A wet foe Krestes
„Mi . . . de . . . na ondro a wet ini a tori foe Krestes.” — 1 KORENTESMA 9:21.
1, 2. (a) Fa sma ben sa kan wai pasi gi den foeroe fowtoe di libisma meki? (b) San krestenhèit no ben leri foe a historia foe a djoe bribi?
„NOITI sma èn tiri leri wan sani foe historia, noso handri na tapoe den gronprakseri di den teki foe dati.” Na so wan Doisri filosoofman foe a di foe 19 jarihondro ben taki. Ija, den ben taki foe a fasi fa sani ben waka na ini a libisma historia, taki a de „a wán don sani baka a trawan”, wan heri ipi froeferi fowtoe èn moeilek situwâsi, èn gi foeroe foe den sani disi den ben kan wai pasi, efoe libisma ben wani leri nomo foe fowtoe di meki kaba.
2 Te wi sa taki now foe a wet foe Gado, dan spesroetoe prakseri sa poti na a srefi fasi disi fa sma weigri foe leri foe fowtoe di meki kaba. Jehovah Gado ben poti wan moro betre wet srefi — a wet foe Krestes — ini a presi foe a Wet foe Moses. Tokoe den fesiman foe krestenhèit, di e taki dati den e gi leri èn e libi akroederi a wet disi, no leri wan sani foe den kefalek don sani di den Fariseiman doe. Na so krestenhèit ben drai a wet foe Krestes èn gebroiki en na wan fasi di no fiti, neleki fa a djoe bribi ben doe nanga a Wet foe Moses. Fa dati ben kan? Na a fosi presi, meki wi taki foe a wet disi srefi — san a de, soema a e tiri èn fa, èn san meki a e difrenti foe a Wet foe Moses. Baka dati, wi sa go ondrosoekoe fa krestenhèit gebroiki en na wan fasi di no fiti. So boen, meki wi leri wan sani foe historia èn feni boen foe dati!
A njoen froebontoe
3. Sortoe pramisi Jehovah ben gi foe wan njoen froebontoe?
3 Soema boiti Jehovah Gado ben kan meki wan volmaakti Wet kon moro boen? A Wet foe Moses ben de volmaakti (Psalm 19:7). Ma tokoe Jehovah ben pramisi: „Loekoe! Dei e kon, . . . èn . . . mi sa sroto nanga na oso foe Israèl èn nanga na oso foe Juda wan njoen froebontoe; a no sa de wan leki a froebontoe di mi ben sroto nanga den fositen tata foe den.” Den Tin Komando — a moro prenspari pisi foe a Wet foe Moses — ben skrifi na tapoe ston tafra. Ma foe a njoen froebontoe, Jehovah ben taki: „Mi wani poti mi wet na den inisei, èn na ini den ati mi sa skrifi en.” — Jeremia 31:31-34.
4. (a) Sortoe Israèl abi foe doe nanga a njoen froebontoe? (b) Soema moro, boiti den Israèlsma na jejefasi, de na ondro a wet foe Krestes?
4 Soema ben sa teki poti na ini a njoen froebontoe disi? Seiker a no ben o de a troetroe „oso foe Israèl”, di ben drai den baka gi a Mindriman foe a froebontoe disi (Hebrewsma 9:15). Nôno, a njoen „Israèl” disi ben sa de na „Israèl foe Gado”, wan nâsi foe Israèlsma na jejefasi (Galasiasma 6:16; Romesma 2:28, 29). Baka ten „wan bigi ipi” foe ala nâsi di ben o soekoe toe foe anbegi Jehovah, ben o moksi densrefi nanga a pikin groepoe disi foe kresten di salfoe nanga santa jeje (Openbaring 7:9, 10; Sakaria 8:23). Ala di a bigi ipi disi no e teki prati na a njoen froebontoe, tokoe den ben o de froeplekti toe foe hori densrefi na a wet. (Teki gersi Lefitikus 24:22; Numeri 15:15.) Leki „wan ipi” di de na ondro „wan skapoeman”, den alamala ben o de „na ondro a wet ini a tori foe Krestes”, soleki fa na apostel Paulus ben skrifi (Johanes 10:16; 1 Korentesma 9:21). Paulus ben kari a njoen froebontoe disi wan „moro betre froebontoe”. Foe san ede? Na a fosi presi, a abi en fondamenti na tapoe pramisi di ben kon troe, na presi taki a abi en fondamenti na tapoe skaduw foe sani di ben moesoe kon ete. — Hebrewsma 8:6; 9:11-14.
