Trowe leti na tapoe a denoja foe Krestes
„Te a Manpikin foe libisma sa doro ini en glori, . . . a sa prati sma foe makandra.” — MATEUS 25:31, 32.
1. Fa den kerki fesiman foe a krestenhèit ben froeklari san den wortoe na Mateus 24:3 wani taki?
DRI dei bifo a dede foe Jesus, fo foe en disipel ben kon na en èn ben aksi en serjoesoe: „Taigi wi: Oten den sani disi sa de èn san sa de a marki foe a kon foe joe [Grikitongo, pa·rou·siʹa], èn foe a kaba foe grontapoe?” Hondrohondro jari langa den kerki fesiman foe a krestenhèit èn skrifiman ben froeklari den wortoe disi foe Jesus na Mateus 24:3 (King James Version), taki den ben wani taki dati a heri libisma famiri ben sa si en baka na ini skin. Foe dati ede, den ben leri sma taki Krestes ben sa kon baka nanga bigi opo-opo èn pranpran di sma ben man si. Den e sori go na disi leki a di foe toe kon foe Krestes. Ma den prakseri foe den de joisti?
2, 3. (a) Sortoe difrenti a di foe toe pisi foe Studies in the Scriptures ben meki na mindri den wortoe „kon” èn „denoja”? (b) San a pipel foe Jehovah ben kon froestan ini a tori foe san a pa·rou·siʹa foe Krestes wani taki?
2 Ini 1889, den salfoewan foe Jehovah, di ben de leki tjariman foe leti foe a di foe tinaneigi jarihondro, ben poti boen na pasi kaba ini a tori foe a kon baka foe Krestes. Ini pisi toe foe Studies in the Scriptures, bladzijde 158 te nanga 161, Charles T. Russell, a fosi presidenti foe a Watch Tower Bible and Tract Society, ben skrifi: „Parousia . . . wani taki denoja èn noiti a moesoe vertaal nanga e kon, so leki fa den gwenti skrifi ini na English Bible . . . Na ‘Emphatic Diaglott’, wan toemoesi warti vertaling foe a Njoen Testamenti, e vertaal parousia na wan joisti fasi, denoja . . . , no nanga e kon, leki te wan sma de na pasi e kon, ma denoja, leki baka di wan sma kon kaba . . . [Jesus] e taki: ’So leki den dei foe Noa ben de, na so a parousia [denoja] foe a Manpikin foe libisma sa de toe.’ Loekoe dja taki na agersifasi no de na mindri a kon di Noa e kon èn a kon di wi Masra e kon . . . A difrenti, so boen, de na mindri a ten foe a denoja foe Noa, na mindri foe den sma ’bifo a froedoe’, nanga a ten foe a denoja foe Krestes na grontapoe, na a di foe toe kon foe en, ’bifo a faja’ — a toemoesi takroe problema foe a Dei foe Masra [Jehovah] nanga san a pisi ten disi e kon na wan kaba.” — Mateus 24:37.
3 So boen, Jehovah en pipel foe a di foe tinaneigi jarihondro ben froestan na wan joistifasi, taki a pa·rou·siʹa foe Krestes ben sa de wan sani di sma no ben sa man si nanga den ai. Den ben kon froestan toe, taki a kaba foe den ten foe den heiden ben sa de ini a dreiten foe 1914. Di a froelekti na jeje fasi ben kon moro nanga moro, Jehovah en pipel ben froestan baka ten taki a srefi jari dati, 1914, den ben poti Jesus Krestes tapoe kownoestoeroe na hemel leki Kownoe foe a Kownoekondre. — Odo 4:18; Danièl 7:13, 14; Lukas 21:24; Openbaring 11:15.
