Foe san ede troe anbegi e kisi a blesi foe Gado

„Prèise Jah, oen pipel! A froeloesoe nanga a glori nanga a krakti na foe wi Gado, bika den kroetoe foe en de troe èn regtfardiki.” — OPENBARING 19:1, 2.

1. Fa Babilon a Bigiwan sa kon na en kaba?

NA INI Gado ai, „Babilon a Bigiwan” fadon, èn now wan pori e wakti en. Bijbel profeititori e sori taki a relisi hoeroe disi di de na heri grontapoe, heri esi sa kisi pori foe den politiek freiri foe en; a kaba foe en sa kon wantronso èn esi-esi. Na openbaring di Jesus ben gi Johanes, ben abi den profeiti wortoe disi: „Wan tranga engel ben opo wan ston leki wan bigi miriston èn a ben fringi en go na ini se, taki: ’Na a srefi fasi den sa fringi Babilon, a bigi foto, go na ondro nanga wan esi-esi fringi, èn noiti moro den no sa feni en.’” — Openbaring 18:2, 21.

2. San den foetoeboi foe Jehovah sa doe te Babilon kisi pori?

² Wan toe pisi foe a grontapoe foe Satan sa sari foe a pori di Babilon a Bigiwan sa kisi, ma den foetoeboi foe Gado kwetikweti no sa doe dati, no den wan di de na hemel èn no den wan di de na grontapoe. A prisiri babari di den sa bari gi Gado sa de: „Prèise Jah, oen pipel! A froeloesoe nanga a glori nanga a krakti na foe wi Gado, bika den kroetoe foe en de troe èn regtfardiki. Bika a tjari kroetoe kon na tapoe a bigi hoeroe, di ben pori grontapoe nanga a hoeroedoe foe en, èn a teki refensi gi a broedoe foe den srafoe foe en di de na a anoe foe a [hoeroe].” — Openbaring 18:9, 10; 19:1, 2.

Sortoe froktoe a troe relisi moesoe meki?

3. Sortoe aksi moesoe kisi wan piki?

³ Foe di Gado sa krin grontapoe poeroe falsi relisi, dan sortoe anbegi sa tan abra? Fa wi kan kon sabi na ini a ten disi sortoe relisi groepoe sa pasa a pori foe Satan en grontapoemakti foe falsi relisi, libilibi? Sortoe regtfardiki froktoe a groepoe disi moesoe meki? Wi abi no moro mendri leki tin penti foe kon si krin san na a troe anbegi foe Jehovah. — Maleaki 3:18; Mateus 13:43.

4. San na a fosi markitiki foe a troe anbegi, èn fa Jesus ben gi na eksempre ini disi?

⁴ A moro prenspari sani de taki troe kresten moesoe hori a soevereiniteit hei di Jesus dede gi dati — a soevereiniteit foe en Tata. Jesus no ben gi en libi gi na a wán noso tra afersi foe politiek foe lo, foe ras, noso foe sociaal tori. A ben poti a Kownoekondre foe en Tata moro hei leki na angri di den djoe ben angri troetroe foe politiek noso foe trowe tiri. Di Satan ben pristeri en a makti na grontapoe, dan a ben piki nanga den wortoe: „Komoto gowe, Satan! Bika Boekoe taki: ’Na Jehovah joe Gado joe moesoe anbegi, en gi en wawan joe moesoe doe santa diniwroko.’” A ben sabi foe den Hebrew Boekoe foe bijbel taki Jehovah na a troe Soeverein foe heri grontapoe. Sortoe relisi groepoe e horibaka gi a tiri foe Jehovah sondro foe poti kondisi, moro leki den e horibaka gi den politiek sistema foe a grontapoe disi? — Mateus 4:10; Psalm 83:18.

5. (a) Fa troe anbegiman moesoe si a nen foe Gado? (b) San e sori taki Jehovah Kotoigi e gi a nen dati grani?

