Pai caesar den sani baka di de foe caesar

„Gi ala sma san den moesoe kisi.” — ROMESMA 13:7.

1, 2. (a) Fa kresten moesoe hori balansi na ini den froeplekti di den abi na Gado èn na caesar, soleki fa Jesus ben taki? (b) San na a moro prenspari sani di Jehovah Kotoigi moesoe hori na prakseri?

SOLEKI fa Jesus ben taki, dan sani de di wi moesoe gi Gado èn sani di wi moesoe gi caesar, noso lanti. Jesus ben taki: „Pai caesar den sani baka di de foe caesar, ma Gado den sani di de foe Gado.” Na ini den wan toe wortoe disi, a ben broeja den feanti foe en èn ben taki sjatoe foe a balansi fasi di wi moesoe abi na ini wi matifasi nanga Gado èn a fasi fa wi e handri nanga lanti. A no de wan wondroe taki den arkiman foe en „ben bigin froewondroe foe en”! — Markus 12:17.

² A no de foe taki, dati a moro prenspari sani di foetoeboi foe Jehovah moesoe hori na prakseri, na taki den moesoe pai Gado den sani baka di foe Gado (Psalm 116:12-14). Ma te den e doe disi, den no e frigiti taki Jesus ben taki dati den moesoe gi caesar son sani. A konsensi foe den di kweki nanga jepi foe bijbel, e aksi taki den e go loekoe na ondro begi te o fara den kan pai caesar baka san a e aksi (Romesma 13:7). Na ini a ten disi, foeroe afkati erken taki a makti foe tiri skotoe, èn taki na ala pe a natoeroe wet e tapoe sma èn tiri foe doe ala sani di den wani.

3, 4. Sortoe moi froeklari gi foe a natoeroe wet, a wet di ben tjari kon na krin, nanga a libisma wet?

³ Na apostel Paulus ben poti prakseri na tapoe a natoeroe wet disi di a ben skrifi foe sma foe grontapoe: „San sma sabi foe Gado kande, tjari kon na krin na den mindri, bika Gado ben meki disi kon na krin gi den. Bika den eigifasi foe en di sma no kan si nanga ai, de krin foe si sensi di grontapoe meki, bika den de foe si na ini den sani di ben meki, ija, en têgo krakti nanga en makti leki Gado, so taki den no man regtfardiki densrefi.” Efoe den sa doe wan sani na tapoe a natoeroe wet, dan disi sa boeweigi a konsensi foe den sma disi srefi di no e bribi. Dati meki Paulus ben taki moro fara: „Ibri leisi te sma foe den nâsi di no abi wet, e doe den sani foe a wet, foe densrefi, dan den sma disi, ala di den no abi wet, de wan wet gi densrefi. Den na joisti den sma di e sori taki san de na ini a wet, skrifi na ini den ati, ala di a konsensi foe den e gi kotoigi nanga den.” — Romesma 1:19, 20; 2:14, 15.

⁴ Na ini a di foe 18 jarihondro, a barinen Ingrisi afkati William Blackstone ben skrifi: „A no de foe taki, dati a wet disi foe a natoeroe [natoeroe wet], di de so langa leki a libisma famiri de èn di Gado ensrefi poti, de moro hei leki iniwan tra wet. Na heri grontapoe, na ini ala kondre, èn ala ten, sma de froeplekti na a wet disi: no wan libisma wet warti wan sani, efoe a de kontrari disi.” Blackstone ben taki moro fara foe „wet di ben tjari kon na krin”, soleki fa dati de foe feni na ini bijbel, a ben froeklari: „Ala libisma wet e anga foe den toe fondamenti sani disi, a wet foe a natoeroe nanga a wet di ben tjari kon na krin, dati wani taki, no wan libisma wet moesoe kisi pasi foe de kontrari den wet disi.” Disi de akroederi san Jesus ben taki foe Gado nanga caesar, soleki fa dati skrifi na ini Markus 12:17. A de krin, taki kontren de pe Gado e skotoe den sani di caesar kan aksi foe wan kresten. A Sanhedrin ben pasa den skotoe disi di Gado ben poti, di den ben komanderi den apostel foe tapoe nanga a preiki di den ben e preiki foe Jesus. Dati meki a ben fiti taki den apostel ben piki: „Wi moesoe gi jesi na Gado leki tiriman moro leki na libisma.” — Tori foe den Apostel 5:28, 29.

