San joe moesoe sabi foe djaroesoefasi

SAN djaroesoefasi wani taki? Na wan tranga firi di kan meki wan sma frede, firi sari, noso atibron. Wi kan djaroesoe te a gersi leki wan sma e doe wan wroko moro boen leki wi. Noso wi kan djaroesoe te sma e prèise wan mati foe wi moro leki wi. Ma, a de ala ten wan fowtoe sani foe djaroesoe?

Sma di abi djaroesoefasi abi a gwenti foe no froetrow den wan di den e si leki sma di man gens den. Kownoe Saul foe owroeten Israèl ben de wan eksempre foe dati. Biginbigin, a ben lobi en fetisani tjariman David èn srefi ben meki en tron fesiman foe a legre (1 Samuèl 16:21; 18:5). Dan wan dei kownoe Saul ben jere den oema e prèise David nanga den wortoe: „Saul naki doesoendoesoen trowe, èn David someni tenti doesoen” (1 Samuèl 18:7). Saul no ben moesoe gi pasi taki disi ben moesoe pori a matifasi foe en nanga David. Ma tokoe, a ben mândi. „Sensi a dei dati Saul ben loekoe David doronomo nanga takroe prakseri.” — 1 Samuèl 18:9.

Wan sma di djaroesoe, kande no e winsi taki ogri pasa nanga wan tra sma. A sma, a kan de wan man noso wan oema, kande e mândi nomo tapoe a fasi fa sani e waka boen nanga wan mati èn e angri foe abi den srefi eigifasi noso a srefi sitûwasi leki a sma dati. Na a tra sei, bigi-ai, moro foeroe na wan takroe fasi foe djaroesoe. Wan sma di abi bigi-ai kan hori sani di boen gi a tra sma na baka tapoe wan kibri fasi, sani di boen gi a sma di e wiki a djaroesoefasi foe en, noso kan winsi taki ogri pasa nanga a sma dati. Son tron, wan sma di abi bigi-ai no man kibri san a e firi. Bigi-ai kan meki a doe ogri nanga a tra sma pe ala sma e si, neleki fa kownoe Saul ben proeberi foe kiri David. Na moro leki wán okasi, Saul ben proeberi foe iti wan lansri foe „spikri David na a skotoe”. — 1 Samuèl 18:11; 19:10.

Kande joe sa piki: ’Ma mi a no wan sma di e djaroesoe.’ A de troe, taki kande djaroesoe no e basi joe libi. Ma tokoe, na wán noso tra fasi, djaroesoefasi abi en krakti na tapoe wi alamala — den eigi djaroesoe firi foe wi èn den di foe trawan. Ala di wi gaw foe si djaroesoefasi na ini trawan, tokoe wi no gaw foe si en na ini wisrefi.

„Wan gwenti foe abi bigi-ai”

A historia foe a sondoefasi foe libisma soleki fa bijbel, a Wortoe foe Gado, e tjari kon na krin, foeroe tron e poti krakti na tapoe den sondoe di abi foe doe nanga bigi-ai. Joe e memre a tori foe Kain nanga Abel? Ala den toe manpikin disi foe Adam nanga Eva ben pristeri ofrandi gi Gado. Abel ben doe dati bikasi a ben de wan man nanga bribi (Hebrewsma 11:4). A ben abi bribi na ini a man di Gado man foe meki En bigi prakseri kon troe di abi foe doe nanga grontapoe (Genesis 1:28; 3:15; Hebrewsma 11:1). So srefi, Abel ben bribi taki Gado ben sa pai den getrow libisma nanga libi na ini a Paradijs di sa kon na grontapoe (Hebrewsma 11:6). Na so wan fasi, Gado ben sori taki a ben prisiri nanga na ofrandi foe Abel. Efoe Kain ben lobi en brada troetroe, dan a ben sa moesoe prisiri taki Gado ben blèsi Abel. Na presi foe dati, Kain „ben kisi bigi atibron”. — Genesis 4:5.

