Wini Satan èn den wroko foe en
„Saka oensrefi, foe dati ede, na Gado ondro; ma kakafoetoe gi Didibri, èn a sa lon gowe libi oenoe.” — JAKOBUS 4:7.
1. Fa „na anoe foe na ogriwan” abi krakti na tapoe a libisma famiri ini a ten disi?
JOB ben taki heri boen: „Grontapoe srefi ben gi na ini na anoe foe na ogriwan” (Job 9:24). Èn ini a ten disi wi e tanapoe na fesi den moro tranga ten foe na heri libisma historia. Foe san ede? Bika disi na „den lasti dei” foe a tiri di Satan e tiri grontapoe na wan bita-atifasi. A no de foe froewondroe taki, foe di Satan e gi deki-ati foe dati, meki ’ogrisma nanga bidrigiman e kon moro ogri, ala di den e kori sma èn trawan e kori den’ (2 Timoteus 3:1, 13). Boiti dati, froefolgoe, kroektoedoe, bita-atidoe, ogridoe, ekonomia problema, siki di e tan langa, pen foe a grani di sma grani, depressie na emotioneelsei — den sani disi nanga moro sani ete kan de wan hebi na wi tapoe.
2. Fa wi kan kakafoetoe gi a feti di Satan e opo go feti nanga wi ini a ten disi?
2 A bigi gensman, Satan Didibri, e poti ala en prakseri na tapoe a libisma famiri foe opo go feti nanga den, èn spesroetoe a e poti en prakseri na tapoe den troe anbegiman foe Gado. A prakseri foe en na foe drai ala sma di ben sa kan tron sma ete di e hori den soifri retifasi, teige Gado èn foe tjari den makandra nanga en èn nanga den ogri jeje foe en go na pori. Ma wi de seiker taki, te wi e horidoro na wi soifri retifasi, dan Didibri sa lon gowe libi wi. Neleki Jesus, wi kan ’leri foe gi jesi’ na Gado nanga jepi foe a pina di wi e pina, èn nanga jepi foe a no-froedini boen-atifasi foe En foe kan kisi têgo libi. — Hebrewsma 5:7, 8; Jakobus 4:7; 1 Petrus 5:8-10.
3, 4. (a) Nanga sortoe tesi foe dorosei Paulus ben kisi foe doe? (b) Nanga san Paulus ben broko en ede leki wan kresten owroeman?
3 Na apostel Paulus srefi ben kisi tesi na foeroe fasi. Di a ben taki foe den sani di a doe di e boeweisi taki a abi reti foe de wan dinari foe Krestes, a ben skrifi: „Mi de dati na wan moro aparti fasi: ini den wroko di weri skin pasa marki, ini strafoe-oso pasa marki, ini a kisi foe fonfon pasa marki, nofotron krosibei foe dede. Foe den djoe mi ben kisi feifi tron fotenti tiki poeroe wán, dri tron den ben fon mi nanga tiki, wán tron den ben ston mi, dri tron sipi broko, wán neti nanga wán dei mi ben pasa na ini a dipi se; nofotron mi ben rèis, ini kefar foe den liba, ini kefar foe den foefoeroeman, ini kefar foe mi eigi ras, ini kefar foe den nâsi, ini kefar ini a foto, ini kefar ini a sabana, ini kefar na se, ini kefar na mindri den falsi brada, ini wroko nanga tranga wroko, nofotron na neti sondro foe sribi, ini angri nanga dreiwatra, foeroetron ini a no teki foe njanjan, ini kowroe nanga soso skin.”
4 „Boiti den sani dati di de foe dorosei, dan dei foe dei a sorgoe gi ala den gemeente e lon kon na mi tapoe. Soema swaki èn mi no swaki? Soema ben naki foetoe fadon èn mi no e kisi hebi atibron?” (2 Korentesma 11:23-29) So boen, Paulus ben hori en soifri retifasi di a ben tanapoe na fesi froefolgoe nanga tesi di komoto foe dorosei, èn leki wan kresten owroeman a ben broko en ede srefisrefi foe gi tranga na den moro swaki brada nanga sisa ini a gemeente, èn a ben e jepi den foe den hori den soifri retifasi. Fa disi na wan boen eksempre gi kresten owroeman ini a ten disi!