„Den sani di de foe Gado”

5, 6. (a) San kresten moesoe hori boen na prakseri foe a seti di a Kownoekondre seti na ini 1914? (b) Fa wan kresten e boeweisi taki a de wan bedinari?

⁵ Spesroetoe sensi 1914, di Jehovah Gado, na Almaktiwan, ben bigin tiri leki kownoe nanga jepi foe a Mesias Kownoekondre foe Krestes, kresten ben moesoe de seiker taki den no gi caesar den sani di de foe Gado (Openbaring 11:15, 17). Leki noiti na fesi, a wet foe Gado e aksi now foe kresten foe „no de wan pisi foe grontapoe” (Johanes 17:16). Foe di den gi densrefi abra na Gado, a Sma di gi den libi, meki den moesoe sori krin taki den no de foe densrefi moro (Psalm 100:2, 3). Soleki fa Paulus ben skrifi, dan „wi na foe Jehovah” (Romesma 14:8). Boiti dati, te wan kresten e teki dopoe, dan den e poti en leki wan bedinari foe Gado, so taki a kan taki makandra nanga Paulus: „Gado . . . troetroe meki wi de koni nofo foe de bedinari.” — 2 Korentesma 3:5, 6.

⁶ Na apostel Paulus ben skrifi toe: „Mi e gi glori na a diniwroko foe mi” (Romesma 11:13). Seiker wi moesoe doe a srefi sani. Efoe wi e teki prati na a diniwroko foeroeten noso na pisi ten, wi e hori na prakseri taki Jehovah srefi ben gi wi a diniwroko foe doe (2 Korentesma 2:17). Foe di son sma kan tweifri na a posisi foe wi, dan ibri kresten di gi ensrefi abra èn di teki dopoe moesoe de klariklari foe gi krin èn positief boeweisi taki a de troetroe wan bedinari foe a boen njoensoe (1 Petrus 3:15). A diniwroko foe en moesoe de foe si toe na ini a fasi fa a e tjari ensrefi. Leki wan bedinari foe Gado, wan kresten moesoe horibaka gi èn waka na baka krin gwenti nanga wet, a moesoe hori na osofamiri wánfasi hei, de eerlijk, èn sori lespeki gi wet nanga òrde (Romesma 12:17, 18; 1 Tesalonikasma 5:15). A matifasi di wan kresten abi nanga Gado èn a diniwroko di Gado gi en foe doe, na den moro prenspari sani na ini en libi. A no kan tapoe nanga den sani disi foe di caesar gi komando. A de krin, taki wi moesoe si den so srefi leki „den sani di de foe Gado”.

„Den sani di de foe caesar”

7. San na a nen di Jehovah Kotoigi e tjari ini a tori foe a pai foe belasting?

⁷ Jehovah Kotoigi sabi taki den moesoe „saka densrefi na ondro den hei tirimakti”, den tiriman foe lanti (Romesma 13:1). Dati meki te caesar, lanti, e aksi sani di a abi a reti foe aksi, dan a konsensi foe den di kweki nanga jepi foe bijbel, e gi den pasi foe doe den sani disi. Foe eksempre, troe kresten de na ondro den moro boen eksempre na grontapoe foe sma di e pai belasting. Na Doisrikondre, a koranti Münchner Merkur ben taki foe Jehovah Kotoigi: „Den na den moro eerlijk sma ini a Bonds Republiek, di e pai belasting biten.” Na Italia, a koranti La Stampa ben taki: „Den [Jehovah Kotoigi] na den moro loyaal borgoe di sma ben sa wani abi: den no e dòk gi belasting noso e soekoe foe wai pasi gi froeferi wet, foe den eigi boen ede.” Den foetoeboi foe Jehovah e doe disi ’foe den konsensi ede’. — Romesma 13:5, 6.

