Foe san ede wi moesoe frede a troe Gado nownow?
„Frede a troe Gado èn ondrow en gebod. Bika disi na a heri froeplekti foe libisma.” — PREIKIMAN 12:13.
1, 2. Foe san ede a e fiti foe frede Gado na wan joisti fasi?
WAN GOSONTOE nanga lespeki frede gi Gado, boen gi libisma. Ija, ala di foeroe frede di libisma abi e broeja den na emotioneelsei, èn so srefi a no boen gi a gosontoe, tokoe a boen gi wi foe frede Jehovah Gado. — Psalm 112:1; Preikiman 8:12.
2 A Mekiman sabi taki a de so. Foe di a lobi en mekisani, a e komanderi ala sma foe frede en èn foe anbegi en. Wi e leisi: „Mi ben si wan tra engel e frei na mindri foe hemel, èn a ben abi têgo boen njoensoe foe meki dati bekènti leki prisiri njoensoe gi den sma di e libi na grontapoe, èn gi ibri nâsi nanga lo nanga tongo nanga pipel, èn a ben taki nanga wan tranga sten: ’Frede Gado èn gi en glori, bika a kroetoe dei foe en doro, èn foe dati ede anbegi a Sma di ben meki hemel nanga grontapoe.’” — Openbaring 14:6, 7.
3. San a Mekiman doe gi den fosi papa nanga mama foe wi?
3 Troetroe, wi no moesoe doe neleki wi no sabi a Mekiman foe ala sani, a Fonten foe libi, foe di en abi wi nanga a planeet disi (Psalm 24:1). Di a ben sori en bigi lobi gi wi, Jehovah ben gi den pikin foe en na grontapoe libi èn ben sorgoe taki den abi wan toemoesi moi presi foe libi na ini — wan moi paradijs. Tokoe, a moi presenti disi no ben gi sondro kondisi. Te joe loekoe en boen, dan den ben kisi a frantiwortoe foe sorgoe gi grontapoe. Den fosi papa nanga mama foe wi ben moesoe sorgoe gi a tanpresi foe den èn den ben moesoe meki en kon moro bigi, te leki den ben foeroe heri grontapoe nanga pikin di den ben sa kisi èn ben poti ala sani na ondro den tiri. Den ben abi a grani nanga a frantiwortoe tapoe den meti, den fowroe, nanga den fisi — tapoe ala tra libi mekisani, di ben sa tan na grontapoe nanga den èn den bakapikin foe den. Libisma ben sa moesoe gi frantiwortoe foe a bigi grani disi.
4. San libisma doe nanga a mekisani foe Gado?
4 Ala di a bigin ben de toemoesi moi, tokoe loekoe fa libisma doti a moi tanpresi foe den na grontapoe! Sondro foe sori lespeki srefisrefi gi Gado leki eiginari foe a warti sani disi, libisma ben doti grontapoe. A pori foe grontapoe doro so fara taki a e meki a libi foe moro nanga moro sortoe meti, fowroe nanga fisi kon na ini kefar. A lobi nanga regtfardiki Gado foe wi no sa meki disi go doro sondro foe a doe wan sani. A pori di sma e pori grontapoe e meki taki den sa moesoe gi frantiwortoe foe dati, wan sani di e gi foeroe sma reide foe frede. Na a tra sei, gi den wan di e froetrow tapoe Gado na wan lespeki fasi, a de wan trowstoe foe sabi san sa pasa. Jehovah sa aksi frantiwortoe èn grontapoe sa meki kon boen baka. Disi na troetroe prisiri njoensoe gi ala den oprègtisma foe grontapoe.
5, 6. Fa Jehovah sa handri tapoe san libisma doe nanga En mekisani?
5 Nanga jepi foe san, Gado sa tjari a kroetoe foe en kon? Nanga jepi foe Jesus Krestes, di de leki Kownoe foe a hemel Kownoekondre foe Gado now. Nanga jepi foe a hemel Manpikin foe en, Jehovah sa tjari wan kaba kon na a doti sistema foe now di e opo ensrefi kontrari Gado (2 Tesalonikasma 1:6-9; Openbaring 19:11). Na tapoe a fasi disi a sa tjari froelekti kon gi den wan di e frede en èn na a srefi ten, meki a tanpresi foe wi na grontapoe tan èn kisi froeloesoe.