⁵ Wan di foe toe markitiki na taki a troe anbegi moesoe gi glori na a nen foe Gado èn moesoe santa a nen dati. Na Almaktiwan ben tjari en nen, Jehovah (di den vertaal nanga Yahweh na ini son bijbel vertaling), kon na krin gi en pipel Israèl, èn den e gebroiki en doesoendoesoen tron na ini den Hebrew Boekoe foe bijbel. Srefi bifo dati, Adam, Eva, nanga trawan ben sabi a nen, ala di den no ben lespeki en ala ten (Genesis 4:1; 9:26; 22:14; Exodus 6:2). Ala di den vertaler foe krestenhèit nanga di foe den djoe ben abi a gwenti foe poeroe a nen foe Gado na ini den bijbel foe den, tokoe Jehovah Kotoigi gi a nen dati a presi nanga a lespeki di a moesoe kisi na ini a New World Translation of the Holy Scriptures (Njoen-Grontapoevertaling foe den Santa Boekoe foe bijbel). Den e gi a nen dati grani, neleki fa den fositen kresten ben doe. Jakobus ben kotoigi: „Simeon froeteri finifini fa Gado foe a fosi tron ben poti en prakseri na tapoe den nâsi foe teki wan pipel foe en nen. Èn nanga disi, den wortoe foe den Profeiti e agri, . . . so taki den wan foe den sma di tan abra, kan soekoe Jehovah serjoesoe, makandra nanga den sma foe ala nâsi, sma di den e kari na mi nen, na so Jehovah e taki, di e doe den sani disi’.” — Tori foe den Apostel 15:14-17; Amos 9:11, 12.

6. (a) San na wan di foe dri markitiki foe a troe anbegi? (b) Fa Jesus nanga Danièl ben poti krakti na tapoe a Kownoekondre tirimakti? (Lukas 17:20, 21)

⁶ Wan di foe dri markitiki foe a troe anbegi na taki a moesoe poti a Kownoekondre foe Gado hei leki a wan-enkri sani di abi reti èn di man tjari wan loesoe kon gi den problema di a tiri foe libisma e tjari. Jesus ben leri den bakaman foe en krin, foe begi foe a Kownoekondre dati kon, so taki a tiri foe Gado kan teki a makti abra na grontapoe. Danièl ben taki na ondro a krakti foe santa jeje wan profeititori foe den lasti dei: „A Gado foe hemel sa opo wan kownoekondre di noiti no sa kisi pori. . . . A sa broko ala den [grontapoe, politiek] kownoekondre disi na pisipisi èn tjari wan kaba kon na den, èn ensrefi sa tan te ten di no skotoe.” Soema sori nanga a waka nanga libi foe den na ini a di foe 20 jarihondro disi, taki den e horibaka dorodoro gi a Kownoekondre dati — den relisi foe Babilon a Bigiwan noso Jehovah Kotoigi? — Danièl 2:44; Mateus 6:10; 24:14.

7. Fa troe anbegiman e si bijbel?

⁷ Wan di foe fo prenspari sani foe meki Gado feni wan sma boen, na taki den troe foetoeboi foe Gado moesoe hori bijbel hei leki a Wortoe di skrifi na ondro a krakti foe Gado en santa jeje. Dati meki den no ben sa tron sma di e kroetoe bijbel foe feni fowtoe na en, èn di e proeberi foe meki bijbel tron soso wan boekoe nomo di libisma skrifi nanga ala den fowtoe di den ben sa meki na ini. Jehovah Kotoigi e bribi taki bijbel na a Wortoe di Gado ben meki sma skrifi na ondro a krakti foe en santa jeje, neleki fa Paulus ben skrifi Timoteus: „Ala den Boekoe foe bijbel Gado meki sma skrifi den èn den boen foe leri sma, foe piri-ai gi sma, foe poti sani reti, èn foe gi tranga leri na ini regtfardikifasi, so taki a sma foe Gado kan de koni dorodoro, de srekasreka dorodoro gi ibri boen wroko.”a Dati meki Jehovah Kotoigi e teki bijbel leki a boekoe di moesoe gi den tiri, a boekoe di den e gebroiki na ini den aladei libi, èn a fonten di e gi den wan howpoe gi a tamara. — 2 Timoteus 3:16, 17.

A Relisi di abi lobi leki marki, no bita-atifasi

8. San na wan di foe feifi prenspari sani foe a troe anbegi?

⁸ Fa Jesus ben sori soema na den troe bakaman foe en? A piki foe en e tjari wi go na wan di foe feifi prenspari marki foe sma kon sabi a troe anbegi. Jesus ben taki: „Mi e gi oenoe wan njoen komando, dati oenoe lobi makandra; neleki fa mi lobi oenoe, oenoe toe moesoe lobi makandra. Nanga disi ala sma sa sabi taki oenoe na mi disipel, efoe oenoe abi lobi gi makandra” (Johanes 13:34, 35). Fa Jesus ben sori a lobi foe en? Foe di a ben gi en libi leki wan froeloesoe-ofrandi (Mateus 20:28; Johanes 3:16). Foe san ede troe lobi de wan prenspari eigifasi gi troe kresten? Johanes ben tjari kon na krin: „Lobiwan, meki wi tan lobi makandra, bika lobi e kon foe Gado . . . A sma di no abi lobi, no kon sabi Gado, bika Gado na lobi.” — 1 Johanes 4:7, 8.

