Sma di e tan makandra na ini wan „kondre” di kon reti baka
„Èn foe oenoe sei, den sa kari oenoe den priester foe Jehovah; den dinari foe Gado den sa taki dati oenoe de.” — JESAJA 61:6.
1, 2. (a) San ben de a situwâsi foe den proselietsma na Israèl? (b) Sortoe fasi foe denki den memre foe a „bigi ipi” sori na ini a ten disi?
NA INI owroeten di Israèl ben de getrow, dan den ben de leki wan kotoigi gi a glori foe Jehovah na grontapoe (Jesaja 41:8, 9; 43:10). Foeroe doroseisma ben doe wan sani na tapoe èn den ben kon foe anbegi Jehovah makandra nanga a pipel foe En di a ben froekisi. Foe taki en leti, den ben taigi Israèl a srefi sani di Rut ben taigi Naomi: „Joe pipel sa de mi pipel, èn joe Gado sa de mi Gado” (Rut 1:16). Den ben saka densrefi na ondro den kondisi foe a Wet froebontoe, èn taki den mansma ben moesoe besnij (Exodus 12:43-48). Wan toe foe den oema ben trow nanga Israèlsma. Rakab foe Jerikow nanga Rut a Moabiet-oema ben kon tron granmama foe Jesus Krestes (Mateus 1:5). Den sortoe proselietsma disi ben de wan pisi foe a gemeente foe Israèl. — Deuteronomium 23:7, 8.
2 Neleki den proselietsma na Israèl, a „bigi ipi” foe a ten disi ben taigi a salfoe fikapisi: „Wi wani go nanga oenoe, bikasi wi jere taki Gado de nanga oenoe” (Openbaring 7:9; Sakaria 8:23). Den e erken taki den salfoe kresten disi de a „getrow èn koni srafoe” foe Jehovah, èn den e wroko so krosibei nanga den, taki den salfoewan nanga den „tra skapoe” de „wán ipi, wán herder” (Mateus 24:45-47; Johanes 10:16). San sa pasa nanga a bigi ipi te ala den salfoe brada foe den kisi den pai na hemel? Den no abi foe broko den ede. Na ini a heri pisi ten foe den „lasti dei” disi, Jehovah sreka sani gi a ten dati. — 2 Timoteus 3:1.
Wan „kondre” na jejefasi
3. San na den „njoen hemel” di Petrus ben taki na fesi foe den, èn o ten den ben seti?
3 Na apostel Petrus ben taki na fesi foe a tiri di seti na hemel, foe san den 144.000 salfoe kresten sa de wan pisi. A ben taki: „Wan njoen hemel nanga wan njoen grontapoe de di wi e froewakti akroederi a pramisi foe en, èn na drape regtfardikifasi sa tan” (2 Petrus 3:13). Den „njoen hemel” disi ben seti na ini 1914, di Krestes ben poti leki Kownoe na ini a hemel Kownoekondre. Ma fa a de nanga a „njoen grontapoe”?
4. (a) Sortoe sani ben feni presi na ini 1919, di sma no ben froewakti? (b) San ben de a ’nâsi di ben gebore wantronso’, èn san ben de a ’kondre di ben gebore nanga pen’?
4 Na ini 1919, Jehovah ben tjari a salfoe fikapisi komoto leki srafoe na Babilon a Bigiwan (Openbaring 18:4). A toemoesi kefalek sani disi di ben feni presi, ben de wan sani di den fesiman foe krestenhéit no ben froewakti srefisrefi. Bijbel e taki foe a sani disi: „Soema jere foe so wan sani? Soema ben si den sortoe sani disi? Wan kondre sa gebore nanga pen na ini wán dei? Noso wan nâsi sa gebore wantronso?” (Jesaja 66:8) Di a salfoe gemeente wantronso ben de na fesi foe den nâsi leki wan fri pipel, a ben de troetroe wan nâsi di „gebore wantronso”. Ma san ben de a „kondre”? Na wan fasi, a ben de a srefi leki a kondre foe Israèl foe owroeten, ma na jejefasi. A ben de a kontren foe aktiviteit di gi na a „nâsi” di gebore no so langa ete, wan presi pe den profeititori foe a Paradijs na ini a boekoe Jesaja abi wan kontroe na jejefasi na ini a ten disi. (Jesaja 32:16-20; 35:1-7; teki gersi Hebrewsma 12:12-14.) Awinsi pe wan kresten kan de toe na skinfasi, a de na ini a „kondre” dati.
