Leisi Gado Wortoe èn dini en na ini waarheid
„Leri mi, o Jehovah foe den pasi foe joe. Mi sa waka na ini joe waarheid.” — PSALM 86:11.
1. San a fosi uitgave foe a tijdschrift disi ben taki foe a waarheid, foe taki en leti?
JEHOVAH e skèin leti nanga waarheid kon (Psalm 43:3). A e gi wi a koni toe foe man leisi en Wortoe, bijbel, èn leri a waarheid. A fosi uitgave foe a tijdschrift disi — juli 1879 — ben taki: „Na lontoe waarheid, di de leki wan bescheiden pikin bromki na ini a bigi boesi foe libi, takroe wiwiri foe leitori e gro boen foeroe, èn pikinmoro disi e tjokro en kiri. Te joe wani feni en, dan joe moesoe de na ai ala ten. Te joe wani si a moi foe en, dan joe moesoe wai den takroe wiwiri foe leitori nanga den makaboesi foe a froedrage di sma no e froedrage, na wan sei. Te joe wani abi en, dan joe moesoe saka joesrefi foe kisi en. No de tevrede nanga wán bromki foe waarheid. Efoe wán nomo ben de nofo dan moro no ben o de. Tan tjari moro kon na wán, soekoe moro.” Foe leisi èn studeri Gado Wortoe e meki taki wi man kisi soifri sabi èn waka na ini en waarheid. — Psalm 86:11.
2. San ben de a bakapisi di Esra nanga trawan ben leisi a Wet foe Gado gi den djoe na Jerusalem foe owroeten?
2 Baka di den skotoe foe Jerusalem ben bow baka na ini 455 b.G.T., dan a priester Esra nanga trawan ben leisi a Wet foe Gado gi den djoe. Baka disi den ben abi wan prisiri Wiwirikampoe-fesa, a bekènti foe sondoe, èn na a kaba „wan seti di de foe froetrow” (Nehemia 8:1–9:38). Wi e leisi: „Èn den ben tan leisi nanga wan tranga sten na ini a boekoe, na ini a wet foe a troe Gado, èn den ben tjari en kon na krin, èn drape den ben sori san a wani taki; èn den ben tan meki sma kon froestan san den ben leisi” (Nehemia 8:8). Son sabiman e taki dati den djoe no ben froestan Hebrewtongo boen èn taki den ben tjari pisi foe a tekst kon na krin na ini Arameisitongo. Ma a tekst no e sori taki a ben de a tjari di den ben tjari a Hebrewtongo kon na krin nomo. Esra nanga den trawan ben tjari a Wet kon na krin, so taki a pipel ben kan froestan den gronprakseri foe en èn gebroiki den na ini den libi. Kresten poeblikâsi nanga konmakandra de toe foe ’sori san Gado Wortoe wani taki’. Na so owroeman di poti na wroko, èn di „abi a koni foe gi leri, e doe”. — 1 Timoteus 3:1, 2; 2 Timoteus 2:24.
Wini di e tan
3. San na wan toe wini di wi kan kisi te wi e leisi bijbel?
3 Te kresten osofamiri e leisi bijbel makandra, dan soleki fa a sori den sa ondrofeni wini di e tan. Den e kon sabi den wet foe Gado èn e leri a waarheid foe den gronleri, den profeititori, nanga tra tori. Baka te den leisi wan pisi foe bijbel, dan na edeman foe na osofamiri ben sa kan aksi: Fa disi moesoe abi krakti na wi tapoe? Na sortoe fasi disi abi foe doe nanga tra bijbel leri? Fa wi kan gebroiki den penti disi te wi e preiki a boen njoensoe? Wan osofamiri e kisi moro inzicht te den e leisi bijbel, efoe den e go ondrosoekoe sani foe di den e gebroiki na Index van Wachttoren- publikaties noso tra index. Den toe pisi foe Insight on the Scriptures kan gebroiki foe loekoe san den e taki, èn disi e tjari boen bakapisi.
