Lobi e wini a djaroesoe di no boen
„Lobi no e djaroesoe.” — 1 KORENTESMA 13:4.
1, 2. (a) San Jesus ben taigi den disipel foe en foe lobi? (b) A kan foe lobi trawan èn foe djaroesoe na a srefi ten, èn foe san ede joe e piki so?
LOBI na wan marki foe kon sabi a troe krestendom. „Nanga disi ala sma sa sabi taki oenoe na mi disipel, efoe oenoe abi lobi na oen mindri”, Jesus Krestes ben taki (Johanes 13:35). Nanga jepi foe Gado en santa jeje, na apostel Paulus ben froeklari fa lobi ben moesoe abi krakti na tapoe a matifasi na mindri kresten. Makandra nanga tra sani a ben skrifi: „Lobi no e djaroesoe.” — 1 Korentesma 13:4.
2 Di Paulus ben skrifi den wortoe dati, dan a ben taki foe a djaroesoefasi di no boen. Noso a no ben kan taigi a srefi gemeente dati: „Mi e djaroesoe na oen tapoe nanga wan djaroesoe gi Gado” (2 Korentesma 11:2). A djaroesoe di a ben „djaroesoe gi Gado” ben opo kon bikasi foe den man di ben pori tra sma na ini a gemeente. Disi ben boeweigi Paulus foe skrifi den kresten foe Korente wan di foe toe brifi di skrifi nanga jepi foe Gado en santa jeje èn di abi foeroe rai na ini di gi nanga lobi. — 2 Korentesma 11:3-5.
Djaroesoe na mindri kresten
3. Fa wan problema di ben abi foe doe nanga djaroesoefasi ben kon de na mindri den kresten foe Korente?
3 Na ini a fosi brifi foe en gi den Korentesma, Paulus ben moesoe loesoe wan problema di ben tapoe den njoen kresten disi foe man feni en nanga makandra. Den ben hei wan toe man, èn „ibriwan foe den persoonlijk ben abi bigifasi gi a boen foe a wan sma èn teige a tra sma”. Disi ben meki prati ben kon na ini a gemeente, èn difrenti sma ben e taki: „Mi na foe Paulus”, „Ma mi na foe Apolos”, „Ma mi na foe Sefas” (1 Korentesma 1:12; 4:6). Na ondro a tiri foe a santa jeje, na apostel Paulus ben man foe doro na a roetoe foe a problema. Den Korentesma ben handri leki sma di e prakseri sani na skinfasi nomo, no leki „sma di abi jejefasi”. Foe dati ede Paulus ben skrifi: „Oenoe e prakseri na skinfasi ete. Foe di djaroesoe nanga strei de na oen mindri, dan a no de so taki oenoe e prakseri na skinfasi èn oenoe e waka na a fasi fa libisma e doe?” — 1 Korentesma 3:1-3.
4. Sortoe agersitori Paulus ben gebroiki foe jepi den brada foe en foe denki na a joistifasi foe makandra, èn sortoe lès wi kan leri foe disi?
4 Paulus ben jepi den Korentesma foe froestan a joisti fasi foe si den talenti nanga den bekwaamfasi foe difrenti sma na ini a gemeente. A ben aksi: „Soema e meki oenoe difrenti foe wan trawan? Ija, san oenoe abi di oenoe no ben kisi? Efoe oenoe kisi en now troetroe, foe san ede oenoe e skepi neleki oenoe no ben kisi en?” (1 Korentesma 4:7) Na ini 1 Korentesma kapitel 12, Paulus ben froeklari taki den wan di ben de wan pisi foe a gemeente ben de leki den difrenti memre foe wan libisma skin, soleki na anoe, na ai, nanga a jesi. A ben sori taki Gado ben meki den memre foe a skin na so wan fasi taki den e broko den ede nanga makandra. Paulus ben skrifi toe: „Efoe wan memre e kisi glori, dan ala den tra memre e prisiri nanga en” (1 Korentesma 12:26). Ala den foetoeboi foe Gado na ini a ten disi moesoe fiti a gronprakseri disi na ini den matifasi nanga makandra. Na presi foe djaroesoe tapoe wan tra sma bikasi foe wan toewijzing di a abi noso foe den sani di a man doe na ini a diniwroko foe Gado, dan wi moesoe prisiri nanga a sma dati.