5. San na a marki foe a njoen froebontoe, èn foe san ede a sa abi boen bakapisi?
5 San na a marki foe a froebontoe disi? A de foe meki wan nâsi foe kownoe nanga priester foe kan blesi a heri libisma famiri (Exodus 19:6; 1 Petrus 2:9; Openbaring 5:10). Noiti a wet froebontoe foe Moses ben meki a nâsi disi kon tron leki fa a ben moesoe de, bika heri Israèl ben meki oproeroe èn ben lasi na okasi di den ben abi. (Teki gersi Romesma 11:17-21.) Ma a njoen froebontoe, seiker sa abi boen bakapisi, bika a abi foe doe nanga wan heri tra sortoe wet. Wan tra sortoe wet na sortoe fasi?
A wet di e meki wi kon fri
6, 7. Fa a wet foe Krestes e gi moro fri leki a Wet foe Moses?
6 Someni leisi den e kroederi a wet foe Krestes nanga fri (Johanes 8:31, 32). Den e taki foe en leki „a wet foe wan fri pipel” èn „a volmaakti wet di e meki wi kon fri” (Jakobus 1:25; 2:12). A no de foe taki, dati no wan enkri fri di libisma abi, de dorodoro. Ma tokoe a wet disi e gi moro fri leki a wet di ben de na en fesi, a Wet foe Moses. Fa so?
7 Foe eksempre, no wan sma gebore na ondro a wet foe Krestes. Den sani leki ras nanga a presi pe wan sma gebore, no e teri. Troe kresten e froekisi na wan fri fasi na ini den ati taki den wani teki a tjatjari foe gi jesi na a wet disi. Te den e doe disi, dan den e si taki a de wan safri tjatjari, wan lekti lai (Mateus 11:28-30). Joe e memre kande, taki a Wet foe Moses ben meki toe foe leri libisma taki a abi sondoe èn a abi wan froeloesoe-ofrandi tranga fanowdoe foe froeloesoe en (Galasiasma 3:19). A wet foe Krestes e leri sma taki a Mesias kon, a ben pai a loesoe-paiman nanga en libi, èn a ben opo a pasi gi wi foe kon fri foe a hebi kwinsi di sondoe nanga dede e kwinsi wi! (Romesma 5:20, 21) Efoe wi wani feni boen foe dati, dan wi moesoe sori bribi ini a srakti-ofrandi dati. — Johanes 3:16.
8. San a wet foe Krestes wani taki toe, ma foe san ede a de so taki te wan sma e libi akroederi en, dan a no wani taki dati a moesoe hori hondrohondro wet sistema na ede?
8 Efoe wi wani „sori bribi”, dan a wani taki dati wi moesoe libi akroederi a wet foe Krestes. Disi abi na ini toe, taki wi moesoe gi jesi na ala den komando foe Krestes. Dati wani taki, dati wi moesoe hori hondrohondro wet nanga wetbosroiti na ede? Nôno. Ala di Moses, a mindriman foe na owroe froebontoe, ben skrifi a Wet foe Moses, tokoe Jesus, a Mindriman foe a njoen froebontoe, noiti no skrifi wán wet. Na presi foe dati, a ben libi akroederi a wet disi. Nanga en volmaakti fasi foe libi, a ben gi wan eksempre di ala sma ben moesoe waka na dati baka (1 Petrus 2:21). Kande na dati meki den ben kari a fositen kresten anbegi „a Pasi” (Tori foe den Apostel 9:2; 19:9, 23; 22:4; 24:22). Gi den, a wet foe Krestes ben de foe si na ini a libi foe Krestes. Foe waka baka Jesus ben wani taki foe gi jesi na a wet disi. A troetroe lobi di den ben abi gi en, ben wani taki dati a wet disi troetroe ben skrifi na tapoe den ati, soleki fa profeititori ben taki (Jeremia 31:33; 1 Petrus 4:8). Èn wan sma di e gi jesi foe lobi ede, noiti no abi a firi taki sma e kwinsi en — disi na ete wan tra reide foe san ede wi kan kari a wet foe Krestes, „a wet foe wan fri pipel”.
