No meki no wan sma pori den boen gwenti foe joe
„No kori oensrefi. Takroe demakandra e pori boen gwenti.” — 1 KORENTESMA 15:33.
1, 2. (a) San na apostel Paulus ben firi gi den kresten foe Korente, èn foe san ede? (b) Sortoe spesroetoe rai wi sa go ondrosoekoe?
FA A LOBI foe papa nanga mama na wan moi firi di tranga srefisrefi! A e boeweigi papa nanga mama foe òfer densrefi foe a boen foe den pikin foe den, foe leri den èn gi den rai. Na apostel Paulus no ben de wan troetroe papa kande, ma a ben skrifi gi den kresten na Korente: „Ala di oenoe abi tin doesoen leriman ini Krestes kande, tokoe oenoe no abi foeroe papa kwetikweti; bika ini Krestes Jesus mi tron oenoe papa nanga jepi foe a boen njoensoe.” — 1 Korentesma 4:15.
2 Fosi dati, Paulus ben rèis go na Korente, pe a ben preiki gi djoe nanga Grikisma. A ben jepi foe opo a gemeente na Korente. Ini wan tra brifi Paulus ben agersi a sorgoe foe en, nanga di foe wan mama di e gi pikin bobi, ma en ben de leki wan papa gi den sma foe Korente (1 Tesalonikasma 2:7). Paulus ben gi den pikin foe en na jeje fasi froemane, leki fa wan lobi papa e doe dati. Joe kan abi wini foe a rai disi, di de leki a rai foe wan papa, gi den kresten na Korente: „No kori oensrefi. Takroe demakandra e pori boen gwenti” (1 Korentesma 15:33). Foe san ede Paulus ben skrifi dati gi den sma foe Korente? Fa wi kan poti a rai ini wi libi?
Rai gi den èn gi wi
3, 4. San wi sabi foe Korente foe a fosi jarihondro èn den sma di ben libi drape?
3 Ini a fosi jarihondro, Strabo, a Griki sabiman foe kondre, ben skrifi: „Den e kari Korente ’goedoe’ foe den bisnis ede di a e doe, foe di a de na tapoe na Istmus (wan smara pisi gron na mindri toe moro bigi pisi gron) èn abi toe lanpresi, di wan foe den e go langalanga na Asia, èn a trawan na Italiankondre; èn a e meki a de makriki foe bai èn seri sani foe ala toe kondre.” Ibri toe jari den barinen Istmus Prei ben meki bigi ipi sma go na Korente.
4 Fa den sma ben de ini a foto disi di ben de a centrum foe a tirimakti, so boen leki foe na anbegi foe Afrodite di ben wroko tapoe sma lostoe? Profesor T. S. Evans ben tjari kon na krin: „Kande so wan 400.000 sma ben libi drape. A [ben de] wan libimakandra nanga wan hei koeltoeroe, ma den ben abi loesoe fasi foe libi na moreel sei, srefi wan lagi fasi. . . . Den Grikisma di ben libi na Akaia, sma ben sabi foe a de di den ben de aktief pasa marki na froestan sei èn foe na angri di den ben angri fajafaja foe kon sabi njoen sani. . . . A belangstelling di den ben abi pasa marki gi densrefi ben kan meki a jeje foe pratifasi sekte opo ede kon makriki.”
5. Na fesi foe sortoe kefar den brada nanga sisa foe Korente ben tanapoe?
5 Nanga di ten ben pasa, srefi a gemeente ben kon prati foe di sonwan ben abi firi ete di ben meki na ati foe den prakseri sani na wan heimemre fasi (1 Korentesma 1:10-31; 3:2-9). Wan moro bigi problema ben de taki son sma ben e taki: „Wan opobaka foe den dedewan no de” (1 Korentesma 15:12; 2 Timoteus 2:16-18). Awinsi san a troetroe bribi (noso fowtoe bribi) foe den ben de toe, Paulus ben moesoe poti den na a joisti pasi nanga krin boeweisi taki Krestes ben „kisi wan opobaka na dede”. So boen, kresten ben sa kan froetrow na tapoe taki Gado ben sa gi den „wini nanga jepi foe wi Masra Jesus Krestes” (1 Korentesma 15:20, 51-57). Efoe joe ben de drape, a jeje foe pratifasi ben sa abi krakti na joe tapoe kande?