5. San Jakobus 4:5 e tjari kon na krin, èn fa den Boekoe foe bijbel e poti krakti na tapoe a troe di den wortoe disi troe?
5 Wi moesoe erken, taki a moro makriki foe taki leki foe doe. A bijbel skrifiman Jakobus e memre wi taki „wan djaroesoe firi” de na ini ibri sondoe libisma (Jakobus 4:5). A dede foe a fosi libisma ben kon foe di Kain ben gi pasi na a djaroesoefasi disi di no boen. Den Filistijnsma ben froefolgoe Isak bikasi den ben djaroesoe tapoe a goedoe foe en di ben kon bigi moro nanga moro. Rakèl ben djaroesoe tapoe a kisi di en sisa ben man kisi pikin. Den manpikin foe Jakob ben djaroesoe tapoe a moro jongoe brada foe den, Josef, bikasi foe a boen-ati di Josef ben kisi. Soleki fa a sori, dan Miriam ben djaroesoe tapoe en brada wefi di no ben de wan Israèlsma. Foe di den ben djaroesoe, meki Korak, Datan, nanga Abiram ben meki takroe plan makandra teige Moses nanga Aron. Kownoe Saul ben kon djaroesoe tapoe den boen bakapisi di David ben abi na sroedati sei. A de seiker taki djaroesoe ben de wan reide toe di ben meki taki ibri tron baka den disipel foe Jesus ben haritaki soema foe den ben de a moro bigiwan. A de so, taki no wan onvolmaakti libisma fri krinkrin foe a sondoe „djaroesoe firi”. — Genesis 4:4-8; 26:14; 30:1; 37:11; Numeri 12:1, 2; 16:1-3; Psalm 106:16; 1 Samuèl 18:7-9; Mateus 20:21, 24; Markus 9:33, 34; Lukas 22:24.
Na ini a gemeente
6. Fa owroeman kan basi a firi di den abi foe abi bigi-ai?
6 Ala kresten moesoe kibri densrefi teige bigi-ai èn teige a djaroesoefasi di no boen. Disi de so toe gi den skin foe owroeman di poti na wroko foe sorgoe gi den gemeente foe a pipel foe Gado. Efoe wan owroeman abi sakafasi, a no sa soekoe grani gi ensrefi foe di a e proeberi foe de moro boen leki den trawan. Na a tra sei, efoe wan owroeman abi heri boen eigifasi leki wan sma di sabi orga sani boen noso leki wan sma di de wan boen poebliki takiman, dan den tra owroeman sa prisiri foe disi èn den sa si en leki wan blesi gi a gemeente (Romesma 12:15, 16). Kande wan brada e meki boen go-na-fesi èn e sori taki a e poti den froktoe foe a jeje foe Gado na ini en libi. Te den owroeman e loekoe den bekwaamfasi foe en, dan den moesoe loekoe boen foe no meki den pikin fowtoe sani foe en kon tron wan bigi sani, foe kan taki dati den no moesoe rikomanderi a brada leki wan dinari na ini a diniwroko noso leki wan owroeman. Dati ben sa sori taki den no abi lobi èn taki den no reidelek.