9. San a wet foe Krestes wani taki troetroe, èn na sortoe fasi a wet disi abi foe doe nanga wan njoen komando?
9 Efoe lobi ben de prenspari na ini a Wet foe Moses, dan lobi de toemoesi prenspari na ini a kresten wet. A wet foe Krestes so boen, abi wan njoen komando na ini toe — kresten moesoe abi a lobi foe man òfer densrefi gi makandra. Den moesoe lobi sma soleki fa Jesus ben doe; a no ben draidrai foe gi en libi foe a boen foe den mati foe en (Johanes 13:34, 35; 15:13). So boen, wi ben sa kan taki dati a wet foe Krestes na wan moro betre fasi srefi foe sori theokrasia, leki fa a Wet foe Moses ben doe. Neleki fa a tijdschrift disi sori wan leisi kaba, dan: „Theokrasia na a tiri foe Gado; Gado na lobi; foe dati ede theokrasia na a tiri di wan sma e tiri nanga lobi.”
Jesus nanga den Fariseiman
10. Fa a leri foe Jesus ben de heri tra fasi leki a wan foe den Fariseiman?
10 Pikinmoro a no de foe froewondroe dan, taki Jesus ben kisi trobi nanga den djoe relisi fesiman foe en ten. Wan „volmaakti wet di e meki wi kon fri”, kwetikweti no ben de ini a prakseri foe den leriman foe Wet nanga den Fariseiman. Nanga libisma wet, den ben proeberi foe basi den sma. A leri foe den ben kwinsi èn kroetoe sma èn a ben de negatief. A leri foe Jesus di ben bow sma troetroe ben de heri tra fasi èn sma ben feni boen foe dati. Jesus ben de praktis èn a ben poti prakseri na tapoe den sani di den sma ben abi fanowdoe troetroe nanga den broko-ede foe den. A ben gi leri na wan makriki fasi èn nanga troetroe firi, foe di a ben gebroiki eksempre foe na aladei libi èn a ben poti a prakseri na san a Wortoe foe Gado ben taki. So boen, „den ipi ben froewondroe foe a fasi fa a [ben] gi leri” (Mateus 7:28). Ija, a fasi fa Jesus ben gi leri, ben doro na ati foe den!
11. Fa Jesus ben sori taki a Wet foe Moses ben moesoe gebroiki na wan reidelek fasi èn nanga sari-ati?
11 Na presi taki Jesus ben poti moro ordroe na a Wet foe Moses, a ben sori fa den djoe ben moesoe gebroiki a Wet dati ala ten — na wan reidelek fasi èn nanga sari-ati. Memre foe eksempre, na okasi pe wan oema, di ben lasi broedoe doronomo, ben kon na en. Soleki fa a Wet foe Moses e taki, dan ibri sma di na oema ben fasi no ben o de krin, dati meki taki a no ben moesoe moksi ensrefi kwetikweti nanga wan ipi sma! (Lefitikus 15:25-27) Ma a no ben sabi moro san foe doe foe kon betre èn foe dati ede a ben meki wan pasi na mindri na ipi èn a ben fasi Jesus tapoesei krosi. Wantewante a no ben lasi broedoe moro. Jesus ben piri-ai gi na oema foe di a ben pasa a Wet? Nôno; na presi foe dati, a ben froestan a moeilek omstandigheid foe na oema èn ben sori a moro bigi gronprakseri foe a Wet — lobi. Nanga dipi firi a ben taigi na oema: „Oemapikin, joe bribi meki joe kon betre. Go ini vrede, èn tan nanga wan boen gosontoe, foe di joe no abi a tranga siki foe joe moro.” — Markus 5:25-34.
A Wet foe Krestes e gi sma toemoesi foeroe primisi?
12. (a) Foe san ede wi no moesoe denki taki Krestes e gi sma toemoesi foeroe primisi? (b) San e sori taki te sma e meki foeroe wet, dan dati abi leki bakapisi taki sma e soekoe foeroe olo na ini a wet toe?