6. Gi soema spesroetoe a rai ben fiti di Paulus ben gi na 1 Korentesma 15:33?
6 Di Paulus ben e gi tranga boeweisi taki den dedewan sa kisi wan opobaka, a ben taigi den: „No kori oensrefi. Takroe demakandra e pori boen gwenti.” A penti ini a rai disi ben de moro foeroe gi den wan di ben abi demakandra nanga a gemeente èn di no ben agri nanga a leri foe na opobaka. Den ben degedege nomo ini a tori foe wan penti di den no ben froestan? (Teki gersi Lukas 24:38.) Nôno. Paulus ben skrifi taki „sonwan na mindri oenoe e taki dati wan opobaka no de”, so boen den sma di ben de ini a tori, ben taki dati den no ben e agri nanga dati, ala di den ben abi a firi foe tron sma di fadon komopo na bribi. Paulus ben sabi heri boen taki den ben sa kan pori den boen gwenti èn fasi foe denki foe trawan. — Tori foe den Apostel 20:30; 2 Petrus 2:1.
7. San na wan kontren fa wi kan poti 1 Korentesma 15:33 ini wi libi?
7 Fa wi kan poti a warskow foe Paulus ini a tori foe demakandra, ini wi libi? Paulus no ben wani taki dati wi no moesoe wani foe jepi wan sma ini a gemeente di ben e feni en moeilek foe froestan wan vers noso wan leri foe bijbel. Ija, Judas 22, 23 e gi wi tranga foe gi jepi na wan sari-ati fasi na opregti sma di e degedege foe den sortoe sani disi (Jakobus 5:19, 20). Ma sondro misi wi moesoe man gebroiki Paulus en rai di de leki a rai foe wan papa, te wan sma e tan strei nanga san wi sabi taki a de waarheid foe bijbel noso te a e tan gi piki di e sori taki a e degedege noso di de negatief. Wi moesoe loekoe boen nanga demakandra nanga a sortoe sma dati. A no kan tra fasi, taki efoe wan sma sondro misi ben tron wan sma di fadon komopo na bribi, dan den skapoeman na jeje fasi ben sa moesoe handri foe kibri na ipi. — 2 Timoteus 2:16-18; Titus 3:10, 11.
8. Fa wi ben sa kan handri nanga a koni foe si sani te wan sma no e agri nanga wan bijbel leri?
8 Wi kan poti den wortoe foe Paulus na 1 Korentesma 15:33, di de leki wortoe foe wan papa, na ini wi libi toe te wi abi foe doe nanga sma na dorosei foe a gemeente di e horibaka gi falsi leri. Fa a ben sa kan de taki wi ben sa kon abi demakandra nanga den? A ben sa kan pasa efoe wi no ben si a difrenti na mindri den sma di wi ben sa kan jepi foe kon sabi a waarheid èn den sma di e strei taki nanga a marki nomo foe horibaka gi wan falsi leri. Foe eksempre, ini a kotoigi wroko foe wi, wi ben sa kan miti wan sma di no e agri nanga wan penti, ma di e sori taki a wani taki moro fara foe dati (Tori foe den Apostel 17:32-34). Dati foe ensrefi no abi foe de wan problema, bika nanga prisiri wi e tjari bijbel waarheid kon na krin gi iniwan sma di na wan opregti fasi wani sabi dati, èn wi e go baka srefi foe pristeri boeweisi di e overtoigi sma (1 Petrus 3:15). Tokoe son wan no abi troetroe belangstelling kande foe feni bijbel waarheid.
