Wèi na ipi foe Gado foe di oenoe wani
„Wèi na ipi foe Gado di de na oenoe sorgoe, no ondro dwengi, ma foe di oenoe wani.” — 1 PETRUS 5:2.
1. Foe san ede wi moesoe froewakti taki kresten owroeman sa ’wèi na ipi foe Gado foe di den wani’?
JEHOVAH e wèi a pipel foe en foe di a wani (Psalm 23:1-4). „A toemoesi boen skapoeman”, Jesus Krestes, ben gi en volmaakti libisma libi gi sma di joe kan teki gersi nanga skapoe, foe di a ben wani (Johanes 10:11-15). Foe dati ede, na apostel Petrus ben gi kresten owroeman a froemane foe ’wèi na ipi foe Gado foe di den wani’. — 1 Peter 5:2.
2. Sortoe aksi moesoe kisi prakseri ini a tori foe den wroko foe den kresten owroeman foe wèi na ipi?
2 A wani di wan sma wani foe doe sani, na wan marki foe den foetoeboi foe Gado (Psalm 110:3). Ma moro de fanowdoe leki a wani, di wan kresten man wani foe den poti en na wroko leki wan opziener noso wan ondro skapoeman. Soema de bekwaam foe de den sortoe skapoeman dati? San a skapoemanwroko foe den wani taki? Fa a wroko disi kan doe na a moro boen fasi?
Teki fesi na ini wan osofamiri
3. Foe san ede wi kan taki dati a fasi fa wan kresten man e sorgoe gi en osofamiri abi krakti na tapoe a de di a de bekwaam foe de wan skapoeman ini a gemeente?
3 Bifo den kan poti wan man foe „doe a wroko foe wan opziener”, a moesoe doro bijbel markitiki (1 Timoteus 3:1-7; Titus 1:5-9). Na a fosi presi, na apostel Paulus ben taki dati wan opziener moesoe de „wan man di e teki fesi ini en eigi osofamiri na wan toemoesi boen fasi, di abi pikin na en ondro nanga ala serjoesoe fasi”. Boen reide de foe disi, bika Paulus ben taki: „Efoe wan man no sabi fa foe teki fesi na ini en eigi osofamiri, fa a sa kan sorgoe dan gi a gemeente foe Gado?” (1 Timoteus 3:4, 5). Di den ben poti owroeman na wroko ini den gemeente na tapoe na eilanti Kreta, den ben taigi Titus foe soekoe „wan man di fri foe fowtoe, wan masra foe wán wefi, di abi pikin di de na bribi èn di sma no ben kan kragi foe wan loesoe fasi foe libi noso tranga-ede” (Titus 1:6). Ija, te den sa bosroiti efoe wan kresten man de bekwaam foe teki a moro hebi frantiwortoe foe wèi a gemeente, den moesoe poti prakseri na tapoe a fasi fa a e sorgoe gi en osofamiri.
4. Fa kresten papa nanga mama moesoe sori lobi gi den osofamiri, boiti taki den abi wan doronomo bijbelstudie èn e begi doronomo?
4 Man di na wan toemoesi boen fasi e teki fesi na ini na osofamiri foe den, e doe moro leki foe begi èn foe studeri bijbel doronomo nanga na osofamiri foe den. Den de ala ten klari foe jepi den lobiwan foe den. Gi denwan di e tron papa nanga mama, disi e bigin na a dei di a pikin e gebore. Kresten papa nanga mama sabi taki omoro tranga den e hori na wan fasi foe libi doronomo akroederi den markitiki foe Gado, omoro esi den jongoe wan foe den sa fiti ini a schema foe den foe kresten aktiviteit ini na aladei libi. O boen a kresten papa e teki fesi ini den omstandigheid disi, e sori den bekwaamfasi foe en leki wan owroeman. — Efeisesma 5:15, 16; Filipisma 3:16.
