Teki den profeiti foe Gado leki wan model
„Brada, teki den profeiti, di ben taki ini a nen foe Jehovah, leki wan model foe a pina di den ben pina foe ogridoe ede nanga a pasensi di den ben hori.” — JAKOBUS 5:10.
1. San e jepi den foetoeboi foe Jehovah foe de nanga prisiri, srefi te den e kisi froefolgoe?
DEN foetoeboi foe Jehovah abi prisiri di de krin foe si, ala di a sari di sma e sari e panja ensrefi na heri grontapoe ini den lasti dei disi. Disi de so, foe di den sabi taki den e plisi Gado. Kotoigi foe Jehovah e hori deki-ati toe na ondro froefolgoe nanga gens foe a poebliki diniwroko foe den ede, bika den e froestan taki den e pina foe regtfardikifasi ede. Jesus Krestes ben taigi den bakaman foe en: „Kolokoe foe oenoe te sma e skempi oenoe èn e froefolgoe oenoe èn na wan leifasi e taki ala sortoe ogri sani foe oenoe foe mi ede. Prisiri èn djompo opo foe prisiri ede, foe di a pai di oenoe sa kisi, bigi ini hemel; bika na a fasi dati den ben froefolgoe den profeiti di ben de fosi oenoe” (Mateus 5:10-12). Ija, awansi oten den foetoeboi foe Gado e ondrofeni tesi foe a bribi di den e bribi, den e si disi leki wan prisiri sani. — Jakobus 1:2, 3.
2. San kan jepi wi foe hori pasensi, so leki fa Jakobus 5:10 e sori?
2 A disipel Jakobus ben skrifi: „Brada, teki den profeiti, di ben taki ini a nen foe Jehovah, leki wan model foe a pina di den ben pina foe ogridoe ede nanga a pasensi di den ben hori” (Jakobus 5:10). W. F. Arndt nanga F. W. Gingrich e taki foe a Griki wortoe di den vertaal dja nanga „model” (hy·poʹdeig·ma) leki „eksempre, model, na wan boen fasi, leki wan sani di e poesoe wan sma noso moesoe poesoe wan sma foe waka na dati baka.” So leki fa Johanes 13:5 e sori, dan „disi de moro leki wan eksempre. A de wan fasti model” (Theological Dictionary of the New Testament). So boen, dan, den disiten foetoeboi foe Jehovah kan teki den getrow profeiti foe en leki wan model ini a tori foe a ’pina di den ben pina foe ogridoe ede’ nanga a ’pasensi di den ben hori’. Sortoe tra sani wi kan si krin te wi e ondrosoekoe a libi foe den? Èn fa disi kan jepi wi ini wi preikiwroko?
Den ben pina foe ogridoe ede
3, 4. San a profeiti Amos ben doe tapoe a gens foe Amasia?
3 Nofotron den profeiti foe Jehovah ben pina foe ogridoe ede noso foe di sma ben handri takroe nanga den. Ini a di foe neigi jarihondro Gewoon Teri, foe eksempre, a priester Amasia, di ben anbegi pikin-kaw, ben gens a profeiti Amos na wan ogrifasi. Amasia ben lei di a ben taki, dati Amos ben meki takroe plan kontrari Jerobeam a Di foe Toe wan, foe di Amos ben taki profeititori dati a feti-owroe ben o kiri a kownoe èn taki Israèl ben sa go na ini katibo. Na wan wisiwasifasi, Amasia ben taigi Amos: „O sma di e si fisjoen, gowe, komoto gowe foe dja, go na a kondre Juda, èn njan brede drape, èn drape joe sa taki profeititori. Ma na Bethel joe no moesoe taki profeititori moro, bika a de a santapresi foe wan kownoe èn a de na oso foe wan kownoekondre.” Sondro frede gi den ogri wortoe disi, Amos ben piki: „Mi no ben de wan profeiti, èn mi no ben de a manpikin foe wan profeiti toe; ma mi ben de wan skapoeman, èn wan sma di ben koti den figa foe den sikomoorbon, kerfoe den. Èn Jehovah poeroe mi foe a waka di mi ben waka na baka na ipi, èn baka dati Jehovah taigi mi: ’Go, taki profeititori gi mi pipel Israèl.’” — Amos 7:10-15.
