsi foe a libisma famiri, ala di sma e bari foe „fri te foe kaba”?

„PEN foe banawtoe” e kwinsi a disiten grontapoe. Dati na den wortoe di Jesus ben gebroiki ini en profeititori di ben abi foe doe nanga „a bosroiti foe a seti foe sani”, a rampoe pisi ten di ben bigin nanga a fosi grontapoe feti ini 1914 (Mateus 24:3-8). Foeroe politiekman no e si noti moro leki wan doengroe tamara. Ala di sma e bari „fri te foe kaba” na Owstoe-Europa, wan man di wan ten ben de presidenti na ini a kontren dati ben froeteri sjatoe foe a situwâsi di a ben taki: „A gro di a nomroe foe libisma e gro so esi èn a waran di a loktoe e kon moro waran dei foe dei, olo na ini na ozonlaag (a pisi foe a loktoe pe ozon de) nanga AIDS (SIDA), a kefar foe ogridoe nanga jepi foe kern fetisani èn a kefarlek bigi olo di e kon bigi moro nanga moro na mindri a goedoe noordsei pisi foe grontapoe nanga a pôti zuidsei pisi, a kefar foe angriten, a leigi di den e leigi den moro prenspari fonten foe a pisi foe grontapoe pe libi de nanga den mineraal fonten foe en, reklame di den e sori na telefisi èn di abi foeroe krakti na tapoe den idea nanga doe foe a libimakandra èn a kefar di e kon bigi moro nanga moro foe orlokoe ini pikin kontren — ala den sani disi, makandra nanga doesoendoesoen tra sani, e prenki wan kefar di de na ala sei, gi a libisma famiri.” No wan libisma krakti de, di kan poeroe a kefar disi foe rampoe di te foe kaba abi dede leki bakapisi. — Jeremia 10:23.

2. Soema abi a loesoe foe ala ten gi den problema foe a libisma famiri èn sortoe stap a ben doe kaba?

² Ma wi kan prisiri taki wi Gran Mekiman abi a loesoe di e tan. Na ini Jesus en profeititori, a e meki „a bosroiti foe a seti foe sani” abi foe doe nanga en „denoja” di sma no man si (Mateus 24:3, 37-39). Foe meki den „njoen hemel”, Jehovah ben poti Jesus na tapoe en kownoestoeroe leki Mesian Kownoe, a profeiti boeweisi e sori taki a historia sani disi ben pasa na hemel ini a jari 1914 (2 Petrus 3:13).a Leki kompe tiriman nanga a Soeverein Masra Jehovah, Jesus kisi now a wroko foe kroetoe den nâsi èn foe prati den safri-ati sma foe grontapoe di gersi skapoe foe den tranga-ede wan di gersi bokoboko. Den „bokoboko” di no abi gadofasi, den e marki den foe kisi „têgo koti poeroe” èn „den skapoe” foe kisi têgo libi na a grontapoe kontren foe a Kownoekondre. — Mateus 25:31-34, 46.

3. Sortoe reide troe kresten abi foe abi prisiri pasa marki?

³ A fikapisi foe Israèl na jeje fasi na grontapoe, di a bigi ipi foe den skapoe disi di e gi jesi, e go makandra nanga den now, abi ala reide foe abi prisiri na ini Jehovah, a Kownoe foe ala ten, foe di a e tjari en bigi prakseri na wan heimarki nanga jepi foe a Kownoekondre foe en Manpikin. Den kan taki: „Sondro mankeri mi sa prisiri pasa marki ini Jehovah. Mi sili sa prisiri ini mi Gado. Bika a weri den krosi foe froeloesoe gi mi . . . So leki fa grontapoe srefi e meki sani sproiti, èn so leki fa a djari e meki ala sani di sai na ini sproiti, na so a Soeverein Masra Jehovah sa meki regtfardikifasi nanga prèise e sproiti na fesi foe ala den nâsi” (Jesaja 61:10, 11). A „sproiti” disi de krin foe si ini den miljoenmiljoen sma di den e tjari kon makandra now foe den nâsi foe singi prèise foe Jehovah.