9. Fa wi moesoe handri te sma e tjalensi den sani di wi e bribi?
9 Foeroe sma sa hari taki nanga wi omeni joeroe langa, wiki baka wiki, ma no foe di den e soekoe foe feni waarheid. Na wani den wani nomo foe swaki a bribi foe wan tra sma, ala di na wan bigimemre fasi den e sori a sabi di den denki foe sabi Hebrewtongo, Grikitongo noso sabidensi foe evolutie. Te son Kotoigi ben e miti den, dan den ben si dati leki wan tjalensi èn leki wan bakapisi foe dati, den ben abi boen foeroe demakandra di ben poti a prakseri moro foeroe na tapoe falsi kerki bribi, filosofie noso fowtoe foe sabidensi. A de wan moi sani foe si, taki Jesus no ben meki dati pasa nanga en, ala di a ben sa kan wini den hari taki nanga kerki fesiman di ben kisi skoro ini Hebrewtongo noso Grikitongo. Di sma ben tjalensi Jesus, a ben gi wan sjatoe piki èn baka dati a ben drai poti en prakseri baka na tapoe den sma di abi sakafasi, den troetroe skapoe. — Mateus 22:41-46; 1 Korentesma 1:23–2:2.
10. Foe san ede a fiti foe kresten loekoe boen te den abi computer èn te den kan meki gebroiki foe elektronis bord nanga ala sortoe boskopoe?
10 Njoenmodoten computer ben opo a pasi gi tra fasi foe takroe demakandra. Son bisnis e meki sma, di gi den nen foe meki gebroiki foe a dienst disi, man foe gebroiki wan computer èn wan telefon foe seni wan boskopoe go na elektronis bord pe boskopoe e skrifi na tapoe; na so wan fasi wan sma kan poti wan boskopoe na tapoe a bord disi, so taki ala sma di gi den nen foe meki gebroiki foe a dienst disi kan kisi a boskopoe disi. Disi ben abi leki bakapisi den sokari elektronis hari taki foe kerki afersi. Sani ben sa kan meki wan kresten teki prati na den sortoe hari taki disi èn kande de foeroe joeroe langa nanga wan sma di e denki leki wan sma di fadon komopo na bribi èn di ben sluit uit kande foe a gemeente. A tiri di gi na 2 Johanes 9-11 e poti krakti na tapoe a rai foe Paulus, di de leki a rai foe wan papa, foe tan farawe foe takroe demakandra.a
Tan farawe foe den kori joe
11. A bisnis situwâsi na Korente ben gi sortoe okasi?
11 Leki fa wi ben si kaba, dan Korente ben de wan centrum foe doe bisnis, èn a ben abi wan lo wenkri nanga bisnis (1 Korentesma 10:25). Foeroe sma di ben kon foe den Istmus Prei ben sa tan na ini tenti èn na a ten foe a prei dati, seriman ben sa seri sani ini pikin tenti, di den man froisi makriki, noso tafra foe seri sani nanga wan dak na en tapoe. (Teki gersi Tori foe den Apostel 18:1-3.) Disi ben meki taki Paulus ben man feni wroko drape foe meki tenti. Èn a ben kan gebroiki a wrokope foe panja a boen njoensoe. Profesor J. Murphy-O’Connor e skrifi: „Foe wan wenkri ini wan wowojo di druk . . . èn di ben tanapoe na fesi wan strati pe foeroe sma ben de, Paulus ben man miti no wawan kompe wrokoman nanga klanti, ma so srefi den ipi sma na dorosei. Te a no ben de so druk, a ben kan tanapoe na a doro èn stòp den sma, di a ben prakseri foe den taki den ben sa arki kande . . . A moeilek foe prakseri taki a fajafaja sma di a ben de èn a overtoigi di a ben abi srefisrefi, no ben meki taki esi-esi a tron wan ’spesroetoe sma’ foe a birti, èn disi ben sa hari den sma di angri foe sabi sani, no wawan sma di no ben abi noti foe doe, ma so srefi den wan di na wan opregti fasi ben soekoe foe kisi bodoi. . . . Oema di trow èn den foetoeboi foe den, di ben jere foe Paulus, ben kan fisiti en, ala di den ben doe neleki den ben kon foe bai sani. Ini moeilek ten, te a ben gersi taki froefolgoe ben sa kon noso taki sma ben sa tergi den nomo, sma di ben de na bribi ben sa kan miti Paulus leki klanti. A wrokope ben meki a miti lantiman toe.”
12, 13. Fa 1 Korentesma 15:33 kan fiti a situwâsi na a wrokope?
