Wan paradijs noso wan doti-ipi — Sortoe wan joe sa teki?
NO WAN sma ben sa meki a fowtoe foe teki en foe san a no de: wan man foe Europa di e rèis di ben abi rostoe fanowdoe, ben de fajafaja foe kan njanboen foe a son te disi e skèin tapoe wan èilanti di gersi wan paradijs. Ala di a e koti abra den bigi hei presi foe santi di ben de a marki foe a se-sjoro, a ben moesoe piki pasi na mindri doti foe batra, kan, plastiki saka, kawgum nanga papira pe soekroesani ben domroe na ini, njoensoe koranti nanga tijdschrift di sma ben trowe drape. A ben de krin foe si taki a ben e froeferi en, a ben e froewondroe efoe disi ben de a paradijs di a ben meki a rèis foe ben kon na en.
Joe oiti ben abi so wan sortoe ondrofeni? Foe san ede sma e dren foe abi fakansi ini wan sortoe paradijs, ma te den de drape kaba, leki fa a sori den no e draidrai foe kenki a paradijs kon tron wan troetroe doti ipi?
No wawan ini „paradijs”
A de krin taki a no ke di sma no e ke nanga a moi foe wan presi, taki ala sani teki poti na den presi, èn ala sani di netjes no de aparti sani na ini den presi di gersi wan paradijs, pe foeroe sma di e rèis e go. Na pikinmoro ala sei a njoen modo libimakandra abi difrenti problema nanga a doti di sma e doti a presi. Foeroe bisnis e meki wan bigi pisi foe a doti disi kon foe di den e meki boen foeroe sani di no boen moro foe gebroiki. Doti di sma trowe èn di abi vergif di den no man pori na wan boen fasi èn oli di den no kan jepi taki a froemorsoe, de leki wan kefar foe pori bigi kontren foe wi grontapoe, foe meki den no fiti foe sma libi.
Orlokoe so srefi e doti sani. Di grontapoe ben lasi ala howpoe, dan a feti ini a Golf foe Persia, ini 1991, ben tjari wan njoen sani kon. Den legre foe Irak ben poti faja na so wan 600 oli peti, foe meki Koewèiti kenki kon tron „wan hel foe faja leki di foe a fisioen foe Openbaring”, so leki fa wan njoensoe koranti foe Europa ben skrifi dati. Na Doisri tijdschrift, Geo, e kari a faja se „a moro bigi rampoe ini wan kontren di oiti libisma ben meki kon”.
Baka di a feti ini a Golf foe Persia ben tapoe, dan wantewante wan wroko ben bigin foe krin a heri presi. Soso a kiri foe na faja ini den peti ben teki foeroe moen foe tranga wroko. Na Organisâsi foe grontapoe Gesontoe afersi, WHO, taki dati a doti di Koewèiti kon moro doti sa meki taki na esi-esifasi nanga san sma e dede drape sa go na loktoe nanga 10 persent.
Moro mendri kefar ma froeferi srefisrefi
Gi ibri prenspari èn krin eksempel foe a doti foe bigi pisi kontren, joe abi doesoendoesoen eksempel foe pikinpikin pori. Sma di e doti den poebliki presi èn „artist” di e meki kraboekraboe na den skotoe skin kan de sma di no e doti so kefarlek, ma tokoe den e jepi so srefi foe foefoeroe a planeet grontapoe foe a man di a man foe de wan paradijs.
Ini son presi kraboekraboe na den skotoe skin de so wan ala dei sani taki sma di e libi ini a foto pikinmoro no e si en moro. Den de na den skin foe den trein di e waka ondrogron, na den skotoe foe oso èn na telefon cel. Joe no e feni den moro langa soso na den skotoe foe den poebliki w.c. (koemakoisi).
Son foto lai nanga brokobroko oso nanga leigi oso. Den pisi foe foto pe oso bow foe sma libi drape kon loekoe takroe nanga oso nanga djari di lai nanga wan lo bongro. Brokobroko oto, masjin di sma no wani moro, èn a djari foe den boeroe di lai nanga wan lo owroe-owroe bongro di na a tra sei ben kan de presi di ben moesoe moi foe si.
Ini son groepoe a gersi taki sma no e broko den ede efoe den skin doti èn morsoe. A weri foe krosi di ala sma e si wantewante èn di doti den no e feni boen wawan, ma a kon tron wan modo. Den sma di lobi taki ala sani teki poti na den presi èn ala sani de netjes, den e si den leki sma di abi owroeten fasi srefisrefi.
Fa dati de wan kefarlek bigi wroko!
Fa a sa de wan kefarlek bigi krin wroko di sa de fanowdoe foe kan kenki den watra sei, den boesi nanga den bergi foe oen grontapoe oso kon tron wan paradijs di den prenki foe en de foe si tapoe den tijdschrift, di meki foe brenki papira, foe den sma di e rèis, no foe taki foe san sa moesoe doe nanga den kondre, foto, boeroegron nanga den libisma srefi!
A sma di ben go na rèis èn di wi ben taki foe en na fesi kaba ben breiti foe si wan groepoe, di ben krin, e waka pasa ini a presi moro lati tapoe a dei, e poeroe den moro bigi doti di ben tan abra. Ma tokoe den ben e libi sani na baka so leki pisipisi foe grasi di broko, tapoen foe batra, papira di e plak na tapoe blik nanga wan heri ipi pisipisi sigaret. So boen srefi na baka a krin, tokoe ete a boeweisi ben de taki a pisi presi moro foeroe ben gersi wan doti ipi na presi foe wan paradijs.
A krin foe a heri grontapoe lontoe foe kibri a planeet grontapoe foe no kon tron wan doti ipi ben o aksi foe kon fri foe ala den sortoe sani dati di tan abra foe den pori sani disi. Wi kan abi howpoe taki so wan sortoe krin sa feni presi? Efoe a de so, fa dan? Soema sa doe dati? Oten?