4. Fa Josua ben moesoe gebroiki a komando di skrifi na ini Josua 1:8?
4 Gronprakseri di teki foe den Boekoe foe bijbel kan tjari wi na ini libi. Boiti dati, foe leisi èn studeri ’den santa Boekoe, di kan meki wi kon koni foe kisi froeloesoe’ (2 Timoteus 3:15). Efoe wi e meki Gado Wortoe tjari wi, dan wi sa tan waka na ini en waarheid èn den opregti angri foe wi sa kon troe (Psalm 26:3; 119:130). Ma wi moesoe soekoe froestan, soleki fa Josua, a sma di ben kon baka Moses, ben doe. A „wetboekoe” no ben komoto na en mofo, èn a ben moesoe leisi na ini en dei nanga neti (Josua 1:8). Foe no meki a „wetboekoe” komoto na en mofo ben wani taki dati Josua no ben moesoe tapoe foe froeteri trawan den sani di a wetboekoe ben tjari kon na krin. Foe leisi a Wet dei nanga neti ben wani taki dati Josua ben moesoe prakseri dipi foe en, a ben moesoe studeri en. Na a srefi fasi na apostel Paulus ben gi Timoteus tranga foe „denki dipi foe” — prakseri dipi foe — en waka nanga libi, en diniwroko, nanga a fasi fa a ben gi leri. Leki wan kresten owroeman, Timoteus ben moesoe loekoe boen spesroetoe, taki en libi ben de wan eksempre èn taki a ben leri bijbel waarheid. — 1 Timoteus 4:15.
5. San de fanowdoe te wi wani feni a waarheid foe Gado?
5 A waarheid foe Gado na wan diri goedoe. Foe feni en wani taki foe diki, foe ondrosoekoe den Boekoe foe bijbel doronomo. Soso leki studenti foe a Gran Leriman, neleki pikin-nengre, wi e kisi koni èn e kon froestan a lespeki frede gi Jehovah (Odo 1:7; Jesaja 30:20, 21). A no de foe taki, dati wi moesoe boeweisi sani nanga jepi foe bijbel (1 Petrus 2:1, 2). Den djoe na Berea „ben de moro boen na jejefasi leki den wan di ben de na Tesalonika, bika den ben teki a wortoe nanga a moro bigi jeje angri èn ala dei den ben ondrosoekoe den Boekoe foe bijbel finifini foe si efoe den sani disi [di Paulus ben taki] ben de so troetroe”. A ben prèise den Bereasma na presi taki a ben piri-ai gi den foe di den ben doe disi. — Tori foe den Apostel 17:10, 11.
6. Foe san ede Jesus ben kan sori taki na ondrosoekoe di son djoe ben ondrosoekoe den Boekoe foe bijbel, no ben tjari wini kon gi den?
6 Jesus ben taigi son djoe: „Oenoe e ondrosoekoe den Boekoe foe bijbel, foe di oenoe e denki taki nanga jepi foe den oenoe sa kisi têgo libi; èn joisti den disi na den wan di e kotoigi foe mi. Èn tokoe oenoe no wani kon na mi so taki oenoe kan abi libi” (Johanes 5:39, 40). Den ben ondrosoekoe den Boekoe foe bijbel nanga a joisti marki na prakseri — so taki den ben kan tjari den go na libi. Ija, den Boekoe foe bijbel ben abi den profeititori foe a Mesias na ini di ben sori go na Jesus leki a sma di ben kan gi libi. Ma den djoe ben drai den baka gi en. Na ondrosoekoe di den ben ondrosoekoe den Boekoe foe bijbel no ben tjari wini kon gi den, so boen.