5. Fa wan kresten papa kan kweki den pikin foe en „ini a tranga leri èn froemane foe Jehovah”?
5 Te wan kresten papa, di e doe en plekti akroederi a konsensi foe en, e teki fesi na ini en osofamiri, a e hori a rai foe Paulus na prakseri: „No tanteri den pikin foe oenoe, ma tan kweki den ini a tranga leri èn froemane foe Jehovah” (Efeisesma 6:4). Doronomo bijbelstudie nanga na osofamiri, a wefi nanga den pikin, e gi toemoesi moi okasi foe gi leri na wan lobi fasi. Den pikin e kisi na so fasi „tranga leri” noso leri di e poti wan fowtoe kon boen baka. „Froemane” di e gi na den okasi dati e jepi ibri pikin foe leri sabi a fasi fa Jehovah e prakseri foe afersi (Deuteronomium 4:9; 6:6, 7; Odo 3:11; 22:6). Te a pikin konmakandra disi na jeje fasi e hori na wan fasi taki sma no de spanspan, a lobi papa e arki boen te den pikin foe en e taki. Na wan switifasi a e gebroiki aksi foe jepi a pikin foe taki na wan eerlijkfasi foe sani di den e broko den ede nanga dati èn a fasi fa den e si sani. A papa no moesoe doe neleki a sabi ala sani di de ini a prakseri foe den jongoewan. Ija, „te wan sma e gi piki na tapoe wan afersi bifo a jere en, dan dati na wan law sani foe en sei èn wan sjen”, Odo 18:13 e taki. Ini a ten disi, moro foeroe papa nanga mama feni taki den situwâsi di den pikin foe den e miti, de difrenti srefisrefi foe denwan di densrefi ben ondrofeni di den ben jongoe. Foe dati ede wan papa sa doe moeiti foe kon sabi a background èn den finifini tori di abi foe doe nanga wan problema, bifo a e taki fa foe doe nanga a problema dati. — Teki gersi Jakobus 1:19.
6. Foe san ede wan kresten papa moesoe soekoe rai ini Gado Wortoe te a e jepi en osofamiri?
6 San e pasa baka di den kon sabi den problema, den sani di den pikin foe den e broko den ede nanga dati èn fa den e prakseri? A papa di e teki fesi na wan toemoesi boen fasi e soekoe rai ini bijbel, di „boen foe gi sma leri, foe piri-ai, foe poti sani reti, foe gi tranga leri na ini regtfardikifasi”. A papa e leri den pikin foe en fa foe poti den tirilin di skrifi na ini bijbel nanga jepi foe santa jeje, ini den libi. Na a fasi disi, denwan di jongoe ini jari e kon „bekwaam dorodoro, de srekasreka dorodoro gi ibri boen wroko”. — 2 Timoteus 3:16, 17; Psalm 78:1-4.
7. Sortoe eksempre kresten papa moesoe gi ini a tori foe begi?
7 Jongoesma di lobi foe dini Gado e tanapoe na fesi moeilek situwâsi ini a tori foe grontapoe skorokompe. So boen fa kresten papa kan meki a frede di den pikin foe den frede, kon moro mendri? Wan fasi na foe e begi doronomo nanga den èn gi den. Te den jongoe sma disi tanapoe na fesi situwâsi di moeilek srefisrefi, den sa froetrow kande na Gado tapoe, neleki fa a papa nanga mama foe den e doe dati. Wan oemapikin foe 13 jari, di den ben abi wan aksi-takimakandra nanga en bifo a ben teki dopoe leki wan simbôl foe a gi di a ben gi ensrefi abra na Gado, ben froeteri taki a ben ondrofeni spotoe nanga meshandri foe en skorokompe. Di a ben opo taki gi a bribi foe en di abi en fondamenti na tapoe bijbel ini a tori foe a santafasi foe broedoe, tra oemapikin ben naki en èn ben spiti na en tapoe (Tori foe den Apostel 15:28, 29). A ben teki refensi? Nôno. „Mi ben tan begi Jehovah foe jepi mi foe no lasi misrefi”, a ben froeklari. „Mi ben memre toe san mi papa nanga mama ben leri mi na wi osofamiri studie, foe a fanowdoe foe dwengi wisrefi te ogri e miti wi.” — 2 Timoteus 2:24.