8. Den sani di wi moesoe gi caesar, na soso a pai foe belastingmoni?

⁸ Den „sani di de foe caesar” de soso a pai foe belasting? Nôno. Paulus ben kari tra sani, soleki frede nanga grani. Na ini en boekoe Critical and Exegetical Hand-Book to the Gospel of Matthew, a Doisri sabiman Heinrich Meyer ben skrifi: „Nanga [den sani di de foe caesar] . . . wi no moesoe froestan belasting nomo, ma ala sani di caesar abi a reti foe aksi, na tapoe a gron foe en reti tiri.” Historia skrifiman E. W. Barnes, ben taki na ini en boekoe The Rise of Christianity, dati wan kresten ben sa pai belasting efoe a ben moesoe doe dati, èn „na a srefi fasi a e teki ala tra froeplekti foe lanti, efoe dati no ben aksi foe en taki a ben moesoe gi caesar den sani di de foe Gado”.

9, 10. Sortoe moeiti wan kresten ben sa kan abi foe pai caesar den sani baka di a moesoe kisi, ma sortoe troetori a kresten moesoe hori na prakseri?

⁹ Sortoe sani lanti ben sa kan aksi sondro foe kon na mindri den sani di troetroe de foe Gado? Son sma ben denki taki den ben kan abi a reti foe gi caesar noti moro leki moni ini a fasi foe belasting. A de seiker taki den ben sa firi froeferi foe gi caesar wan sani di ben sa teki a ten di den ben kan gebroiki foe theokrasia wroko. Ma tokoe, ala di a troe taki wi moesoe ’lobi Jehovah wi Gado nanga wi heri ati, sili, froestan nanga krakti’, tokoe Jehovah e froewakti foe wi foe gebroiki ten na tra sani leki soso wi santa diniwroko (Markus 12:30; Filipisma 3:3). Foe eksempre, wan kresten di trow, e kisi a rai foe gi ten na a plisi di a moesoe plisi a trowpatna foe en. A no wan fowtoe sani foe doe den sani disi, ma na apostel Paulus e taki dati den na „den sani di de foe grontapoe”, no „den sani di de foe Masra”. — 1 Korentesma 7:32-34; teki gersi 1 Timoteus 5:8.

¹⁰ Moro fara, Krestes ben gi den bakaman foe en a komando foe „pai [belasting] baka”, èn disi seiker wani taki foe gebroiki ten di gi na Jehovah — foe di wi gi ala wi ten na Gado. Efoe a gemiddelde belasting na wan kondre na 33 procent foe a moni di wan sma e kisi (a de moro hei na son kondre), dan disi wani taki dati ibri jari moro foeroe wrokoman e pai a goedoekisi foe lanti a waarde foe a moni di den e wroko na ini fo moen. Poti en na wan tra fasi, na a kaba foe ala a ten di moro foeroe wrokoman wroko na ini den libi, den sa gebroiki so wan 15 jari foe wroko gi a belasting moni di „caesar” wani. Loekoe so srefi, a tori foe teki leri. Na moro foeroe kondre a wet e aksi, taki papa nanga mama moesoe meki den pikin foe den go na skoro foe wan seiker nomroe jari. Na ibri kondre, den jari di wan sma moesoe go na skoro e difrenti. Na moro foeroe presi disi e teki troetroe wan langa ten. A troe, taki nofo tron a e tjari wini kon foe teki a leri dati, ma na caesar e teki a bosroiti omeni ten foe en libi wan pikin moesoe gebroiki na a fasi disi, èn kresten papa nanga mama e gi jesi na a bosroiti disi foe caesar.

Froeplekti sroedatiwroko

11, 12. (a) Sortoe sani caesar e aksi foe sma na foeroe kondre? (b) Fa den fositen kresten ben si sroedatiwroko?

¹¹ Wan tra sani di caesar e aksi na son kondre, na froeplekti sroedatiwroko. Na ini a di foe 20 jarihondro, na moro foeroe nâsi den poti a seti disi na ini ten foe feti èn na son nâsi na ini ten foe vrede toe. Na Fransikondre, den ben kari a froeplekti disi foeroe jari broedoe belasting, san wani taki dati ibri jongoe man ben moesoe de klariklari foe gi en libi na lanti. Disi na wan sani di den wan di gi densrefi abra na Jehovah, kan doe akroederi den konsensi? Fa den fosi jarihondro kresten ben si a tori disi?