7. San de fanowdoe foe kisi moro froestan foe bijbel, èn foe san ede?
7 Te wi wani gro ini a froestan di wi e froestan bijbel, dan wi abi tiri foe Gado jeje noso wroko krakti, fanowdoe. „A jeje e ondrosoekoe ala sani, srefi den dipi sani foe Gado” foe kan tjari kon na krin san den wani taki (1 Korentesma 2:10). Kresten na Tesalonika ben moesoe „overtoigi densrefi foe ala sani”, foe iniwan profeititori di den ben jere (1 Tesalonikasma 5:20, 21). Di Paulus ben skrifi den Tesalonikasma (na wan sani foe 50 G.T.), dan a wan-enkri pisi foe den Griki Boekoe foe bijbel di ben skrifi kaba, ben de na Evangelie foe Mateus. So boen den Tesalonikasma nanga den Bereasma ben kan overtoigi densrefi foe ala sani, kande foe di den ben ondrosoekoe a Griki Septuaginta vertaling foe den Hebrew Boekoe foe bijbel. Den ben moesoe leisi èn studeri den Boekoe foe bijbel, èn wi moesoe doe dati toe.
Toemoesi prenspari gi ala sma
8. Foe san ede owroeman di poti na wroko moesoe abi foeroe bijbel sabi?
8 Den owroeman di poti na wroko moesoe de boen srefisrefi ini a sabi foe bijbel. Den moesoe „abi a koni foe gi leri” èn den moesoe ’hori tranga na a getrow wortoe’. Na opziener Timoteus ben moesoe ’handri a wortoe foe waarheid na wan reti fasi’ (1 Timoteus 3:2; Titus 1:9; 2 Timoteus 2:15). Foe sensi en pikin-nengreten, en mama Eunice, nanga en granmama Lois, ben leri en den santa boekoe, èn ben e poti ’wan bribi [na ini en] di no e hoigri’, ala di en papa no ben de wan bribisma (2 Timoteus 1:5; 3:15). Papa di de na bribi moesoe kweki den pikin foe den „na ini a tranga leri èn serjoesoe froemane foe Jehovah”, èn spesroetoe den owroeman di de papa, moesoe abi ’pikin di de na bribi èn di no tranga jesi noso di sma no abi wan kragi teige en foe wan jajolibi ede’ (Efeisesma 6:4; Titus 1:6). Foe dati ede, awansi san na a situwâsi foe wi, tokoe wi moesoe teki a fanowdoe di a de fanowdoe foe leisi, studeri èn gebroiki Gado Wortoe, leki wan toemoesi serjoesoe sani.
9. Foe san ede wi moesoe studeri bijbel makandra nanga kompe kresten?
9 Wi moesoe studeri bijbel toe, makandra nanga kompe bribiman. Paulus ben wani taki den kresten foe Tesalonika taki nanga makandra foe en rai (1 Tesalonikasma 4:18). Te wi wani srapoe a froestan di wi abi foe a waarheid, dan no wan moro betre sani de leki foe moksi wisrefi nanga tra studenti di gi densrefi na ini na ondrosoekoe foe den Boekoe foe bijbel. Na odo disi de troe: „Nanga isri, isri srefi e kon srapoe. Na so wan man e srapoe a fesi foe wan trawan” (Odo 27:17). Wan isri wrokosani kan kon froestoe efoe sma no e gebroiki en èn no e srapoe en. Na so wi moesoe kon makandra doronomo èn srapoe makandra foe di wi e prati a sabi di wi kisi bika wi e leisi, e studeri, èn e prakseri dipi foe Gado Wortoe foe waarheid (Hebrewsma 10:24, 25). Boiti dati, disi na wán fasi foe overtoigi wisrefi taki wi e kisi wini foe a jeje leti di e skèin. — Psalm 97:11; Odo 4:18.
