Yu ben o hori yu soifri retifasi?

OMENI pikin fowru dede esde? Nowan sma no sabi, èn kande furu sma no e broko den ede nanga dati, bika someni fowru de. Ma Yehovah e broko en ede nanga den. Den fowru disi no gersi prenspari srefisrefi, ma Yesus ben taigi den disipel fu en: „Nowan fu den sa fadon na gron sondro taki un Tata sabi.” A ben taki sosrefi: „Unu no musu frede: unu warti moro leki furu pikin fowru.”​—Mateyus 10:29, 31.

Bakaten den disipel ben frustan moro bun o warti den ben de gi Yehovah. Wan fu den, na apostel Yohanes, ben skrifi: „Nanga disi, a lobi fu Gado ben kon na krin na ini wi kefal, taki Gado ben seni en wan-enkri gebore Manpikin kon na grontapu, so taki nanga yepi fu en wi ben sa kan kisi libi” (1 Yohanes 4:9). Boiti taki Yehovah gi wi a lusu-paiman, a gi ibriwan fu den futuboi fu en a dyaranti disi tu: „Mi no sa gowe libi yu kwetikweti, èn noiti mi no sa drai mi baka gi yu.”—Hebrewsma 13:5.

A de krin taki Yehovah abi so furu lobi gi a pipel fu en, taki nowan sani kan tapu en fu lobi den. Ma na aksi di e opo kon na: ’A banti di wi abi nanga Yehovah de so tranga, taki wi noiti no sa gowe libi en?’

Den sani di Satan e pruberi fu man broko wi soifri retifasi

Di Yehovah sori Satan taki Yob ben de wan man di tan hori en soifri retifasi, dan Satan piki en nanga atibron: „Job de frede Gado foe soso?” (Yob 1:9, Da Bijbel na ini Sranantongo) Nanga den wortu dati Satan ben wani taki dati libisma no e dini Gado „foe soso”, ma taki libisma de getrow na Gado soso efu den man kisi wini gi densrefi. Efu dati ben de so, dan iniwan Kresten ben kan poti Bijbel gronprakseri na wan sei èn lasi en soifri retifasi, efu den sani di Satan e pramisi en o meki a kisi furu wini gi ensrefi.

Na ini a kefal fu Yob, dan Satan ben taki na a bigin taki Yob no ben o tan getrow na Gado moro efu a ben lasi den moro warti gudu fu en (Yob 1:10, 11). Satan ben afrontu Gado nanga den wortu dati. Di Yob no du san Satan ben taki, dan Satan taigi Yehovah: „Alasani disi wan soema abi a sa gi foe hori hemsrefi na libi” (Yob 2:4, Da Bijbel na ini Sranantongo). Kande wan tu sma trutru e du soleki fa Satan taki, ma Yob ben weigri fu broko en soifri retifasi soso fu man tan na libi. Bijbel e sori taki Yob trutru ben hori en soifri retifasi (Yob 27:5; 42:10-17). Yu de getrow neleki Yob? Noso yu ben o meki Satan broko a soifri retifasi fu yu? Prakseri fa a de nanga yu te wi e ondrosuku wan tu prenspari tori di abi fu du nanga ibri Kresten.

Na apostel Paulus ben e bribi taki a getrowfasi fu tru Kresten kan de tranga srefisrefi. A ben skrifi: „Mi abi na overtoigi taki nowan dede noso libi, . . . nowan sani di de now noso wan sani di musu kon ete, . . . nowan tra mekisani sa man prati wi fu a lobi fu Gado, di de na ini Krestes Yesus, wi Masra” (Romesma 8:38, 39). Wi kan abi a srefi overtoigi dati efu wi lobi gi Yehovah tranga. A lobi dati e meki wi kon abi wan tranga banti nanga Yehovah di no man broko kwetikweti, taki dede srefi no man broko en.