’Meki a go moro esi’

4, 5. (a) Fa den ben taki na fesi foe a tjari kon na ini foe a pipel foe Gado? (b) Sortoe toemoesi aparti gro sma ben kan si ini a dienstjari 1992?

⁴ A tjari kon na ini e go moro esi, ala di a kaba foe Satan en seti foe sani e kon moro krosibei: „Èn foe a sei foe a pipel foe joe den alamala sa de regtfardiki . . . , a sproiti foe a sani di mi prani, a wroko foe mi anoe, so taki mi sa kisi glori. A pikinwan srefi san tron doesoen èn a mendriwan wan makti nâsi. Misrefi, Jehovah sa meki a go moro esi na en reti ten” (Jesaja 60:21, 22). A go moro esi disi de foe si heri boen ini a Bericht foe a dienstjari 1992 foe Jehovah Kotoigi na heri grontapoe, di poti na tapoe bladzijde 12 te nanga 15 foe a tijdschrift disi.

⁵ Toemoesi moi na ini a raport disi na a njoen heimarki foe 4.472.787 Kownoekondre preikiman, wan gro foe 193.967 — 4,5 procent moro leki a jari di pasa. A heimarki foe 301.002 sma di dopoe na ini a jari 1992 e sori toe, taki ipi-ipi sma e teki bijbel waarheid. Fa wi e prisiri taki ini a „dei [disi] foe dangrafasi nanga doengroefasi, . . . wan makti èn bigi folkoe de”, di, neleki wan heri ipi sprenka, e panja a Kownoekondre kotoigi „na den moro farawe presi foe grontapoe”! (Joèl 2:2, 25; Tori foe den Apostel 1:8) Foe a kowroe Alaska — pe na opolani foe a Waktitoren genootschap ben tjari moro leki 50 fisiti go na kontren di tapoe nanga snew — te na a drei sabana foe Mali nanga Boerkina Faso nanga den èilanti foe Mikronesia di panja na ala sei, den foetoeboi foe Jehovah e skèin leki „wan leti foe den nâsi, so taki a froeloesoe foe en sa doro na ala sei foe grontapoe.” — Jesaja 49:6.

6, 7. Foe sortoe onfroewakti kenki foe situwâsi sma ben de kotoigi ini den jari di pasa èn san den foetoeboi foe Jehovah ben doe na tapoe dati?

⁶ Jehovah ben de leki wan fortresi nanga wan tranga toren foe di a ben kibri a pipel foe en èn horibaka gi den. Ini foeroe pisi foe grontapoe, Jehovah Kotoigi ben horidoro tintenti jari langa ondro bita-ati kwinsi nanga froefolgoe (Psalm 37:39, 40; 61:3, 4). Ma no sa langa pasa, neleki na wan wondroe pasa, dan skotoe ben poeroe na ini wan sani foe 21 kondre, so taki now a pipel foe Gado kan meki bekènti na wan fri fasi taki wi Gran Mekiman ben poti Krestes leki Kownoe na tapoe heri grontapoe. — Psalm 2:6-12.

⁷ A pipel foe Jehovah e meki wan boen gebroiki foe a fri foe den di den kisi no so langa pasa? Loekoe ini a tabel a gro foe Bulgaria, Roemenia, nanga san ben de fosi Sovjet Unie (a tiri foe Rosia libimakandra) na Owstoe-Europa nanga di foe Angola, Benin nanga Mosambik na Afrika. Na ini Saire toe a gro bigi kefarlek. Nanga prisiri ini den ati, den brada foe wi di kon fri e piki tapoe a kari: „Taki Jehovah tangi, o oen pipel, bika a boen . . . , a Sma di en wawan e doe froewondroe sani di bigi: bika a lobi boen-atifasi foe en de foe ten di no abi marki” (Psalm 136:1, 4). Den taki-tangi disi den e sori nanga a fajafaja diniwroko foe tjari tra sma di gersi skapoe kon makandra na a sei foe a Kownoekondre.