Soifri retifasi na ondro froefolgoe
5. San na a piki tapoe froefolgoe di e kon langalanga na wan sma tapoe?
5 Sortoe wrokosani Satan e gebroiki foe broko a soifri retifasi foe sma? So leki fa a skrifi na tapoesei, dan wan foe den moro ogri-ati fasi foe Satan, na langalanga froefolgoe. Ma wan piki de. Efeisesma 6:10, 11 e gi wi a rai: „Tan kisi krakti ini Masra èn ini a makti foe en tranga. Weri a heri fetisani foe Gado, so taki joe kan tanapoe steifi teige den kibriwroko [noso, „triki wroko”, foetoewortoe] foe Didibri.”
6. San e sori taki Jehovah Kotoigi tron „winiman dorodoro”?
6 Foeroetron na ini den lasti dei disi, Jehovah Kotoigi kisi foe doe nanga tesi. Foe dati ede, wi kan taki neleki Paulus: „Ini ala den sani disi wi e kon de winiman dorodoro nanga jepi foe en di lobi wi” (Romesma 8:37). Wan boeweisi foe disi na den verslag di skrifi foe a soifri retifasi foe Jehovah Kotoigi na ini den konsentrâsi kampoe ini Doisrikondre, Oostenrijk, Polen nanga Joegoslafia, na a ten foe den Nazi na den jari 1933 te go miti 1945, na ondro a Komunistis tiri di ben kwinsi sma ini Owstoe Europa na den jari 1945 te go miti 1989, èn na a ten foe den froefolgoe di ben kwinsi kontren foe Afrika nanga Latina Amerika no so langa pasa.
7. Sortoe eksempre di e naki sma ati, foe soifri retifasi foe Etiopia den skrifi?
7 Jehovah Kotoigi ini Etiopia ben gi wan eksempre di e naki sma ati, foe soifri retifasi na mindri den jari 1974 nanga 1991. Wan foe den man di ben teki den brada hori èn di ben abi politiek prakseri, ben taigi wán foe den brada di ben de na strafoe-oso: „A no ben sa de so kefalek foe loesoe den lew foe a dierentuin, leki foe fri oenoe baka!” Den bita-ati froefolgoeman disi ben gi den foetoeboi foe Jehovah skin-ati, èn baka wan toe jari wan moro hei kroetoe ben leisi a dede-strafoe gi den. Den ben poti a dede skin foe wan brada na wan presi pe ala sma ben kan si en, so taki a ben kan de leki wan eksempre di e dini leki warskow. Tra brada ben go na wan moro hei kroetoe foe den bosroiti teige a dede-strafoe. A kroetoe disi di ben abi wan pikinmoro frifasi foe denki, ben fri den brada, èn wan toe foe den getrow ’winiman’ disi ben abi wan prati na a programa tapoe a „Leri foe Gado”-distriktskongres na Addis Ababa na a bigin foe a jari 1994.a — Johanes 16:33; teki gersi 1 Korentesma 4:9.
8. Fa Satan proeberi foe kisi wini gi ensrefi foe a gebroiki di a ben gebroiki a „krin di den e krin a ras”?
8 Satan no ben man kwetikweti foe broko a soifri retifasi foe den getrow brada nanga sisa disi, di a ben feti langalanga nanga den. So boen, sortoe tra triki wrokosani a e gebroiki? Openbaring 12:12 e taki foe den lasti dei disi: „Heloe foe grontapoe èn foe a se, bikasi Didibri saka kon na oenoe, èn a abi bigi atibron, foe di a sabi taki a abi wan sjatoe pisi ten.” Foe di a no ben man kwetikweti foe pori a loyaal pipel foe Gado nanga jepi foe froefolgoe, meki a e proeberi nanga atibron foe kiri heri pipel, èn sondro tweifri nanga a prakseri foe pori a pipel foe Jehovah makandra nanga den tra pipel. Na so wan fasi a so-kari krin di den e krin a ras, feni presi na ini kontren foe a Joegoslafia foe fosi, èn den ben proeberi foe kiri heri ras na ini Liberia, Boeroendi, nanga Rwanda.