4 A jeje foe Jehovah ben gi Amos a krakti foe taki profeititori na wan deki-atifasi. Prakseri foe a fasi fa Amasia ben doe, di Amos ben taki: „Jere a wortoe foe Jehovah: ’Joe e taki: „Joe no moesoe taki profeititori teige Israèl, èn joe no moesoe taki no wan wortoe teige na oso foe Isak”? Foe dati ede, disi na san Jehovah taki: „Ini a tori foe joe wefi, a sa tron wan hoeroe-oema ini a foto. Èn ini a tori foe den manpikin nanga den oemapikin foe joe, a feti-owroe sa kiri den. Èn ini a tori foe joe gron, nanga wan markitiki den sa prati en. Èn ini a tori foe joesrefi, na tapoe gron di no krin joe sa dede; èn ini a tori foe Israèl, sondro misi a sa go ini katibo, èn gowe foe en eigi gron.”’” A profeititori dati ben kon troe (Amos 7:16, 17). Fa a ben moesoe de wan sani di seki Amasia, di ben fadon komoto na bribi!
5. Fa wi kan agersi a situwâsi foe Jehovah en disiten foetoeboi nanga a di foe a profeiti Amos?
5 A situwâsi disi de neleki a di foe Jehovah en pipel ini a ten disi. Wi e pina foe ogridoe ede, leki sma di e meki den boskopoe foe Gado bekènti, èn foeroe sma e taki na wan wisiwasi fasi foe a preikiwroko foe wi. A troe, taki a no wan theologis seminari seni wi foe go preiki. Na presi foe dati, na Jehovah en santa jeje e poesoe wi foe meki a boen njoensoe foe a Kownoekondre bekènti. Wi no e kenki a boskopoe foe Gado noso e meki en kon swaki. Na presi foe dati, neleki Amos, wi e meki a boskopoe bekènti, foe di wi e gi jesi, awansi san den sma di e jere en, e doe na tapoe. — 2 Korentesma 2:15-17.
Den ben hori pasensi
6, 7. (a) San ben de so aparti na a profeititori foe Jesaja? (b) Fa Jehovah en disiten foetoeboi e doe neleki Jesaja?
6 Den profeiti foe Gado ben hori pasensi. Foe eksempre, Jesaja, di ben dini leki profeiti foe Jehovah ini a di foe aiti jarihondro bifo Gewoon Teri, ben sori pasensi. Gado ben taigi en: „Go, èn joe moesoe taigi a pipel disi: ’Jere alatron baka, oen pipel, ma no froestan; èn loekoe alatron baka, ma no kisi sabi.’ Meki na ati foe a pipel disi de taki a no e teki sani, èn meki srefi den jesi foe den no e jere sani, èn tapoe den ai foe den srefi, so taki den no kan si nanga den ai èn no kan jere nanga den jesi, èn so taki den eigi ati no kan froestan èn so taki den no kan drai troetroe kon baka èn kisi gosontoe gi densrefi” (Jesaja 6:9, 10). A pipel troetroe ben handri na a fasi dati. Ma disi ben meki taki Jesaja ben tapoe nanga en wroko? Nono. Na presi foe dati, nanga pasensi èn fajafaja a ben meki den boskopoe foe Jehovah foe warskow sma, bekènti. A fasi fa den wortoe foe Gado di wi teki skrifi didjonsro, seti ini a Hebrewtongo, e horibaka gi a prakseri taki den boskopoe di a profeiti ben meki bekènti, ben e „go nanga langa” èn sma ben jere den „alatron baka”. — Gesenius’ Hebrew Grammar.