8. Fa njoen sma di e prèisi Jehovah „e frei kon neleki wan wolkoe” na Owstoe-Europa? na Afrika?

⁸ Ini a lasti dreiten foe Europa, kongres foe Jehovah en pipel di ben hori na kondre di fosi ben de komunist kondre, ben abi nomroe foe fisitiman di ben gi froewondroe. San ben gi srefi moro froewondroe, ben de den nomroe foe sma di ben dopoe ini den kondre disi. Na a srefi fasi, na Togo, Afrika, a skotoe ben poeroe na tapoe 10 december, 1991. A tra moen na baka dati, wan nationaal kongres ben hori. Te joe e teki gersi a gemiddelde foe den moen foe 6.443 preikiman ini a veld, dan a nomroe foe fisitiman na den kongres disi ben frei go na loktoe na wan kefarlek moi fasi, kon tron 25.467, nanga 556 sma di ben dopoe — 8,6 procent foe a nomroe foe preikiman. So leki fa Jesaja 60:8 e prenki en, dan njoen sma di e prèise Jehovah e „frei kon neleki wan wolkoe èn leki doifi na den olo foe den” na den gemeente foe Jehovah en pipel.

9. Sortoe sani ben seti so taki kresten, na kondre di kon fri no so langa pasa, kan ’njan èn kisi satisfaksi’?

⁹ Den ben tapoe toe na angri foe njanjan na jeje fasi na Owstoe-Europa nanga Afrika. Den drukkerij foe a Waktitoren genootschap na Doisrikondre, Italia nanga Zuid Afrika ben seni a wan truck baka a trawan di ben foeroe nanga boekoe di de na ini wan lo tongo, na kondre di ben e dede foe angri na jeje fasi. Fosifosi, foeroe foe den Kotoigi ben moesoe prati fotocopie di ben kon owroe, foe di nofo eksemplaar no ben de, ma now den e kisi njanjan na jeje fasi pasa marki. Den e prisiri foe abi wan prati na a kontroe foe a profeititori: „Joe sa njan seiker, njan èn kisi bere foeroe èn joe sa moesoe prèise a nen foe Jehovah, joe Gado, di ben handri na so wan toemoesi moi fasi nanga joe.” — Joèl 2:26.

Sorgoe gi moro gro

10. Sortoe kari e pristeri na ala sma di abi belangstelling, te joe e loekoe a hei nomroe foe fisitiman na a Memrefesa?

¹⁰ Foe troe a nomroe foe fisitiman na heri grontapoe na a Memrefesa de wan froewondroe sani, 11.431.171, wan gro foe 781.013 sma, noso 7,3 procent moro leki a jari di pasa. Wi e bari oenoe njoensma, alamala wan switikon! Fa a ben sa de wan toemoesi moi sani efoe ala den njoen sma di abi belangstelling ben kan njanboen foe a wini foe wan oso-bijbelstudie nanga wan Kotoigi foe Jehovah! (Loekoe Jesaja 48:17.) A Bericht foe a dienstjari e sori taki den e hori 4.278.127 foe den studie disi ibri moen, wan moi gro foe 8,4 procent. Ma foeroe sma moro ben kan meki boen gebroiki foe a diniwroko disi. Jehovah Kotoigi breiti foe go doronomo baka na sma di abi belangstelling foe hori wan fri bijbelstudie na den oso èn jepi den sma disi na so fasi foe poti den foetoe steifi na tapoe a pasi di e go na têgo libi (Johanes 3:16, 36). Foe san ede joe no e aksi foe so wan studie? Èn memre, ala ten wan switikon e wakti joe na a Kownoekondrezaal! — Psalm 122:1; Romesma 15:7.

11, 12. (a) Na fesi sortoe problema sma e kon tanapoe na son kondre? (b) Na sortoe fasi „sani e meki kon de a srefi” na mindri kondre di moro goedoe nanga kondre di moro pôti?