Te wi abi so wan banti nanga Gado, dan wi noiti no sa aksi wisrefi: ’Mi sa tan dini Yehovah ete baka wan tu yari?’ Te wi ben o abi a denki dati, dan a kan gersi leki a fasi fa wi libi sa waka sa meki taki wi tan getrow na Gado, noso no tan getrow na en. Ma te wan sma abi tru soifri retifasi, dan den sani di e pasa lontu en no abi krakti tapu a fasi fa a e tyari ensrefi. A tan di wan sma e tan hori en soifri retifasi, abi fu du nanga a sma di a de fu inisei (2 Korentesma 4:16-18). Efu wi lobi Yehovah nanga wi heri ati, dan wi noiti no sa du sani di Yehovah no feni bun.—Mateyus 22:37; 1 Korentesma 13:8.

Ma wi musu hori na prakseri taki Satan e pruberi doronomo fu broko wi soifri retifasi. A kan gi wi deki-ati fu gi wisrefi abra na den lostu fu a skin, a kan meki wi brokokindi sosrefi te speri e dwengi wi fu du sani di no bun, noso a kan gebroiki iniwan sortu problema fu meki wi gowe libi a waarheid. Den sma fu grontapu di no abi wan banti nanga Gado, na a moro prenspari grupu sma di e yepi Satan fu tyari den tesi disi kon na wi tapu, aladi den swakifasi fu wi e meki taki a moro makriki gi en fu broko wi soifri retifasi (Romesma 7:19, 20; 1 Yohanes 2:16). Toku wi abi wan tu bun sani di e yepi wi na ini a feti disi. Wan fu den moro bun sani di e yepi wi, na taki wi sabi den sani di Satan e gebroiki fu kisi sma.—2 Korentesma 2:11.

San na den sani di Satan e gebroiki fu kisi sma? Na ini a brifi di Paulus ben seni go na den Efeisesma, a ben kari den sani disi „triki” (Efeisesma 6:11). Satan e gebroiki triki fu kan broko wi soifri retifasi. A bun taki wi sabi sortu triki a e gebroiki, fu di den sani di Didibri e gebroiki fu kisi sma, skrifi gi wi na ini Gado Wortu. Den triki di Satan ben gebroiki fu pruberi fu pori a soifri retifasi fu Yesus èn fu Yob, e sori wi krin san na wan tu fu den fasi fa a e suku fu broko wi Kresten soifri retifasi.

Nowan sani ben kan broko a soifri retifasi fu Yesus

Na a bigin fu Yesus en diniwroko, Satan ben prefuru fu tesi a Manpikin fu Gado. A ben aksi Yesus fu meki wan ston kon tron brede. A sani disi ben sori krin taki Satan abi triki fasi trutru! Yesus no ben nyan noti 40 dei langa. Sobun, angri ben musu e kiri Yesus srefisrefi (Lukas 4:2, 3). Satan ben wani taki Yesus ben musu tapu na angri fu en wantewante na wan fasi di no ben e kruderi nanga a wani fu Yehovah. Na so a de tu na ini a ten disi. Grontapu e gi sma deki-ati fu tapu den lostu fu den wantewante, sondro fu prakseri bun fosi san o de a bakapisi fu dati. A rai di den e gi sma na: ’Yu musu abi a sani dati nownow’, noso den e taigi sma nomo ’Du san yu wani!’

Efu Yesus ben tapu na angri fu en sondro fu prakseri a bakapisi, dan Satan ben o kisi Yesus nanga a triki dati èn a ben o meki A broko en soifri retifasi. Yesus ben hori en banti nanga Yehovah na prakseri, èn fu dati ede a ben taki sondro degedege: „Buku skrifi: ’Libisma no musu libi fu brede wawan.’”—Lukas 4:4; Mateyus 4:4.