7 Foeroe sma ini a ten disi e handri na tapoe a boen njoensoe, neleki fa sma ben handri na tapoe den wortoe foe Jehovah di Jesaja ben tjari gi den. Ma, neleki a getrow profeiti dati, ibritron wi e taki a Kownoekondre boskopoe „alatron baka”. Wi e doe disi nanga faja èn wi e hori doro nanga pasensi, bika disi na a wani foe Jehovah.
„Joisti so den ben doe”
8, 9. Na sortoe fasi Jehovah en profeiti Moses de wan moi eksempre?
8 A profeiti Moses ben de wan eksempre ini a hori di wan sma e hori pasensi èn ini a gi di wan sma e gi jesi. A ben froekisi foe teki a sei foe den Israèlsma di ben de srafoe, ma a ben moesoe wakti nanga pasensi tapoe a ten te den ben sa kisi froeloesoe. A ben libi 40 jari langa na Midian te leki Gado ben gebroiki en foe tjari a pipel Israèl komoto na katibo. Di Moses nanga en brada Aron ben de na fesi foe a tiriman foe Egipti, den ben taki èn ben doe san Gado ben komanderi, foe di den ben gi jesi. Foe taki en leti, na „joisti so den ben doe”. — Exodus 7:1-6; Hebrewsma 11:24-29.
9 Nanga pasensi Moses ben froedrage den fotenti langa jari di Israèl ben de ini a gran sabana. Foe di a ben gi jesi, a ben doe toe san Gado ben taigi en foe doe, di a tabernakel foe Israèl ben moesoe bow èn di tra sani ben moesoe meki foe gebroiki den ini na anbegi foe Jehovah. So soifri a profeiti ben doe den sani di Gado ben taigi en, taki wi e leisi: „Moses ben doe ala den sani so leki fa Jehovah ben komanderi en. Joisti so a ben doe” (Exodus 40:16). Te wi doe a diniwroko foe wi makandra nanga Jehovah en organisâsi, dan meki wi memre fa Moses ben gi jesi èn fiti a rai di na apostel Paulus ben gi foe ’gi jesi na denwan di e teki fesi na wi mindri’. — Hebrewsma 13:17.
Den ben abi wan positief fasi
10, 11. (a) San e sori taki a profeiti Hosea ben abi wan positief fasi foe si sani? (b) Fa wi kan tan abi wan positief fasi foe si sani te wi e go na sma ini den kontren foe wi?
10 Den profeiti ben moesoe abi wan positief fasi te den ben tjari den kroetoeboskopoe nanga den profeititori go, di ben sori a lobifasi fa Gado ben broko en ede nanga getrowsma di ben panja na ini heri Israèl. Disi ben de so nanga Hosea, di ben de wan profeiti no mendri leki 59 jari. Na wan positief fasi, a ben e go doro foe tjari den boskopoe foe Jehovah go èn a ben kaba a profeitiboekoe foe en nanga den wortoe: „Soema koni, taki a kan froestan den sani disi? Koni, taki a kan sabi den? Bika den pasi foe Jehovah opregti, èn den regtfardikiwan na den sma di sa waka ini den; ma den sma di no e hori densrefi na wet, na denwan di sa naki foetoe fadon na den” (Hosea 14:9). So langa Jehovah e gi wi pasi foe gi kotoigi, meki wi abi wan positief fasi èn tan soekoe denwan di sa abi a koni foe teki a no-froedini boen-atifasi foe Gado.
11 Foe ’soekoe den sma di warti dati’, wi moesoe hori doro èn loekoe afersi na wan positief fasi (Mateus 10:11). Foe eksempre, efoe wi ben sa lasi den sroto foe wi, dan wi ben sa kan go waka baka pe wi ben waka èn soekoe na den difrenti presi pe wi ben de. Wi ben sa kan feni den sroto foe wi, soso baka te wi ben doe disi moro leki wán tron nomo. Meki wi hori doro na a srefi fasi, te wi e soekoe den sma di joe kan teki gersi nanga skapoe. Fa wi e prisiri te wi e feni sma di e doe boen na tapoe a boen njoensoe, ini kontren pe wi e wroko foeroe! Èn fa wi e prisiri taki Gado e blesi a wroko foe wi ini kondre pe fosi a poebliki diniwroko foe wi, ben skotoe. — Galasiasma 6:10.