6 Fa disi sa pasa? Bijbel e froeteri wi foe wan bigi banawtoe di e kon èn di sa abi en heimarki na ini a feti foe Armagedon (Openbaring 7:14; 16:16). Disi sa de a kroetoe foe Gado teige a doti sistema foe sani disi nanga den sma di e doti en. Sma sa tan na libi? Ija! A no den sma di abi wan takroe frede di no gosontoe gi Gado, ma den wan di abi wan dipi lespeki frede gi En. Den sa kisi froeloesoe. — Odo 2:21, 22.
Wan demonstrâsi foe makti di e meki sma froewondroe
7. Foe san ede Gado ben boemoei foe jepi Israèl na ini den dei foe Moses?
7 A sani disi di Jehovah Gado sa doe èn di e naki sma ati, ben prenki na fesi nanga wan sani di a ben doe gi den anbegiman foe en so wan 1500 jari bifo wi Gewoon Teri. A bigi sroedatimakti foe Egipti ben meki den wrokoman foe Israèl, di ben de freimdesma na ini a kondre foe Egypti, tron srafoe èn ben proeberi wan sortoe fasi foe kiri a heri ras, di a tiriman foe den, Farao, ben komanderi foe kiri ala den manpikin foe den Israèlsma, di ben de watrapikin. A wini di Gado ben wini Egipti ben de foe tjari froeloesoe kon gi Israèl foe a politiek sistema dati di ben kwinsi den, ija, foe fri den foe wan nâsi di ben pori nanga na anbegi foe foeroe gado.
8, 9. Fa Moses nanga den Israèlsma ben handri tapoe a jepi foe Gado?
8 Exodus kapitel 15 e froeteri fa Israèl ben handri tapoe a kisi di den ben kisi froeloesoe foe Egipti. Te wi e ondrosoekoe a tori disi, dan a sa jepi wi foe froestan fa krestensma kan kisi froeloesoe foe a sistema foe noja, di pori na skinsei èn na jejesei. Meki wi loekoe Exodus kapitel 15, èn poti prakseri na tapoe den vers di poeroe na ini, foe si foe san ede wi moesoe froekisi foe frede Jehovah, a troe Gado. Wi e bigin nanga vers 1 nanga 2:
9 „Na a ten dati Moses nanga den manpikin foe Israèl ben singi a singi disi gi Jehovah èn ben taki den wortoe di e kon now: ’Meki mi singi gi Jehovah, bika a meki kon hei. A trowe na asi nanga en tjariman go na ini a se. Mi krakti nanga mi makti na Jah, bika na en e gi mi froeloesoe.’”
10. San ben meki Gado pori a legre foe Egipti?
10 Sma na heri grontapoe sabi a tori, fa Jehovah ben froeloesoe Israèl foe Egipti. A ben tjari plaag kon na tapoe a bigi grontapoemakti dati, taki te foe kaba, Farao ben gi den Israèlsma primisi foe gowe. Ma dan den legre foe Farao ben bigin hari go na baka den pôti sma disi èn a ben gersi leki den Israèlsma ben de na ini wan trapoe na sjoro foe a Redi Se. Ala di a ben gersi leki heri esi den manpikin foe Israèl ben o lasi a fri di den ben kon fri no so langa pasa, tokoe Jehovah ben abi wan tra sani na prakseri. Nanga jepi foe wan wondroe a ben meki wan pasi na ini a se èn ben kibri en pipel foe a kefar. Di den Egiptisma ben teki na den baka, a ben tapoe a pasi foe a Redi Se èn ben meki Farao nanga den sroedatimakti foe en dede na watra. — Exodus 14:1-31.
11. San ben de a bakapisi foe a feti di Gado ben feti teige Egipti?
11 A pori di Jehovah ben pori a sroedatimakti foe Egipti ben meki en kon hei na ini den ai foe en anbegiman èn ben meki en nen kon bekènti na ala sei (Josua 2:9, 10; 4:23, 24). Ija, en nen ben kon hei moro den soso, falsi gado foe Egipti, di ben sori taki den no ben man froeloesoe den anbegiman foe den. A froetrow di den ben froetrow tapoe den gado foe den, èn tapoe libisma di man dede èn tapoe sroedatimakti, ben abi bita bakapisi (Psalm 146:3). A no e froewondroe wi taki na ati foe den Israèlsma ben boeweigi den foe singi prèisesingi di ben sori taki den abi gosontoe frede gi a libi Gado, di e froeloesoe en pipel na wan makti fasi!