¹² Ala di den fositen kresten ben doe moeiti foe de boen borgoe, tokoe a bribi foe den ben tapoe den foe teki wan tra sma libi noso foe gi den eigi libi foe lanti ede. The Encyclopedia of Religion e taki: „Den fositen kerki fesiman, so srefi Tertullianus nanga Origenes, ben erken taki kresten no ben kisi pasi foe teki wan sma libi, wan gronprakseri di ben tapoe den foe teki prati na ini a legre foe Rome.” Profesor C. J. Cadoux e skrifi na ini en boekoe The Early Church and the World: „Awansi fa a no fa, te leki a tiri foe Markus Aurelius [161-180 G.T.], no wan kresten ben sa tron wan sroedati baka en dopoe.”

13. Foe san ede moro foeroe sma foe krestenhèit no e si sroedatiwroko soleki fa den fositen kresten ben si dati?

¹³ Foe san ede memre foe den kerki foe krestenhèit no e denki so foe a tori na ini a ten disi? Foe di wan bigi kenki ben kon na ini a di foe fo jarihondro. A Katolik boekoe A History of the Christian Councils e tjari kon na krin: „Foeroe kresten, . . . di ben de na ondro a tiri foe heiden kèiser, ben abi, foe relisi reide ede, moeiti nanga sroedatiwroko, èn den ben weigri krinkrin foe dini leki wan sroedati, noso den ben gowe libi a legre sondro primisi. A Kerki Konmakandra [foe Arles, di ben hori na ini 314 G.T.], ben go loekoe den kenki di Constantijn ben tjari kon na fesi, èn den ben poti a froeplekti taki kresten moesoe go ini feti, . . . foe di Kerki de ini vrede (in pace) nanga lanti di de na ondro a tiri foe wan granman di abi switifasi gi kresten.” Wan bakapisi foe a libi di den libi den leri foe Jesus foe sensi a ten dati te leki now, ben de, taki den tiriman foe krestenhèit gi den ipi foe den deki-ati foe dini ini den legre foe den nâsi, ala di son sma teki wan bosroiti leki sma di, foe den konsensi ede, weigri foe de sroedati.

14, 15. (a) Na tapoe sortoe gron, kresten na son presi e aksi primisi foe no doe sroedatiwroko? (b) Sortoe bijbel gronprakseri sa jepi wan kresten foe teki wan joisti bosroiti ini a tori foe sroedatiwroko, te a no man kisi primisi foe no doe sroedatiwroko?

¹⁴ Kresten na ini a ten disi de froeplekti foe doe san moro foeroe sma e doe ini a tori disi? Nôno. Efoe wan kresten di gi ensrefi abra èn teki dopoe, e libi na wan kondre pe den e gi bedinari foe relisi primisi foe no doe sroedatiwroko, dan a kan gebroiki a seti disi boen, bika te joe e loekoe en boen, a de wan bedinari (2 Timoteus 4:5). Wan lo kondre, so srefi Amerkankondre nanga Australia, gi primisi foe disi, srefi na ini fetiten. Èn na ini ten foe vrede, na foeroe kondre di tan abi froeplekti sroedatiwroko, Jehovah Kotoigi, leki bedinari foe relisi, e kisi primisi foe no doe sroedatiwroko. So boen, den kan go doro foe jepi sma nanga a poebliki diniwroko di den e doe.

¹⁵ Ma san efoe a kresten e libi na wan kondre pe den no e gi bedinari foe relisi primisi foe no doe sroedatiwroko? Dan a moesoe teki wan persoonlijk bosroiti tapoe a gron foe en konsensi di kweki nanga jepi foe bijbel (Galasiasma 6:5). Ala di a e hori a makti foe caesar na prakseri, tokoe a sa loekoe finifini san a moesoe gi Jehovah (Psalm 36:9; 116:12-14; Tori foe den Apostel 17:28). A kresten sa memre taki a marki foe wan troe kresten na lobi gi ala en kompe bribiman, srefi den wan di e libi na tra kondre noso den wan di de foe tra lo (Johanes 13:34, 35; 1 Petrus 2:17). Moro fara, a no sa frigiti den bijbel gronprakseri di de foe feni na ini den tekst leki Jesaja 2:2-4; Mateus 26:52; Romesma 12:18; 14:19; 2 Korentesma 10:4; nanga Hebrewsma 12:14.