Fonten foe kisi deki-ati
12. Sortoe profeititori foe Joèl e kon troe ini a di foe 20 jarihondro, èn fa?
12 Den wortoe foe den profeiti foe Jehovah kan gi wi foeroe deki-ati ini a diniwroko foe wi. Foe eksempre, loekoe a profeititori foe Joèl. A profeititori abi kroetoe boskopoe na ini di a ben moesoe taigi den Israèlsma di ben fadon komoto na bribi nanga trawan ini a di foe neigi jarihondro bifo Gewoon Teri. Tokoe Gado ben meki Joèl taki a profeititori toe: „A moesoe pasa taki mi [Jehovah], sa kanti mi jeje go na tapoe ala sortoe foe skin, èn joe manpikin nanga joe oemapikin seiker sa taki profeititori. Èn foe a sei foe den owroeman foe joe, den sa kisi dren. Foe a sei foe den jongoeman foe joe, den sa si fisjoen. Èn srefi tapoe den foetoeboi èn na tapoe den oema-foetoeboi mi sa kanti mi jeje go na ini den dei dati” (Joèl 2:28, 29). Disi ben sori foe de so nanga den bakaman foe Jesus foe sensi 33 Gewoon Teri. Èn fa wi e si wan bigi kontroe foe a profeititori disi ini a di foe 20 jarihondro disi. Ini a ten disi wi abi miljoenmiljoen sma di e „taki profeititori”, noso di e meki a boskopoe foe Jehovah bekènti — na mindri den joe abi moro leki 600.000 ini a foeroeten pionierwroko.
13, 14. San kan jepi jongoe kresten foe abi prisiri ini a velddienst?
13 Foeroe Kownoekondre preikiman na jongoe sma. A no de ala ten makriki gi den foe taki foe bijbel nanga moro owroe sma. Wanwan leisi sma e taigi den jongoe foetoeboi foe Jehovah: ’Joe e lasi joe ten nanga a preiki di joe e preiki’, èn ’joe ben sa moesoe go doe wan tra sani.’ Na wan konifasi den jongoe Kotoigi foe Jehovah kan piki taki den e firi sari taki a sma e firi a fasi dati. Wan jongoe preikiman foe a boen njoensoe e feni en wan jepi foe taki moro fara: „Mi e firi troetroe taki mi abi wini te mi e taki nanga owroe sma leki joe, èn mi e prisiri foe dati.” A no de foe taki, dati troetroe a no lasiten foe preiki a boen njoensoe. A libi foe sma de ini kefar. Nanga jepi foe Joèl, Gado ben froeklari moro fara: „A moesoe pasa taki ibriwan sma di e kari a nen foe Jehovah sa komoto boen.” — Joèl 2:32.
14 Pikin-nengre di e go makandra nanga a papa nanga mama foe den ini a Kownoekondre-preikiwroko, breiti nanga a jepi di den e kisi foe a papa nanga a mama foe doro persoonlijk marki. Pikinso-pikinso den jongoewan disi e go na fesi, foe a leisi di den e leisi wan bijbeltekst te leki a tjari di den e tjari a howpoe foe den kon na krin, di abi en fondamenti na tapoe bijbel, èn e pristeri den joisti boekoe na sma di abi belangstelling. Te den jongoe Kownoekondre preikiman e si fa densrefi e go na fesi èn te den e si a blesi foe Jehovah, dan den e prisiri srefisrefi foe preiki a boen njoensoe. — Psalm 110:3; 148:12, 13.