9. Foe san ede den taktik foe Satan e misi foeroe leisi? Gi wan toe eksempre.
9 Ma foeroetron, den taktiek foe Satan ben drai kon baka tapoe ensrefi, foe di a kwinsi di Satan e kwinsi sma, e opo den ai foe opregti sma, foe den kon froestan taki a wan-enkri howpoe foe den abi en fondamenti na tapoe Gado Kownoekondre di Jehovah Kotoigi e meki bekènti nanga faja (Mateus 12:21). Foe troe, sma di abi belangstelling e go na ini ipi-ipi na a Kownoekondre! Foe eksempre, na ini Bosnia nanga Hersegofina di priti foe feti ede, 1307 sma ben fisiti a Memrefesa foe a dede foe Jesus, tapoe 26 maart 1994, èn dati ben de 291 sma moro leki a jari bifo. Den ben abi heimarki foe 414 fisitiman na ini Sarajevo, 223 sma na ini a foto Zenica, 339 sma na ini a foto Tuzla, 255 sma na ini a foto Banja Luka, èn na ini tra foto. Na ini Kroasia di de krosibei, wan njoen heimarki foe 8326 fisitiman ben de. Na ogridoe di e pasa lontoe den no ben hori Jehovah Kotoigi ini den kondre dati foe e gi jesi na a komando foe „tan meki a dede foe Masra bekènti, teleki a doro”. — 1 Korentesma 11:26.
Na Rwanda di priti foe feti ede
10, 11. (a) San ben pasa na ini a so-kari kresten Rwanda? (b) San wan toe getrow zendeling ben taki?
10 Na ini 1993, Rwanda, di abi 2080 Kownoekondre preikiman, ben abi 4075 sma di ben fisiti a „Leri foe Gado”-distriktskongres, èn 230 sma ben teki dopoe. Foe den disi, 142 ben gi den nen wantewante foe go ini a jepi-pionierwroko. Den oso bijbelstudie di den e hori ben gro kon doro 7655 ini 1994 — a de krin taki Satan no ben lobi a gro disi srefisrefi! Ala di a moro bigi pisi foe a pipel e taki dati den na kresten, tokoe sma ben soetoe faja foe kiri ipi-ipi sma na mindri den Hoetoe nanga den Toetsi. L’Osservatore Romano foe a Vatikaan ben taki: „Disi na wan dorodoro kiri foe wan heri ras, èn a de wan sari foe taki dati srefi den Lomsoe sma de frantiwortoe gi dati.” Wan sani foe afoe miljoen mansma, oemasma, nanga pikin-nengre dede, èn pikinmoro toe miljoen sma lasi den oso noso den ben abi foe lowe. Ala di den ben e tan hori den kresten neutraliteit ini a doe foe ogridoe, den Jehovah Kotoigi ben proeberi foe tan nanga makandra. Den ben kiri hondrohondro foe wi brada nanga sisa. Ma ini wan gemeente di abi 65 preikiman, pe den ben kiri 13 preikiman, a nomroe foe sma di ben fisiti den konmakandra ben gro kon doro 170 na ini augustus 1993. Den sani di den Kotoigi foe tra kondre ben seni kon foe jepi den, ben de na mindri den fosi sani di ben doro. Wi e begi gi denwan di tan na libi. — Romesma 12:12; 2 Tesalonikasma 3:1, 2; Hebrewsma 10:23-25.