¹¹ Den gemeente di abi moi Kownoekondrezaal blesi troetroe. A situwâsi de tra fasi na kondre pe getrow Kotoigi ben horidoro foeroe jari, foe di a wroko ben tapoe èn den ben miti makandra na kibrifasi na ini pikin groepoe. Na wan lo foe den presi dati, den fri now ma den no abi foeroe Kownoekondrezaal. Na wan Afrikan kondre foe eksempel, pe den abi 93 gemeente den e meki gebroiki foe dri Kownoekondrezaal nomo. So boen konmakandra e hori moro foeroe na bigi pisi gron di sma no e gebroiki. Wan gemeente foe 150 sma kan kisi doronomo moro leki 450 sma di e fisiti den konmakandra disi.

¹² Na Owstoe-Europa a de nofotron wan moeilek sani foe bai gron noso foe bow, ma sani go pikinso na fesi. Den ben poti na inwijding foe wan moi njoen bijkantoro na Polen na tapoe 28 november 1992. Den e gebroiki bigi bijdrage di sma e gi na a wroko foe Jehovah Kotoigi na heri grontapoe, foe jepi bow zaal nanga tra oso. So boen, „sani e meki kon de a srefi”, foe di brada di lobi foe gi bijdrage foe den sani foe den na skin fasi di „den abi bogobogo”, foe jepi sorgoe gi den fanowdoe na jeje fasi foe gemeente na kondre di no abi foeroe. — 2 Korentesma 8:13, 14.

Wan biljoen joeroe!

13. Omeni joeroe sma ben gi na a preikiwroko èn leriwroko ini 1992, èn a moeiti foe soema de foe si na a nomroe disi?

¹³ San joe ben sa doe nanga wan biljoen joeroe? Ala sma di kisi têgo libi sa man foe pasa den joeroe dati èn srefi moro ini wan dienst, di abi boen bakapisi èn di e gi satisfaksi gi Jehovah. Ma go prakseri nomo foe kwinsi den foeroe joeroe dati poti na ini wán jari! Dati na san a pipel foe Jehovah ben doe na ini 1992. Te joe e poti den aparti raport foe ala den Kownoekondre preikiman kon makandra, wi e si wan njoen heimarki foe 1.024.910.434 joeroe di gebroiki na a moro boen fasi di wan sma kan gebroiki joeroe — foe prèise wi Gran Mekiman èn „foe gi sma leri . . . na poebliki èn oso foe oso” (Tori foe den Apostel 20:20). Gemiddeld 4.289.737 Kotoigi ben gi raport ibri moen. Den e komoto na ala sortoe posisi foe a libimakandra. Sonwan foe den a ten di den kan gi na a Kownoekondre wroko, skotoe. Joe abi na ini toe osofamiri edeman, di moesoe sorgoe gi na osofamiri; owroe sma; nanga foeroe sma di abi problema nanga den gesontoe; so srefi pikin di e go na skoro ete. Tokoe a raport di ibriwan foe den ben meki, na wan warti sori foe lobi gi Jehovah. — Teki gersi Lukas 21:2-4.

14. Fa jongoe sma e ’memre den Gran Mekiman’?

¹⁴ Wan moro jongoe geslakti e gro kon ini a diniwroko foe Jehovah èn kolokoe taki a moro bigi pisi foe denwan disi e meki gebroiki foe den wortoe foe Salomo na Preikiman 12:1: „Prakseri now joe Gran Mekiman na ini joe jongoejari.” Den e meki densrefi bekwaam ini a skorowroko foe den, so boen leki a kisi di den e kisi skoro ini afersi na jeje fasi nanga jepi foe den papa nanga mama di e gi densrefi foe dini. A ben de wan prisiri foe si wan bigi nomroe foe tini jongoewan di ben opo tanapoe na tapoe kongres di hori no so langa pasa èn ben pristeri densrefi foe dopoe. A de wan prisiri toe foe sabi taki foeroe foe den, foe di den ben leri wan wroko noso wan bekwaamfasi, e sreka densrefi na wan praktis fasi foe go pionier te den kaba nanga skoro. Na so fasi, den sa man sorgoe gi densrefi, so leki na apostel Paulus ben doe ten na ten, foe di a ben meki tenti. — Tori foe den Apostel 18:1-4.