9. Soema sori troe lobi, èn fa?

⁹ Soema na ini wi ten sori a sortoe lobi disi, srefi te den ben kisi foe doe nanga bita-atifasi foe ras ede noso foe di den ben de foe wan tra nâsi? Soema pasa a moro bigi tesi, srefi te na dede, so taki a lobi foe den ben sa de krin foe si? Wi kan taki dati a de den Katolik priester nanga den non di e erken taki den de frantiwortoe pikinso gi a kiri di den ben kiri sma foe lo na ipi-ipi na Rwanda na ini 1994? Na den Ortodòks-sma foe Serfia noso den Katolieksma foe Krowâsia di, na ini a borgoe feti dati na den Balkan Staten, ben abi wan prati na ini a „krin di den wani krin a ras” foe den, nanga tra sani di no fiti wan kresten? Noso na den Katoliek noso Protestant kerki tiriman di soetoe faja foe sma kroetoe makandra sondro foe sabi fa sani de èn foe abi bita-ati gi makandra na Noord-Ierland na ini den wan toe tenti jari di pasa kaba? Sma kwetikweti no kan gi Jehovah Kotoigi a fowtoe taki den abi wan prati na den sortoe feti dati. Na presi taki den drai den baka gi a kresten lobi foe den, den kisi pina na ini strafoe-oso èn na ini strafoeman kampoe, srefi te na dede. — Johanes 15:17.

10. Foe san ede troe kresten e tan neutraal?

¹⁰ Wan di foe siksi prenspari sani foe meki anbegi kon de wan sani di Gado feni boen, na foe de neutraal ini a tori foe den politiek afersi foe a grontapoe disi. Foe san ede kresten moesoe tan neutraal na ini politiek? Paulus, Jakobus, nanga Johanes ben gi wi boen reide foe dati. Na apostel Paulus ben skrifi taki Satan na „a gado foe a seti foe sani disi”, di e breni a froestan foe den sma di no e bribi, èn a e gebroiki ibri sani di a kan gebroiki, so srefi politiek di e prati sma. A disipel Jakobus ben taki dati „matifasi nanga grontapoe na feantifasi nanga Gado”, èn na apostel Johanes ben taki dati „heri grontapoe e didon na ini a makti foe a godelowsoewan”. Dati meki wan troe kresten no kan drai en baka gi a gi di a gi ensrefi abra na Gado, foe di a e go moksi ensrefi nanga Satan en pori grontapoe foe politiek nanga makti. — 2 Korentesma 4:4; Jakobus 4:4; 1 Johanes 5:19.

11. (a) Fa kresten e denki foe feti? (b) Sortoe reide bijbel e gi foe a fasi disi foe denki? (2 Korentesma 10:3-5)

¹¹ Te wi e hori den lasti toe markitiki disi na prakseri, dan wan di foe seibiwan de makriki foe froestan, namkoe, dati troe kresten anbegiman no moesoe abi wan prati na feti. Foe di a troe relisi na wan bradafasi di de na heri grontapoe èn di abi lobi leki fondamenti, meki no wan sani kan prati noso pori a „heri libimakandra [dati] foe . . . brada na grontapoe”. Jesus ben leri sma lobi, a no ben leri den bita-atifasi; a ben leri sma vrede, a no ben leri den feti (1 Petrus 5:9; Mateus 26:51, 52). A srefi „godelowsoewan”, Satan, di ben poesoe Kain foe kiri Abel e tan poti bita-atifasi na mindri libisma èn e soetoe faja foe sma feti nanga makandra èn kiri makandra foe di den prati tapoe a kontren foe politiek, relisi nanga ras. Troe kresten ’no e leri feti moro,’ awansi san dati wani taki toe. Na agersifasi joe kan taki dati den ’naki den feti-owroe foe den kon tron proegoe èn den lansri foe den kon tron koti-nefi’ kaba. Den e meki vrede leki wan froktoe foe Gado jeje. — 1 Johanes 3:10-12; Jesaja 2:2-4; Galasiasma 5:22, 23.

Gado e blesi a soifri fasi fa wan sma e tjari ensrefi èn den soifri leri

12. (a) San na a di foe aiti marktiki, ma foe sortoe pratifasi na relisi sei joe kan taki? (b) Fa Paulus ben tjari a di foe aiti markitiki disi kon na krin?