7. Sortoe problema kan kon te wan kresten kisi wan toewijzing na ini a theokrasia?
7 Efoe wan sma kisi wan toewijzing na ini a theokrasia noso wan blesi na jejefasi, dan tra sma na ini a gemeente moesoe loekoe boen foe no kisi bigi-ai. Foe eksempre, kande den e gebroiki wan bekwaam sisa moro foeroe leki trawan foe gi demonstrâsi na den gemeente konmakandra. Disi kan meki wan toe sisa e djaroesoe. Kande wan srefi sortoe problema ben de na mindri Efowdia nanga Sentike foe a gemeente foe Filipi. A kan taki den sortoe oema disi foe a ten disi abi switi deki-ati fanowdoe foe den owroeman, foe abi sakafasi èn foe abi „a srefi denki na ini Masra”. — Filipisma 2:2, 3; 4:2, 3.
8. Djaroesoefasi kan abi sortoe sondoe leki bakapisi?
8 A kan de taki wan kresten sabi foe den fositen fowtoe foe wan sma di blesi now nanga grani na ini a gemeente (Jakobus 3:2). Foe djaroesoefasi ede, a kan abi a firi foe taki nanga tra sma foe den fowtoe disi èn foe kroetoe a toewijzing di a sma disi kisi na ini a gemeente. Disi ben sa de kontrari lobi di „e tapoe foeroe sondoe” (1 Petrus 4:8). A taki di wan sma e taki na wan djaroesoe fasi, kan broko a vrede foe a gemeente. „Efoe oenoe abi bita-ati djaroesoe nanga strei na ini oen ati”, na disipel Jakobus ben warskow, „no skepi èn no lei teige a waarheid. Disi a no a koni di e kon foe tapoesei, ma a de foe grontapoe, a de foe meti, a de foe den ogri jeje”. — Jakobus 3:14, 15.
Na ini joe osofamiri
9. Fa den trowpaar kan basi den djaroesoe firi?
9 Foeroe trowlibi e broko bikasi foe a djaroesoefasi di no boen. A no de wan lobi fasi efoe wan sma no e froetrow en trowpatna (1 Korentesma 13:7). Na a tra sei, wan patna kande no e froestan den djaroesoe firi di a trawan abi. Foe eksempre, wan wefi kan djaroesoe bikasi foe a poti di en masra e poti prakseri na tapoe wan tra oema. Noso wan masra kan djaroesoe foe a ten di en wefi e gi na ini a sorgoe di a e sorgoe wan famiri di de na ini nowtoe. Foe di den e firi sjen foe den sortoe firi disi, meki kande den trowpatna no e taki noti èn den e sori a lasi-ati foe den na fasi di e meki a problema moro moeilek. Na presi foe dati, wan trowpatna di djaroesoe, moesoe taki nanga a trawan èn a moesoe taki eerlijk foe a fasi fa a e firi. A tra patna foe en sei, moesoe sori taki a e froestan en, èn a moesoe gi en a djaranti taki a lobi en (Efeisesma 5:28, 29). Den ala toe kan kowroe den djaroesoe firi te den e tan farawe foe situwâsi di e meki djaroesoe opo kon. Son tron wan kresten owroeman kande moesoe jepi en wefi foe froestan taki a e poti pikinso prakseri na tapoe tra oema na wan joisti fasi, so taki a kan doe en frantiwortoe leki wan herder foe na ipi foe Jehovah (Jesaja 32:2). A no de foe taki, dati wan owroeman moesoe loekoe boen foe no gi no wan reti reide foe meki a wefi firi djaroesoe. Disi e aksi balansifasi, foe de seiker taki a e gebroiki ten foe tranga en eigi trowlibi. — 1 Timoteus 3:5; 5:1, 2.
