A bigi jeje tempel foe Jehovah
„Wi abi so wan granpriester leki a wan disi, . . . wan poebliki foetoeboi foe a santa presi èn foe a troe tenti, di Jehovah ben seti, èn no libisma.” — HEBREWSMA 8:1, 2.
1. Sortoe lobi-ati sani Gado ben seti gi a sondoe libisma famiri?
FOE DI Jehovah Gado abi boen foeroe lobi gi a libisma famiri, meki a ben gi wan srakti-ofrandi foe poeroe den sondoe foe grontapoe (Johanes 1:29; 3:16). Disi ben wani taki, dati a libi foe en fosi gebore Manpikin na hemel ben moesoe tjari go abra na ini a bere foe wan djoe njoenwenke di ben nen Maria. Na engel foe Jehovah ben tjari boen kon na krin gi Maria taki den ben sa „kari” a pikin di a ben sa kisi, „santa, a Manpikin foe Gado” (Lukas 1:34, 35). Den ben taigi Josef, di ben meki mofo foe trow nanga Maria, foe a froewondroe fasi fa Jesus ben o gebore èn a ben kon sabi taki a wan disi ben sa „froeloesoe en pipel foe den sondoe foe den”. — Mateus 1:20, 21.
2. San Jesus ben doe di a ben abi so wan 30 jari, èn foe san ede?
2 Di Jesus ben gro kon bigi, a ben moesoe foe froestan wan toe foe den tori disi foe a froewondroe fasi fa a ben gebore. A ben sabi taki en hemel Tata ben abi wan wroko gi en foe doe na grontapoe foe kibri sma libi. So boen, di Jesus ben de wan bigiman foe so wan 30 jari, a ben kon na Gado profeiti, Johanes, foe teki dopoe na ini Jordan liba. — Markus 1:9; Lukas 3:23.
3. (a) San Jesus ben wani taki nanga den wortoe „Srakti-ofrandi nanga ofrandi joe no ben wani”? (b) Sortoe toemoesi aparti eksempre Jesus ben gi ala den sma di wani tron disipel foe en?
3 Jesus ben e begi, di a ben teki dopoe (Lukas 3:21). A de krin, taki foe sensi a momenti disi ini en libi, a ben meki den wortoe foe Psalm 40:6-8 kon troe, soleki fa na apostel Paulus ben taki baka ten: „Srakti-ofrandi nanga a tjari foe ofrandi joe no ben wani, ma joe ben sreka wan skin gi mi” (Hebrewsma 10:5). Na so fasi Jesus ben sori taki a ben sabi taki Gado „no ben wani” sma tan òfer meti-ofrandi na a tempel na Jerusalem. Na presi foe dati, a ben kon froestan taki Gado ben sreka wan volmaakti libisma skin gi en, Jesus, foe òfer dati leki wan srakti-ofrandi. Disi ben sa meki taki a no ben de fanowdoe moro foe tjari meti-ofrandi. Jesus, di ben sori na wan opregti fasi taki a ben wani saka ensrefi na ondro a wani foe Gado, ben go doro foe begi: „Loekoe! Mi kon (na ini a lolo foe den boekoe den skrifi foe mi) foe doe joe wani, o Gado” (Hebrewsma 10:7). A dei dati, Jesus troetroe ben gi na ala den sma di baka ten ben tron disipel foe en, wan toemoesi moi eksempre foe deki-ati èn foe lespeki dini sondro foe wan sma e prakseri en wawan! — Markus 8:34.
4. Fa Gado ben sori taki a ben feni en boen taki Jesus ben gi ensrefi leki ofrandi?
4 Gado ben sori taki a ben feni a begi boen, di Jesus ben taki na en dopoe? Meki wan foe den apostel di Jesus froekisi, gi wi a piki: „Baka di Jesus teki dopoe, a ben opo komoto na a watra wantewante; èn, loekoe! hemel ben kon opo èn a ben si a jeje foe Gado e saka kon leki wan doifi èn kon na en tapoe. Loekoe! Wan sten ben komoto na hemel toe, di ben taki: ’Disi na mi Manpikin, a lobiwan, di mi feni boen.’” — Mateus 3:16, 17; Lukas 3:21, 22.