Gado ben gi Kain tranga foe doe san boen, so taki ensrefi ben kan kisi blesi. Baka dati, Gado e warskow: „Efoe joe no e drai joe libi foe go doe san boen, dan leti drape sondoe e loeroe na a dromofo èn en tranga lostoe e soekoe joe; èn joe foe joe sei sa man basi en?” (Genesis 4:7) Na wan sari foe taki dati Kain no ben basi en bita djaroesoe firi. A boeweigi en foe kiri en regtfardiki brada (1 Johannes 3:12). Sensi a ten dati, feti nanga orlokoe teki hondrohondro miljoen sma libi. „Wan toe foe den fondamenti reide foe san ede orlokoe de, kan de na angri foe abi wan moro bigi pisi gron, wan gridi foe abi moro goedoe, wan angri foe abi moro makti, noso wan angri foe abi moro seikerfasi”, The World Book Encyclopedia e taki.

Troe kresten no e teki prati na den grontapoe feti disi (Johannes 17:16). Ma na wan sari sani, taki son tron wanwan kresten e moksi densrefi nanga djoegoedjoegoe èn kese-kese. Efoe tra memre foe a gemeente teki prati toe na ini a djoegoedjoegoe, dan den kesekese disi kan kon tron bigi trobi. „Foe sortoe fonten den orlokoe e komoto èn foe sortoe fonten den feti e komoto di de na oenoe mindri?”, a bijbel skrifiman Jakobus ben aksi en kompe bribiman (Jakobus 4:1). A ben piki na aksi dati foe di a poeroe kon na doro a gridifasi fa den ben feti na baka materia sani èn a ben taki toe: „Oenoe e tan . . . abi bigi-ai”, noso e „djaroesoe” (Jakobus 4:2, foetoewortoe). Ija, materialisme kan tjari bigi-ai kon èn kan meki wi djaroesoe tapoe den wan di sori leki den abi wan moro betre situwâsi leki wi. Foe a reide disi ede, Jakobus ben warskow teige a libisma „gwenti foe abi bigi-ai”. — Jakobus 4:5.

Sortoe winimarki wi kan kisi te wi ondrosoekoe finifini den reide foe san ede wan sma e djaroesoe? We, disi kan jepi wi foe de eerlijk èn foe kweki wan moro betre matifasi nanga trawan. A kan jepi wi so srefi foe man froestan trawan moro boen, foe abi pasensi èn foe gi pardon. A moro boen sani, na taki a e poti krakti na tapoe o tranga wi libisma abi den sani fanowdoe di Gado sreka tapoe wan lobi fasi, foe froeloesoe wi foe den sondoe libisma fasi. — Romesma 7:24, 25.

Wan grontapoe sondro den sondoe djaroesoefasi

A fasi fa libisma e si sani, dan wan grontapoe sondro sondoe djaroesoefasi e sori leki a no kan. A skrifiman Rom Landau ben erken: „Den foeroe koni di sma ben kisi foe den foeroe geslakti nanga ala den sani di filosofiaman . . . nanga den psycholoog taki foe a tori, no e jepi a sma di e dede nanga djaroesoe. . . . Sortoe datra oiti ben man dresi wan sma di e djaroesoe?”

Ma a wortoe foe Gado e gi wi a howpoe foe kan kisi volmaakti libi na ini a njoen grontapoe pe no wan sma oiti sa kisi problema baka nanga ogri djaroesoefasi noso bigi-ai. Moro fara, sma di e sori den sortoe ogri eigifasi disi no sa man broko a vrede moro foe a njoen grontapoe dati. — Galasiasma 5:19-21; 2 Petrus 3:13.

Ma tokoe, a no ala djaroesoefasi no boen. Foe taki en leti, bijbel e taki dati Jehovah „na wan djaroesoe Gado” (Exodus 34:14). San dati wani taki? Èn san bijbel e taki foe djaroesoefasi di de joisti? So srefi, fa wan sma kan basi a djaroesoefasi foe en di no de joisti? Loekoe den artikel di e kon now nanga den toe lasti studie-artikel.