10. Fa papa nanga mama kan jepi den pikin foe den foe kakafoetoe gi djaroesoe firi?
10 Papa nanga mama moesoe jepi den pikin foe den toe foe froestan a djaroesoe di no boen. Foeroetron pikin e go na ini hebi haritaki di e tron feti. Foeroetron a roetoe foe disi na djaroesoe. Bikasi ibri pikin abi spesroetoe sani fanowdoe, meki sma moesoe handri aparti nanga ibri wan foe den. Boiti dati, den pikin moesoe froestan taki ibri wan foe den abi difrenti boen eigifasi nanga swaki eigifasi. Efoe ala ten wan pikin e kisi a deki-ati foe doe a srefi leki wan trawan, dan disi kan meki bigi-ai kon na ini a wan pikin èn bigifasi na ini a tra pikin. So boen, papa nanga mama moesoe leri den pikin foe den foe marki den go-na-fesi foe di den e loekoe den eksempre na ini Gado Wortoe, èn no foe strei nanga makandra. Bijbel e taki: „No meki wi tron sma di e prakseri densrefi nomo, di e soetoe faja gi strei nanga makandra, di abi bigi-ai tapoe makandra.” Na presi foe dati, „meki ibri sma sori san na en eigi wroko, èn dan a sa abi wan reide foe prisiri foe ensrefi wawan, èn no te a teki ensrefi gersi nanga trawan” (Galasiasma 5:26; 6:4). San de moro prenspari, na taki kresten papa nanga mama moesoe jepi den pikin foe den nanga jepi foe wan doronomo bijbelstudie, èn den moesoe poti krakti na tapoe den boen eksempre nanga den takroe eksempre di de na ini Gado Wortoe. — 2 Timoteus 3:15.
Eksempre foe dwengi a djaroesoefasi
11. Fa Moses ben de wan boen eksempre na ini a fasi fa a ben handri nanga djaroesoefasi?
11 Heri tra fasi leki den tiriman foe a grontapoe disi di gridi foe abi makti, „Moses ben de a moro safri-ati man di ben de na grontapoe” (Numeri 12:3). Di a fesiman-wroko na tapoe den Israèlsma ben kon hebi toemoesi gi Moses foe tjari dati en wawan, dan Jehovah ben meki En jeje wroko na tapoe 70 tra Israèlsma, èn a ben gi den krakti foe jepi Moses. Di toe foe den man disi ben bigin doe leki profeiti, dan Josua ben feni taki na wan fowtoe fasi den ben swaki a fesiman-wroko foe Moses. Josua ben wani foe tapoe den man, ma nanga sakafasi Moses ben taki: „Joe e djaroesoe gi mi? Nôno, mi winsi taki ala pipel foe Jehovah ben de profeiti, bikasi Jehovah ben sa poti en jeje na den tapoe!” (Numeri 11:29) Ija, Moses ben breiti di tra sma ben kisi grani foe doe diniwroko. A no ben djaroesoe foe kisi glori gi ensrefi.
12. San ben meki Jonatan ben man foe wai pasi gi djaroesoe firi?
12 Wan heri boen eksempre foe a fasi fa lobi e wini a djaroesoe firi di ben kan de, na a eksempre foe Jonatan, a manpikin foe Saul, a kownoe foe Israèl. Jonatan ben de a tra sma na ini a lin di ben o go sidon na tapoe a kownoestoeroe foe en papa, ma Jehovah ben froekisi David, a manpikin foe Isai foe tron a tra kownoe. Foeroe sma di ben o de na ini a situwâsi foe Jonatan ben sa djaroesoe tapoe David, foe di den ben sa si en leki wan feanti. Ma a lobi di Jonatan ben abi gi David ben sorgoe taki so wan firi foe djaroesoe no wini en noiti. Di David ben jere foe a dede foe Jonatan, a ben kan taki: „Mi e sari foe joe, mi brada Jonatan, joe ben de wan prisiri gi mi srefisrefi. Joe lobi ben de wan moro boen sani gi mi leki a lobi foe oemasma.” — 2 Samuèl 1:26.