Baka dati, Satan ben gebroiki wan tra triki. A ben drai den wortu fu den Buku fu Bijbel di Yesus ben e gebroiki. Didibri ben gi Yesus deki-ati fu dyompo komopo fu a skotu fu a tempel. ’Wan engel sa abi fu kon fanga yu’, Satan ben taki. Yesus no ben wani aksi en Tata fu kibri en na wan wondru fasi, soso fu man gi ensrefi glori. „Yu no musu tesi Yehovah yu Gado”, Yesus ben taki.—Mateyus 4:5-7; Lukas 4:9-12.

A lasti triki di Satan ben gebroiki ben sori moro krin san a ben wani fu Yesus. A ben pruberi fu meki wan kruderi nanga Yesus. Satan ben o gi Yesus a heri grontapu nanga ala den moi sani na ini, efu Yesus ben o anbegi en wan leisi nomo. Den sani di Satan ben wani gi Yesus, ben de pikinmoro ala san a ben abi. Ma Yesus ben o anbegi a moro bigi feanti fu en Tata? Yesus no ben o prakseri fu du so wan sani kwetikweti! Yesus ben piki: „Na Yehovah, yu Gado, yu musu anbegi, èn gi en wawan yu musu du santa diniwroko.”—Mateyus 4:8-11; Lukas 4:5-8.

Di Satan no ben man kisi Yesus na den dri okasi dati, dan Satan ’gowe libi Yesus fu kon baka na wan moro bun ten’ (Lukas 4:13). Disi wani taki dati Satan ben de na ai ala ten fu suku wan fasi fu broko a soifri retifasi fu Yesus. Wan moro bun ten ben doro sowan tu nanga afu yari baka dati, di Yesus bigin yepi den disipel fu en fu abi a yoisti denki fu a dede di a ben o dede dyonsro. Na apostel Paulus ben taki: „De bun gi yusrefi, Masra; a sani disi no sa pasa nanga yu kwetikweti.”—Mateyus 16:21, 22.

A rai dati ben kon fu wan fu den disipel fu Yesus di ben wani taki sani musu waka bun nanga en. Ma fa Yesus ben feni a rai dati? We, aladi a disipel dati ben abi bun prakseri, toku dati ben de wan fowtu denki. Yesus ben si wantewante taki den wortu dati no ben de a denki fu Yehovah, ma a denki fu Satan. Krestes ben piki sondro degedege: „Komopo na mi tapu, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki.”—Mateyus 16:23.

Fu di Yesus lobi Yehovah dorodoro, dati meki Satan no ben man broko a soifri retifasi fu en. Nowan sani di Didibri ben kan gi en, èn nowan tesi, awinsi o hebi a tesi dati ben de, ben kan swaki a bosroiti fu Yesus fu tan getrow na en hemel Tata. Wi sa abi so wan fasti bosroiti tu te situwâsi e meki taki a tranga gi wi fu hori wi soifri retifasi? Na eksempre fu Yob sa yepi wi fu frustan moro bun sortu kefalek bigi problema kan miti wi.

Fa wi kan tan getrow te problema e miti wi

Soleki fa Yob ben ondrofeni, dan problema kan miti wi alamala na iniwan momenti. Yob ben abi wan koloku trowlibi èn a ben abi tin pikin. Boiti dati, na anbegi fu Yehovah ben de wan prenspari sani na ini en libi (Yob 1:5). Ma Yob no ben sabi taki a tan di a ben tan hori en soifri retifasi na Gado, ben meki wan strei opo kon na ini hemel. Yob no ben sabi tu taki Satan ben e suku nomonomo fu broko en soifri retifasi na iniwan fasi fa a ben man du dati.

Baka wan syatu pisi ten nomo, Yob ben kon lasi ala den gudu fu en (Yob 1:14-17). Ma Yob ben hori en soifri retifasi ondro a tesi dati, fu di a noiti no ben poti en frutrow tapu moni. Di Yob ben e prakseri baka fu a ten di a ben gudu, dan a taki: „Efu mi howpu tapu gowtu, . . . efu mi ben gwenti fu prisiri fu di mi gudu ben de furu, . . . dan dati sosrefi ben sa de wan fowtu sani . . . , bika mi ben sa drai baka gi a tru Gado di de na loktu.”—Yob 31:24, 25, 28.