„A denoja foe wi Masra”
4. Na san „a denoja foe wi Masra Jesus Krestes” e sori go?
4 San den bijbelwortoe „a denoja foe wi Masra Jesus Krestes” wani taki foe dati ede, ini a ten foe wi? (1 Tesalonikasma 5:23) Wan boekoe e taki, dati a wortoe „denoja”, pa·rou·siʹa, „ben tron na officieel wortoe gi wan fisiti foe wan sma nanga wan hei posisi, spesroetoe foe kownoe nanga kèiser di ben e fisiti wan tra pisi foe a kownoekondre foe den”. So boen a wortoe disi e sori go na a kownoe denoja foe Masra Jesus Krestes leki Kownoe, sensi èn baka 1914, baka di den poti en tapoe kownoestoeroe na hemel. A de dja, sondro foe sma man si en, foe ’go poti sma na en ondro na mindri foe den feanti foe en’, èn a e tiri fajafaja leki Kownoe foe meki a profeitis komando disi, kon troe (Psalm 110:2). A de now so wan 79 jari taki libisma na grontapoe ben ondrofeni den bakapisi foe Krestes en kownoe denoja di sma no man si nanga den ai.
5. Foe sortoe sani di sa pasa ini a ten foe a pa·rou·siʹa wi sa taki ini den dri studie artikel foe a tijdschrift disi?
5 Ini den dri artikel disi, wi sa loekoe sjatoe den krin boeweisi foe den sani di a Kownoekondre foe Krestes e doe ini a pisi ten disi. Fosi, wi sa pristeri difrenti bijbel profeititori di e taki na fesi foe sani di ben pasa kaba noso di e pasa nownow srefi. Ini a di foe toe presi, wi sa taki foe a bigi wroko di a getrow èn koni srafoe, di Jesus e gebroiki a heri pisi ten disi foe en kownoe denoja, e doe (Mateus 24:45-47). A di foe dri artikel sa froeteri wi foe a bigi kaba, a pisi ten foe a „bigi banawtoe”. Dati na a ten te Jesus e kon leki Jehovah en bigi Tjariman foe strafoe, foe pori den onregtfardiki libisma èn foe froeloesoe den regtfardikiwan (Mateus 24:21, 29-31). Paulus ben skrifi foe a ten dati foe pori, leki foe tjari „gi oenoe di e njanpina foe banawtoe ede, froeloesoe makandra nanga wi na a tjari kon na krin foe Masra Jesus komoto na hemel nanga den tranga engel foe en, ini wan flamfaja, te a e teki refensi tapoe den sma di no sabi Gado èn tapoe den sma di no gi jesi na a boen njoensoe foe wi Masra Jesus”. — 2 Tesalonikasma 1:7, 8.
A marki
6. Foe sortoe marki di abi difrenti pisi, di e meki wán, den e taki na ini Mateus kapitel 24 nanga 25?
6 Tinaneigi jarihondro pasa kaba, Jesus disipel di ben tjari leti, ben aksi en wan marki, noso boeweisi, foe a denoja foe en ini Kownoekondre makti ini a ten di ben o kon. A piki foe en, di skrifi ini a di foe 24 nanga a di foe 25 kapitel foe Mateus, ben gi den wan marki di abi difrenti pisi èn di ala pisi foe en e kon troe now na heri grontapoe. A kontroe foe a marki dati e sori tapoe wan ten foe banawtoe èn hebi tesi. Jesus ben warskow: „Loekoe boen foe no wan sma e kori oenoe, bika foeroe sma sa kon tapoe a fondamenti foe mi nen èn den sa taki: ’Mi na a Krestes’, èn den sa kori foeroe sma. Oenoe sa jere foe orlokoe èn njoensoe foe orlokoe; loekoe boen foe oenoe no skreki. Bika den sani disi moesoe pasa, ma a kaba no de ete.” — Mateus 24:4-6.