11 Na mindri a broeja foe a kefalek takroe sani disi, den dri zendeling di ben de na Rwanda ben man lowe foe drape. Den e skrifi: „Wi e froestan taki den brada foe wi na heri grontapoe abi foe doe nanga den srefi situwâsi disi noso moro ogri, èn wi sabi taki ala den sani disi na wan pisi foe a marki foe den lasti dei foe na ogri seti disi. Tokoe, te wan sma abi foe doe persoonlijk nanga so wan sani, dan dati e meki a sma froestan heri boen fa sani de troetroe èn a e meki a sma kon froestan omeni a libi warti. Wan toe bijbel tekst kisi njoen warti gi wi now, èn wi e loekoe nanga faja froewakti go na a ten te den fosi sani no sa kon na ini prakseri moro. Ma nownowde, wi wani tan abi foeroe foe doe ini a diniwroko foe Jehovah.”
Jongoesma di hori den soifri retifasi
12, 13. (a) Sortoe fasi foe libi wan jongoe oemapikin ben teki foe hori en soifri retifasi? (b) Pe den jongoewan foe wi kan feni deki-ati ini a ten disi?
12 Jesus ben taki dati denwan di den famiri foe den no wani den moro foe na waarheid ede, sa kisi pai „wan hondro tron moro” (Markus 10:29, 30). Disi ben de so nanga Entellia, wan oemapikin foe tin jari na ini a noordsei foe Afrika, èn di ben lobi a nen foe Gado — Jehovah — so esi leki a ben jere a nen. A ben studeri nanga Jehovah Kotoigi èn a ben waka 90 miniti go-kon na den konmakandra, srefi ala di na osofamiri foe en di ben gens en, no ben gi en pasi foe go ini na oso te a ben drai kon baka foe den konmakandra. Di a ben abi 13 jari, a ben bigin preiki oso foe oso, èn a gens foe na osofamiri foe en ben kon moro hebi. Wan dei, famiriman foe en ben tai den foetoe nanga anoe foe en èn den ben meki a didon na ini a faja son seibi joeroe langa, èn wanwan leisi den ben e trowe doti watra na tapoe en. Den ben fon en na wan ogri-atifasi, èn dati ben meki taki a lasi wan foe den ai foe en, èn te foe kaba den ben dwengi en foe gowe libi na oso foe en. Ma tokoe, a ben feni wroko na wan ati-oso èn baka ten a ben tron wan zuster foe sorgoe siki sma. Di a ben abi 20 jari, a ben teki dopoe èn wantewante a ben gi en nen foe bigin nanga a jepi-pionierwroko. Foe di a soifri retifasi foe en ben naki na ati foe na osofamiri foe en, meki den teki en baka na ini na oso foe den, èn neigi foe den teki oso bijbelstudie.
13 Entellia ben kisi foeroe deki-ati foe Psalm 116, spesroetoe den vers 1-4, di a leisi foeroetron baka: „Mi lobi Jehovah troetroe, bika Jehovah e jere mi sten, den tranga begi foe mi. Bika a drai en jesi go na mi, èn so langa mi de, mi sa kari en. Den titei foe dede ben de lontoe mi èn den banawtoe situwâsi foe Sjeool ben miti mi. Banawtoe nanga sari ben tan miti mi. Ma mi ben bigin foe kari a nen foe Jehovah: ’Ke Jehovah, froeloesoe mi sili!’” Jehovah e piki den sortoe begi disi!