12 Ma Paulus ben sa si a kefar foe „takroe demakandra” di ben sa kan de na a wrokope. Wi moesoe si dati toe. A de prenspari foe si taki Paulus ben taki foe wan fasi foe denki èn doe di son sma foe a ten dati ben abi: „Meki wi njan èn dringi, bikasi tamara wi e dede” (1 Korentesma 15:32). Wantewante baka dati a ben gi en rai di de leki a rai foe wan papa: „No kori oensrefi. Takroe demakandra e pori boen gwenti.” Fa a wrokope èn a soekoe foe prisiri kan abi foe doe nanga wan kefar di ben kan kon?
13 Kresten wani foe de nanga switifasi nanga den wroko patna, èn foeroe ondrofenitori e sori fa disi e jepi foe opo a pasi foe gi kotoigi. Ma wan kompe wrokoman ben sa kan froestan a switifasi di joe e sori en, na wan fowtoe fasi, leki wan kari foe abi wan boen ten makandra nanga en. A man noso oema dati wanwan leisi ben sa kan gi wan kari foe kon njan nanga en, foe stòp wan sjatoe pisi ten foe go dringi pikinso sopi nanga en baka wroko joeroe, noso foe teki wan pikinso ontspanning na a kaba foe a wiki. A sma disi kan sori foe de nanga switifasi èn krin gwenti, èn a kari disi kan sori leki a no de kefarlek. Ma tokoe Paulus e gi wi a rai: „No kori oensrefi.”
14. Fa demakandra ben kori son kresten?
14 Son kresten ben kori densrefi. Safrisafri den kweki wan fasi foe denki èn doe di no e broko den ede toemoesi gi demakandra nanga wroko patna. Kande dati ben doe kon foe di den ben abi a srefi belangstelling gi wan sport noso hobby. Noso wan sma di no de wan kresten, na wrokope, ben sa kan abi switifasi pasa marki èn e poti prakseri na sma srefisrefi, san ben sa meki taki wan kresten e pasa moro nanga moro ten nanga a sma dati, srefi a ben kan wani a demakandra dati moro leki di nanga son sma ini a gemeente. Dan a demakandra ben sa kan meki taki den e misi soso wán konmakandra. A ben sa kan wani taki foe de wan neti lati na strati èn taki den broko a gwenti foe teki prati na a velddienst na a mamanten. A kan abi leki bakapisi foe loekoe wan kino noso video di de wan sortoe di a kresten normaal ben sa weigri foe si. ’O, ma dati noiti ben sa pasa nanga mi’, wi ben sa kan prakseri. Ma moro foeroe foe den sma di ben kori densrefi, fosi ben sa piki na a srefi fasi. Wi moesoe aksi wisrefi: ’O fasti a bosroiti foe mi de foe poti a rai foe Paulus ini mi libi?’
15. Sortoe balansi fasi foe denki èn doe wi moesoe abi ini a tori foe den birtisma foe wi?
15 San wi ben taki djonsrode ini a tori foe wi wrokope, abi foe doe toe nanga a demakandra foe wi nanga birtisma. Foe troe, den kresten na Korente foe owroeten ben abi birtisma. Na son libimakandra a de a gwenti foe de nanga switifasi nanga birtisma èn foe jepi den. Na boiti presi, birtisma abi makandra fanowdoe kande, foe di den e libi so fara. Den famiri banti tranga na wan spesroetoe fasi ini son koeltoeroe, san e meki foeroetron den e kari makandra foe kon njan. A de krin taki wan balansi fasi foe si sani de prenspari, leki fa Jesus ben sori dati (Lukas 8:20, 21; Johanes 2:12). Te wi de makandra nanga birtisma èn famiriman, wi abi a firi foe go doro foe doe neleki wi ben doe bifo wi ben tron kresten? Na presi foe dati, wi no ben sa moesoe go loekoe den sortoe demakandra disi èn baka di wi prakseri boen foe dati, bosroiti sortoe skotoemarki e fiti?