5. Sortoe prenspari pisi ben kon de na ini 1919? Froeklari dati.
5 San disi ben abi foe doe nanga a „njoen grontapoe” di Petrus ben taki na fesi foe dati? We, a njoen „nâsi” dati, di ben gebore na ini 1919 na ini wan „kondre” di kon reti baka, ben sa gro foe tron wan organisâsi na heri grontapoe, di seti nanga sma di salfoe èn sma di no salfoe èn di e prèise Jehovah. Na organisâsi disi sa pasa Armagedon libilibi go na ini a njoen grontapoe foe Gado. Na a fasi disi wi kan si a njoen nâsi dati leki a prenspari pisi foe a regtfardiki libisma libimakandra, a njoen grontapoe, di sa tan baka te a grontapoe foe Satan kisi pori.a Na ini a pisi ten foe 1935, den salfoewan, leki wan groepoe, ben kon makandra na ini a kondre di kon reti baka. Foe sensi a ten dati, den ben poti krakti na tapoe a tjari kon na wán foe a bigi ipi foe tra skapoe, di abi pikinmoro feifi miljoen sma na ini a ten disi (Openbaring 14:15, 16). A „kondre” abi toemoesi foeroe sma? Nôno, den oekoe foe en kan bradi te so fara leki a de fanowdoe (Jesaja 26:15). Foe troe, a de wan sani di e naki na ati, foe si a pipel foe en e gro ala di a salfoe fikapisi e foeroe a „kondre” nanga „froktoe” — njanjan na jejefasi di gosontoe èn di e gi krakti (Jesaja 27:6). Ma san na a posisi foe den tra skapoe disi, na ini a „kondre” di kon reti baka èn di de foe a pipel foe Gado?
Doroseisma de aktief na ini a „kondre”
6. Fa den doroseisma ben de aktief na ini a „kondre” foe a pipel foe Gado?
6 Neleki fa den proselietsma na a kondre foe Israèl ben saka densrefi na ondro a Wet foe Moses, na so a bigi ipi na ini a ten disi, na ini a „kondre” di kon reti baka, e gi jesi na den komando foe Jehovah. Foe di den kisi leri foe den salfoe brada foe den, meki den e tan farawe foe falsi anbegi dorodoro èn den e si broedoe leki wan santa sani (Tori foe den Apostel 15:19, 20; Galasiasma 5:19, 20; Kolosesma 3:5). Den lobi Jehovah nanga den heri ati, froestan, sili, nanga krakti èn den lobi den sma na den sei leki densrefi (Mateus 22:37; Jakobus 2:8). Den proselietsma ben jepi foe bow a tempel foe Salomo èn den ben jepi foe meki a troe anbegi kon reti baka na Israel foe owroeten(1 Kroniki 22:2; 2 Kroniki 15:8-14; 30:25). Na ini a ten disi, a bigi ipi abi wan prati toe na ini den bow wroko. Foe eksempre, den e jepi foe meki den gemeente nanga kring e gro, èn a no de foe taki, dati den e jepi so srefi na ini den bow projekt, soleki kownoekondre zaal, kongres hal, nanga bijkantoro.