7. Sortoe pisi foe a marki disi wi ben si e kon troe sensi 1914?
7 Jesus ben sori moro fara taki orlokoe ben sa de na wan fasi di noiti sma ben jere foe dati ete. Ini a kontroe, sma ben taki foe toe foe den orlokoe disi leki grontapoe orlokoe, wán foe 1914 te nanga 1918 èn a di foe toe foe 1939 te nanga 1945. Moro fara a ben taki dati mankeri foe njanjan nanga gronseki ben sa de ini a wan presi baka a trawan. Troe kresten ben sa kisi hebi froefolgoe. Neleki fa profeititori taki, Jehovah Kotoigi, den disiten tjariman foe leti, ondrofeni froefolgoe ini den aiti tenti jari di pasa, ala di den ben preiki a boen njoensoe foe Gado en Kownoekondre „na ala presi foe grontapoe pe sma e libi, leki wan kotoigi gi ala nâsi” (Mateus 24:7-14). Ibri Jariboekoe foe Jehovah Kotoigi e boeweisi taki den tori disi foe a marki e kon troe.
8, 9. (a) San a kownoe denoja foe Jesus abi na ini toe? (b) San a profeititori foe Jesus ini a tori foe den falsi Krestes e sori wi foe a presi nanga a fasi fa a denoja foe en sa de?
8 Foe di a kownoewroko foe Jesus de gi heri grontapoe, a troe anbegi e bradi ensrefi na ala pisi foe grontapoe. A kownoe denoja foe en (pa·rou·siʹa), na wan ten foe ondrosoekoe sani na heri grontapoe (1 Petrus 2:12). Ma wan mamafoto noso wan centraal presi de, pe sma kan aksi Jesus rai? Jesus ben piki tapoe disi, di a ben froeteri na fesi taki ini a froewakti di den ben e froewakti en denoja, falsi krestes ben sa opo. A ben warskow: „Te sma e taigi oenoe: ’Loekoe! A [Krestes] de na a sabana’, no go; ’Loekoe! A de ini den inisei kamra’, no bribi. Bika so leki a faja e koti komoto na den owstoesei kontren èn e skèin go tapoe den westsei kontren, na so a denoja [pa·rou·siʹa] foe a Manpikin foe libisma sa de.” — Mateus 24:24, 26, 27.
9 Jesus, „a Manpikin foe libisma”, ben sabi moro betre leki iniwan tra sma na grontapoe, pe a ben sa de te a denoja foe en ben bigin troetroe. A no ben sa go libi djaso noso drape noso na wan spesroetoe presi na grontapoe. A no ben sa de foe si na wan fara presi pe sma no e go foeroe, „na a sabana”, so taki den sma di ben sa soekoe a Mesias ben kan aksi en rai drape, farawe foe pe a lantimakti foe a kondre dati ben kan si en èn pe den bakaman foe en ben kan kisi skoro ondro a tiri foe en, foe teki a politiek makti abra nanga wan koep èn foe poti en leki a Mesian Tiriman foe grontapoe. Moro fara a no ben sa kibri ensrefi na ini wan „inisei kamra”, ala di soso wan pikin groepoe, di a ben teki poeroe na mindri trawan, ben sa sabi a presi èn sondro foe wan sma man si en èn man feni en, a ben kan poti na en prakseri na wan kibrifasi, nanga sma di ben sa jepi en, foe trowe den tiri foe grontapoe èn foe meki den salfoe en leki a pramisi Mesias. Nôno!
10. Fa faja foe bijbel waarheid ben koti èn skèin kon na a heri grontapoe?
10 Na presi foe dati, no wan sani ben sa de foe kibri ini a tori foe Jesus di ben kon leki Kownoe, na a bigin foe en kownoe denoja. So leki fa Jesus ben taki na fesi, dan na heri grontapoe, faja foe bijbel waarheid ben go doro foe koti tapoe bigi kontren foe owstoesei pisi te na westsei pisi. Foe troe, leki disiten tjariman foe leti, Jehovah Kotoigi e sori taki den de „wan leti foe den nâsi, so taki a froeloesoe foe [Jehovah] moesoe doro na ala sei foe grontapoe”. — Jesaja 49:6.