8. Fa wan owroeman di no abi pikin kan teki fesi na wan toemoesi boen fasi na ini en osofamiri?
8 Wan owroeman di no abi pikin kan sorgoe toe gi boen sani na jeje fasi èn na skin fasi gi den sma ini en osofamiri. Disi abi na ini toe en trowpatna nanga kande kresten famiri di no kan sorgoe gi densrefi èn di e libi na ini en oso (1 Timoteus 5:8). Foe teki fesi so na wan toemoesi boen fasi, na wán foe den sani di wan man di den poti na wroko moesoe doe foe teki frantiwortoe leki gemeente owroeman. Ma fa owroeman di den poti na wroko moesoe si den gemeente frantiwortoe dan di de wan grani?
Teki fesi „ini ala serjoesoefasi”
9. Sortoe fasi foe tjari densrefi, kresten owroeman moesoe abi ini a tori foe a dienst toewijzing foe den?
9 Ini a fosi jarihondro foe wi Gewoon Teri, na apostel Paulus ben dini leki wan man di ben sorgoe gi den sani ini Gado en osofamiri, a kresten gemeente na ondro a tiri foe Krestes (Efeisesma 3:2, 7; 4:15). Foe en sei, Paulus ben froemane en kompe bribiman na Rome: „Foe di . . . wi abi presenti di e difrenti akroederi a no-froedini boen-atifasi di den ben gi wi, awansi a de wan profeititori, meki wi taki profeititori akroederi a bribi di den ben gi wi; noso wan diniwroko, meki wi poti wisrefi na tapoe a diniwroko disi; noso a sma di e gi sma leri, meki a poti ensrefi na tapoe a gi di a e gi leri; noso a sma di e gi froemane, meki a poti ensrefi na tapoe a gi foe froemane; a sma di e prati sani, meki a doe en sondro gridi; en di e teki fesi, meki a doe en ini ala serjoesoefasi; a sma di e sori sari-atifasi, meki a doe en nanga prisiri.” — Romesma 12:6-8.
10. Sortoe eksempre Paulus ben e gi owroeman ini a ten disi ini a tori foe a sorgoe di den e sorgoe na ipi foe Gado?
10 Paulus ben memre den Tesalonikasma: „So leki fa wan papa e doe nanga en pikin, wi ben tan gi froemane na ibriwan foe oenoe èn gi trowstoe èn gi kotoigi na oenoe, so taki oenoe ben sa tan waka na wan fasi di e fiti Gado, di e kari oenoe kon na en kownoekondre èn glori” (1 Tesalonikasma 1:1; 2:11, 12). A froemane ben gi na so wan switi, lobi fasi, taki Paulus ben kan skrifi: „Wi ben kon kisi switifasi na oenoe mindri, neleki te wan mama di e gi en pikin bobi e sori safoefasi gi en eigi pikin. Foe di wi ben abi wan switi firi gi oenoe, nanga prisiri wi no ben gi oenoe soso a boen njoensoe foe Gado, ma wi eigi sili toe, foe di oenoe ben tron lobiwan gi wi” (1 Tesalonikasma 2:7, 8). Ini akroederi nanga Paulus en eksempre di joe kan teki gersi nanga di foe wan papa, loyaal owroeman e broko den ede srefisrefi nanga ala sma ini a gemeente.