Na ini a ten disi, a kan de so tu taki wantronso wi e kon lasi pikinmoro ala den gudu fu wi. Wan bisnisman di de wan Kotoigi fu Yehovah, ben lasi kefalek furu moni fu di wan tra sma bedrigi en. A e taki: „Mi ben skreki srefisrefi di a sani dati pasa. Fu taki en leti, efu mi no ben abi wan banti nanga Gado, dan mi denki taki mi ati ben o tapu fu tru. Ma a sani disi di mi ben ondrofeni, meki mi kon si taki yeye afersi no ben de na a fosi presi na ini mi libi. A meki di mi ben man meki moni gaw, ben kon fosi ala tra sani.” Sensi a ten dati, a Kotoigi disi no e du so furu wroko moro, èn a e dini leki wan yepipionier. Ibri mun a e wroko 50 yuru noso moro leki dati na ini a Kresten preikiwroko. Ma tra problema kan gi moro bigi sari srefi leki a lasi di wan sma e lasi den gudu fu en.

Yob no ben kaba yere a nyunsu taki a lasi ala den gudu fu en, di a kisi a boskopu taki ala den tin pikin fu en kon lasi libi. Toku a ben taki: „Meki a nen fu Yehovah tan kisi blesi” (Yob 1:18-21). Wi ben o hori wi soifri retifasi efu wi ben o lasi wan tu sma fu wi osofamiri wantronso na ini dede? Francisco, wan Kresten owruman na ini Spanyorokondre, ben lasi den tu pikin fu en na ini wan sari onkoloku nanga wan bus. A ben kisi trowstu fu di a suku fu kisi wan moro tranga banti nanga Yehovah, èn sosrefi fu di a ben e du moro na ini a Kresten preikiwroko.

Srefi baka di Yob ben lasi ala den pikin fu en, toku a hebi tesi fu en no ben kaba ete. Satan ben naki en nanga wan kefalek takru siki di ben hati en srefisrefi. Na a momenti dati, Yob no ben kisi bun rai fu en wefi. „Fluku Gado èn dede!” a ben taigi Yob. Yob no ben arki a rai dati, èn a no ben „sondu nanga den mofobuba fu en” (Yob 2:9, 10). A no fu di Yob osofamiri ben horibaka gi en, meki Yob ben man hori en soifri retifasi, ma a ben man hori en soifri retifasi fu di a ben abi wan banti nanga Yehovah.

Flora, di a masra nanga a moro owru manpikin fu en gowe libi a Kresten pasi moro leki tin yari pasa, e frustan fa Yob ben musu e firi. „Te wantronso na osofamiri fu yu no e horibaka gi yu moro, dan dati kan meki yu firi brokosaka srefisrefi”, na so a e taki. „Ma mi ben sabi taki mi no ben o de koloku efu mi ben o gowe libi na organisâsi fu Yehovah. Fu dati ede mi ben tanapu kánkan, èn mi poti Yehovah na a fosi presi aladi mi ben e meki muiti fu tan de wan bun wefi nanga wan bun mama. Mi ben e begi doronomo, èn Yehovah ben gi mi krakti. Awinsi mi e tan kisi gens fu mi masra, toku mi de koloku fu di mi leri fu frutrow dorodoro tapu Yehovah.”

Wan tra triki di Satan ben gebroiki fu broko a soifri retifasi fu Yob, ben abi fu du nanga dri kompe fu en (Yob 2:11-13). Yob ben musu fu firi sari trutru di den kompe bigin krutu en. Efu a ben bribi den sani di den man dati ben e taki, dan a no de fu taki dati a ben o lasi a frutrow di a ben abi na ini Yehovah Gado. Den rai fu den no ben gi en deki-ati kwetikweti èn fu dati ede den rai dati ben kan meki a firi brokosaka, èn a ben kan broko en soifri retifasi tu. Efu dati ben pasa, dan Satan ben o kisi Yob trutru nanga a triki fu en.