A wroko foe den engel
11. (a) Na sortoe fasi den e gebroiki engel boskopoeman foe skèin Kownoekondre leti kon? (b) Oten èn na ini sortoe groepoe den ben tjari den memre foe a tarwe-groepoe kon makandra?
11 Tra tekst di abi foe doe nanga Jesus en denoja e froeteri foe en leki wan sma di engel e go makandra nanga en noso leki wan sma di ’e seni den go’ (Mateus 16:27; 24:31). Ini na agersitori foe a tarwe nanga a takroe wiwiri, Jesus ben taki dati „a gron na grontapoe” èn taki „a kotiwroko na wan bosroiti foe wan seti foe sani èn den kotiman na engel”. Ma disi no wani taki dati na a ten foe en denoja ini Kownoekondre makti èn glori, a e gebroiki soso engel boskopoeman foe doe wroko na grontapoe. Na ini 1919, engel na ondro a tiri foe Jesus, ben bigin poti a tarwe-groepoe foe salfoewan na grontapoe aparti, di ben kon naki panja, di den sani foe a Fosi Grontapoefeti ben pasa èn den ben sreka den gi moro wroko ini a nen foe a Kownoe (Mateus 13:38-43). Ini den jari 1920, tra doesoendoesoen sma ben teki a sei foe a Kownoekondre foe Gado di ben opo èn den ben kisi salfoe nanga Gado jeje. Den salfoewan disi, te joe loekoe en boen, den ben poti kon na a groepoe foe a fosi fikapisi. Leki wán groepoe makandra, den de a getrow èn koni srafoe groepoe gi a ten foe wi.
12. Na ini sortoe wroko foe krin sani, den engel ben teki prati èn nanga sortoe bakapisi gi grontapoe?
12 Wan tra eksempre foe a prati di den engel abi ini a ten foe Jesus en denoja, baka di den poti en na tapoe kownoestoeroe ini 1914, skrifi na Openbaring 12:7-9: „Mikaèl [Jesus Krestes] nanga den engel foe en ben feti nanga a draak èn a draak nanga den engel foe en ben feti, ma den no ben wini èn so toe presi no ben de foe feni moro gi den na hemel. Foe dati ede den ben iti a bigi draak, a fosi sneki, di nen Didibri nanga Satan, di e kori heri grontapoe pe libisma e libi; den ben iti en go na grontapoe èn den engel foe en den ben iti go nanga en.” So boen hemel na tapoe ben kon krin now, ala di a grontapoe pisi foe a Kownoekondre de ete foe krin dorodoro foe a nen foe Jehovah kan meki kon santa. Ini a jari 1993 disi, a warskow di e kon foe Gado e tan fiti foe gebroiki: „Heloe foe grontapoe . . . foe di Didibri saka kon na oenoe èn a abi bigi atibron foe di a sabi taki a abi wan sjatoe pisi ten.” — Openbaring 12:12.
Opobaka foe go na hemel
13, 14. (a) San den Boekoe e sori taki ben e pasa sensi 1918? (b) San Paulus nanga Johanes e tjari kon na krin ini a tori foe a salfoe fikapisi ini a ten disi?
13 Wan tra froewondroe sani di ben pasa na a ten foe Krestes en denoja, na a bigin foe na opobaka foe go na hemel. Na apostel Paulus ben sori taki den salfoe kresten, di sribi langa ten kaba ini den grebi foe den, ben sa de den fosiwan di den ben sa meki kon na libi èn di ben sa libi nanga Krestes Jesus na a jejekondre. Den ben pristeri boeweisi ini den jari di pasa, taki a gersi taki disi ben pasa sensi 1918. Paulus e skrifi: „Na so toe den alamala sa meki kon na libi ini Krestes. Ma ibriwan na en eigi presi: Krestes, a fosiwan, baka dati den di de foe Krestes, na a ten foe en denoja [pa·rou·siʹa]” (1 Korentesma 15:22, 23). Na 1 Tesalonikasma 4:15-17 den e sori taki na opobaka foe den salfoewan na a ten foe Krestes denoja de so: „Disi na san wi e taigi oenoe nanga jepi foe a wortoe foe Jehovah, taki wi den libiwan, di e tan na libi te na a denoja [pa·rou·siʹa] foe Masra, kwetikweti no sa go na fesi foe denwan di go sribi ini dede . . . Denwan di dede ini wánfasi nanga Krestes sa opo fosi. Bakadati wi den libiwan di e tan na libi, sa hari gowe makandra nanga den ini wolkoe foe miti Masra na loktoe.” Joe abi 144.000 di de foe Krestes leki salfoewan èn di sa kisi te foe kaba a toemoesi moi paiman disi. — Openbaring 14:1.