5. San a tempel altari di sma ben man si, ben prenki?
5 Taki Gado teki a pristeri di Jesus pristeri en skin leki wan srakti-ofrandi ben wani taki dati, na wan jeje fasi, wan altari di ben de moro bigi leki a wan na Jerusalem, ben kon de foe si. A troetroe altari pe den ben pristeri meti leki srakti-ofrandi, ben prenki a jeje altari dati na fesi, di, te joe loekoe en boen, ben de Gado „wani” noso a seti foe teki Jesus libisma libi leki wan srakti-ofrandi (Hebrewsma 10:10). Dati meki na apostel Paulus ben kan skrifi gi kompe kresten: „Wi abi wan altari di den wan di e doe santa diniwroko na ini a tenti [noso, tempel] no abi a reti foe njan foe dati” (Hebrewsma 13:10). Nanga tra wortoe, troe kresten e kisi wini foe wan moro betre soen-ofrandi, di moro foeroe foe den djoe priester ben weigri foe teki.
6. (a) San ben kon de foe si na a ten di Jesus ben teki dopoe? (b) San a nen Mesias, noso Krestes, wani taki?
6 Di Jesus ben kisi salfoe nanga santa jeje, dan dati ben wani taki, dati now Gado ben seti en heri seti foe a jeje tempel, di abi Jesus di e dini leki Granpriester (Tori foe den Apostel 10:38; Hebrewsma 5:5). Na ondro a krakti foe santa jeje, a disipel Lukas ben sori go na a jari foe a prenspari sani disi leki „a di foe tinafeifi tiri jari foe a tiri foe Tiberius Caesar” (Lukas 3:1-3). Dati de a srefi leki a jari 29 G.T. — soifri 69 jariwiki, noso 483 jari, foe sensi a ten di kownoe Artakserkses ben gi a komando foe bow den skotoe foe Jerusalem baka (Nehemia 2:1, 5-8). Soleki fa profeititori e taki, dan „Mesias, a Fesiman”, ben o kon na ini a jari dati di den ben taki foe en na fesi (Danièl 9:25). Soleki fa a sori, dan foeroe djoe ben sabi disi. Lukas e skrifi taki „a pipel ben e froewakti” a kon foe a Mesias, noso Krestes, nen di e kon foe Hebrew nanga Griki wortoe èn di wani taki a srefi: „salfoewan”. — Lukas 3:15.
7. (a) O ten Gado ben salfoe „a Moro Santapresi”, èn san disi ben wani taki? (b) Sortoe tra sani ben pasa nanga Jesus na a ten di a ben teki dopoe?
7 Na a ten di Jesus ben teki dopoe, dan Gado en hemel tanpresi ben kisi salfoe, noso ben poti aparti leki „a Moro Santapresi” na ini a seti foe a bigi jeje tempel (Danièl 9:24). „A troe tenti [noso, tempel], di Jehovah ben seti, èn no libisma”, ben bigin wroko (Hebrewsma 8:2). So srefi, nanga jepi foe en dopoe nanga watra èn nanga santa jeje, a man Jesus Krestes ben gebore ete wan tron leki wan jeje Manpikin foe Gado. (Teki gersi Johanes 3:3.) Disi ben wani taki, dati na wan seiker ten Gado ben sa kari en Manpikin foe kon libi na hemel baka, pe a ben sa dini na a reti anoe foe en Tata leki Kownoe nanga Granpriester „akroederi a fasi foe Mèlkiseidèk foe ala ten”. — Hebrewsma 6:20; Psalm 110:1, 4.
A Moro Santapresi na hemel
8. Sortoe njoen marki Gado en kownoestoeroe na hemel ben kisi now?
8 Na a dei foe Jesus en dopoe, a hemel kownoestoeroe foe Gado ben kisi njoen marki. A taki di Gado ben taki foe wan volmaakti libisma-ofrandi foe verzoen den sondoe foe grontapoe, ben poti krakti na tapoe a santafasi foe Gado di de kontrari a sondoefasi foe libisma. A sari-ati foe Gado ben kon na krin toe di a ben sori now taki a ben de klariklari foe kon ini vrede, noso foe kon verzoen. Na so fasi a kownoestoeroe foe Gado na hemel ben tron leki a moro inisei pisi foe a tempel, pe a granpriester ben go na ini nanga broedoe foe meti wán tron wan jari foe verzoen sondoe na wan agersifasi.