¹² Kresten wánfasi na a di foe aiti markitiki foe a troe anbegi. Ma den relisi foe krestenhèit di prati, no jepi taki wánfasi kon. Foeroe bigi relisi organisâsi di e kari densrefi kresten, kon prati na ini difrenti sekte, èn broeja de a bakapisi foe disi. Teki foe a eksempre a Baptist relisi na Amerkankondre, di prati na ini den Baptistsma foe Noordsei (Amerkan Baptist Kerki na Verenigde Staten foe Amerkankondre) nanga den Baptistsma foe Zuidsei (A Zuidsei Baptist Konmakandra), so srefi wan lo tra Baptist groepoe di kon foe pratifasi ede (World Christian Encyclopedia, bladzijde 714). Foeroe groepoe di prati, bigin foe di difrenti ben de ini leri noso ini a fasi fa kerki ben moesoe tiri (foe eksempre, a di foe den Presbytersma, a di foe den Episkopaalsma, a di foe den Congretionaalsma). Joe kan agersi den groepoe foe krestenhèit di prati, nanga den wan foe den relisi dorosei foe krestenhèit — efoe na a Boedist bribi, na Islam noso a Hindoe bribi. San na apostel Paulus ben gi leki rai na den fositen kresten? „Now mi e froemane oenoe brada, na ini a nen foe wi Masra Jesus Krestes, taki oen alamala moesoe taki na ini wánfasi nanga makandra, èn taki no wan prati moesoe de na oen mindri, ma taki oenoe de makandra na ini wánfasi soleki fa a fiti, nanga a srefi denki èn nanga a srefi fasi foe prakseri.” — 1 Korentesma 1:10; 2 Korentesma 13:11.

13, 14. (a) San a wani taki ’foe de santa’? (b) Fa a troe anbegi e tan krin?

¹³ San na wan di foe neigi markitiki foe a relisi di Gado feni boen? Wan bijbel gronprakseri e taki na ini Lefitikus 11:45: „Oenoe moesoe sori taki oenoe de santa, bika mi de santa.” Na apostel Petrus ben taki baka foe a markitiki disi di a ben skrifi: „Oenoe so srefi moesoe kon santa toe, akroederi a Santa Sma di ben kari oenoe, na ini ala fasi fa oenoe e tjari oensrefi.” — 1 Petrus 1:15.

¹⁴ San de na ini a fanowdoe disi di a de fanowdoe foe de santa? Taki den sma di e anbegi Jehovah, moesoe de krin na jejefasi èn na moreel sei (2 Petrus 3:14). Presi no de gi sondari di no abi berow, di e doe sani foe espresi, èn di nanga a fasi fa den e tjari densrefi, e sori taki den no abi lespeki gi a froeloesoe-ofrandi foe Krestes (Hebrewsma 6:4-6). Jehovah e aksi foe sma, taki a kresten gemeente moesoe tan krin èn santa. Fa dati e doe? Na a wan sei, foe di den e teki kroetoe bosroiti foe sluit sma uit di ben sa pori a gemeente. — 1 Korentesma 5:9-13.

15, 16. Sortoe kenki foeroe kresten tjari kon na ini a libi foe den?

¹⁵ Foeroe sma, bifo den ben sabi a kresten waarheid, ben abi wan loesoe fasi foe libi, èn den ben denki soso foe prisiri wawan, ala di den ben prakseri den eigi afersi nomo. Ma a wortoe di e taki foe Krestes, ben kenki den, èn den kisi pardon foe den sondoe foe den. Paulus ben taki disi nanga krakti wortoe di a ben skrifi: „San! Oenoe no sabi taki onregtfardiki sma no sa kisi a kownoekondre foe Gado? No meki den kori oenoe. No wan hoeroeman, no wan anbegiman foe kroektoe gado, no wan soetaman, no wan man di den e hori foe doe sani di a no meki foe dati, no wan man di e didon nanga man, no wan foefoeroeman, no wan sma di abi bigi-ai, no wan droengoeman, no wan skempiman, no wan bedrigiman sa kisi a kownoekondre foe Gado. Èn tokoe, dati na san son wan foe oenoe ben de. Ma oenoe wasi kon krin.” — 1 Korentesma 6:9-11.