12 Wi moesoe kon na a bosroiti dan, taki foe di a wet foe Krestes „e meki wi kon fri”, taki a e gi sma toemoesi foeroe primisi, ala di den Fariseiman, nanga ala den gwenti foe den di ben gi abra nanga mofo, awansi fa a no fa ben man poti skotoe gi a fasi fa sma ben tjari densrefi? Nôno. Wet sistema foe a ten disi e sori taki nofo tron o moro wet de, o moro olo sma e feni ini den.a Na ini Jesus ten, den heri ipi reglementi foe den Fariseiman ben gi sma deki-ati foe soekoe olo ini a wet, foe doe wroko leki wan plekti sondro taki lobi ben de ini a tori, èn foe kweki wan fasi foe sori regtfardiki na dorosei, ala di den ben de kroektoe na inisei. — Mateus 23:23, 24.
13. Foe san ede a wet foe Krestes abi wan moro hei markitiki leki bakapisi ini a tori foe fa wan sma moesoe tjari ensrefi, leki iniwan wet sistema di den skrifi poti na ini boekoe?
13 A wet foe Krestes, na a tra sei, no e gi sma deki-ati foe handri na so wan fasi. Te joe loekoe en boen, dan te sma e gi jesi na wan wet di abi en fondamenti na tapoe lobi gi Jehovah èn di sma e gi jesi na dati foe di den e waka na baka a lobi di Krestes abi foe òfer ensrefi gi trawan, dan a abi wan moro hei markitiki leki bakapisi fa wan sma moesoe tjari ensrefi leki, te wan sma e waka baka wan formeel wet sistema. Lobi no e soekoe olo ini a wet; a e tapoe wi foe doe ogri sani di wan wet sistema kande no e taki krin dati wan sma no mag doe den. (Loekoe Mateus 5:27, 28.) So boen, a wet foe Krestes sa boeweigi wi foe doe sani gi trawan — foe sori a lobi foe gi sani, a lobi foe ontfanga sma boen, nanga a sori di wi e sori lobi srefi — na fasi di no wan formeel wet kan meki wi doe. — Tori foe den Apostel 20:35; 2 Korentesma 9:7; Hebrewsma 13:16.
14. San ben de a bakapisi te a fosi jarihondro kresten gemeente ben libi akroederi a wet foe Krestes?
14 So langa leki den memre foe a fositen kresten gemeente ben libi akroederi a wet foe Krestes, sani ben waka na wan waran lobi-ati fasi, èn pikinmoro no wan strak fasi ben de, noso taki sma ben lobi kroetoe trawan, èn ben abi hoigri fasi, san ben de so foeroe na ini den snoga foe a ten dati. Memre foe den njoen gemeente disi troetroe ben moesoe si taki den ben libi akroederi „wet foe wan fri pipel”!
15. San ben de wan toe foe den moeiti di Satan ben doe biginbigin foe pori a kresten gemeente?
15 Ma Satan ben angri foe pori a kresten gemeente na inisei, neleki fa a ben pori a nâsi Israèl. Na apostel Paulus ben warskow taki man di ben de neleki wolfoe, ben o „taki kroektoe sani” èn ben o kwinsi na ipi foe Gado (Tori foe den Apostel 20:29, 30). A ben moesoe feti nanga den sma foe a djoe bribi, di ben soekoe foe kenki a fri di a wet foe Krestes ben gi, gi a katibo foe a Wet foe Moses, di ben kon troe ini Krestes (Mateus 5:17; Tori foe den Apostel 15:1; Romesma 10:4). Baka di a lasti apostel dede, no wan sani ben de moro foe tapoe pasi gi a fadon disi di sma ben fadon komoto na bribi. Na so, kroektoedoe ben kon panja ensrefi na ala sei. — 2 Tesalonikasma 2:6, 7.
Krestenhèit e doti a wet foe Krestes
16, 17. (a) Na sortoe fasi krestenhèit ben kon pori? (b) Fa den wet foe a Katolik Kerki ben horibaka gi wan kroektoe fasi foe si seks?