9. (a) San a garden na mindri a Santapresi nanga a Moro Santapresi ben prenki? (b) Fa Jesus ben man pasa a garden foe a jeje tempel foe Gado?
9 A garden di ben prati a Santapresi foe a Moro Santapresi ben prenki Jesus en libisma skin (Hebrewsma 10:19, 20). Jesus skin ben de a skotoe di ben tapoe Jesus di a ben de wan libisma na grontapoe, foe go pe en Tata de (1 Korentesma 15:50). A joeroeten di Jesus dede, „a garden foe a santa presi ben priti na toe, foe tapoesei go na ondrosei” (Mateus 27:51). Na wan fasi di ben seki sma, disi ben sori taki a skotoe di ben e tapoe Jesus foe go na hemel ben poeroe now. Dri dei na baka, Jehovah Gado ben doe wan toemoesi aparti wondroe. A ben opo Jesus na dede, no leki wan libisma di man dede èn di de foe skin nanga broedoe, ma leki wan glori jeje mekisani „di e tan na libi foe têgo” (Hebrewsma 7:24). Fotenti dei na baka, Jesus ben opo go na hemel èn ben go na a troe „Moro Santapresi”, „foe sori ensrefi na fesi a sma di de Gado, foe a boen foe wi”.’ — Hebrewsma 9:24.
10. (a) San ben pasa, baka di Jesus ben pristeri en hemel Tata, a waarde foe en srakti-ofrandi? (b) San a ben wani taki gi den disipel foe Krestes foe kisi salfoe nanga santa jeje?
10 Gado ben teki a waarde foe Jesus broedoe di ben trowe leki wan sani foe verzoen den sondoe foe grontapoe? Foe troe a ben doe dati. Boeweisi foe disi ben de foe si soifri 50 dei baka na opobaka foe Jesus, na a Pinkster fesadei. A santa jeje foe Gado ben kanti kon na tapoe 120 disipel foe Jesus di ben kon makandra na Jerusalem (Tori foe den Apostel 2:1, 4, 33). Neleki a Granpriester foe den, Jesus Krestes, na so den ben kisi salfoe now foe dini leki „wan santa priesterwroko, foe kan tjari srakti-ofrandi na jejefasi” na ondro Gado en seti foe wan bigi jeje tempel (1 Petrus 2:5). Moro fara, den salfoewan disi ben tron wan njoen nâsi, Gado en „santa nâsi” foe Israèl na jejefasi. Foe dati ede, ala profeititori foe den boen sani foe Israèl, soleki a pramisi foe a „njoen froebontoe” di ben skrifi na ini Jeremia 31:31, ben sa fiti a salfoe kresten gemeente, a troetroe „Israèl foe Gado”. — 1 Petrus 2:9; Galasiasma 6:16.
Tra marki foe a jeje tempel foe Gado
11, 12. (a) San a priester fesidjari ben prenki ini a tori foe Jesus, èn san a de ini a tori foe den salfoe bakaman foe en? (b) San a watrabeki e prenki, èn fa den e gebroiki en?
11 Ala di a Moro Santapresi ben prenki „hemel srefi”, pe Gado e sidon na tapoe wan kownoestoeroe, tokoe ala den tra marki foe a jeje tempel foe Gado abi foe doe nanga sani na grontapoe (Hebrewsma 9:24). Na ini a tempel na Jerusalem, wan inisei priester fesidjari ben de, di ben abi wan altari na ini foe tjari srakti-ofrandi nanga wan bigi beki nanga watra, di den priester ben gebroiki foe krin densrefi fosi den ben go doe santa diniwroko. San den sani disi e prenki na ini a sani di Gado en seti foe wan jeje tempel?