12, 13. San wi e leri foe a wini di Gado ben wini na a Redi Se?
12 Na a srefi fasi, wi moesoe erken taki no wan falsi gado na ini wi ten èn no wan heimakti, srefi den wan nanga nucleair fetisani, noiti sa man strei nanga Jehovah. A man èn a sa froeloesoe en pipel. „En e doe sani akroederi en eigi wani na mindri a legre foe hemel nanga den sma di e tan na grontapoe. Èn no wan sma de di kan tapoe en anoe noso kan taigi en: ’San joe ben doe?’” (Danièl 4:35) Te wi froestan den wortoe disi dorodoro, dan dati e boeweigi wi toe foe singi prèisesingi gi En, nanga prisiri.
13 A winisingi na a Redi Se e taki moro fara: „Jehovah na wan mansma foe feti. En nen na Jehovah.” A Fetiman disi di sma no man wini, no de wan anansitori èn wan sma di libisma no sabi. A abi wan nen! En de ’a Sma di e meki kon tron’, a Gran Mekiman, a Sma „di nen Jehovah, . . . a Moro Hei Sma foe heri grontapoe” (Exodus 3:14; 15:3-5; Psalm 83:18). Joe no e agri, taki a ben sa boen gi den Egiptisma foe owroeten efoe den ben abi nofo frede nanga lespeki gi na Almaktiwan na presi foe afrontoe en?
14. Fa sma ben kan si o warti a frede gi Gado ben de na a Redi Sé?
14 Leki a Sma di meki grontapoe, a Mekiman foe se abi makti na tapoe ala den watra (Exodus 15:8). Di a gebroiki a makti di a abi tapoe a winti toe, a ben doe wan sani di gersi leki a no kan. A ben prati a dipi watra na wan spesroetoe presi èn ben meki a go na baka na a wan sei èn na a tra sei foe ben man meki wan watra pasi gi en pipel foe pasa. Proeberi foe si a sitûwasi: miljoenmiljoen liter se watra di tanapoe leki toe langa skotoe, di de a srefi èn na so wan fasi a ben meki wan pasi gi den Israèlsma foe lowe gowe, foe kibri den. Ija, den sma di ben sori wan gosontoe frede gi Jehovah ben kisi kibri. Baka dati, Jehovah ben loesoe a watra èn ben meki a fadon go baka leki wan bigi froedoe, èn na so wan fasi den skwala ben swari ala den fetisani nanga fetiman foe Farao. Fa disi ben de wan demonstrâsi foe krakti foe Gado tapoe den soso gado èn libisma sroedatimakti. Troetroe, Jehovah de a sma di wi moesoe frede, a no so? — Exodus 14:21, 22, 28; 15:8.
Fa wi kan sori taki wi abi frede gi Gado
15. San moesoe de a fasi fa wi e handri tapoe a maktifasi fa Gado ben froeloesoe sma?
15 Efoe wi ben tanapoe nanga Moses sondro foe de na ini kefar, foe troe wi ati ben sa boeweigi wi foe singi: „Soema na mindri den gado de leki joe, O Jehovah? Soema de leki joe, di e sori taki a abi someni makti na ini santafasi? A Sma di den moesoe frede nanga prèisesingi, a Sma di e doe wondroewroko” (Exodus 15:11). Sensi a ten dati, sma taki densrefi sani disi ibri leisi baka na ini ala den hondrohondro jari di pasa. Na ini a lasti boekoe foe bijbel, na apostel Johannes e taki foe wan groepoe foe getrow salfoe dinari foe Gado: „Den e singi a singi foe Moses a srafoe foe Gado èn a singi foe a Pikin Skapoe.” San na a moi singi disi? „Bigi èn toemoesi moi srefi den wroko foe joe de, Jehovah Gado, na Almaktiwan. Regtfardiki èn troe den pasi foe joe de, Kownoe foe têgo. Soema no sa frede joe foe troe, Jehovah, èn gi joe nen glori, foe di joe wawan de loyaal?” — Openbaring 15:2-4.
16, 17. Sortoe toemoesi moi sani wi e si e pasa now?