10. San a wani taki foe waka na ini waarheid?
10 Te wi e studeri den Boekoe foe bijbel, dan a fiti taki wi e begi na Gado soleki fa a psalm singiman ben doe: „Skèin joe leti nanga joe waarheid kon. Meki den disi srefi tjari mi” (Psalm 43:3). Efoe wi wani taki Gado feni wi boen, dan wi moesoe waka na ini en waarheid (3 Johanes 3, 4). Disi wani taki toe, dati wi moesoe hori wisrefi na den markitiki foe en èn dini en getrow èn opregti (Psalm 25:4, 5; Johanes 4:23, 24). Wi moesoe dini Jehovah na ini waarheid, soleki fa tjari kon na krin na ini en Wortoe èn na ini den poeblikâsi foe „a getrow èn koni srafoe” (Mateus 24:45-47). Disi wani taki soifri sabi foe den Boekoe foe bijbel. Ma fa wi moesoe leisi èn studeri Gado Wortoe dan? Wi moesoe bigin leisi en foe Genesis kapitel 1, vers 1, nanga ala den 66 boekoe baka makandra? Ija, ibri kresten di abi heri bijbel na ini en tongo moesoe leisi en foe Genesis te go miti Openbaring. Èn te wi e leisi bijbel nanga kresten poeblikâsi, dan a marki foe wi moesoe de foe kon froestan moro foe a bigi ipi foe bijbel waarheid di Gado gi nanga jepi foe a ’getrow srafoe’.
Leisi Gado Wortoe nanga wan tranga sten
11, 12. Foe san ede a de wan boen sani foe meki den leisi bijbel nanga wan tranga sten na den konmakandra?
11 Wi kan leisi na wan tirifasi te wi de wi wawan. Ma na ini owroeten, sma ben leisi nanga wan tranga sten te den ben de den wawan. Di na Etiopia eunuch ben rèi na ini en wagi, dan na so na evangelie preikiman Filipus ben jere en leisi foe a profeititori Jesaja (Tori foe den Apostel 8:27-30). A Hebrew wortoe di vertaal nanga „leisi”, moro foeroe wani taki foe „kari”. So boen den wan di fosi no ben man leisi na wan tirifasi èn kon froestan san leisi wani taki, no moesoe lasi-ati foe di den e taki ibri wortoe nanga wan tranga sten. A moro prenspari sani na foe leri a waarheid foe di wi e leisi a skrifi Wortoe foe Gado.
12 A de wan boen sani taki bijbel e leisi nanga wan tranga sten na den kresten konmakandra. Na apostel Paulus ben gi en kompe wrokoman Timoteus tranga: „Go doro nanga a poti di joe e poti joesrefi na tapoe a leisi na poebliki, a gi foe froemane, a gi di joe e gi leri” (1 Timoteus 4:13). Paulus ben taigi den Kolosesma: „Te den leisi a brifi disi gi oenoe, dan seti sani taki a leisi toe na ini a gemeente foe den Laodiseasma èn taki oenoe e leisi a wan foe Laodisea toe” (Kolosesma 4:16). Èn Openbaring 1:3 e taki: „Kolokoe foe a sma di e leisi den wortoe foe a profeititori disi nanga wan tranga sten, èn den wan di e jere den, èn di e doe den sani di skrifi na ini; bika a fasti ten de krosibei.” Dati meki wan poebliki takiman moesoe leisi tekst foe bijbel foe horibaka gi san a e taigi wan gemeente.
A fasi foe studeri nanga jepi foe edeprakseri
13. San na a moro progresief fasi foe leri bijbel waarheid, èn san kan jepi wi foe feni bijbel tekst?
13 Studeri nanga jepi foe edeprakseri na a moro progresief fasi foe leri bijbel waarheid. Concordantie nanga bijbel wortoe di seti akroederi na alfabet èn di abi foe doe nanga makandra, èn di seti akroederi boekoe, kapitel nanga vers, e meki en makriki foe feni tekst di abi foe doe nanga wan spesroetoe tori. Èn den sortoe bijbel tekst dati kan kroederi nanga makandra foe di a Skrifiman foe bijbel no de kontrari ensrefi. Nanga jepi foe santa jeje, a ben meki so wan 40 man skrifi bijbel na ini wan pisi ten foe 16 jarihondro, èn foe studeri en nanga jepi foe edeprakseri, na wan fasi di ben sori foe de boen foe leri waarheid.