12 Ini a kefal foe Jesus Krestes, na inisei priester fesidjari ben prenki a fasi fa Jesus ben de sondro sondoe leki wan volmaakti libisma Manpikin foe Gado. Foe di salfoe bakaman foe Krestes e sori bribi na ini Jesus srakti-ofrandi, meki den e kisi regtfardikifasi. So boen, Gado kan handri nanga den na wan fasi di fiti, neleki den ben de sondro sondoe (Romesma 5:1; 8:1, 33). Foe dati ede, a fesidjari disi e prenki a regtfardiki fasi toe di ibri memre foe a santa priesterwroko kisi leki libisma na fesi foe Gado. Na a srefi ten, den salfoe kresten de onvolmaakti ete èn den kan sondoe. A watrabeki na ini a fesidjari e prenki Gado Wortoe, di a Granpriester e gebroiki foe krin a santa priesterwroko ibri leisi pikinso moro. Foe di den e saka densrefi na ondro a fasi disi foe kon krin, meki den man sori densrefi na wan warti fasi di e gi Gado grani èn di e hari tra sma kon na en soifri anbegi. — Efeisesma 5:25, 26; teki gersi Maleaki 3:1-3.
A Santapresi
13, 14. (a) San a Santapresi foe a tempel e prenki ini a tori foe Jesus nanga den salfoe bakaman foe en? (b) San a gowtoe kandratiki e prenki?
13 A fosi pisi foe a tempel e prenki wan situwâsi di de moro boen leki di foe a fesidjari. Ini a tori foe a volmaakti libisma Jesus Krestes, a fosi pisi disi e prenki a gebore di a ben gebore baka leki wan jeje Manpikin foe Gado di ben o drai go baka na hemel foe go libi drape. Baka te den salfoe bakaman disi froeklari regtfardiki tapoe a gron foe a bribi di den e bribi na ini Krestes broedoe di ben trowe, dan den e kisi foe doe toe nanga a spesroetoe fasi disi fa Gado jeje e wroko (Romesma 8:14-17). Nanga jepi foe „watra [dati wani taki a dopoe foe den] èn nanga jeje”, den e „gebore ete wan tron” leki jeje manpikin foe Gado. Èn na so fasi, den abi a howpoe foe kisi wan opobaka foe go libi na hemel leki jeje manpikin foe Gado, efoe den e tan getrow te na dede. — Johanes 3:5, 7; Openbaring 2:10.
14 Anbegiman di ben de na dorosei foe a tempel, no ben kan si den priester di ben dini na ini a Santapresi foe a tempel na grontapoe. Na so den salfoe kresten de ini wan situwâsi na jejefasi di a moro bigi pisi foe den anbegiman foe Gado, di abi a howpoe foe libi foe têgo na ini wan paradijs grontapoe, no abi prati na ini noso no e froestan krinkrin. A gowtoe kandratiki foe a tabernakel e prenki a situwâsi foe den salfoe kresten, di kon kisi leti. A fasi fa a santa jeje foe Gado e wroko, neleki na oli na ini den lampoe, e trowe leti na tapoe bijbel. San kresten e kon froestan leki wan bakapisi foe dati, den no e hori gi densrefi. Na presi foe dati, den e gi jesi na Jesus, di ben taki: „Oenoe na a leti foe grontapoe. . . . Meki oen leti skèin gi den sma, so taki den kan si den boen wroko foe oenoe èn gi glori na oen Tata, di de na hemel.” — Mateus 5:14, 16.