Sori faja nanga wan fasi foe tan wakti
15. Fa na eksempre foe Esekièl kan jepi wi foe meki a faja foe wi gi a Kownoekondre preikiwroko kon baka?
15 Den profeiti foe Gado ben de wan eksempre ini a sori di den ben sori faja nanga wan fasi foe tan wakti — eigifasi di wi abi fanowdoe ini wi diniwroko ini a ten disi. Di wi ben leri a waarheid foe a Wortoe foe Gado fositron, dan kande wi ben de nanga faja di ben poesoe wi foe taki fri èn sondro frede. Ma, kande foeroe jari pasa sensi a ten dati, èn kande wi ben wroko foeroe ini a kontren pe wi e gi kotoigi. Kande moro mendri sma e teki a Kownoekondre boskopoe now. Disi ben meki taki a faja foe wi kon kowroe? Efoe dati de so, dan loekoe a profeiti Esekièl, di a nen foe en wani taki „Gado e gi krakti”. Ala di Esekièl ben tanapoe na fesi sma ini Israèl foe owroeten di ben de sondro firi gi tra sma, Gado ben gi en krakti èn na wan agersifasi A ben tranga a fesi-ede foe en moro tranga leki ston. So boen, Esekièl ben man foe doe en diniwroko foeroe, foeroe jari langa, efoe a pipel ben arki efoe no. Na eksempre foe en e sori taki wi kan doe a srefi, èn a kan jepi wi foe meki a faja foe wi gi a preikiwroko, kon baka. — Esekièl 3:8, 9; 2 Timoteus 4:5.
16. Sortoe fasi foe Mika wi moesoe kweki?
16 Mika, di ben taki profeititori ini a di foe aiti jarihondro bifo Gewoon Teri, ben de wan aparti sma foe a pasensi di a ben abi. „Foe mi sei”, a ben skrifi, „na Jehovah mi sa tan loekoe. Mi sa sori wan fasi foe tan wakti na tapoe a Gado foe mi froeloesoe. Mi Gado sa arki mi” (Mika 7:7). A froetrow di Mika ben abi, ben kon foe a tranga bribi foe en. Neleki a profeiti Jesaja, Mika ben sabi taki san Jehovah ben abi na prakseri, na dati A ben sa doe foe troe. Wi sabi disi toe (Jesaja 55:11). Foe dati ede, meki wi kweki wan fasi foe tan wakti tapoe a kontroe foe den pramisi foe Gado. Èn meki wi preiki a boen njoensoe nanga faja, srefi ini kontren pe sma e sori pikinso belangstelling gi a Kownoekondre boskopoe. — Titus 2:14; Jakobus 5:7-10.
Hori pasensi ini a ten disi
17, 18. Sortoe eksempre foe owroeten èn foe a ten disi kan jepi wi foe hori pasensi?
17 Foeroe jari langa sonwan foe den profeiti foe Jehovah ben hori doro nanga pasensi, ma den no ben si a kontroe foe den profeititori foe den. Tokoe, a hori di den ben hori doro nanga pasensi, ala di den ben pina nofotron, foe di sma ben handri takroe nanga den, e jepi wi foe froestan taki wi kan doe wi diniwroko. Wi kan kisi wini toe foe na eksempre foe den getrow salfoewan ini den fosi someni tenti jari foe a di foe 20 jarihondro. A hemel howpoe di den ben abi no ben kon troe so esi leki fa den ben froewakti. Ma tokoe den no ben gi pasi, taki foe di a froewakti foe den no ben kon troe so esi leki den ben denki, dati a faja foe den saka, foe doe a wani foe Gado leki fa a ben tjari kon na krin gi den.