16 Neleki fa a ben de nanga a djoe bribi, na so krestenhèit ben kon pori na moro leki wán fasi. Krestenhèit toe ben kisi foe doe nanga falsi leri èn nanga loesoe fasi ini a tori foe boen gwenti nanga wet. Èn a moeiti di a ben doe foe kibri na ipi foe en gi krakti di ben kon foe dorosei, nofo tron ben pori ibri sani di ben tan abra foe a soifri anbegi. Moro strak wet di no ben de akroederi bijbel ben opo kon.
17 A Katolik Kerki de a moro prenspari wan di ben meki heri ipi kerki wet. Spesroetoe tapoe a kontren foe seks, den ben drai den wet disi. Soleki fa a boekoe Sexuality and Catholicism e taki, dan kerki ben teki a Griki Stowisijn filosofia abra, di no ben froetrow no wan enkri fasi foe abi prisiri. Kerki ben leri taki ibri sortoe seks prisiri, so srefi a prisiri di e kon foe normaal seks demakandra ini a trowlibi, ben de wan sondoe. (Teki gersi Odo 5:18, 19.) Den ben taki dati seks ben de soso foe meki pikin, èn no gi wan tra sani. So boen, kerki wet ben si ibri fasi di sma ben gebroiki foe no kisi pikin, leki wan toemoesi serjoesoe sondoe, èn son tron disi ben wani taki srefi dati sma ben moesoe boetoe foeroe jari gi dati. Boiti dati, den priester no ben kisi pasi foe trow, wan komando di meki taki foeroe seks e doe di no fiti, èn sma e meshandri pikin na seks sei. — 1 Timoteus 4:1-3.
18. San ben de a bakapisi di den ben meki moro kerki wet?
18 Di den kerki wet ben kon foeroe, den ben tjari den kon na wán na ini boekoe. Den boekoe disi ben bigin tapoe pasi gi bijbel èn ben skoifi en na wan sei. (Teki gersi Mateus 15:3, 9.) Neleki a djoe bribi, na so a katolik bribi no ben froetrow boekoe di no ben abi foe doe nanga relisi èn a ben si foeroe foe den leki wan kefar. Heri esi a denki disi ben go moro fara leki a warskow di bijbel gi foe a tori (Preikiman 12:12; Kolosesma 2:8). Jerome, wan kerki skrifiman foe a di foe fo jarihondro G.T. ben taki: „O Masra, efoe oiti baka mi abi boekoe foe grontapoe noso leisi den, dan mi drai mi baka gi joe.” Baka wan pisi ten, kerki ben bigin ondrosoekoe boekoe foe poeroe sani na ini di den no ben feni boen — srefi den boekoe di ben taki foe sani foe grontapoe. Na so den ben kroetoe a di foe 17 jarihondro sabiman tapoe a kontren foe astronomia, Galileo, foe di a ben skrifi taki grontapoe e drai lontoe son. A wani di kerki ben wani nomonomo taki na ini ala sani den ben moesoe abi a lasti wortoe — srefi na tapoe aksi di abi foe doe nanga astronomia — te foe kaba ben o meki taki sma no ben o bribi moro na ini bijbel.
19. Fa den klooster ben horibaka gi a basi di sma ben basi trawan na wan toemoesi strak fasi?
19 Foeroe kerki wet ben meki na ini den klooster, pe den moniki ben hori densrefi aparti foe a grontapoe disi, foe go libi na wan fasi taki den no ben prakseri den eigi afersi. Pikinmoro ala katolik klooster ben hori densrefi na „A Wet foe St. Benedict”. Soso na abòt (wan wortoe di den teki foe na Arameisi wortoe gi „papa”) ben abi ala tirimakti. (Teki gersi Mateus 23:9.) Efoe wan moniki ben kisi wan presenti foe en papa nanga mama, dan na abòt ben o bosroiti efoe a moniki dati noso wan tra sma ben o kisi en. Boiti taki a ben kroetoe morsoe tori, wan reglementi ben tapoe pasi gi ala prisiri takitaki nanga lafoetori, èn a ben taki: „No wan disipel moesoe taki den sortoe sani disi.”