15. San a brede na tapoe a tafra nanga soribrede e prenki?
15 Efoe salfoe kresten wani tan ini a situwâsi disi pe den e kisi leti, dan den moesoe njan doronomo foe san a brede na tapoe a tafra nanga soribrede e prenki. A moro prenspari fonten fa den e kisi jeje njanjan na a Wortoe foe Gado, di den e meki moeiti foe leisi èn prakseri dipi foe dati ibri dei. Jesus ben pramisi toe foe gi den „njanjan na a reti ten” nanga jepi foe en „getrow èn koni srafoe” (Mateus 24:45). A „srafoe” disi na a heri skin foe salfoe kresten na grontapoe na iniwan ten. Krestes gebroiki a salfoe skin disi foe tjari tori kon na doro foe a kontroe foe bijbel profeititori èn gi den tiri na a joisti ten foe den kan gebroiki bijbel gronprakseri na ini na aladei libi foe a ten disi. Foe dati ede, salfoe kresten e njan nanga warderi foe ala den sortoe sani disi di seti na jejefasi. Ma a tan di den moesoe tan na libi na jejefasi e anga foe moro leki foe teki sabi foe Gado na ini den froestan nanga ati. Jesus ben taki: „Mi njanjan de, foe mi e doe a wani foe en di seni mi kon èn foe kaba a wroko foe en” (Johanes 4:34). Na a srefi fasi den salfoe kresten e firi tevrede foe di den e doe ala dei Gado en wani di a tjari kon na krin.
16. San a diniwroko di ben doe na a wierook-altari e prenki?
16 Na mamanten èn na mofoneti, wan priester ben òfer wierook na tapoe a wierook altari foe Gado na ini a Santapresi. Na a srefi ten, den anbegiman di no ben de priester, ben sa begi na Gado ala di den ben e tanapoe na ini den dorosei fesidjari foe en tempel (Lukas 1:8-10). „A wierook”, na so bijbel e tjari kon na krin, „wani taki den begi foe den santawan” (Openbaring 5:8). „Meki a begi foe mi de srekasreka leki wierook na joe fesi”, na so a psalm singiman David ben skrifi (Psalm 141:2). Den salfoe kresten e si a grani di den abi foe kon na fesi Jehovah na ini begi nanga jepi foe Jesus Krestes, leki wan warti sani toe. Fajafaja begi di e komoto na a ati de leki wierook di e smeri switi. Salfoe kresten e prèise Gado na tra fasi toe, foe di den e gebroiki den mofoboeba foe gi trawan leri. Spesroetoe a hori di den e horidoro te den e kisi problema èn a soifri retifasi foe den na ondro tesi, e plisi Gado. — 1 Petrus 2:20, 21.
17. San ben de toe na ini a kontroe foe a profeitis prenki di ben sori fa a granpriester ben go a fosi leisi na ini a Moro Santapresi na a Verzoendei?
17 Na a Verzoendei, a granpriester foe Israèl ben moesoe go na ini a Moro Santapresi èn bron wierook na tapoe wan gowtoe wierook-patoe pe faja krofaja ben de na ini. Disi ben moesoe doe bifo a ben tjari a broedoe foe sondoe-ofrandi go na inisei. Leki wan kontroe foe a profeiti prenki disi, a libisma Jesus ben tan hori en soifri retifasi na Jehovah Gado dorodoro, bifo a ben gi en libi leki a wan-enkri têgo srakti-ofrandi gi den sondoe foe wi. Na so fasi a ben sori taki wan volmaakti libisma ben kan hori en soifri retifasi na Gado awansi sortoe kwinsi Satan ben tjari kon na en tapoe (Odo 27:11). Di Jesus ben kisi tesi, dan a ben gebroiki begi „nanga tranga babari èn nanga watra-ai, . . . èn Gado ben arki en foe di a ben abi frede gi Gado” (Hebrewsma 5:7). Na a fasi disi a ben gi glori na Jehovah leki a regtfardiki èn reti Soeverein foe na universum. Gado ben pai Jesus foe di a ben opo en baka na dede foe libi na hemel sondro foe man dede. Na ini a hei posisi disi, Jesus e poti prakseri na a tra reide foe san ede a ben kon na grontapoe, namkoe, foe verzoen libisma sondari di abi berow, nanga Gado. — Hebrewsma 4:14-16.