14. Foe san ede wi moesoe studeri den Hebrew nanga kresten Griki Boekoe foe bijbel nanga makandra?
14 A warderi di wi e warderi bijbel waarheid moesoe boeweigi wi foe leisi èn studeri den kresten Griki Boekoe foe bijbel makandra nanga den Hebrew Boekoe foe bijbel. Disi sa sori fa den Griki Boekoe foe bijbel abi foe doe nanga a prakseri foe Gado èn den sa trowe leti na tapoe den profeititori na ini den Hebrew Boekoe foe bijbel (Romesma 16:25-27; Efeisesma 3:4-6; Kolosesma 1:26). Wan sani di kan de wan heri boen jepi na a New World Translations of the Holy Scriptures (Njoen-Grontapoevertaling foe den Santa Boekoe foe bijbel). Foetoeboi foe Gado di gi densrefi abra, ben sreka en èn den ben meki boen gebroiki foe moro sabi di de foe a bijbel tekst di ben de biginbigin, èn so srefi foe en historia nanga a spesroetoe fasi fa sani e taki. San de toemoesi prenspari toe na den bijbelstudie jepisani di Jehovah gi nanga jepi foe „a getrow èn koni srafoe”.
15. Fa joe ben sa boeweisi taki a fiti foe teki tekst foe difrenti pisi na ini bijbel?
15 Son sma kan taki: ’Den poeblikâsi foe oenoe e teki doesoendoesoen tekst foe bijbel, ma foe san ede oenoe e teki den foe difrenti pisi foe bijbel?’ Foe di den poeblikâsi e gebroiki tekst foe difrenti pisi foe den 66 boekoe foe bijbel, meki den e poti prakseri na tapoe difrenti kotoigi di ben de na ondro a krakti foe santa jeje, foe boeweisi a troefasi foe wan leri. Jesus srefi ben gebroiki a fasi disi foe gi leri. Di a ben gi en Bergitaki, a ben teki 21 tekst foe den Hebrew Boekoe foe bijbel. A taki dati abi dri pisi di teki foe Exodus, toe foe Lefitikus, wán foe Numeri, siksi foe Deuteronomium, wán foe Toe Kownoe, fo foe Psalm, dri foe Jesaja, nanga wán foe Jeremia. Jesus ben ’proeberi foe boeweisi wan sani nomo’, foe di a ben doe disi? Nôno, bika ’a ben gi leri leki wan sma di abi makti èn no leki den leriman foe wet’. Dati ben de so foe di Jesus ben horibaka gi a leri di a ben gi nanga jepi foe a skrifi Wortoe foe Gado (Mateus 7:29). Dati na san na apostel Paulus ben doe toe.
16. Sortoe tekst foe bijbel Paulus ben teki skrifi na ini Romesma 15:7-13?
16 Na ini den bijbel tekst di de foe feni na ini Romesma 15:7-13, Paulus ben teki tekst foe dri pisi foe den Hebrew Boekoe foe bijbel — a Wet, den Profeiti, nanga den Psalm. A ben sori taki djoe nanga heiden ben o gi Gado glori, èn dati meki kresten moesoe erken sma foe ala nâsi. Paulus ben taki: „Erken makandra, neleki fa Krestes ben erken wi, nanga a glori foe Gado na prakseri. Bika mi e taki dati Krestes troetroe ben tron wan bedinari foe den wan di besnij foe a troefasi foe Gado ede, so taki a ben kan meki den sani di A ben pramisi den afo foe den, kon troe, èn taki den nâsi ben sa kan gi Gado glori foe di a abi sari-ati. Soleki fa a skrifi [na ini Psalm 18:49]: ’Dati meki na poebliki mi sa erken joe na mindri den nâsi èn gi joe nen mi sa plèi pokoe.’ Èn ete wan tron a e taki [na ini Deuteronomium 32:43]: ’Prisiri, oen nâsi, nanga en pipel.’ Èn ete wan tron [na ini Psalm 117:1]: ’Prèise Jehovah, ala oen nâsi, èn meki ala pipel prèise en.’ Èn ete wan tron Jesaja [11:1, 10] e taki: ’A roetoe foe Isa-i sa de, èn wan sma sa opo kon foe tiri den nâsi; na tapoe en den nâsi sa poti a howpoe foe den.’ Meki a Gado di e gi howpoe, foeroe oenoe nanga ala prisiri nanga vrede, foe di oenoe e bribi, so taki oenoe kan kisi howpoe pasa marki nanga a krakti foe santa jeje.” Nanga a fasi disi foe gebroiki edeprakseri, Paulus ben sori fa foe teki bijbel tekst, foe poti wan fondamenti gi bijbel waarheid.