¹⁶ A de krin taki Jehovah feni den wan boen di abi berow foe a fasi fa den ben tjari densrefi na wan fasi di no de akroederi bijbel, di den e drai den libi, èn di e tron troe bakaman foe Krestes èn foe den leri foe en. Den lobi a sma na den sei troetroe, neleki fa den lobi densrefi èn den e sori disi na foeroe fasi, soleki te den e horidoro na ini wan diniwroko di e pristeri a boskopoe foe libi na ala sma di ben sa wani jere dati. — 2 Timoteus 4:5.

„Waarheid sa meki oenoe kon fri”

17. San na wan di foe tin markitiki foe a troe anbegi? Gi eksempre.

¹⁷ Wan di foe tin markitiki de di Jehovah poti gi den sma di e anbegi en na ini jeje èn na ini waarheid — soifri leri (Johanes 4:23, 24). Jesus ben taigi den bakaman foe en: „Oenoe sa sabi waarheid, èn waarheid sa meki oenoe kon fri” (Johanes 8:32). A waarheid foe bijbel e fri wi foe den leri di e gi Gado sjen, soleki a sili di no e dede, a hèlfaja, nanga a vagevuur (Preikiman 9:5, 6, 10; Esekièl 18:4, 20). A e meki wi kon fri foe a kibritori ini a tori foe a „Toemoesi Santa Dri-wánfasi” foe krestenhèit èn di komoto na Babilon (Deuteronomium 4:35; 6:4; 1 Korentesma 15:27, 28). Te sma e gi jesi na den waarheid foe bijbel, dan dati abi leki bakapisi lobi-ati sma di e broko den ede nanga trawan, èn di abi switifasi nanga sari-atifasi. A troe krestendom noiti no gi deki-ati na froefolgoeman leki Tomas Torquemada, di ben lobi foe teki refensi èn di no ben wani gi sma pasi foe taki fri san den denki, èn a troe krestendom noiti no gi deki-ati na den bita-ati sma di ben poesoe trawan foe go feti, leki den sma foe Lomsoe kerki di ben horibaka gi den Kruistocht. Ma tokoe na den froktoe disi di Babilon a Bigiwan meki na ini ala den jarihondro, awansi fa a no fa disi de so foe sensi a ten foe Nimrod te leki now. — Genesis 10:8, 9.

Wan nen di de aparti

18. (a) Soema na den sma di e libi akroederi den tin marktiki foe a troe anbegi èn fa? (b) San ibriwan foe wi moesoe doe foe kisi a blesi di e wakti wi?

¹⁸ Soema na ini a ten disi troetroe e libi akroederi den tin markitiki disi foe a troe anbegi? Soema trawan sabi èn e erken leki sma di e hori den soifri retifasi èn di lobi vrede? Na heri grontapoe sma sabi heri boen taki Jehovah Kotoigi „no de wan pisi foe grontapoe” (Johanes 15:19; 17:14, 16; 18:36). A pipel foe Jehovah e feni en wan grani foe tjari a nen foe en èn foe de den Kotoigi foe en, neleki fa Jesus Krestes ben de wan getrow kotoigi foe en Tata. Wi e tjari a santa nen dati, foe di wi sabi wi frantiwortoe heri boen taki wi moesoe libi akroederi san a nen wani taki. Èn troetroe moi sani wi kan froewakti leki en Kotoigi! A froewakti foe de wan pisi foe wan libisma famiri di e gi jesi èn di de wán, ala di den e anbegi na Universeel Soeverein na ini wan paradijs dja na grontapoe. Efoe wi wani kisi so wan blesi, dan meki wi go doro foe meki sma kon sabi wi krinkrin foe a troe anbegi ede, èn foe tjari a nen Jehovah Kotoigi nanga ala grani „bika den kroetoe foe en de troe èn regtfardiki”! — Openbaring 19:2; Jesaja 43:10-12; Esekièl 3:11.

[Foetoewortoe]

Fa joe ben sa piki?

◻ Fa den foetoeboi foe Jehovah e si a pori foe Babilon a Bigiwan?

◻ San na den moro prenspari markitiki foe a troe anbegi?

◻ Fa waarheid e meki joe kon fri?

◻ Sortoe spesroetoe grani wi abi leki Jehovah Kotoigi?

[Prenki na tapoe bladzijde 27]

Jehovah Kotoigi e preiki èn e leri sma a boen njoensoe foe Gado Kownoekondre

[Prenki na tapoe bladzijde 31]

Troe kresten tan neutraal ala ten ini a tori foe politiek nanga feti foe grontapoe

[Sma di abi a reti foe a prenki]

Airplane: Courtesy of the Ministry of Defense, London