A moro bigi glori foe a jeje tempel foe Gado
18. Fa Jehovah tjari toemoesi aparti glori kon gi a jeje tempel foe en?
18 „A glori foe a lasti oso disi sa kon moro bigi leki di foe a fosiwan”, na so Jehovah ben froeteri na fesi (Hagai 2:9). Foe di Jehovah ben opo Jesus baka leki wan Kownoe nanga Granpriester di no man dede, meki A ben gi en jeje tempel toemoesi aparti glori. Jesus de ini wan posisi now foe tjari ’têgo froeloesoe [kon] gi ala den wan di e gi jesi na en’ (Hebrewsma 5:9). Den fosiwan di ben sori taki den ben gi jesi na a fasi disi, ben de den 120 disipel di ben kisi santa jeje na a Pinksterfesa na ini 33 G.T. A boekoe Openbaring ben froeteri na fesi taki a nomroe foe den jeje manpikin foe Israèl disi te foe kaba ben o teki 144.000 (Openbaring 7:4). Baka di den dede, foeroe foe den ben abi foe didon na ini a grebi foe a libisma famiri sondro foe sabi wan sani, ala di den ben e wakti a ten foe Jesus en denoja na ini kownoemakti. A fasi fa den profeiti tori ben o waka na a joisti ten, èn di skrifi na ini Danièl 4:10-17, 20-27 e sori go na 1914 leki a ten taki Jesus ben o bigin tiri na mindri foe den feanti foe en (Psalm 110:2). Someni tenti jari na fesi, den salfoe kresten ben froewakti a jari dati nanga faja. A fosi grontapoefeti nanga den heloe di ben kon foe dati na tapoe a libisma famiri, ben gi a boeweisi taki na ini 1914, Jesus troetroe ben go sidon leki Kownoe na tapoe a kownoestoeroe (Mateus 24:3, 7, 8). Sjatoe baka dati, di a ten ben doro taki „a kroetoe [ben o] bigin na a oso foe Gado”, Jesus ben o meki kon troe san a ben pramisi den salfoe disipel foe en di ben fadon na sribi na ini dede: „Mi e kon baka èn misrefi sa teki oenoe na mi oso”. — 1 Petrus 4:17; Johanes 14:3.
19. Fa a fikapisi foe den 144.000 sa man go na ini a Moro Santapresi na hemel?
19 A no ala den 144.000 memre foe a santa priesterwroko kisi wan lakstampoe ete èn tjari kon makandra na ini a hemel tanpresi foe den. Wan fikapisi foe den e libi ete na grontapoe na ini a fasi fa den de na jejefasi soleki fa a Santapresi e prenki, ala di a „garden”, noso skotoe foe libisma skin foe den, e hori den aparti foe a santa denoja foe Gado. Te den sma disi dede na ini getrowfasi, dan den e opo baka wantronwantron leki jeje mekisani di no man dede, so taki den kan moksi densrefi nanga den wan foe den 144.000 di de na hemel kaba. — 1 Korentesma 15:51-53.
20. Sortoe toemoesi prenspari wroko den wan di tan abra foe a santa priesterwroko e doe na ini a ten disi, èn nanga sortoe bakapisi?
20 Foe di someni priester e dini makandra nanga a bigi Granpriester na hemel, dan a jeje tempel foe Gado kisi moro glori. Na ini a pisi ten dati, den wan di tan abra foe a santa priesterwroko e doe wan warti wroko na grontapoe. Nanga jepi foe a preikiwroko foe den, Gado e ’seki ala den nâsi’ nanga den kroetoe di a e taki, soleki fa a ben froeteri na fesi na ini Hagai 2:7. Na a srefi ten, miljoenmiljoen anbegiman di den e taki foe den leki „den sani foe ala den nâsi di sma wani srefisrefi”, e kon ipi-ipi na ini Jehovah en tempel fesidjari na grontapoe. Fa den wan disi e fiti na ini a sani di Gado seti foe anbegi, èn sortoe glori di de gi a tamara wi kan froewakti gi a bigi jeje tempel foe en? Den aksi disi wi sa go ondrosoekoe na ini a tra artikel.
Aksi foe loekoe sani sjatoe baka
◻ Sortoe toemoesi aparti eksempre Jesus ben gi na ini 29 G.T.?
◻ Sortoe seti ben bigin wroko na ini 29 G.T.?
◻ San a Santapresi nanga a Moro Santapresi e prenki?
◻ Fa a bigi jeje tempel kisi glori?
[Prenki na tapoe bladzijde 16]
Di Jesus ben kisi salfoe nanga santa jeje na ini 29 G.T., dan a bigi jeje tempel foe Gado ben bigin wroko