20. San e sori taki a protestant bribi ben kon koni toe ini a basi foe trawan na wan fasi di bijbel no ben horibaka gi?
20 Heri esi a protestant bribi, di ben soekoe foe kenki den sani di a katolik bribi ben doe pasa marki èn di no ben abi en fondamenti na tapoe bijbel, ben kon koni toe ini a meki foe reglementi di ben basi sma èn di no ben abi en fondamenti tapoe a wet foe Krestes. Foe eksempre, den ben kari a moro prenspari reform-sma, Johanes Calvijn, „a wet mekiman foe a Kerki di meki kon njoen baka”. A ben tiri na Genève nanga wan heri ipi strak wet pe „Owroeman” ben sorgoe taki sma ben hori densrefi na den wet èn a „wroko” foe den „Owroeman”, na so Calvijn ben taki, „de foe tiri a libi foe ibri sma.” (Teki gersi 2 Korentesma 1:24.) A kerki ben tiri den bar èn ben bosroiti sortoe tori sma ben mag taki drape. Hebi strafoe ben gi te wan sma ben doe den sortoe sani disi leki a singi foe prisiri singi noso dansi.b
Leri foe den fowtoe foe krestenhèit
21. San ben de moro foeroe a bakapisi foe a go di krestenhèit ben „go moro fara leki den sani di skrifi”?
21 Ala den reglementi nanga wet disi ben meki taki sani no pori krestenhèit? Kontrari foe dati! Na ini a ten disi, krestenhèit prati na ini hondrohondro sekte, foe den wan di de toemoesi strak te den wan di e gi toemoesi foeroe primisi. Den alamala, na wán noso tra fasi „go moro fara leki den sani di skrifi”, èn den gi libisma na okasi foe tiri na ipi akroederi den eigi prakseri èn kon gens Gado wet. — 1 Korentesma 4:6.
22. Foe san ede a fadon di krestenhèit ben fadon komoto na bribi, no ben wani taki a kaba foe a wet foe Krestes?
22 Ma a historia foe a wet foe Krestes, no abi wan sari kaba. Noiti Jehovah Gado sa gi pasi taki libisma nomo poeroe a wet foe en. A kresten wet e wroko srefisrefi na mindri troe kresten na ini a ten disi, èn den disi abi a bigi grani foe libi akroederi a wet. Ma baka di wi ondrosoekoe san a djoe bribi nanga krestenhèit doe nanga a wet foe Gado, dan a ben sa fiti te wi e aksi: ’Fa wi e libi akroederi a wet foe Krestes ala di wi e wai pasi gi a trapoe foe doti a Wortoe foe Gado nanga libisma denki èn nanga reglementi di e pori san a wet srefi foe Gado wani taki? Sortoe balansi fasi foe si sani, a wet foe Krestes moesoe poti na ini wi na ini a ten disi?’ A tra artikel sa taki foe den aksi disi.
[Foetoewortoe]
a Moro foeroe na den Fariseiman di ben de frantiwortoe foe a fasi fa a djoe anbegi de na ini a ten disi, foe dati ede wi no abi foe froewondroe taki te now ete a djoe bribi e soekoe olo ini den foeroe Sabadei gebod di den e poti na tapoe dati ete. Foe eksempre, wan sma di e go na wan ortodòks djoe ati-oso na Sabadei, kande e si taki na ibri sodro a lift e stòp foe ensrefi, so taki den sma di de na ini no abi foe doe sondoe „wroko”, foe di den ben moesoe poesoe a knopoe foe a lift. Son ortodòks datra e skrifi recept nanga enki di o gowe baka wan toe dei. Foe san ede? A Misjna e si a skrifi di wan sma e skrifi, leki „wroko”, ma a e taki dati „skrifi” de leki a libi di wan sma e libi wan marki di e tan.
b Den ben bron Servet na wan postoe leki wan ketter, foe di a no ben agri nanga wan toe theologis denki foe Calvijn.
Fa joe ben sa piki?
◻ San a wet foe Krestes wani taki troetroe?
◻ Fa a fasi fa Jesus ben gi leri, e difrenti foe a wan foe den Fariseisma?
◻ Fa Satan ben gebroiki wan strak fasi foe meki wet foe kan pori krestenhèit?
◻ San na wan toe boen bakapisi di wan sma kan abi te a e libi akroederi a wet foe Krestes?
[Prenki na tapoe bladzijde 10]
Jesus ben gebroiki a Wet foe Moses na wan reidelek fasi en nanga sari-ati