11. Fa owroeman di den poti na wroko kan sori fajafasi?
11 Switifasi makandra nanga fajafasi, moesoe de den eigifasi di de a marki fa wi getrow kresten skapoeman e hori ai na tapoe sani na wan lobifasi. A fasi fa den e handri e tjari foeroe sani kon na krin. Petrus e gi owroeman a rai foe wèi na ipi foe Gado „no ondro dwengi” noso „foe lobi ede gi wini na wan fasi di no eerlijk” (1 Petrus 5:2). Foe a sani disi, sabiman William Barclay ben taki wan wortoe foe warskow, di a ben skrifi: „Wan fasi de foe teki wan wroko nanga frantiwortoe èn foe doe diniwroko neleki a de wan takroe wroko di no prisiri, neleki a de wan sani di e weri skin, neleki a de wan bigi hebi di sma no moesoe wani si na ai. A kan heri boen taki den e aksi wan man foe doe wan sani èn taki en man doe en, ma a e doe en na so wan fasi di no fiti taki a heri wroko dati pori. . . . Ma [Petrus] e taki dati ibri kresten moesoe beifi foe a faja di wi de faja foe doe so wan diniwroko so boen leki a man, ala di a sabi heri boen taki a no warti foe doe dati.”
Skapoeman di wani
12. Fa kresten owroeman kan sori a wani di den wani?
12 „Wèi na ipi foe Gado di de na oenoe sorgoe . . . foe di oenoe wani”, Petrus e gi tranga toe. Wan kresten opziener di e sorgoe gi den skapoe e doe disi foe di a wani noso nanga en eigi fri wani, ondro a tiri foe a Toemoesi Boen Skapoeman, Jesus Krestes. Foe dini foe di a wani, wani taki toe dati wan kresten skapoeman moesoe saka ensrefi na a makti foe Jehovah ondro, ’a skapoeman èn opziener foe wi sili’ (1 Petrus 2:25). Wan kresten ondro skapoeman e sori lespeki gi a theokrasia seti foe di a wani. A e doe disi te a e tiri denwan di e soekoe rai na Gado Wortoe, bijbel. Ala di ondrofeni sa jepi wan owroeman foe bow wan heri maksin foe rai di abi en fondamenti na tapoe bijbel, dati no wani taki dati gi ibri problema wantewante a sa man abi a loesoe di de foe feni ini bijbel. Srefi te a sabi a piki tapoe wan aksi, a kan feni en wan koni sani foe go soekoe rai foe a Waktitoren Poeblikâsi Index noso index-boekoe di de a srefi, makandra nanga a sma di ben aksi sani. Na so fasi a e gi leri na toe fasi: A e sori fa foe feni bodoi di kan de wan jepi èn na wan sakafasi a e sori lespeki gi Jehovah foe di a e poti a prakseri na tapoe san Gado organisâsi tjari kon na doro.
13. Sortoe sani kan doe foe jepi owroeman foe gi gosontoe rai?
13 San wan owroeman kan doe efoe den boekoe foe a Genootschap no skrifi noti foe a spesroetoe problema di a sma abi? Wi kan de seiker taki a sa begi foe kisi inzicht èn a sa soekoe wan toe bijbel gronprakseri di e fiti na afersi. A kan feni en wan boen sani toe foe taigi a sma di e soekoe jepi, foe a loekoe na eksempre foe Jesus. Na owroeman ben sa kan aksi: „Efoe Jesus, a Bigi Leriman, ben de ini joe situwâsi, san joe denki a ben sa doe?” (1 Korentesma 2:16). So wan fasi foe taki-go-taki-kon sa kan jepi wan sma di ben aksi sani, foe teki wan koni bosroiti. Ma a no ben sa de wan koni sani efoe wan owroeman ben sa taki soifri san en e denki, neleki dati de a soifri rai foe bijbel! Na presi foe dati, owroeman kan taki nanga makandra foe moeilek problema. Den kan tjari srefi prenspari afersi foe taki makandra kon na fesi na wan konmakandra foe a skin foe owroeman (Odo 11:14). Den bosroiti di den sa teki baka dati sa meki taki den alamala kan taki ini akroederi nanga makandra. — 1 Korentesma 1:10.
Safri-atifasi de prenspari
14, 15. San den e aksi foe owroeman te den e meki wan kresten kon boen baka di ’ben misi foetoe fadon bifo a ben kisi ensrefi’?