14. Fa Kotoigi ini Polen sori wan toemoesi aparti soifri retifasi?
14 Neleki fa a ben de ini den dei foe Jesus, foeroetron Satan gebroiki a faja di sma abi gi relisi, foe wiki a faja foe froefolgoe — ma sondro taki a ben man broko a soifri retifasi foe denwan di a ben froefolgoe. Toemoesi aparti na a eksempre foe den brada foe wi na ini Polen, so leki fa dati skrifi ini a Jaarboek van Jehovah’s Getuigen 1994. Srefi jongoewan ben abi foe boeweisi taki den e hori den soifri retifasi. Ini 1946, wan foe den jongoewan disi ben de wan oemapikin di ben abi 15 jari, èn den ben taigi en: „Meki soso a marki foe a Lomsoe kroisi. Efoe joe no e doe dati dan wi sa soetoe joe!” Foe di a ben e hori en soifri retifasi den ben srepi en go na ini wan boesi, ben meshandri en na wan kefalek takroe fasi, èn ben soetoe en kiri. — Teki gersi Mateus 4:9, 10.
Tra triki wrokosani foe Satan
15, 16. (a) San na a didibri prakseri foe Satan, èn fa wi kan kakafoetoe gi en? (b) Foe san ede a no abi foe de so, taki den jongoewan foe wi moesoe naki foetoe fadon?
15 Foe troe, a didibri prakseri foe Satan na troetroe „tiri noso foe pori”! A abi foeroe takroe fetisani di a kan gebroiki. Foe dati ede, a no de wan sani foe froewondroe taki na apostel Paulus e warskow: „Na feti foe wi no de wan feti nanga broedoe èn skin, ma nanga den tiri foe kondre, nanga den tirimakti, nanga den grontapoe tiriman foe a doengroe disi, nanga den ogri-ati jeje krakti na den hemel kontren. Foe dati ede, teki a heri fetisani foe Gado, so taki oenoe kan kakafoetoe tapoe na ogridei, èn baka te oenoe doe ala den sani disi dorodoro, oenoe kan tanapoe kánkán” (Efeisesma 6:12, 13). Tranga lostoe gi sani na skin fasi, lagi ontspanning nanga propaganda, didibri pokoe, druk foe speri na skoro, a fowtoe gebroiki foe drug, èn a droengoe di sma e droengoe — ibriwan foe den sani disi kan pori a libi foe wi. Foe dati ede, na apostel e gi moro rai: „Na tapoe foe ala den sani disi, teki a bigi schild foe bribi, nanga san joe sa man foe kiri ala den faja peiri foe na ogriwan.” — Efeisesma 6:16.
16 A gersi taki disi de spesroetoe fanowdoe ini a ten disi, te wi e prakseri den dangra pokoe nanga san Satan e foeroe a grontapoe disi. Wan toe foe den abi foe doe wantewante nanga na anbegi foe Satan. Wan verslag foe a kantoro foe skowtoe na San Diego County (Amerkankondre) ben froeklari: „Wi ben abi wan show djaso na San Diego pe a groepoe di ben prei pokoe, ben meki 15.000 pikin bari ibritron baka makandra ‘Natas’ — dati wani taki Satan, te joe leisi en foe baka go na fesi.” Den ben taki foe na anbegi foe Satan leki wan olo ini a gron na ini san wan toe tini e naki foetoe fadon „bika den e wakawaka sondro howpoe, nanga atibron èn den wawan”. Oenoe jongoewan ini a kresten gemeente, a no de fanowdoe taki joe e naki foetoe fadon! Jehovah e gi oenoe jeje fetisani di den peiri foe Satan noiti no man boro. — Psalm 16:8, 9.
17. Fa wi kan wini emotioneel depressie?
17 Satan meki den faja peiri foe abi krakti na tapoe a emotioneel firi foe sma. A gensman foe wi ben kan meki wan toe sma firi taki den no warti noti nanga jepi foe den kwinsi foe a libi, so leki siki na skin fasi noso tranga depressie. Wan sma kan lasi deki-ati foe di a no man wroko foeroe joeroe na ini a diniwroko foe Gado, noso foe di a e misi wan boen sani na tapoe wan toe foe den gemeente konmakandra. A sorgoe di den owroeman e gi sorgoe na wan lobifasi, nanga tra brada nanga sisa di e sori switifasi, kan jepi wan sma foe pasa den moeilek ondrofeni di no switi srefisrefi èn di e hati. Memre ala ten taki Jehovah lobi den foetoeboi foe en di de getrow (1 Johanes 4:16, 19). Psalm 55:22 e taki: „Trowe oen hebi na tapoe Jehovah srefi, èn ensrefi sa horibaka gi oenoe. Noiti a sa gi pasi taki a regtfardikiwan e degedege.”