Lantiwroko

16. Na son kondre, sortoe wroko di no de sroedatiwroko, caesar e aksi foe den wan di no e teki sroedatiwroko?

¹⁶ Ma kondre de pe lanti, ala di a no e gi bedinari foe relisi primisi foe no doe sroedatiwroko, tokoe e erken taki son sma kan weigri foe doe sroedatiwroko. Foeroe foe den kondre disi e seti sani taki den no e dwengi den sortoe opregti sma disi foe doe sroedatiwroko. Na son presi den e si a lantiwroko di wan sma moesoe doe, soleki wroko di e doe foe a boen foe a libimakandra, leki wroko gi a kondre di no de sroedatiwroko. Wan kresten di gi ensrefi abra, kan doe so wan wroko? Djaso baka, wan kresten di gi ensrefi abra èn di teki dopoe ben sa moesoe teki en eigi bosroiti tapoe a fondamenti foe en konsensi di kweki nanga jepi foe bijbel.

17. Wan sani skrifi noso pasa na ini bijbel di kan dini leki wan eksempre foe regtfardiki a teki di wan sma e teki lantiwroko di no de sroedatiwroko?

¹⁷ A gersi taki froeplekti wroko ben doe na ini bijbel ten. Wán historia boekoe e taki: „Boiti den belasting nanga den plekti di den ben aksi foe den sma di ben libi na Judea, joe ben abi wroko toe [di sma no ben kisi pai foe dati] di poebliki makti ben aksi sma foe doe ini a presi foe belasting. Disi ben de wan owroeten seti na a Mindri Owstoesei, di den Griki tirimakti nanga den di foe Rome ben tan doe. . . . A Njoen Testamenti, so srefi, e taki foe eksempre foe a froeplekti wroko disi na Judea, èn disi e sori o foeroe a ben doe. Akroederi a gwenti disi, den sroedati ben dwengi Simon foe Sireine foe tjari a kroisi [pina postoe] foe Jesus (Mateus 5:41; 27:32; Markus 15:21; Lukas 23:26).”

18. Na sortoe wroko gi a libimakandra, di no de sroedatiwroko, èn di no abi foe doe nanga relisi, Jehovah Kotoigi e teki prati nofo tron?

¹⁸ Na so a de toe na son kondre na ini a ten disi, taki lanti noso wan tirimakti foe wan presi, e aksi foe sma foe teki prati na difrenti wroko gi a libimakandra. Son tron, disi de foe wan spesroetoe wroko, soleki a diki foe peti noso a bow foe pasi; son tron a de wroko di moesoe doe doronomo, soleki a krin di den moesoe krin pasi, skoro noso ati-oso ala wiki. Pe a sortoe lantiwroko dati de foe a boen foe a libimakandra èn a no abi foe doe nanga falsi relisi noso a no de kontrari a konsensi foe Jehovah Kotoigi na a wán noso tra fasi, dan den nofo tron ben gi jesi na dati (1 Petrus 2:13-15). Foeroe tron disi ben abi leki bakapisi taki wan boen kotoigi gi èn son tron a tapoe a mofo foe den wan di e kon nanga falsi kragi taki den Kotoigi de kontrari lanti. — Teki gersi Mateus 10:18.

19. Fa wan kresten moesoe handri a tori te caesar e aksi en foe doe foe wan pisi ten, wroko gi a kondre di no de sroedatiwroko?

¹⁹ Ma san efoe lanti e aksi foe wan kresten foe doe foe wan pisi ten, lantiwroko di de wan pisi foe wroko gi a kondre na ondro a tiri foe borgoe? Djaso baka, kresten moesoe teki den eigi bosroiti di abi en fondamenti na tapoe wan konsensi di kisi boen leri. „Wi alamala sa tanapoe na fesi a kroetoestoeroe foe Gado” (Romesma 14:10). Kresten di e kisi foe doe nanga wan sani di caesar e aksi, moesoe loekoe a tori na ondro begi èn prakseri dipi foe disi.a Kande a de wan koni sani toe foe taki foe a tori nanga lepi kresten na ini a gemeente. Baka disi, wan persoonlijk bosroiti moesoe teki. — Odo 2:1-5; Filipisma 4:5.

20. Sortoe aksi nanga bijbel gronprakseri e jepi wan kresten foe prakseri foe a tori foe lantiwroko di no de sroedatiwroko?