14 Wan kresten owroeman moesoe sori safri-atifasi te a e gi leri na trawan, spesroetoe te a e gi den rai. „Brada”, Paulus ben gi rai, „srefi efoe wan sma misi foetoe fadon bifo a kisi ensrefi, dan oenoe di abi jeje eigifasi, proeberi ini wan jeje foe safri-atifasi, foe meki so wan sma kon boen baka” (Galasiasma 6:1). A de wan moi sani foe si, taki a Griki wortoe di den vertaal dja nanga „kon boen baka”, abi foe doe nanga wan wortoe di datra ben gebroiki foe taki fa wan bonjo moesoe poti boen, so taki den ben kan meki taki a sma no tan malengri en heri libi langa. Sabiman foe wortoe W. E. Vine, e tjari a sani disi kon ini a tori foe a meki di den e meki „wan sma di ben doe sondoe [kon boen baka], nanga jepi foe denwan di abi jeje fasi, so wan sma de leki wan memre foe a skin na jeje fasi, di no de na en presi”. Tra vertaling na, „foe poti en kon boen baka ini a joisti posisi; foe tjari en kon baka ini wan joisti lin”.
15 Foe poti joe eigi denki kon boen baka no makriki èn a kan de moeilek srefisrefi foe tjari a prakseri foe wan sma di meki wan fowtoe, kon baka ini wan joisti lin. Ma jepi di gi nanga wan jeje foe safri-atifasi, den sa teki kande nanga grantangi. Foe dati ede, kresten owroeman moesoe waka baka a rai foe Paulus: „Weri gi oensrefi den safoe lobi fasi foe sari-atifasi, switifasi, sakafasi foe jeje, safri-atifasi èn langa pasensi” (Kolosesma 3:12). San owroeman moesoe doe te wan sma di moesoe kon boen baka abi wan takroe fasi foe si sani? Den moesoe „feti na baka . . . safri-atifasi”. — 1 Timoteus 6:11.
Wèi na ipi na wan konifasi
16, 17. Gi sortoe kefar owroeman moesoe loekoe boen te den e gi rai na trawan?
16 Moro sani de ete na a rai foe Paulus ini Galasiasma 6:1. A e gi tranga na man di bekwaam na jeje fasi: „Proeberi ini safri-atifasi foe meki [wan sma di doe wan fowtoe] kon boen baka, ala di ibriwan foe oenoe e hori wan ai na oensrefi tapoe, foe tesi no moesoe miti oenoe toe.” Fa serjoesoe takroe bakapisi kan kon te sma no e waka baka so wan rai! Tori di ben abi foe doe nanga wan anglikan kerki fesiman, di den ben feni fowtoe na en taki a ben doe hoeroedoe nanga toe kerkisma, ben meki a tijdschrift The Times foe Londen, ben moesoe taki dati disi „na wan situwâsi di no abi wan kaba: wan man di e gi rai, di kande de leki wan papa noso wan brada, e broko kindi gi sondoe foe di den sma di a e gi rai ben froetrow en”. Baka dati wan oema di e skrifi njoensoe gi koranti, ben sori go na den sani di Dr. Peter Rutter ben taki dati „a gebroiki di den e meki wan fowtoe gebroiki foe seksdoe na mindri siki sma nanga den man-nengre raiman foe den — datra, afkati, priester nanga wrokobasi — kon tron, ini wi libisma libimakandra, di no e skotoe sma ini a tori foe seks, wan toemoesi bigi siki di e panja ensrefi na alasei, èn di sma no e erken, ala di a e doe sma ogri èn e gi den sjen”.
17 Wi no moesoe denki taki a pipel foe Jehovah no kan fadon gi den sortoe tesi dati. Wan lespeki owroeman di jari langa ben dini getrow, ben kisi foe doe nanga hoeroedoe, bika a ben tjari skapoeman fisiti na wan sisa di trow, te a sisa ben de en wawan. Ala di a ben abi berow, a brada ben lasi ala en dienst grani (1 Korentesma 10:12). Ma fa owroeman di den poti na wroko kan tjari skapoeman fisiti dan na so wan fasi taki den no sa kon ini tesi? Fa den kan seti sani foe de pikinso den wawan sondro foe sma hendri den, foe begi èn foe gi wan okasi foe soekoe rai na ini Gado Wortoe èn na ini kresten poeblikâsi?