Den moro boen eksempre
13. Soema na a moro boen eksempre na ini na afersi foe djaroesoefasi, èn foe san ede?
13 Jehovah Gado na a moro boen eksempre foe wan sma di man dwengi ensrefi, srefi ini a sori foe djaroesoefasi di boen. A man dwengi den sortoe firi disi heri boen. Ibri fasi fa Gado e sori a djaroesoe di a djaroesoe na wan kraktifasi, de ala ten akroederi a lobi foe Gado, a retifasi foe en, nanga a koni foe en. — Jesaja 42:13, 14.
14. Sortoe eksempre Jesus ben poti di de heri tra fasi leki di foe Satan?
14 A di foe toe heri boen eksempre foe wan sma di kan dwengi ensrefi na ini a sori foe den firi foe djaroesoefasi, na a lobi Manpikin foe Gado, Jesus Krestes. „Ala di a ben abi a fasi foe Gado”, tokoe Jesus „no ben prakseri foe teki sani nanga tranga, dati wani taki, foe de leki Gado” (Filipisma 2:6). Dati de krinkrin kontrari a pasi foe Satan, na engel di ben wani abi bigi nen gi ensrefi, di ben kon tron Satan Didibri! Neleki fa a ben de nanga „a kownoe foe Babilon”, na so Satan ben angri na wan djaroesoefasi foe „de leki a Moro Heiwan” foe di a ben poti ensrefi leki wan gado di e strei teige Jehovah (Jesaja 14:4, 14; 2 Korentesma 4:4). Satan ben proeberi srefi foe meki Jesus „fadon na gron foe anbegi” en (Mateus 4:9). Ma no wan sani ben kan poeroe Jesus foe a pasi di a ben waka nanga sakafasi, foe saka ensrefi na ondro a soevereiniteit foe Jehovah. Heri tra fasi leki Satan, Jesus „ben libi en glori èn ben teki a skin foe wan srafoe èn a ben tron leki libisma. Moro leki dati, di a ben de na ini a fasi foe libisma, a ben saka ensrefi èn a ben gi jesi te na dede, ija, a dede na wan pina-oedoe”. Jesus ben hei a reti di en Tata abi foe tiri, foe di a ben weigri foe teki a bigifasi nanga a djaroesoefasi foe Satan krinkrin. Foe a getrowfasi foe en ede, meki „Gado hei en na wan hei posisi èn nanga boenfasi a gi en wan nen di hei moro ibri tra nen, so taki na ini a nen foe Jesus, ibri kindi ben sa boigi, foe den wan na ini hemel èn na grontapoe èn na ondro grontapoe, èn ibri tongo moesoe erken taki Jesus Krestes na Masra gi a glori foe Gado, a Tata”. — Filipisma 2:7-11.
Dwengi joe djaroesoefasi
15. Foe san ede wi moesoe doe moeiti foe dwengi djaroesoe firi?
15 Tra fasi leki Gado nanga Krestes, kresten de onvolmaakti. Foe di den abi sondoe, meki son tron den e doe sani foe fowtoe djaroesoefasi ede. Na presi foe meki djaroesoefasi poesoe wi foe kroetoekroetoe wan kompe bribiman foe wan pikin fowtoe noso wan sani di wi e denki taki a fowtoe, a de prenspari taki wi e prakseri dipi foe den wortoe disi di skrifi nanga jepi foe Gado en santa jeje: „No kon toemoesi regtfardiki èn no sori foe de toemoesi koni. Foe san ede joe sa tjari pori kon na tapoe joesrefi?” — Preikiman 7:16.
