Tan hori joe soifri retifasi èn libi!
„FLOEKOE Gado èn dede!” A fesisei foe wi tijdschrift e sori a wefi foe Job, di ben teki Job skin nanga den wortoe dati. Dati ben de so wan 3600 jari pasa kaba. Tokoe a teki dati di na oema ben teki a skin foe a getrow foetoeboi foe Gado nanga wortoe, e poti krakti na tapoe wan afersi di a libisma famiri abi foe doe nanga dati te na a dei foe tide. Job, di ben de getrow, ben lasi boen foeroe — den meti foe en, en oso, den tin pikin foe en. Now wan takroe sortoe siki ben pina en skin kefalek, èn a ben tesi en te na a lasti pisi foe a hori di Job ben man horidoro. San ben de a reide? Satan Didibri, a moro bigi feanti foe Gado èn foe libisma, ben handri akroederi wan tjalensi taki libisma no man hori a soifri retifasi foe den na Gado na ondro hebi tesi. — Job 1:11, 12; 2:4, 5, 9, 10.
Ini a ten disi, „heri grontapoe de ini a makti foe na ogriwan”, Satan Didibri, neleki fa a ben de ini a ten foe Job (1 Johanes 5:19). Ija, dati de troe srefi moro ini a ten disi, bika now den trowe „a wan di den kari Didibri nanga Satan, di e kori heri grontapoe pe sma e libi”, komoto na hemel kon na a grontapoe disi (Openbaring 12:9). Disi na a reide foe san ede someni sari de di e kwinsi a libisma famiri foe wi ten. A fosi grontapoe orlokoe di ben broko ini 1914, ben de „a bigin foe pen foe banawtoe”, di go doro boen fara ini a di foe twenti jarihondro disi. — Mateus 24:7, 8.
Wan ten de, taki joe e firi taki joe doro te na a lasti pisi foe a hori di libisma man horidoro ini na ogri grontapoe disi di e go na baka? Wan ten de, taki joe e aksi joesrefi: ’A libi disi abi wan prakseri?’ Kande Job ben firi a fasi dati, ma noiti a ben lasi en bribi ini Gado, ala di a ben meki fowtoe. A ben sori a fasti bosroiti di a ben abi, ini den wortoe disi: „Te leki mi lasti bro, mi no sa libi mi soifri retifasi!” A ben abi a froetrow taki Gado ben sa ’kon sabi a soifri retifasi foe en’. — Job 27:5; 31:6.
Jesus Krestes, Gado en eigi Manpikin, ben moesoe horidoro toe na ondro tesi, di a ben de dja na grontapoe. Satan ben soekoe foe doe Jesus ogri na difrenti fasi. A ben meki gebroiki foe Jesus en nowtoe na skin fasi èn a ben tesi a froetrow di Jesus ben froetrow tapoe a Wortoe foe Gado, so leki di den ben de na tapoe a bergi pe a ben tesi Jesus (Mateus 4:1-11). Satan ben trobi Jesus, foe di a ben meki den sabiman foe boekoe nanga den Fariseiman di ben fadon komoto na bribi, nanga denwan di den ben kori, froefolgoe Jesus. Èn a ben meki den kragi Jesus taki a ben afrontoe Gado, èn den ben meki mofo foe kiri Jesus (Lukas 5:21; Johanes 5:16-18; 10:36-39; 11:57). Den ben handri moro ogri srefi nanga Jesus, leki fa den dri falsi trowstoeman ben doe nanga Job. — Job 16:2; 19:1, 2.
Ini a djari foe Getseimanei, di Jesus ben doro a heimarki foe a tesi disi, a ben taigi den disipel foe en: „Mi e sari srefisrefi, srefi te foe dede.” Baka dati, „a ben iti ensrefi nanga en fesi go na gron, ala di a ben e begi èn a ben e taki: ’Mi Tata, efoe a kan, meki a beker disi pasa mi. Tokoe, no so leki fa mi wani, ma so leki fa joe wani.’” Te foe kaba, leki wan kontroe foe den profeiti wortoe foe Psalm 22:1, Jesus ben bari taki na a pina-oedoe: „Mi Gado, mi Gado, foe san ede joe gowe libi mi?” Ma te foe kaba, Gado no ben gowe libi Jesus, foe di Jesus ben hori en soifri retifasi na Gado na wan volmaaktifasi, èn ben gi wan model foe ala troe kresten waka na dati baka. Jehovah ben pai a soifri retifasi foe Jesus, foe di a ben opo en baka èn ben hei en te na den moro hei hemel (Mateus 26:38, 39; 27:46; Tori foe den Apostel 2:32-36; 5:30; 1 Petrus 2:21). Na a srefi fasi Gado sa pai ala tra sma di e hori den soifri retifasi na en.
No wawan a ben de so taki a soifri retifasi foe Jesus ben gi wan volmaakti piki na tapoe a tjalensi foe Satan, ma na òfer di A ben òfer en volmaakti libisma libi, ben gi a loesoe-paiman toe. Na tapoe a gron foe dati, libisma di e hori a soifri retifasi foe den, kan kisi têgo libi (Mateus 20:28). Na a fosi presi Jesus e tjari wan salfoe „pikin ipi” kon na wan, di e tron kompe erfgenaam nanga en ini a Kownoekondre foe hemel (Lukas 12:32). Baka disi, den e tjari „wan bigi ipi” kon na wan foe pasa „a bigi banawtoe” libilibi, èn e komoto na a bigi banawtoe dati foe kisi têgo libi ini a kontren foe a Kownoekondre foe Gado na grontapoe. — Openbaring 7:9, 14-17.
Job, di ben hori en soifri retifasi, sa de na mindri den miljardmiljard dedewan, di na a ten dati sa kisi wan opobaka foe tron wan pisi foe a vrede „njoen grontapoe” libisma libimakandra dati (2 Petrus 3:13; Johanes 5:28, 29). So leki fa a de foe si na tapoe a bakasei foe a tijdschrift foe wi, dan Job ben kisi pai foe di a ben hori en soifri retifasi, di Jehovah „ben blesi a kaba foe Job . . . moro leki a bigin foe en”. A ben kisi jeje krakti leki wan sma di „no ben sondoe nanga den mofoboeba foe en”. Gado ben meki a libi foe en 140 jari moro langa. Na goedoe sei, a ben gi Job toe tron moro leki san a ben abi fosi, èn Job „ben kisi seibi manpikin nanga dri oemapikin”, èn sma ben si den oemapikin leki den moro moi oema foe a heri kondre (Job 2:10; 42:12-17). Ma ala den boen sani disi ben de soso foe tesi na fesi sortoe blesi den sma di e hori den soifri retifasi, sa kisi ini a Paradijs foe a „njoen grontapoe”. Joe toe kan abi wan prati na a prisiri dati, so leki fa den bladzijde di e kon now, sa tjari kon na krin!
[Prenki na tapoe bladzijde 4]
Jesus ben gi a volmaakti eksempre leki wan sma di ben hori en soifri retifasi