18 Foeroe jari langa foeroe foe den kresten disi ben prati A Waktitoren doronomo, makandra nanga a tijdschrift Ontwaakt! (di fosi ben nen Het Gouden Tijdperk èn baka ten Vertroosting). Fajafaja den ben meki sma kisi den tijdschrift disi, di sma e warderi, na tapoe strati èn na den oso foe den, na san wi ini a ten disi e kari, tijdschrift route. Heri esi sma, di ben pasa na strati, ben misi wan owroe sisa di kaba en libi nanga waka na grontapoe. Den ben gwenti foe si en e gi kotoigi na strati. Fa a ben gi wan boen kotoigi ini den foeroe jari foe a getrow dienst foe en, so leki fa dati ben de foe si na den wortoe foe warderi di den sma ben taki, di ben si a poebliki diniwroko foe en! Joe, leki wan Kownoekondre preikiman, e poti A Waktitoren nanga Ontwaakt! doronomo ini na anoe foe den sma di joe e miti ini joe diniwroko?
19. Sortoe deki-ati Hebrewsma 6:10-12 e gi wi?
19 Loekoe toe, a pasensi nanga a getrow diniwroko foe den brada di e dini leki memre foe a Tiri Skin foe Jehovah Kotoigi. Wan toe foe den pasa now 80 noso 90 jari, ma den de Kownoekondre preikiman ete di e sorgoe fajafaja gi a wroko di den kisi foe doe (Hebrewsma 13:7). Èn fa a de nanga den tra owroe sma di abi a hemel howpoe èn srefi wan toe sma na mindri den „tra skapoe” di e kon moro owroe ini jari? (Johanes 10:16) Den kan de seiker taki Gado no de onregtfardiki, so taki a e frigiti a wroko foe den nanga a lobi di den e sori gi en nen. Meki a de so, taki den owroe Kotoigi foe Jehovah e hori doro foe doe san den man doe, makandra nanga den moro jongoe kompe bribiman, ala di den e sori bribi nanga pasensi ini a diniwroko foe Gado (Hebrewsma 6:10-12). Dan, efoe a de nanga jepi foe wan opobaka, leki fa a ben de nanga den profeiti foe owroeten, noso foe di den e pasa libilibi a „bigi banawtoe” di de na pasi e kon, den sa kisi a bigi pai foe têgo libi. — Mateus 24:21.
20. (a) San joe leri foe a „model” foe den profeiti? (b) Fa a pasensi foe den profeiti kan jepi wi?
20 Fa den profeiti foe Gado libi wan moi model gi wi! Foe di den ben froedrage pina, ben hori pasensi, èn ben sori tra eigifasi foe Gado, den ben kisi a grani foe taki ini a nen foe Jehovah. Meki wi, leki en disiten Kotoigi, de neleki den èn de nanga a srefi fasti bosroiti leki di foe a profeiti Habakuk, di ben froeklari: „Na mi waktipostoe mi sa tan tanapoe, èn mi sa tan na tapoe a fortresi; èn mi sa hori wakti foe si san [Gado] sa taki nanga jepi foe mi” (Habakuk 2:1). Meki wi abi a srefi fasti bosroiti, ala di wi e hori pasensi èn e go doro nanga prisiri foe meki a toemoesi moi nen foe wi Gran Mekiman, Jehovah, bekènti na poebliki! — Nehemia 8:10; Romesma 10:10.
Joe ben froestan den penti disi?
◻ Sortoe eksempre foe deki-ati a profeiti Amos ben gi?
◻ Na sortoe fasi a profeiti Moses ben de wan eksempre?
◻ Fa Jehovah en disiten Kotoigi kan doe neleki fa Amos nanga Jesaja ben doe?
◻ San kresten bedinari kan leri foe a fasi fa Hosea nanga Joèl ben tjari densrefi?
◻ Fa wi kan kisi wini foe den eksempre foe Esekièl nanga Mika?
[Prenki na tapoe bladzijde 25]
Ala di Amasia ben gens Amos hebi, tokoe a jeje foe Jehovah ben gi Amos krakti foe taki profeititori na wan deki-atifasi
[Prenki na tapoe bladzijde 27]
Den getrow salfoewan de wan moi eksempre, foe di den ben hori pasensi ini Jehovah en diniwroko