Gado, lanti, nanga joe

„Na Ierland, kerki nanga lanti e tjalensi makandra foe di den e aksi a pipel foe poti den sten ini a tori foe brokotrow.”

NA EDEPRAKSERI disi na ini The New York Times e sori fa sma na ini a ten disi kan kisi foe doe nanga wan bosroiti di den moesoe teki ini a tori foe san lanti wani èn san a kerki foe den e leri.

Na artikel ben taki: „Nanga no moro leki wán moen bifo a pipel o poti den sten foe sori efoe den wani taki a pisi foe a mamawet moesoe poeroe di e tapoe brokotrow, dan Ierland, pe moro foeroe sma de Lomsoe, e kisi foe doe nanga wan aparti sortoe toeka di den fesiman foe kondre nanga den wan foe a kerki e toeka nanga makandra.” Lanti ben aksi foe poeroe a wet di e tapoe brokotrow, ala di a Katolik Kerki krinkrin de kontrari brokotrow nanga a trow di sma e trow baka. Den Katoliksma foe Ierland ben moesoe teki wan bosroiti na mindri kerki nanga lanti. Soleki fa sani ben waka, dan lanti ben wini nanga pikinso moro sten nomo.

Ma san ben seki sma moro na taki foeroe jari langa, sma na Noord-Ierland kisi foe doe nanga wan tranga feti di ben abi foe doe nanga a soevereiniteit foe a kondre. Den kiri foeroe sma. Lomsoesma nanga Protestantsma ben abi difrenti prakseri ini a tori foe sortoe lanti den ben moesoe saka densrefi na ondro: foe tan na ondro a tiri foe Ingrisikondre na Noord-Ierland noso foe abi wán tiri gi heri Ierland.

Na so den tirimakti di e tiri san ben de Joegoslafia fosi, aksi den memre foe den difrenti bribi, so srefi den Katoliksma nanga den Ortodòks-sma, foe feti na ini wan feti gi gron. San ben de a moro prenspari froeplekti gi moro foeroe sma foe a kondre? Den ben moesoe waka na baka den wan di ben taki dati den ben teki presi gi lanti, noso den ben moesoe gi jesi na Gado, di e taki: „Joe no moesoe kiri . . . Joe moesoe lobi a sma na joe sei leki joesrefi”? — Romesma 13:9.

Joe denki kande taki a situwâsi disi noiti kan abi krakti na joe tapoe. Ma a ben kan de so. Foe taki en leti, kande joe e broko joe ede nanga dati srefi now. A theoloog Oscar Cullman e taki na ini en boekoe The State in the New Testament, foe „bosroiti di abi foe doe nanga libi noso dede, di disiten kresten moesoe noso kan teki na ini moeilek situwâsi te den tiri, pe wan diktator abi a makti, de wan kefar gi den”. Ma a e taki toe foe „a srefi troe èn prenspari frantiwortoe di ibri kresten abi — so srefi a kresten di e libi na ini san sma e kari ’gewoon’, ’aladei’ situwâsi — foe tanapoe na fesi èn loesoe wan serjoesoe problema di a e kisi foe doe nanga dati, soso foe di a de wan kresten”.

Foe dati ede, a matifasi di de na mindri relisi nanga lanti moesoe abi a belangstelling foe kresten na ini a ten disi? Troetroe a moesoe abi den belangstelling. Sensi fositen, den kresten proeberi foe kweki wan balansi fasi foe prakseri ini a tori foe tirimakti foe grontapoe. A lanti foe Rome ben kroetoe a Fesiman foe den, Jesus Krestes, èn den ben gi en a dedestrafoe èn kiri en. Den disipel foe en ben moesoe fiti den kresten froeplekti foe den na den wroko di den ben moesoe doe gi a Grontapoemakti foe Rome. Dati meki, wan sjatoe loekoe baka foe a fasi fa den ben handri nanga den tirimakti, sa gi tirilin na kresten na ini a ten disi.

[Sma di abi a reti foe a prenki na tapoe bladzijde 3]

Tom Haley/Sipa Press