15, 16. Fa pionier nanga tra foeroeten bedinari ben abi prati na a gro foe a Kownoekondre wroko èn foe sortoe blesi sonwan foe den ben njanboen?

¹⁵ Fa den pionier nanga tra foeroeten bedinari abi wan toemoesi bigi prati na a gro foe a Kownoekondre wroko! Den lijst foe pionier ben gro kon tron wan heimarki foe 931.521 a jari disi di pasa. Foe di den sma disi e preiki aladei oso foe oso èn e hori bijbelstudie na den oso foe den sma, den e man taki moro boen foe den Boekoe. Boiti dati, foeroe foe den, den ben feni boen foe go na a toe-wiki Pionier Diniwroko Skoro, di e jepi den foe kweki moro bekwaamfasi nanga prisiri foe man doe a wroko foe Gado.

¹⁶ Ibriwan foe den getrow pionier disi kan agri nanga den wortoe na Jesaja 50:4: „A Soeverein Masra Jehovah srefi ben gi mi a tongo foe denwan di kisi leri, taki mi kan sabi fa foe piki den weriwan nanga wan wortoe.” Wan heri ipi sma de ini a ten disi di weri foe a kroektoe grontapoe lontoe den, ma di e feni kowroe-ati nanga jepi foe a wortoe di den getrow pionier foe wi e taki. — Teki gersi Odo 15:23; Esekièl 9:4.

Wan bow programa di bigi srefisrefi

17. Boiti foe a bow na jeje fasi, dan foe sortoe bow na skin fasi sma ben de kotoigi, ini den jari di pasa?

¹⁷ A gro na jeje fasi di Jehovah Kotoigi abi na heri grontapoe e aksi gro toe foe sani na skin fasi. A meki kon moro bigi foe drukkerij, kantoro nanga Bethel-oso nanga a bow foe Kownoekondrezaal nanga kongreshal kon de fanowdoe. So wan boen den e aksi foe Jehovah Kotoigi kon tron bowman na wan troetroe fasi. So sortoe bow ben feni presi ini den dei foe kownoe Salomo. Salomo ben bow wan tempel gi na anbegi foe Jehovah akroederi „den bowplan . . . di a ben kisi nanga jepi foe santa jeje”, di Jehovah ben gi en papa, kownoe David (1 Kroniki 28:11, 12). Na so fasi, Salomo no wawan ben bow den arkiman foe en nanga diri wortoe foe koni, ma a ben tiri toe a bow na skin fasi foe wan toemoesi moi wroko di sma ini a grontapoe noiti ben doe. — 1 Kownoe 6:1; 9:15, 17-19.

18, 19. (a) Na sortoe bow projekt di e gro esi-esi na organisâsi foe Jehovah e wroko? (b) Fa a jeje foe Jehovah ben de foe si na a bow foe sani na skin fasi so boen leki na jeje fasi?

¹⁸ Ini a ten disi, Jehovah Kotoigi no e bow nanga jepi foe bowplan di Gado gi, ma den abi a jeje foe Gado. Neleki ini den dei foe Israèl, disi e boeweigi den foe bow na wan fasi di e froewondroe sma foe grontapoe (Sakaria 4:6). A ten sjatoe. Kownoekondrezaal nanga tra oso de fanowdoe sondro draidrai. Na son kondre Kownoekondrezaal di den e bow esi-esi na wan sani di e pasa foeroe. Ini den lasti 10 jari, foe eksempel, Kanada ben froeteri foe a bow foe 306 zaal, di ibriwan foe den bow na ini moro mendri leki toe dei. Foe di a wroko foe Jehovah na heri grontapoe e gro so esi, den e bow now wan totaal foe 43 njoen bijkantoro noso den e meki den bijkantoro kon moro bigi noso den e meki plan foe doe dati. Boiti dati, a bow foe wan oso foe 30 verdieping, di sa man teki moro leki wan doesoen Bethel friwani wrokoman na Brooklyn, e doro en kaba. So srefi ini New York State, na Patterson, a bow foe wan bijbel centrum foe gi leri, a moro bigi projekt di a Waktitoren genootschap ben bow wan ten, e go esi-esi èn den de fara na fesi tapoe a schema.