²⁰ Te kresten e ondrosoekoe den sani disi, dan den ben sa wani loekoe wan toe bijbel gronprakseri. Paulus ben taki dati wi moesoe „gi jesi na tiri èn na tirimakti leki tiriman, . . . de klariklari foe doe ibri boen wroko . . . de reidelek, sori safoefasi na ala sma” (Titus 3:1, 2). Na a srefi ten, a ben sa de boen efoe kresten ondrosoekoe a lantiwroko di den aksi den foe doe. Den sa man tan neutraal leki kresten, te den e teki a wroko disi? (Mika 4:3, 5; Johanes 17:16) Den ben sa kisi foe doe nanga a wán noso tra falsi relisi? (Openbaring 18:4, 20, 21) Efoe den ben sa doe disi, dan dati ben sa tapoe den noso skotoe den na wan onreidelek fasi foe doe den kresten frantiwortoe foe den? (Mateus 24:14; Hebrewsma 10:24, 25) Na a tra sei, den ben sa man tan go na fesi na jejefasi, èn kande teki prati na a foeroeten diniwroko srefi ala di den e doe a wroko di lanti e aksi foe den foe doe? — Hebrewsma 6:11, 12.

21. Fa a gemeente moesoe si wan brada di e handri a tori foe lantiwroko di no de sroedatiwroko, awansi sortoe bosroiti a e teki?

²¹ San efoe den eerlijk piki di a kresten e gi na tapoe den sortoe aksi disi, e meki en kon na a bosroiti taki a lantiwroko de wan „boen wroko” di a kan doe foe gi jesi na den tirimakti? Dati na en bosroiti na fesi foe Jehovah. Owroeman di poti na wroko èn tra sma moesoe lespeki a konsensi foe a brada dorodoro èn tan si en leki wan kresten di abi wan boen nen. Ma efoe wan kresten feni taki a no kan doe a lantiwroko disi, dan sma moesoe lespeki en fasi foe handri toe. En toe tan abi wan boen nen èn a moesoe kisi lobi-ati jepi. — 1 Korentesma 10:29; 2 Korentesma 1:24; 1 Petrus 3:16.

22. San wi sa tan doe, awansi nanga sortoe situwâsi wi e kisi foe doe?

²² Leki kresten wi no sa tapoe foe gi „a sma di e aksi grani, a grani dati” (Romesma 13:7). Wi sa lespeki boen òrde èn doe moeiti foe de borgoe di lobi vrede, èn di e gi jesi na wet (Psalm 34:14). Wi kan begi srefi „gi kownoe nanga ala den wan di abi wan hei posisi” te den sma disi moesoe teki wan bosroiti di abi krakti na tapoe wi kresten libi nanga wroko. Leki wan bakapisi foe a pai di wi e pai caesar den sani baka di de foe caesar, wi e howpoe taki „wi kan tan libi wan tiri libi sondro broeja nanga a gi di wi gi wisrefi na ini a dini foe Gado dorodoro èn na wan serjoesoe fasi” (1 Timoteus 2:1, 2). Ma a moro prenspari sani de, taki wi sa wani go doro foe preiki a boen njoensoe foe a Kownoekondre leki a wan-enkri howpoe foe a libisma famiri, ala di, akroederi a konsensi, wi pai Gado den sani baka di de foe Gado.

[Foetoewortoe]

Joe kan tjari disi kon na krin?

◻ San na a moro prenspari sani di wan kresten moesoe hori na prakseri, te a e hori a balansi na ini a fasi fa a de nanga caesar nanga a matifasi di a abi nanga Jehovah?

◻ San wi moesoe gi Jehovah di wi noiti kan gi caesar?

◻ San na wan toe sani di fiti foe wi gi dati baka na caesar?

◻ Sortoe bijbel tekst e jepi wi foe teki wan joisti bosroiti ini a tori foe froeplekti sroedatiwroko?

◻ San na wan toe sani foe hori na prakseri efoe den aksi foe wi foe doe lantiwroko di no de sroedatiwroko?

◻ San wi e tan doe ini a tori foe Jehovah nanga caesar?

[Prenki na tapoe bladzijde 16]

Den apostel ben taigi a Sanhedrin: „Wi moesoe gi jesi na Gado leki tiriman moro leki na libisma”