7. San ben pasa baka di Jerusalem ben komoto na katibo, di nofo Leifisma no ben de foe doe diniwroko na a tempel?
7 Na ini 537 bifo Gewoon Teri di Israèl ben drai kon baka foe katibo na Babilon, den ben bigin na wan orga fasi nanga a diniwroko na ini a kontren foe a tempel. Ma den Leifisma di ben drai kon baka, no ben de so foeroe. Foe dati ede den Netinim — freimdesma di ben tan nanga den èn di ben besnij èn di ben asisteri den Leifisma na fesi kaba — ben kisi moro grani na ini a tempel diniwroko. Ma den no ben de a srefi leki den salfoe priester foe Aron.b — Esra 7:24; 8:15-20; Nehemia 3:22-26.
8, 9. Fa den tra skapoe ben teki wan moro bigi pisi foe a santa diniwroko na ini den lasti dei?
8 Den salfoe kresten na ini a ten disi ben waka na baka a srefi model disi. Ala di „a ten foe a kaba” e go moro nanga moro, den fikawan foe den salfoewan kon mendri moro nanga moro na ini a „kondre” foe a pipel foe Gado (Danièl 12:9; Openbaring 12:17). Foe disi ede, a bigi ipi e doe a moro bigi pisi foe a „santa diniwroko” na ini a ten disi (Openbaring 7:15). Foe di den e waka na baka a tiri foe den salfoe brada foe den, den „e òfer wan ofrandi foe prèise na Gado, dati wani taki, den froktoe foe den mofoboeba foe meki a nen foe en bekènti na poebliki”. Den „no e frigiti foe doe boen èn foe prati sani gi tra sma”, foe di den sabi taki „nanga den ofrandi disi Gado e plisi”. — Hebrewsma 13:15, 16.
9 Moro fara, foe di a bigi ipi e kon moro foeroe nanga foeroe hondrodoesoen sma ibri jari, meki a nowtoe e kon moro bigi foe man tiri den. A ben de so fosi taki soso den salfoe kresten ben doe disi. Now foe di a de fanowdoe, meki a tiri foe moro foeroe foe den gemeente, so srefi kring, distrikt, nanga bijkantoro, ben poti na ini na anoe foe den tra skapoe. Na ini 1992 wan toe foe den disi ben kisi a grani foe fisiti den konmakandra foe den komte foe a Tiri Skin, èn den ben asisteri na den takimakandra foe den komte, ma den no ben abi wan prati na ini den bosroiti di den e teki. Ma tokoe den tra skapoe e tan loyaal na den salfoe kompe kresten foe den èn den e feni en wan grani foe horibaka gi den leki a getrow èn koni srafoe foe Jehovah. — Mateus 25:34-40.
„Leki wan granman”
10, 11. Akroederi a model foe wan toe Filistijnsma, fa wan toe fositen feanti foe a pipel foe Gado ben kenki na ati foe den? Nanga sortoe bakapisi?
10 Na ini Sakaria 9:6, 7 den ben taki na fesi kaba foe a fasi fa a getrow èn koni srafoe gebroiki den tra skapoe na ini frantiwortoe posisi. Drape wi e leisi: „Foe troe, mi sa koti a bigimemre foe den Filistijnsma. Èn mi sa poeroe foe en mofo den sani di flaka nanga broedoe èn den tegoe sani foe en mi sa poeroe na mindri den tifi foe en, èn ensrefi sa tan abra troetroe gi wi Gado; èn a moesoe tron leki wan granman na Juda, èn Ekron leki den Jebusietsma.”c Den Filistijnsma ben de troetroe feanti foe a pipel foe Jehovah, soleki fa a de nanga a grontapoe foe Satan na ini a ten disi (1 Johanes 5:19). Neleki fa den Filistijnsma ben kisi pori leki wan pipel te foe kaba, na so a grontapoe disi nanga en relisi, politiek nanga bisnis sistema, sa ondrofeni heri esi na atibron foe Jehovah di sa tjari pori kon. — Openbaring 18:21; 19:19-21.