18. Nanga sortoe kibriwroko foe Satan wan toe sma abi foe feti?
18 Den triki „kibriwroko” foe Satan de foe si na ete wan tra sortoe fasi ini a ten disi. Ini wan toe kondre, foeroe bigisma ben kisi a denki na ini a prakseri foe den, di e gi den a kefalek idea, taki di den ben pikin, sma di ben anbegi Satan ben abi seks nanga den foe gi den skin-ati na wan kefalek ogri-atifasi èn den sma disi ben abi prisiri foe dati. Foe pe den sortoe idea disi e kon? Ala di finifini ondrosoekoe doe, tokoe a fasi fa grontapoe sabiman e prakseri foe dati, e difrenti foeroe nanga makandra. Son sma e si den sortoe prakseri disi leki sani di pasa troetroe èn di den e memre. Tra sma e si den prakseri disi leki foeberdi — di kande den ben kisi foe wan psychotherapie, di sma no sabi seiker efoe a boen efoe no, — èn tokoe tra sma e si den leki wan sortoe hallucinatie di de a bakapisi foe wan ondrofeni di no switi srefisrefi èn di e hati, èn di sma ben abi ini a ten di den ben pikin.
19. (a) Nanga sortoe denki Job ben kisi foe doe? (b) Na sortoe fasi owroeman kan waka na baka na eksempre foe Elihu?
19 A de boen foe si taki Job, wan foetoeboi foe Gado, ben abi foe doe nanga „broeja prakseri” di Satan ben tjari na en tapoe nanga jepi foe Elifaz nanga Zofar (Job 4:13-18; 20:2, 3). Foe dati ede, Job ben pina na ondro „prakseri di ben tanteri en”. Èn dati ben abi leki bakapisi taki a ben gi ensrefi abra na „takitaki sondro foe prakseri fosi”, di abi foe doe nanga „skreki sani” di ben e kwinsi a prakseri foe en (Job 6:2-4; 30:15, 16). Elihu ben arki Job sondro foe taki wan sani èn a ben jepi en na wan opregtifasi foe si a toemoesi konifasi fa Jehovah e si sani. Na so a de ini a ten disi toe. Owroeman di e sori taki den e froestan sma, e sori taki den e broko den ede nanga denwan di kisi kwinsi, foe di den no e poti moro „hebi” na tapoe denwan disi. Na presi foe dati, neleki Elihu, den e arki den nanga pasensi èn dan den e gebroiki a safoe oli foe a Wortoe foe Gado gi den (Job 33:1-3, 7; Jakobus 5:13-15). Foe dati ede, iniwan sma di den firi foe den e hendri den foe di den ben ondrofeni wan sani di no switi srefisrefi èn di e hati, awinsi den de sani di pasa troetroe noso di den foeberdi, noso wan sma di e „frede . . . nanga den dren, èn nanga den fisjoen” neleki fa a ben de nanga Job, kan feni a safoe trowstoe foe den Boekoe foe bijbel, ini a gemeente. — Job 7:14; Jakobus 4:7.