16 So srefi na ini a ten disi anbegiman de di kon fri, di no wawan e warderi den mekisani foe Gado, ma so srefi den komando foe en. Sma foe ala nâsi kon fri na jeje fasi, èn ben poti aparti foe a doti grontapoe disi foe di den e erken èn e fiti den regtfardiki komando foe Gado na ini den libi. Ala jari, hondrohondro doesoen sma e lowe gowe libi a kroeka grontapoe disi foe kan tan nanga a krin, oprègti organisâsi foe anbegiman foe Jehovah. Heri esi, baka te Gado tjari en hebi kroetoe kon teige falsi relisi èn teige a tra pisi foe na ogri sistema disi, dan den sa libi foe têgo na ini wan regtfardiki njoen grontapoe.
17 Akroederi Openbaring 14:6, 7, nownow libisma e kisi foe jere wan warskow kroetoe boskopoe di kotoigi foe Jehovah e meki bekènti nanga jepi foe den engel. A jari di pasa, na ini moro leki 230 kondre, so wan feifi miljoen kotoigi ben meki a boen njoensoe bekènti foe a Kownoekondre foe Gado nanga a kroetoe joeroe foe en. Den kotoigi ben tjari fisiti doronomo na sma foe leri den kompe libisma foe den so taki den kan kan kisi froeloesoe, èn den e hori bijbelstudie foe soso. Na so wan fasi, ala jari, hondrohondro doesoen sma e leri nofo foe kan froestan fa foe frede a troe Gado na wan joisti fasi, èn den e gi densrefi abra na en èn e teki dopoe. Fa a de wan prisiri taki den sortoe sma disi kon frede a troe Gado! — Lukas 1:49-51; Tori foe den Apostel 9:31; teki gersi Hebrewsma 11:7.
18. San e sori taki den engel abi prati na ini a preikiwroko foe wi?
18 A troe taki engel abi foe doe nanga a preikiwroko disi? We, sondro degedege, a de krin foe si taki foeroe tron, engel tjari Kotoigi foe Jehovah go na wan oso pe wan sma di ben lasi-ati ben angri, èn ben begi srefi foe kisi jeje jepi! Foe eksempre, toe Kotoigi foe Jehovah makandra nanga wan pikin boi ben prati a boen njoensoe tapoe wan Karibis èilanti. Di brekten doro, dan den toe Kotoigi ben klari foe go na oso. Ma a pikin boi ben wani nomonomo, foe fisiti a tra oso na den fesi. Di a ben si taki den toe Kotoigi no ben wani doe dati tapoe a momenti dati, dan a ben go ensrefi èn ben bigin klop. Wan jongoe oema ben opo a doro. Di den toe kotoigi ben si dati, den ben go foe taki nanga en. A ben kari den kon na inisei èn ben froeteri den, taki tapoe a srefi momenti di a ben jere a klop tapoe a doro a ben e begi Gado foe seni Kotoigi kon na en foe leri en foe bijbel. Den ben meki mofo foe bigin wan bijbelstudie.
19. San wi ben kan sori na tapoe leki wan winimarki foe a frede gi Gado?
19 Te wi e tjari a kroetoe boskopoe foe Gado na wan getrow fasi, dan so srefi wi e meki den regtfardiki komando foe en bekènti. Èn te sma e fiti den komando disi na ini den libi, dan a abi boen blèsi na jejesei nanga na skinsei. Foe eksempre, bijbel de krinkrin na ini a fasi fa a e kroetoe ala seks hoeroedoe (Romesma 1:26, 27, 32). Na ini a ten disi, sma na heri grontapoe no e ke nanga den markitiki foe Gado. San na a bakapisi? Sma e broko-trow. A doe di jongoe sma e doe ogridoe e kon moro foeroe. Sma e kisi siki di seks tjari abra di e malengri den noso kan kiri den; den siki disi e kon foeroe srefisrefi èn e panja na ala sei ini a di foe 20 jarihondro disi. Foe troe, a siki AIDS (SIDA) di e gi foe frede, moro foeroe e panja foe seks hoeroedoe ede. Ma, a no de so taki a frede foe Gado sori foe de wan bigi kibri gi troe anbegiman? — 2 Korentesma 7:1; Filipisma 2:12; loekoe so srefi Tori foe den Apostel 15:28, 29.