¹⁹ Den projekt disi e go esi-esi heri boen na fesi nanga wan kwaliteit di e meki bow wrokopresi foe grontapoe di sabi a wroko, e froewondroe. Foe san ede? Foe a toemoesi bigi bijdrage di den Kotoigi foe Jehovah, di gi densrefi abra, e gi. A jeje foe Gado e poesoe den no wawan foe sorgoe gi jepi na skin fasi ma foe meki den gi toe nanga den heri ati foe a ten nanga krakti foe den. Den presi pe den e bow, lai nanga wrokoman di kisi boen skoro èn di e gi densrefi. A no de so taki den e tapoe a wroko èn den no e meki ten foe a wroko lasi foe soso. A jeje foe Jehovah e boeweigi na ati, neleki fa a ben boeweigi den bowman foe a tabernakel ini a ten foe Moses nanga denwan di ben bow a tempel ini den dei foe Salomo. A jeje fasi na a toemoesi aparti eigifasi di den e aksi foe den wrokoman disi. — Teki gersi Exodus 35:30-35; 36:1-3; 39:42, 43; 1 Kownoe 6:11-14.

20. (a) O fara a preiki foe a boen njoensoe sa go ete? (b) Sortoe blesi froewakti de ete gi Jehovah en pipel?

²⁰ Salomo ben go doro nanga a bow programa foe en baka di a ben kaba nanga a tempel (2 Kroniki 8:1-6). Ofara a disiten kotoigi sa bradi ensrefi go — nanga a fanowdoe foe bow zaal nanga tra oso di e kon na a srefi ten nanga dati — wi no sabi. Ma wi sabi taki te a boen njoensoe disi foe a Kownoekondre preiki na a marki di Jehovah ben poti, dan a kaba, a „bigi banawtoe” sa kon (Mateus 24:14, 21). Na ini wan grontapoe di gridi sma no e pori moro langa, a seti foe Jehovah foe „njoen hemel nanga wan njoen grontapoe”, sa tjari dan foeroe blesi gi a libisma famiri. Meki wi foe dati ede ’prisiri pasa marki èn de breiti foe têgo foe san Gado e meki’ èn gi ala prèise na wi Gran Mekiman! — Jesaja 65:17-19, 21, 25.

[Foetoewortoe]

Joe kan froeklari disi?

◻ Sortoe reide wi abi foe prisiri ini wi Gran Mekiman?

◻ Foe sortoe gro den ben skrifi ini a dienstjari 1992?

◻ Foe sortoe bigi blesi, ini kondre pe a kotoigiwroko no ben mag doe fosi, den ben skrifi?

◻ Fa jongoesma nanga pionier ben abi wan prati na a gro ini Jehovah en organisâsi?

◻ Fa Jehovah en pipel ben doe foeroe ini bow-wroko na skin fasi so boen leki na jeje fasi?

[Faki na tapoe bladzijde 11]

A jari di pasa moro leki wan miljard joeroe ben gi na ini a preikiwroko èn wroko foe gi leri

[Raportoe na tapoe bladzijde 6-9]

1992 DINIWROKO RAPORTOE FOE JEHOVAH KOTOIGI NA HERI GRONTAPOE

(Loekoe a tijdschrift)

[Prenki na tapoe bladzijde 4]

Den hondrohondro doesoen sma di teki dopoe a jari di pasa, e sori Jehovah en blesi na tapoe a preikiwroko èn a wroko foe gi leri

[Prenki na tapoe bladzijde 10]

Bigi nomroe foe jongoe sma e ’memre a Gran Mekiman foe den’