16. Fa wi moesoe froestan den wortoe foe Jesus na Mateus 13:3, 4?
16 Wan leisi Jesus ben agersi a wortoe foe a Kownoekondre nanga siri di „ben fadon na sei pasi, èn den fowroe ben kon èn ben njan den” (Mateus 13:3, 4, 19). Na a ten dati, a gron na sei wan pasi ben kon tranga, foe di foeroe foetoe ben e waka go-kon na en tapoe. Na so a de toe nanga foeroe sma. Den libi foeroe nanga birtisma, famiriman, nanga trawan di e go-kon, so taki den no abi ten. Disi, foe taki en so, e masi a gron foe den ati, èn e meki a kon tranga foe den siri foe waarheid bigin gro. So wan fasi foe no handri na tapoe sani, kan kon toe ini wan sma di de wan kresten kaba.
17. Fa demakandra nanga birtisma noso tra sma ben sa kan abi krakti na wi tapoe?
17 Son grontapoe birtisma nanga famiriman kan de nanga switifasi èn lobi foe jepi sma, ala di doronomo den e sori foe no abi belangstelling gi jeje sani èn foe no lobi regtfardikifasi (Markus 10:21, 22; 2 Korentesma 6:14). Taki wi tron kresten no wani taki dati wi no de nanga switifasi moro, noso no de wan boen birtisma. Jesus ben gi wi a rai foe sori opregti belangstelling gi trawan (Lukas 10:29-37). Ma a rai foe Paulus ben de nètso fanowdoe èn a ben gi toe nanga jepi foe santa jeje, taki wi moesoe loekoe boen nanga den demakandra foe wi. Te wi e teki a fosi rai, dan wi no moesoe frigiti a lasti wan. Efoe wi no e hori ala toe gronprakseri na prakseri, dan disi sa abi krakti tapoe wi gwenti. Omeni den gwenti foe joe ini a tori foe eerlijkfasi noso a gi di joe e gi jesi na a wet foe Caesar, e agersi di foe den birtisma noso famiriman foe joe? Foe eksempre, den kan firi taki te ten doro foe pai belasting, a de joisti foe taki dati den e kisi moro mendri moni noso abi moro mendri wini foe a bisnis foe den, leki san den e kisi noso abi troetroe, èn taki a de fanowdoe srefi foe tan na libi. Kande den e taki na wan fasi foe overtoigi joe fa den e si sani te oenoe e dringi wan kopi kofi makandra noso na wan sjatoe fisiti. Fa dati ben kan abi krakti tapoe a fasi fa joe e denki èn den eerlijk gwenti foe joe? (Markus 12:17; Romesma 12:2) „No kori oensrefi. Takroe demakandra e pori boen gwenti.”
Den gwenti foe jongoewan toe
18. Foe san ede 1 Korentesma 15:33 e fiti jongoewan toe?
18 San jongoe sma e si èn e jere abi spesroetoe krakti tapoe den. Joe no ben si pikin di e meki densrefi boeweigi èn di abi a srefi maniri leki di foe den papa nanga mama noso den brada nanga sisa foe den? Dan wi no moesoe froewondroe toe, taki den preimati noso skoromati foe pikin kan abi foeroe krakti na den tapoe. (Teki gersi Mateus 11:16, 17.) Efoe a manpikin noso oemapikin foe joe de na mindri jongoewan di e taki foe den papa nanga mama na wan fasi di no e sori respeki, foe san ede joe ben sa prakseri dan taki disi no ben sa abi krakti tapoe den pikin foe joe? San sa pasa efoe foeroetron den e jere tra jongoewan e gebroiki doti taki? San sa pasa efoe den speri foe den na skoro noso ini a birti pe joe e libi, e kon de fajafaja foe wan njoenmodo soesoe noso wan modo foe moimoisani? Wi ben sa moesoe denki taki den sortoe sani disi no ben sa man abi krakti tapoe jongoe kresten? A de so taki Paulus ben taki dati 1 Korentesma 15:33 abi krakti soso tapoe den wan di doro wan spesroetoe jari?
19. Sortoe fasi foe si sani papa nanga mama moesoe proeberi foe poti ini den pikin foe den?
19 Efoe joe na wan papa noso mama, joe e hori a rai dati na prakseri te joe e taki-go-taki-kon nanga den pikin foe joe èn e teki bosroiti di abi foe doe nanga den? A kan jepi joe efoe joe e erken taki disi no wani taki dati ala tra jongoewan di abi demakandra nanga joe pikin ini a birti pe joe e libi noso na skoro, no de boen sma. Sonwan foe den kan de nanga switifasi èn abi boen maniri, neleki sonwan foe den birtisma, famiriman nanga wroko patna foe joe. Proeberi foe meki den pikin foe joe si disi èn foe froestan taki na wan balansi fasi joe e poti a koni rai foe Paulus na ini joe libi, rai di Paulus gi leki wan papa na den sma foe Korente. Te den kon si a fasi fa joe e hori sani ini balansi, a kan jepi den foe waka na joe baka. — Lukas 6:40; 2 Timoteus 2:22.