18. (a) Fa a doe foe den gronprakseri foe na edeman-wroko kan jepi owroeman, foe tan farawe foe situwâsi di kan tjari sjen kon? (b) Sortoe sani den kan seti foe tjari wan skapoeman fisiti na wan sisa?
18 Wan sani di owroeman moesoe hori na prakseri na a gronprakseri foe na edeman-wroko (1 Korentesma 11:3). Efoe wan jongoe sma e soekoe tiri, dan doe moeiti foe meki en papa nanga mama kon ini a takimakandra toe te dati fiti. Te wan sisa di trow e aksi jepi na jeje fasi, joe kan seti sani taki a masra foe en de drape te joe e fisiti a sisa? Fa a de te disi no man noso a masra na wan sma di no de na bribi èn di ben meshandri a sisa na wan noso tra fasi? Seti sani dan na a srefi fasi te joe ben sa tjari wan skapoeman fisiti na wan sisa di no trow. A ben sa de wan koni sani te toe brada makandra di de bekwaam na jeje fasi, e tjari a fisiti na a sisa. Efoe disi no man, kande wan joisti ten kan teki foe toe brada abi wan takimakandra nanga a sisa na a Kownoekondrezaal, a moro boen te a ben sa de ini wan kamra di e gi pasi foe de oenoe wawan sondro foe sma hendri oenoe. Nanga tra brada nanga sisa di de ini a zaal, ala di den no de ini a posisi foe si èn jere a takimakandra, kande ala reide foe naki foetoe fadon sa poeroe na pasi. — Filipisma 1:9, 10.
19. Sortoe boen bakapisi sa kon foe a wèi di den e wèi den skapoe foe Gado foe di den wani èn gi soema wi e sori taki wi de grantangi gi den skapoeman disi di wani?
19 Foe wèi den skapoe foe Gado foe di oenoe wani sa abi boen bakapisi — wan ipi di tranga na jeje fasi èn di e kisi boen tiri. Neleki na apostel Paulus, den disiten kresten owroeman e broko den ede srefisrefi nanga kompe bribiman (2 Korentesma 11:28). A frantiwortoe foe wèi Gado ipi ini den moeilek ten disi, hebi spesroetoe. Foe dati ede, wi de grantangi srefisrefi gi a toemoesi boen wroko di wi brada, di e dini leki owroeman, e doe (1 Timoteus 5:17). Foe di a blesi wi nanga „presenti ini sma” di e wèi foe di den wani, wi e tjari wan prèise gi a Sma di e gi „ibri boen presenti nanga ibri volmaakti kado”, wi lobi hemel Skapoeman, Jehovah. — Efeisesma 4:8; Jakobus 1:17.
Fa joe ben sa piki?
◻ Fa wan man kan teki fesi ini en osofamiri na wan toemoesi boen fasi?
◻ Sortoe eigifasi moesoe de foe si ini a teki di kresten owroeman e teki fesi?
◻ Fa owroeman kan sori sakafasi èn safri-atifasi te den e gi rai?
◻ San e jepi foe e sorgoe taki a meki kon boen baka na jeje fasi abi boen bakapisi?
◻ Fa owroeman kan tan farawe foe kon ini situwâsi di kan meki den kon ini kefar, te den e wèi na ipi?
[Prenki na tapoe bladzijde 28]
Wan kresten owroeman moesoe teki fesi ini en osofamiri na wan toemoesi boen fasi
[Prenki na tapoe bladzijde 31]
Foe wèi na ipi na wan kresten fasi na wan sani di moesoe doe nanga safri-atifasi èn na wan fasi foe kroetoe sani boen