16. Sortoe boen rai na ini a tori foe djaroesoefasi ben gi na ini wan fosi eksemplaar foe a tijdschrift disi?
16 The Watch Tower foe 15 maart 1911 di ben taki foe djaroesoefasi, ben warskow: „Ala di wi moesoe de fajafaja, noso djaroesoe srefisrefi gi a prakseri foe Masra, tokoe wi moesoe hori boen na prakseri taki a swakifasi foe wan tra kresten a no wan sani di no wan tra sma moesoe abi foe doe nanga dati; èn wi moesoe loekoe efoe wi no de ’sma di e boemoei na ini tra sma afersi’. Dan wi moesoe loekoe toe efoe a de wan joisti sani di den owroeman moesoe handri nanga dati noso efoe a de so taki a de a plekti foe wi foe go na den owroeman. Wi alamala moesoe abi foeroe djaroesoefasi gi a prakseri foe Masra nanga gi en wroko, ma wi moesoe loekoe heri boen taki a no de bita-ati djaroesoe . . . nanga tra wortoe, wi moesoe loekoe boen taki a no de a djaroesoe tapoe wan tra sma, ma a djaroesoe gi a boen foe a tra sma èn foe sani waka boen nanga en.” — 1 Petrus 4:15.
17. Fa wi kan wai pasi gi a sondoe di wi e doe foe djaroesoe ede?
17 Fa wi leki kresten kan wai pasi gi bigifasi, djaroesoefasi, nanga bigi-ai? A loesoe na foe gi pasi meki a santa jeje foe Gado lon na wan fri fasi na ini wi libi. Foe eksempre, wi moesoe begi foe kisi a santa jeje foe Gado èn foe kisi jepi foe sori den boen froktoe foe en (Lukas 11:13). Wi moesoe fisiti den kresten konmakandra, di e bigin nanga begi èn di abi a jeje foe Gado nanga a blesi foe en na tapoe den. Moro fara, wi moesoe studeri bijbel, di skrifi nanga jepi foe Gado en santa jeje (2 Timoteus 3:16). Èn wi moesoe teki prati na ini a Kownoekondre preikiwroko di e doe nanga a krakti foe a santa jeje foe Jehovah (Tori foe den Apostel 1:8). A jepi di wi e jepi kompe kresten di ben kisi kwinsi foe wan takroe ondrofeni ede, na wan tra fasi foe saka wisrefi na ondro a boen krakti foe a jeje foe Gado (Jesaja 57:15; 1 Johanes 3:15-17). Te wi e doe ala den kresten plekti disi nanga faja, dan dati sa jepi foe kibri wi foe doe sondoe sani foe djaroesoefasi, bika a Wortoe foe Gado e taki: „Tan waka nanga jeje, èn joe no sa doe no wan lostoe foe a skin srefisrefi.” — Galasiasma 5:16.
18. Foe san ede wi no abi foe feti ala ten nanga den djaroesoe firi di no boen?
18 Den e kari lobi leki a fosiwan foe den froktoe foe a santa jeje foe Gado (Galasiasma 5:22, 23). Te wi e sori lobi, dan dati sa jepi wi foe dwengi den sondoe firi foe wi na ini a ten disi. Ma fa a de nanga a ten di e kon? Miljoenmiljoen foe den foetoeboi foe Jehovah abi a howpoe foe libi na ini a Paradijs na grontapoe di e kon, pe den kan froewakti foe tron volmaakti libisma. Na ini a njoen grontapoe dati lobi sa de na ala sei, èn no wan sma sa fadon gi den fowtoe firi foe djaroesoefasi, bikasi „a mekisani srefi sa kon fri foe a katibo foe pori èn sa abi glori fri foe den pikin foe Gado”. — Romesma 8:21.
Penti foe prakseri dipi foe den
◻ Sortoe agersitori Paulus ben gebroiki foe jepi teige djaroesoefasi?
◻ Fa djaroesoefasi kan broko a vrede foe a gemeente?
◻ Fa papa nanga mama kan leri den pikin foe den foe kakafoetoe gi djaroesoefasi?
◻ Fa wi kan wai pasi gi a sondoe di wi e doe foe djaroesoe ede?
[Prenki na tapoe bladzijde 27]
No meki djaroesoefasi broko a vrede foe a gemeente
[Prenki na tapoe bladzijde 28]
Papa nanga mama kan leri den pikin foe den foe kakafoetoe gi djaroesoe firi