Kownoekondre preikiman e froeteri
Troe kresten sa kisi froefolgoe
SENSI den dei foe Abel, foeroe foe den foetoeboi foe Jehovah ondrofeni froefolgoe foe relisi ede (Lukas 11:49-51). Èn dati no e froewondroe wi, bikasi bijbel e warskow taki „ala sma di wani libi nanga a gi di a e gi ensrefi na ini a dini foe Gado na ini wánfasi nanga Krestes Jesus, sa kisi froefolgoe toe”! (2 Timoteus 3:12) Foe dati ede, na ini a ten disi na ini moro leki 25 kondre, a wroko foe den Kotoigi foe Jehovah skotoe èn den e ondrofeni froefolgoe. Na tra kondre, ala di a wet e erken den Kotoigi, den e ondrofeni bita-ati gens — sontron nanga ogri-ati — foe fanatieksma foe relisi.
Na wan kondre pe a wroko foe den Kotoigi foe Jehovah no skotoe wawan, ma pe den e kisi froefolgoe toe foe relisisma, moro leki 12.000 preikiman foe a boen njoensoe e tan wroko fajafaja èn den e studeri bijbel nanga moro leki 15.000 sma. A no de foe taki dati den e doe a preikiwroko foe den nanga koni. Moro foeroe foe den kresten konmakandra e hori na ini sma oso, èn den e loekoe boen te den e kari sma di abi belangstelling foe kon na den sortoe konmakandra disi.
No so langa pasa, lanti teki wan moro safoe fasi fa den e denki foe den Kotoigi, èn den Kotoigi e doe foeroe foe a wroko foe den sondro taki sma e kon nanga feantifasi na ini a wroko foe den. Ma difrenti relisi groepoe gebroiki a makti foe den foe soetoe faja foe meki problema kon.
Na wan foto, wan groepoe foe 200 fanatieksma foe relisi di ben atibron, ben waka go na wan oso pe so wan 50 Kotoigi foe Jehovah ben hori wan gemeente konmakandra. Wan toe sma foe a groepoe ben tjari ston èn den ben bari relisi wortoe foe feti. A ben de krin taki den ben abi na prakseri foe ròs den Kotoigi èn foe broko na oso. Soleki fa a sori, dan den relisi fesiman ben loekoe den konmakandra wan pisi ten kaba, èn den ben wakti a joisti momenti foe ròs den. Na tapoe a momenti di a groepoe ben wani foe go na ini na oso, dan 15 skowtoe ben doro èn den ben komanderi a groepoe foe broko gowe. Disi ben froewondroe den Kotoigi, foe di no wan foe den ben abi na okasi foe kari skowtoe.
Ma na tra okasi den gensman ben abi moro boen bakapisi. Den ben tjari difrenti Kotoigi go na kroetoe èn den ben seni den Kotoigi go na strafoe-oso. Wan kroetoe afersi ben tan wan toe jari, èn soleki fa a sori, dan den froefolgoeman no ben abi belangstelling moro gi na afersi. Ma foe den tiriman foe kerki ede, den ben tjari na afersi go baka na kroetoe, èn den ben seni a Kotoigi go na strafoe-oso.
Na ini wan tra presi, wan groepoe Kotoigi ben kon makandra na ini wan oso foe wan sma foe memre na Avondmaal foe Masra. Moro lati a neti dati, wan toe skowtoe ben teki na ososma nanga na owroeman di ben hori a konmakandra foe go sroto den. Den ben fon den serjoesoe na a lontoe-oso. Wan toe joeroe langa den ben poti aksi gi den na wan ogri fasi. Den ben meshandri wán foe den Kotoigi toe, di den ben doekroen en na ini wan peti nanga kowroe watra.
Foe san ede den skowtoe ben ròs den Kotoigi foe Jehovah? Agen wan groepoe fanatieksma foe relisi, nanga jepi foe den tiriman foe kerki ben de na baka a sani disi di den skowtoe ben doe. Bakaten na edeman foe den skowtoe ben tjari kon na krin taki a teki di den ben teki den foe go sroto ben doe sondro taki a ben gi den skowtoe primisi foe dati. A ben aksi pardon foe disi, èn den strafoe den sma di ben de frantiwortoe gi den fonfon di den Kotoigi ben kisi.
Na heri grontapoe Jehovah Kotoigi e tan preiki a boen njoensoe foe Gado Kownoekondre awinsi den e kisi ogri-ati gens. Den e waka na baka a rai di Jesus ben gi: „Loekoe! Mi e seni oenoe leki skapoe na mindri foe wolfoe; sori foe dati ede foe de koni neleki sneki èn tokoe sondro fowtoe neleki doifi.” — Mateus 10:16.
[Prenki na tapoe bladzijde 31]
Abel ben de a fosi sma di ben kisi froefolgoe