11 Ma akroederi den wortoe foe Sakaria, dan wan toe foe den Filistijnsma ben kenki na ati foe den, èn disi ben prenki taki wan toe foe den grontapoesma foe a ten disi no ben sa tan na ini wan feantifasi nanga Jehovah. Den ben sa tapoe nanga den relisi afkodrei, nanga den takroe kerki gwenti èn tegoe ofrandi, èn den ben sa kon krin na ini na ai foe Jehovah. Na ini den dei foe wi, wi e feni den „Filistijnsma” disi di kenki den ati, na ini a bigi ipi.
12. Fa „Ekron” kon tron „leki den Jebusietsma” na ini a ten disi?
12 Akroederi a profeititori, a moro bigi Filistijn foto, Ekron, ben sa de „leki den Jebusietsma”. Wan ten den Jebusietsma ben de feanti toe foe Israèl. Jerusalem ben de na ini na anoe foe den te leki David wini Jerusalem. Ma tokoe, soleki fa a sori, wan toe foe den disi di ben pasa den feti nanga Israèl libilibi, ben kon tron proselietsma. Den ben dini leki srafoe na a kondre foe Israèl èn den ben abi a grani srefi foe wroko na a bow foe a tempel (2 Samuèl 5:4-9; 2 Kroniki 8:1-18). Na ini a ten disi, „den Ekronsma” di ben drai foe kon anbegi Jehovah, abi den grani toe foe dini na ini a „kondre” na ondro a tiri foe a getrow èn koni srafoe.
13. Soema ben de den granman na ini a grontapoe foe owroeten?
13 Sakaria e taki dati den Filistijnsma ben sa de leki wan granman na Juda. Te den vertaal a Hebrew wortoe ʼal·luphʹ nanga „granman”, dan a wani taki „fesiman foe wan doesoen” (noso “chiliarch”). A ben de wan hei posisi srefisrefi. A fositen nâsi Edom ben abi kande soso 13 granman (Genesis 36:15-19). A wortoe „granman” no gebroiki foeroetron te den e taki foe Israèl, ma den e gebroiki foeroetron a wortoe „edeman (noso basja) foe wan doesoen”. Di Moses ben kari den man foe a nâsi Israèl di ben teki presi gi Israèl foe kon makandra, a ben kari „den edeman foe den doesoendoesoen foe Israèl”.d Joe ben abi 12 foe den edeman disi, èn soleki fa a sori dan den ben moesoe saka densrefi soso na ondro Moses (Numeri 1:4-16). Na so a ben de toe na a fasi fa a legre ben orga, taki den edeman foe doesoendoesoen ben de den di foe toe na ondro a generaal noso a kownoe. — 2 Samuèl 18:1, 2; 2 Kroniki 25:5.
14. Fa a „Filistijnsma” kon tron leki wan granman na ini a ten disi?
14 Sakaria no ben taki na fesi taki a Filistijnsma di ben abi berow, ben sa de wan granman troetroe na Israèl. Dati no ben sa de joisti, foe di a Filistijnsma no ben gebore leki wan Israèlsma. Ma a ben sa de leki wan granman, foe di a ben sa abi wan makti di joe kan teki gersi nanga di foe wan granman. Èn na so a ben kon de toe. Ala di a fikapisi foe den salfoewan e kon moro mendri na ini nomroe èn foeroe foe den wan di de na libi ete no man doe foeroe moro foe di den kon owroe, dan den tra skapoe di kisi boen leri e jepi den te dati de fanowdoe. Den no wani foe teki a presi foe den salfoe brada foe den nanga tranga. Ma a getrow èn koni srafoe e gi den makti te dati de fanowdoe na ini a „kondre”, so taki na organisâsi foe Gado kan tan go doro na fesi na wan orga fasi. A go di den e go na fesi, de foe si na ini ete wan tra profeititori.
Priester nanga gronman
15. (a) Leki wan kontroe foe Jesaja 61:5, 6, soema na „den priester foe Jehovah”, èn o ten den e dini dorodoro na ini a posisi disi? (b) Soema na den „freimdesma” di e doe a gronwroko foe Israèl, èn san a wroko disi abi na ini, na wan jejefasi?