Den bakapisi foe frede Gado nownow
20. San e sori taki tra sma sabi foe a boen nen di Jehovah Kotoigi abi?
20 Den blèsi lai pasamarki gi den wan di e frede Gado èn di e waka baka en komando. Loekoe wan sani di pasa di e gi a boeweisi taki dei foe dei, sma e erken taki den Kotoigi foe Jehovah abi wan kresten bradafasi di abi vrede èn di abi sma di de oprègti, èn di e libi akroederi boen gwenti nanga wet. Wan toe kotoigi di ben go foe fisiti wan internationaal kongres na Zuid-Amerika, ben tan na ini wan hotel di sma ben gebroiki so srefi wan neti gi wan konmakandra pe a president foe a kondre ben o hori wan taki gi grontapoe sma. Di wan groepoe foe bodyguard ben tjari a president go gawgaw na ini wan lift, dan wan kotoigi di no ben sabi soema ben de na ini a lift go na inisei. Den bodyguard ben froewondroe srefisrefi! Di a kotoigi kisi ensrefi san a ben doe, a ben aksi pardon foe a fasi fa a ben kon na inisei. A ben sori en lapelkarta di ben meki sma sabi taki en na wan Kotoigi èn a ben taki dati a no ben de wan kefar gi a president. Wan bodyguard ben lafoe pikinso èn ben taki: „Efoe ala sma ben de leki den Kotoigi foe Jehovah, dan wi no ben sa abi den sortoe veiligheid disi fanowdoe.” — Jesaja 2:2-4.
21. Sortoe fasi foe handri opo gi sma na ini a ten disi?
21 Disi na den sortoe sma di Jehovah e tjari kon na wan na ini a ten disi èn a e sreka den foe ’komoto na a bigi banawtoe’ di e marki a kaba foe a sistema disi (Openbaring 7:9, 10, 14). Foe pasa libilibi no sa abi foe doe nanga na abi foe kolokoe. Foe kan pasa libilibi wan sma moesoe frede Jehovah, erken en leki a regtfardiki Soeverein èn gi ensrefi abra na en. Tokoe, moro foeroe sma no sa kweki a sortoe frede di sa meki den man foe kisi kibri (Psalm 2:1-6). Akroederi ala boeweisi di de foe kisi, a Tiriman di Jehovah ben froekisi, Jesus Krestes, e tiri leki Kownoe sensi a moeilek jari 1914. Disi wani taki, dati a ten di libi ete, sjatoe gi ibriwan sma persoonlijk foe kan kweki èn foe sori gosontoe frede gi Jehovah. Tokoe, a Mekiman foe wi e gi ibriwan sma pasi, srefi den sma nanga bigi posisi, foe handri: „We dan, oenoe kownoe, handri nanga inzicht; meki den poti oenoe reti, o kroetoeman foe grontapoe. Dini Jehovah nanga frede èn prisiri nanga beifi. Bosi a manpikin, foe En no kisi atibron so taki oenoe no sa lasi pasi èn kisi pori, foe di en ati e bron gawgaw. Kolokoe na ala den wan di e poti den froetrow tapoe en.” — Psalm 2:7-12.
22. San sa de a tamara gi den sma di e frede Gado nownow?
22 Meki wi de na mindri den wan di sa prèise wi Mekiman leki a Sma di froeloesoe wi. Ma disi e aksi foe wi taki wi moesoe frede a troe Gado nownow! (Teki gersi Psalm 2:11; Hebrewsma 12:28; 1 Petrus 1:17.) Wi moesoe tan leri den règtfardiki komando foe en èn gi jesi na den. A singi foe Moses nanga a Pikin Skapoe, di skrifi na ini Openbaring 15:3, 4, sa doro wan heimarki te Jehovah e figi ala ogridoe poeroe foe grontapoe èn e bigin foe dresi libisma nanga en tanpresi na grontapoe foe den takroe bakapisi foe sondoe. Baka dati, nanga wi heri ati wi sa singi: „Bigi en moi srefisrefi den wroko foe joe de, Jehovah Gado, na Almaktiwan. Regtfardiki èn troe den pasi foe joe de, Kownoe foe têgo. Soema no sa frede joe troetroe, Jehovah, èn gi joe nen glori?”
Joe e memre ete?
◻ Foe san ede Jehovah e froedini foe kisi wi gosontoe frede?
◻ San ben kon de foe si krin nanga den sani di Gado ben doe na a Redi Se?
◻ San na den winimarki foe a lespeki frede foe wi gi Jehovah?
◻ Sortoe tamara den sma di e frede Gado now e froewakti?