Na presi fu dati, Yob ben taki: „Teleki mi lasti bro, mi no sa libi mi soifri retifasi!” (Yob 27:5) Yob no ben taki ’mi no sa meki unu broko mi soifri retifasi!’ Nôno. Yob ben sabi taki a ben o man hori en soifri retifasi efu ensrefi ben wani dati, èn sosrefi efu a ben lobi Yehovah.

Wan owru triki fu kisi sma na ini a ten disi

Satan e pruberi ete fu kisi wi nanga fowtu rai di e kon fu mati nanga tra bribiman, noso nanga sani di sma e taki sondro fu hori den firi fu trawan na prakseri. Te sma na ini a gemeente e taki sani di e meki wi lasi-ati, dan dati kan meki wi firi brokosaka moro esi leki te tra sma e frufolgu wi. Wan Kresten owruman di ben feti na ini a legre fosi, ben agersi a libi dati leki srudati nanga a sari di a ondrofeni di wan tu Kresten brada nanga sisa ben taki sani èn ben du sani di hati den firi fu en. A ben taki fu den sani disi di trawan na ini a gemeente ben du: „Dati ben de a moro tranga sani di mi ondrofeni na ini mi libi.”

Na a tra sei a kan de so, taki wi e atibron so kefalek nanga den fowtu di tra bribiman e meki, taki wi no wani taki nanga spesrutu sma na ini a gemeente moro, noso taki wi e tapu fu go na den Kresten konmakandra srefi. Kande wi e prakseri nomo san wi kan du fu meki wisrefi firi bun baka te sma hati den firi fu wi. Ma a ben o de wan sari sani srefisrefi efu wi ben o luku a tori na so wan fasi. A ben o de wan sari sani tu efu wi ben o meki sani di trawan e du, noso sani di den e taki, meki a moro warti gudu fu wi, namku a banti di wi abi nanga Yehovah, kon swaki. Efu wi ben o meki dati pasa, dan wi ben sa meki Satan kisi wi nanga wan fu den moro owru triki di a e gebroiki fu kisi sma.

A tru taki wi e fruwakti fu sma na ini a Kresten gemeente taki den e hori densrefi na hei markitiki. Ma efu wi e fruwakti tumusi furu fu den brada nanga sisa fu wi, di no de volmaakti sma ete, dan wi sa lasi-ati sondro misi. Heri tra fasi leki dati, Yehovah sabi san a kan fruwakti fu den futuboi fu en. Efu wi e teki na eksempre fu en, dan wi sa de klariklari fu frudrage den fowtu fu trawan (Efeisesma 4:2, 32). Na apostel Paulus ben gi a rai disi: „Efi oen hatti wani bron, loekoe boen, vo oen no doe zondoe! No meki zon go na ondro, bifo da hattibron vo oen kaba! No gi didiebri pasi.”—Efeisesma 4:26, 27, Njoe Testament nanga dem Psalm.

Soleki fa Bijbel e leri wi, dan Satan e gebroiki difrenti sortu triki fu suku wan fasi fu broko a soifri retifasi fu Kresten, efu a man feni wan fasi fu du dati. Sonwan fu den triki di a e gebroiki na sani di a sondu skin lobi, èn trawan na sani di e gi sma furu pen nanga sari. Soleki fa na artikel disi sori, dan yu kan si fu san ede a de tumusi prenspari taki yu de na ai ala ten. Meki a dipi lobi di yu abi na ini yu ati gi Gado, yepi yu fu teki a fasti bosroiti fu sori taki Didibri na wan leiman, so taki yu sa prisiri na ati fu Yehovah (Odo 27:11; Yohanes 8:44). Hori na prakseri taki noiti wan sani musu broko wi tru Kresten soifri retifasi, awinsi sortu tesi wi e kisi.