15 Jesaja 61:5, 6 e taki: „Freimdesma sa tanapoe troetroe èn den sa loekoe den skapoe foe oen pipel, èn den doroseisma sa de oen gronman nanga oen droifi-djariman. Èn foe oenoe sei, den sa kari oenoe den priester foe Jehovah; den dinari foe wi Gado den sa taki dati oenoe de. Den goedoe foe den nâsi oenoe sa njan, èn na ini a glori foe den oenoe sa taki nanga prisiri foe oensrefi.” Na ini a ten disi, „den priester foe Jehovah” na den salfoe kresten. Te foe kaba, den sa dini dorodoro leki „priester foe Jehovah . . . , dinari foe wi Gado” na ini a hemel Kownoekondre (Openbaring 4:9-11). Soema na den „freimdesma” di de frantiwortoe gi a gronwroko? Den na den tra skapoe, di e tan na ini a „kondre” foe na Israèl foe Gado. San na a herderwroko, a gronwroko nanga a wroko na ini a droifi-djari di den kisi foe doe? Na a prenspari jeje fasi, den wroko disi abi foe doe nanga a jepi, a sorgoe èn a tjari di den e tjari sma. — Jesaja 5:7; Mateus 9:37, 38; 1 Korentesma 3:9; 1 Petrus 5:2.
16. Te foe kaba, soema sa doe ala a wroko na ini a „kondre” foe a pipel foe Gado?
16 Nownowde wan pikin nomroe foe Israèlsma na jejefasi de ete na grontapoe foe doe herderwroko, gronwroko nanga wroko na ini a droifi-djari na jejefasi. Te foe kaba, te a heri salfoe gemeente de nanga Krestes, dan ala den wroko disi sa tan gi den tra skapoe. Srefi a tiri na tapoe a „kondre” sa de na ini na anoe foe bekwaam tra skapoe, di den e kari wan granman groepoe na ini a boekoe Esekièl. — Esekièl, kapitel 45, 46.e
Wan „kondre” e hori doro
17. Sortoe sani Jehovah sreka na ini a heri pisi ten foe den lasti dei disi?
17 Ija, a bigi ipi no abi foe frede! Jehovah sreka nofo sani gi den. Wan toemoesi prenspari sani di ben feni presi na grontapoe na ini den lasti dei disi, ben de foe tjari den salfoewan kon na wán èn foe poti a lakstampoe na den tapoe (Openbaring 7:3). Ma na a ten te disi e feni presi, dan Jehovah tjari den tra skapoe kon foe de makandra nanga den foe go na ini wan kondre na jejefasi, di meki kon reti baka. Drape den kisi njanjan na jejefasi èn den kisi leri fa den moesoe libi leki kresten. Boiti dati, den kisi leri na ini den prenspari sani foe santa diniwroko, èn so srefi foe man tiri. Den de Jehovah nanga den salfoe brada foe den tangi srefisrefi gi den sani disi.
18. Na ini sortoe sani di o feni presi, den tra skapoe sa tan loyaal na ini a „kondre” foe Israèl na jejefasi?
18 Te foe kaba, te Gog foe Magog e opo go feti nanga a pipel foe Gado, dan den tra skapoe nanga a salfoe fikapisi sa hori den soifri retifasi na ini „a kondre foe a boitipresi di opo”. Den tra skapoe sa de ete na ini a „kondre” dati, te den sa pasa a pori foe den nâsi libilibi èn sa go na ini a njoen grontapoe foe Gado. Drape den sa pasa a pori foe den nâsi libilibi, èn den sa go na ini a njoen grontapoe foe Gado (Esekièl 38:11; 39:12, 13; Danièl 12:1; Openbaring 7:9, 14). Efoe den e tan go doro na wan getrow fasi, dan noiti den no sa abi foe libi a prisiri presi dati. — Jesaja 11:9.
