Foe gi presenti — Na wan sani di sma e froewakti?

JOE sabi heri boen kande taki nofo tron na foe gwenti ede taki sma e gi kado. Na ini moro foeroe koeltoeroe okasi de pe sma e froewakti foe kisi presenti. Den sortoe presenti dati kan wani taki wan fasi foe sori lespeki noso foe sori lobi. Foeroe foe den presenti, a sma di e kisi den, noiti e gebroiki den; tra presenti e jepi sma di abi nowtoe troetroe èn den e warderi den srefisrefi.

Na Deinsikondre te wan beibi e gebore, dan mati nanga famiriman o kon foe loekoe a beibi èn foe tjari presenti kon, di den e howpoe taki den sa man gebroiki gi a beibi. Na tra kondre mati e hori wan fesa kande pe den e gi den sortoe presenti dati, ala di den e wakti a ten te a beibi o gebore.

Den okasi pe sma e froewakti foe kisi presenti, nofo tron na alajari fesa. Ala di den kresten foe fositen no ben hori den sortoe fesa dati, tokoe den fesa disi kon de wan sani di moro foeroe sma di e taki dati den na kresten, kon lobi srefisrefi, so srefi toe sma di no de kresten. Na ini tra koeltoeroe den e tapoe kande nanga a gwenti foe gi presenti na frijaridei te den pikin e kon moro owroe, ma a gwenti di den Grikisma abi, e taki wan tra sani. Na Grikikondre den e poti foeroe prakseri na tapoe frijaridei. Den e gi kado toe na wan sma na tapoe en „nen dei”. San na dati? We, relisi gwenti e poti gi ibri dei foe a jari wan difrenti „santawan”, èn foeroe sma den e gi a nen foe „santawan”. Te a dei foe a „santawan” doro, dan den sma di abi a nen foe a santawan e kisi presenti.

Boiti taki den Koreasma e hori frijari-oso gi den pikin foe den, den abi wan nationaal fesadei di sma sabi leki Pikin-nengre Dei. A de wan ten pe den osofamiri e go koiri èn pe den e gi kado na den pikin awansi sortoe dei den gebore. Koreasma abi wan Papa nanga Mama Dei toe, pe pikin e gi sani na a papa nanga mama foe den, èn den abi wan Leriman Dei toe, pe skoropikin e gi grani na a skoromasra noso skoromisi foe den èn den e gi den presenti. Akroederi a gwenti foe den Koreasma, den e hori wan bigi fesa te wan sma doro a libimarki foe 60 jari. Ala famiri nanga mati e taki fa den e winsi taki a sma sa libi langa èn de kolokoe, èn den e gi presenti na a sma di doro a ten dati na ini en libi.

Wan trow-oso na wan tra okasi pe sma abi a gwenti kande pe den lobi foe gi presenti. Te wan paar e trow na Kenia, dan den e froewakti foe a famiri foe a trowmasra taki den e gi presenti na a famiri foe a trowmisi. Den fesaman e tjari presenti kon toe. Efoe a trowmisi nanga a trowmasra e hori densrefi na san a gwenti e taki, dan den sa go sidon na tapoe wan pikin podium, ala di den fesaman e tjari den presenti foe den kon. Te den gi a presenti, dan den sa meki bekènti taki „so wan sma tjari wan presenti kon gi a paar”. Foeroe foe den sma di e gi presenti no ben sa prisiri srefisrefi efoe den no ben taki so wan sani foe den.

Na den Libaneisi, te wan sma e trow, dan mati nanga birtisma, srefi sma di no sabi a paar boen, e kon wan heri pisi ten baka a trowdei srefi èn den e tjari presenti kon. Sensi pikin-nengreten, den e leri den taki foe gi presenti na wan frantiwortoe di den abi, neleki te joe e pai wan paiman. „Efoe joe no e doe disi, dan joe no e firi boen”, wan Libaneisi ben taki. „Na wan owroe gwenti.”

Ma foe ala den okasi pe sma e froewakti taki sma e gi presenti, kresneti e teki a fosi presi na foeroe kondre. A no de so pe joe e libi? No so langa pasa, na ini 1990 den ben bereken taki ibri jari den Amerkan e pai moro leki 40 miljard Amerkan dala foe bai presenti gi kresneti. Den boedistsma nanga den sjintoesma na Japan e hori a fesa dati toe nanga foeroe faja, èn difrenti fasi foe a fesa de foe feni na Europa, Zuid-Amerika, nanga pisi foe Afrika.

Kresneti na wan ten pe sma e froewakti foe de kolokoe, ma foeroe sma no de kolokoe. Èn foeroe sma e feni taki a fajafaja fasi fa sma e feti foe bai presenti nanga a broko-ede foe pai den paiman di den e kisi foe dati, e pori ibri prisiri di den e ondrofeni.

Tokoe bijbel e taki dati wan sma de kolokoe te a e gi. Disi de troetroe so, te joe e go loekoe nanga sortoe reide sma e gi presenti. — Tori foe den Apostel 20:35.