17. Akroederi sortoe eksempre kresten e teki tekst foe difrenti presi na ini bijbel?
17 A fosi brifi foe na apostel Petrus di skrifi na ondro krakti foe santa jeje abi 34 tekst di teki foe tin boekoe na ini a Wet, den Profeiti, nanga den Psalm. Siksi tron Petrus e teki tekst foe dri boekoe, poti na ini en di foe toe brifi. Na Evangelie foe Mateus abi 122 tekst di teki foe Genesis te go miti Maleaki. Na ini den 27 Griki Boekoe foe bijbel, 320 tekst de di teki langalanga foe Genesis te go miti Maleaki, so srefi hondrohondro tra tekst di e sori go na den Hebrew Boekoe foe bijbel. Akroederi na eksempre di Jesus ben gi èn di den apostel foe en ben waka na baka, dan te kresten na ini a ten disi e studeri wan bijbel tori nanga jepi foe edeprakseri, dan den e teki tekst foe difrenti pisi na ini heri bijbel. Disi fiti spesroetoe na ini den „lasti dei” disi, pe a moro bigi pisi foe den Hebrew nanga Griki Boekoe foe bijbel e kon troe (2 Timoteus 3:1). Ini den poeblikâsi foe den, a ’getrow srafoe’ e gebroiki bijbel na a fasi disi, ma noiti a e poti sani na a Wortoe foe Gado noso e poeroe sani foe en. — Odo 30:5, 6; Openbaring 22:18, 19.
Waka na ini waarheid ala ten
18. Foe san ede wi moesoe ’waka na ini waarheid’?
18 Wi no moesoe poeroe no wan sani foe bijbel, bika ala den kresten leri na ini a Wortoe foe Gado, na „a waarheid” noso „a waarheid foe a boen njoensoe”. Foe hori na a waarheid disi — „waka” na ini en — de prenspari foe kisi froeloesoe (Galasiasma 2:5; 2 Johanes 4; 1 Timoteus 2:3, 4). Foe di krestendom na „a pasi foe waarheid”, dan te wi e jepi trawan foe horibaka gi den afersi foe en, wi e tron „kompe wrokoman na ini waarheid”. — 2 Petrus 2:2; 3 Johanes 8.
19. Fa wi kan „go doro foe waka na ini waarheid”?
19 Efoe wi wani „go doro foe waka na ini waarheid”, dan wi moesoe leisi bijbel èn gebroiki a jepi na jejefasi di Gado e gi nanga jepi foe a ’getrow srafoe’ (3 Johanes 4). Meki wi doe disi foe wi eigi boen èn so taki wi kan leri trawan foe Jehovah Gado, Jesus Krestes, nanga a prakseri foe Gado. Èn meki wi de nanga tangi taki a jeje foe Jehovah e jepi wi foe froestan en Wortoe èn foe abi boen bakapisi nanga a dini di wi e dini en na ini waarheid.
San joe e piki?
◻ San na wan toe wini di e tan te wi e leisi bijbel?
◻ Foe san ede wi moesoe studeri bijbel makandra nanga kompe bribiman?
◻ Foe san ede a fiti foe teki tekst foe difrenti presi na ini bijbel?
◻ San a wani taki foe ’waka na ini waarheid’, èn fa wi kan doe disi?
[Prenki na tapoe bladzijde 29]
Papa nanga mama, leri den pikin foe oenoe den Boekoe foe bijbel
[Prenki na tapoe bladzijde 31]
Na ini en Bergitaki, Jesus ben teki tekst foe difrenti pisi foe den Hebrew Boekoe foe bijbel