19, 20. (a) Den sma di e libi na ini a „kondre” sa njan boen foe sortoe toemoesi moro prenspari tiri di sa de na den tapoe na ini a njoen grontapoe? (b) Sortoe sani wi e froewakti nanga faja?
19 Israèl foe owroeten ben de na ondro a tiri foe libisma kownoe èn den ben abi priester di ben de foe a lo foe Leifi. Na ini a njoen grontapoe, kresten sa de na ondro wan toemoesi moro prenspari tiri. Na ondro Jehovah Gado, den sa saka densrefi na ondro a bigi Hei Priester nanga Kownoe, Jesus Krestes, èn na ondro den 144.000 kompe priester èn kownoe — wan toe foe den ben sabi den leki kresten brada nanga sisa foe den na grontapoe (Openbaring 21:1). Getrow sma di e libi na ini a kondre na jejefasi, sa libi na wan grontapoe di kon reti baka na ini wan troetroe paradijs, èn den sa prisiri foe den blesi di e dresi, di sa saka kon nanga jepi foe a Njoen Jerusalem. — Jesaja 32:1; Openbaring 21:2; 22:1, 2.
20 Ala di a bigi hemel wagi foe Jehovah e go na fesi sondro foe stop, foe doe den prakseri foe en, dan wi alamala e loekoe nanga faja froewakti foe doe a toewijzing di wi kisi (Esekièl 1:1-28). Te foe kaba, te den prakseri dati klari kaba, dan prakseri nanga o foeroe prisiri a fesa sa hori foe a santa di Jehovah sa kon santa nanga a wini foe en! Ala mekisani sa singi a kefalek singi di skrifi na Openbaring 5:13: „Gi a Sma di e sidon na tapoe a kownoestoeroe èn gi a Pikin Skapoe, blesi nanga grani nanga glori nanga makti foe têgo!” Awinsi a presi foe wi de na ini hemel noso na grontapoe, a no de so taki wi abi na angri foe de drape foe moksi wi sten nanga a kefalek moi babari foe prèise?
[Foetoewortoe]
a Loekoe „Nieuwe hemelen en een nieuwe aarde”, di a Watchtower Bible and Tract Society of New York, Inc., ben tjari kon na doro na ini 1957, bladzijde 319-320.
b Gi wan moro finifini takimakandra, loekoe na artikel „A seti foe Jehovah, ’den wan di den gi’” na ini A Waktitoren foe 1 april 1992.
c Loekoe Het herstel van het paradijs voor de mensheid — door de Theokratie!, di a Watchtower Bible and Tract Society of New York, Inc., ben tjari kon na doro na ini 1973, bladzijde 264-269.
d A Hebrew wortoe na: raʼ·shehʹ ʼal·phehʹ Yis·ra·ʼelʹ, a vertaal nanga khi·liʹar·khoi Is·ra·elʹ „chiliarch foe Israèl” na ini a Septuaginta.
e Loekoe „De natiën zullen weten dat ik Jehovah ben” — Hoe?, di a Watchtower Bible and Tract Society of New York, Inc., tjari kon na doro na ini 1972, bladzijde 401-407.
Fa joe e piki?
◻ Sortoe „kondre” ben kon reti baka na ini 1919, èn fa a ben foeroe nanga sma di e libi na ini?
◻ Fa den tra skapoe ben kisi moro frantiwortoe na ini a „kondre” foe a pipel foe Gado di kon reti baka?
◻ Na sortoe fasi den memre foe a bigi ipi de „leki a Jebusietsma”? èn „leki wan granman na Juda”?
◻ O langa den getrow tra skapoe sa tan na ini a „kondre”?
[Prenki na tapoe bladzijde 19]
Den disiten Filistijnsma sa de „leki wan granman na Juda”
[Prenki na tapoe bladzijde 20]
Den salfoewan nanga den tra skapoe e dini makandra na ini a kondre na jejefasi