14 So leki fa Paulus e sori, dan a salfoe fikapisi dati di de na libi ini a ten disi, no e go ini a Kownoekondre bifosi den getrow fositen salfoe kresten dati, di ben kisi hebi skin-ati èn den disipel. Na apostel Johanes e froeteri moro fara foe den salfoewan dati di e dede ini a ten disi so leki fa e kon now: „Kolokoe den dedewan di e dede ini wánfasi nanga Masra foe bigin nanga now. Ija, a jeje e taki, meki den rostoe foe a hebi wroko foe den, bika den sani di den ben doe e go makandra nanga den”, dati wani taki, te den de na libi baka na opobaka foe den (Openbaring 14:13). Èn Paulus e taki: „Loekoe! mi e froeteri oenoe wan santa kibritori: A no wi alamala sa go sribi ini dede, ma wi alamala sa kenki, na wán bro, na wán momenti, na a joeroeten foe a lasti trompeti. Bika a trompeti sa bari èn den dedesma sa opo foe den no kan kisi pori moro èn wi sa kon kenki” (1 Korentesma 15:51, 52). Ai, fa dati na wan toemoesi moi wondroe!
15, 16. (a) Sortoe agersitori Jesus ben gi na Lukas 19:11-15 èn nanga sortoe reide? (b) Fa a profeititori disi kon troe?
15 Wan leisi di Jesus ben e preiki foe a Kownoekondre foe Gado gi wan groepoe foe den bakaman foe en, a ben gebroiki wan agersitori foe jepi den foe poti den fowtoe prakseri foe den reti. A tori e taki: „Den ben prakseri taki a kownoekondre foe Gado ben o sori ensrefi wantewante. Foe dati ede a ben taki: ’Wan seiker man foe hei gebortoe ben rèis go na wan farawe kondre foe go kisi kownoemakti gi ensrefi èn foe drai [baka dati] kon baka. A ben kari tin foe en srafoe èn ben gi den tin mina èn ben taigi den: „Doe bisnis nanga disi te leki mi kon.” . . . Te foe kaba di a drai kon baka, na baka di a ben kisi kownoemakti, a ben gi a komando foe kari den srafoe di a ben gi a solfroe moni kon gi en, foe a kon sabi san den ben kisi nanga jepi foe bisniswroko.’” — Lukas 19:11-15.
16 Jesus ben de a „man” dati di ben go na hemel, a „farawe kondre” pe a ben o kisi wan kownoekondre. A Kownoekondre dati a ben kisi ini 1914. Sjatoe baka dati, Krestes leki Kownoe, ben aksi frantiwortoe foe den sma di ben taki dati den ben de en bakaman, foe si san den ben doe foe sorgoe gi den Kownoekondre afersi di a ben froetrow na den. Wan toe getrow-wan a ben teki poeroe foe kisi a prèise foe a meester: „Heri boen, boen srafoe! Bika ini wan pikin sani joe ben sori joesrefi getrow, abi makti tapoe tin foto” (Lukas 19:17). A pisi ten disi foe Krestes denoja ben wani taki toe fajafaja Kownoekondre preikiwroko di ben sa go doro, so srefi a meki bekènti foe a kroetoe foe Gado gi na ogriwan èn a loekoe di den ben moesoe loekoe a wroko disi ben de toe ini a makti di a „boen srafoe” ben kisi.