20. Jongoewan, na fesi sortoe tjalensi oenoe e tanapoe?
20 Oenoe di jongoe ete, proeberi foe kon si fa foe poti a rai foe Paulus ini oen libi, foe di oenoe sabi taki a de prenspari gi ibri kresten, efoe den jongoe noso owroe. Disi sa aksi foe joe meki moeiti srefisrefi èn abi wan fasti bosroiti, ma foe san ede joe no sa teki a tjalensi disi? Froestan boen taki a no foe di joe ben sabi sonwan foe den jongoewan disi foe sensi joe jongoe jari, taki den no kan abi krakti tapoe den gwenti foe joe, taki den no kan pori den gwenti di joe e kweki leki wan kresten jongoewan. — Odo 2:1, 10-15.
Positief stap foe kibri den gwenti foe wi
21. (a) Sortoe fanowdoe wi abi ini a tori foe demakandra? (b) Foe san ede wi kan de seiker taki son demakandra kan de kefarlek?
21 Wi alamala abi demakandra nanga trawan fanowdoe. Ma wi moesoe de na ai taki den sma di wi abi demakandra nanga den kan abi krakti tapoe wi, nanga boen noso ogri bakapisi. Disi ben de so ini a tori foe Adam èn nanga ibri sma ini den hondrohondro jari di pasa sensi a ten dati. Foe eksempre, Josafat, wan boen kownoe foe Juda, ben njanboen foe a feni di Jehovah ben feni en boen èn a blesi di a ben blèsi en. Ma baka di a ben gi primisi foe en manpikin trow nanga na oemapikin foe kownoe Akab foe Israèl, Josafat ben bigin foe abi demakandra nanga Akab. A takroe demakandra dati pikinmoro ben meki Josafat lasi en libi (2 Kownoe 8:16-18; 2 Kroniki 18:1-3, 29-31). Efoe wi e teki don bosroiti ini a tori foe den sma di wi abi demakandra nanga den, dan a kan de nètso kefarlek.
22. Na sortoe sani wi moesoe gi jesi èn foe san ede?
22 Meki wi gi jesi foe dati ede èn teki a lobi rai di Paulus e gi wi na 1 Korentesma 15:33, na ati. Den dati a no soso wortoe di wi ben jere kande so foeroetron taki wi sabi den na ede. Den e sori tapoe a lobi leki di foe wan papa, di Paulus ben abi gi den brada nanga sisa foe en na Korente, èn moro fara gi wi. Èn a no de foe taki dati den abi rai di wi hemel Tata e gi foe di a wani taki den moeiti di wi e meki sa abi boen bakapisi. — 1 Korentesma 15:58.
[Foetoewortoe]
a Wan tra kefar ini den sortoe bord disi nanga boskopoe, na a tesi foe teki programa noso poeblikâsi abra, di tra sma e hori a reti na tapoe, èn poti dati na ini den eigi computer, sondro a primisi foe a fosi eiginari noso skrifiman, wan sani di ben sa de kontrari den internationaal wet foe teki sani abra. — Romesma 13:1.
Joe e memre disi ete?
◻ Nanga sortoe spesroetoe reide Paulus ben skrifi 1 Korentesma 15:33?
◻ Fa wi kan poti a rai foe Paulus ini wi libi na a wrokope?
◻ Sortoe balansi fasi foe si wi moesoe abi foe den birtisma foe wi?
◻ Foe san ede 1 Korentesma 15:33 de rai di e fiti spesroetoe gi jongoewan?
[Prenki na tapoe bladzijde 15]
Paulus ben gebroiki a wrokope foe panja a boen njoensoe
[Prenki na tapoe bladzijde 16]
Tra jongoewan kan pori den kresten gwenti foe joe