20. Fa kresten kan kisi jepi foe hori balansi na jeje fasi, te den prakseri foe den e trobi den?
20 Nownowde wan kresten kan de seiker taki, na a wán noso tra fasi, Satan de na baka den sortoe toemoesi takroe prakseri disi. Efoe wan toe sma ini a gemeente e pina na a fasi disi, dan a sa de wan koni sani foe si den sortoe frede prakseri disi foe a froestan, leki wan langalanga fasi fa Satan e proeberi foe broeja a jeje balansifasi foe den. Den abi jepi fanowdoe foe den Boekoe foe bijbel, di e gi nanga pasensi èn na wan switifasi. Denwan di e ondrofeni banawtoe, sa kisi krakti di pasa a marki foe san de normaal, foe di den e drai go na Jehovah na ondro begi èn foe di den e kisi wini foe a wroko foe den skapoeman, na jeje fasi (Jesaja 32:2; 2 Korentesma 4:7, 8). Na a fasi disi den sa man foe horidoro na wan getrowfasi èn den sa man foe weigri foe gi pasi taki didibri prakseri e go na ini den prakseri foe den foe abi krakti na tapoe a vrede foe a gemeente (Jakobus 3:17, 18). Ija, den sa man foe kakafoetoe gi Didibri, te den e sori a srefi jeje di Jesus ben abi di a ben taki: „Gowe foe dja, Satan!” — Mateus 4:10; Jakobus 4:7.
21. Na sortoe fasi den Boekoe foe bijbel e warskow wi gi den trikifasi foe Satan?
21 Wi sabi taki a marki foe Satan na foe pori a prakseri foe wi na a wán noso tra fasi, neleki fa na apostel Paulus ben warskow na 2 Korentesma 11:3: „Mi e frede taki na a wán noso tra fasi, neleki fa a sneki ben kori Eva nanga en triki, joe jeje ben sa kon pori èn ben sa drifi komoto na a opregtifasi nanga a krinfasi di fiti a Krestes.” A pori di ala libiskin ini a ten disi, noso a libisma libimakandra di de farawe foe Gado, e pori, e memre wi foe a lagifasi di ben kon foe den ogri basra „man di e meki tra sma fadon”, foe Noa en ten (Genesis 6:4, 12, 13, foetoewortoe; Lukas 17:26). Foe dati ede, a no de foe froewondre taki Satan e meki gebroiki foe triki wroko nanga triki wrokosani foe poeroe na atibron foe en, spesroetoe tapoe a pipel foe Gado. — 1 Petrus 5:8; Openbaring 12:17.
22. Sortoe blesi wi kan froewakti te Satan no de moro foe trobi wi?
22 Den no e taki srefi foe Satan na ini den lasti kapitel foe a bijbelboekoe Job. Foe di Job ben hori a soifri retifasi foe en, meki Job ben boeweisi taki a kragi foe Satan, taki libisma no kan hori den soifri retifasi na Gado, de wan lei. Na a srefi fasi, heri esi ini a ten di de na wi fesi te „wan bigi ipi” sma di e hori den soifri retifasi „e komoto na a bigi banawtoe”, dan Satan sa fringi go ini a peti. Mansma nanga oemasma di abi bribi, so srefi a getrowman Job, sa moksi nanga a „bigi ipi” dati, foe njanboen foe den toemoesi moi blesi na a paradijs, di de moro bigi srefi leki denwan di Job ben kisi leki pai! — Openbaring 7:9-17; 20:1-3, 11-13; Job 14:13.
[Foetoewortoe]
Aksi foe loekoe sjatoe baka
◻ Sortoe toemoesi boen eksempre foe soifri retifasi, Job Jesus nanga Paulus ben gi?
◻ Fa sma di hori den soifri retifasi ben kakafoetoe gi Satan?
◻ Na sortoe fasi den jongoewan kan kakafoetoe gi den triki wrokosani foe Satan?
◻ San wi kan doe foe kakafoetoe gi den trikiwroko foe Satan?
[Prenki na tapoe bladzijde 7]
Meswat nanga Yoalan e doe foeroe-ten diniwroko gi Jehovah now na ini Etiopia, foe di den e waka na baka na eksempre foe a papa foe den di sma ben kiri
[Prenki na tapoe bladzijde 7]
Entellia, wan jongoe sma di hori en soifri retifasi ini a noordsei foe Afrika