Preiki na heri grontapoe
17. Sortoe prisiri e marki a pa·rou·siʹa?
17 San moro ben sa pasa na a pa·rou·siʹa disi? A ben sa de wan ten foe bigi prisiri ini a preikiwroko èn ini a jepi foe njoen sma foe sreka densrefi foe pasa a bigi banawtoe di e kon, libilibi. Denwan foe a „bigi ipi”, di e jepi a fikapisi, e tron „brifi di e rikomanderi den” (Openbaring 7:9; 2 Korentesma 3:1-3). Paulus e taki foe a prisiri foe a kotiwroko disi te a e taki: „San na wi howpoe noso prisiri noso kownoe-ati foe prisiri — ija, a no oenoe de disi te joe loekoe en boen? — na fesi foe wi Masra Jesus Krestes na en denoja [pa·rou·siʹa]?” — 1 Tesalonikasma 2:19.
Tan de krin èn sondro fowtoe
18. (a) Sortoe begi foe Paulus e sori go na a pa·rou·siʹa? (b) Sortoe jeje wi alamala moesoe sori ini a ten disi èn na sortoe fasi?
18 Paulus ben begi toe foe meki denwan di de na libi na a pisi ten disi foe Krestes denoja, kon santa: „Meki a Gado foe vrede srefi santa oenoe dorodoro. Èn meki a jeje èn a sili èn a skin foe oenoe, [brada] sondro foe kisi mankeri na ala fasi, kisi kibri na wan fasi di de sondro fowtoe, na a denoja [pa·rou·siʹa] foe wi Masra Jesus Krestes” (1 Tesalonikasma 5:23). Ija, ini a ten disi, awansi wi de foe a salfoe fikapisi noso foe a bigi nomroe foe tra skapoe, a jeje foe wroko makandra e tai wi na wan loyaalfasi makandra, so taki wi kan go doro foe de krin èn sondro fowtoe ini a toemoesi aparti ten disi. Na a srefi fasi, wi moesoe oefen pasensi. Jakobus ben skrifi: „Oefen pasensi, foe dati ede, brada, te leki a denoja [pa·rou·siʹa] foe Masra. . . . Meki oen ati kon stanfaste, foe di a denoja [pa·rou·siʹa] foe Masra kon krosibei.” — Jakobus 5:7, 8.
19. Sortoe warskow Petrus ben gi ini a tori foe a pa·rou·siʹa èn san wi moesoe doe na tapoe dati?
19 Na apostel Petrus ben abi wan sani toe foe taigi wi, di de na libi ini a pisi ten disi. A ben warskow wi gi spotoeman, di foeroe foe den de ini ala pisi foe grontapoe. Petrus e taki: „Bika oenoe sabi disi ini a fosi presi, taki ini den lasti dei spotoeman sa kon nanga den spotoe foe den, di e wroko akroederi den eigi lostoe èn den e taki: ’Pe a pramisi denoja [pa·rou·siʹa] foe en de? Ija, foe sensi a dei di den afo foe wi ben dede, ala sani e tan leti so, leki sensi a bigin di Gado meki sani’” (2 Petrus 3:3, 4). Ala di den spotoeman de na ala sei na a ten foe Krestes en denoja, a pipel foe Jehovah e tan skèin leki a leti foe grontapoe, foe meki foeroe sma kisi froeloesoe.
Aksi foe e loekoe sani sjatoe
◻ Fa a pipel foe Jehovah ben kisi froelekti pikinso-pikinso ini a tori foe a pa·rou·siʹa?
◻ Fa Mateus 24:4-8 ben kisi en kontroe?
◻ Fa den engel ben wroko makandra nanga Krestes di den ben poti na tapoe kownoestoeroe?
◻ Sortoe toemoesi moi wondroe e sori taki a e go makandra nanga a pa·rou·siʹa?
◻ Sortoe prisiri wi e ondrofeni ini a ten disi èn soema abi wan prati na disi?