A wet di ben de bifo Krestes

„O, fa mi lobi joe wet! Heri dei mi wani poti prakseri na en tapoe.” — PSALM 119:97.

1. San e meki taki den planeiti na hemel e boeweigi?

SENSI en pikin-nengreten, Job ben loekoe go na den stari kande, foe di a ben froewondroe foe den. Kande en papa nanga mama ben leri en den nen foe den bigi stari sistema nanga san den ben sabi foe den wet di ben tiri a fasi fa den stari sistema e boeweigi na loktoe. Te joe loekoe en boen, dan sma foe owroeten ben gebroiki a fasti fasi fa den bigi, moi stari sistema disi ben boeweigi, foe marki a kenki di den jariten e kenki. Ma tokoe, ala leisi te Job ben loekoe den nanga wan lespeki frede, a no ben sabi sortoe bigi krakti ben hori den stari sistema disi na wán. So boen, a no ben man piki di Jehovah Gado ben aksi en: „Joe froestan den wet foe den stari?” (Job 38:31-33, The New Jerusalem Bible) Ija, na wet e tiri den stari — wet di de so soifri èn so frekti taki den sabidensiman foe a ten disi no e froestan den dorodoro.

2. Foe san ede wi kan taki dati na wet e tiri ala mekisani?

² Na ini na universum, Jehovah na a Moro Hei Giman foe wet. Na wet e tiri ala den wroko foe en. En lobi Manpikin, „a fosi geborewan foe ala den sani di [Gado] meki”, ben e gi jesi na en Tata na wan getrow fasi bifo materia universum ben de! (Kolosesma 1:15) Na wet e tiri den engel toe (Psalm 103:20). Na wet e tiri srefi den meti, foe di den e gi jesi na den komando di a Mekiman foe den poti na ini den. — Odo 30:24-28; Jeremia 8:7.

3. (a) Foe san ede libisma abi wet fanowdoe? (b) Nanga jepi foe sortoe sani Jehovah ben tiri a nâsi Israèl?

³ Fa a de nanga a libisma famiri? Ala di wi blesi nanga presenti soleki froestan, boen gwenti nanga wet, èn nanga jejefasi, tokoe wi abi wan seiker marki fanowdoe foe Gado en wet foe tiri wi te wi e gebroiki den sani disi. Wi fosi papa nanga mama, Adam nanga Eva, ben de volmaakti, so taki soso wan toe wet ben de fanowdoe foe tiri den. Lobi gi den hemel Tata, ben moesoe gi den nofo reide foe prisiri foe gi jesi. Ma den no ben gi jesi (Genesis 1:26-28; 2:15-17; 3:6-19). A bakapisi ben de, taki den bakapikin foe den ben de sondoe mekisani di ben abi foeroe wet moro fanowdoe foe gi den tiri. Baka wan pisi ten, Jehovah ben sorgoe gi a sani disi di den ben abi fanowdoe. A ben gi Noa spesroetoe wet di a ben moesoe gi abra na en osofamiri (Genesis 9:1-7). Hondrohondro jari baka dati, Gado ben gebroiki Moses foe gi a njoen nâsi Israèl wan Wet sistema di ben skrifi poti na ini Boekoe finifini. Disi ben de a fosi leisi taki Jehovah ben tiri wan heri nâsi nanga wet foe en. Te wi e ondrosoekoe a Wet dati, dan dati sa jepi wi foe froestan a prenspari ròl di a wet dati foe Gado abi ini a libi foe kresten na ini a ten disi.

A Wet foe Moses — A marki foe en

4. Foe san ede a ben sa de wan tjalensi gi den bakapikin foe Abraham, di Gado ben froekisi, foe meki a pramisi Siri?

⁴ Na apostel Paulus, wan troetroe studenti foe a Wet, ben aksi: „Foe san ede a Wet de dan?” (Galasiasma 3:19) Efoe wi wani gi piki na tapoe dati, dan wi moesoe prakseri taki Jehovah ben pramisi en mati Abraham taki wan Siri ben sa kon foe en famirilin, di ben sa tjari bigi blesi kon gi ala nâsi (Genesis 22:18). Ma djaso wan tjalensi de: A no ala bakapikin foe Abraham di Gado ben froekisi, den Israèlsma, ben de sma di ben lobi Jehovah. Baka ten, moro foeroe foe den ben sori taki den ben tranga-ede, èn den ben lobi meki oproeroe — son wan foe den no ben wani foe sma tiri den! (Exodus 32:9; Deuteronomium 9:7) Gi den sortoe sma dati, a ben de soso foe den geborte ede taki den ben de na mindri a pipel foe Gado, èn no foe di den ben wani dati.

5. (a) San Jehovah ben leri den Israèlsma nanga jepi foe a Wet foe Moses? (b) Fa a Wet ben meki so, taki a ben kan abi krakti na tapoe a waka nanga libi foe sma di ben hori densrefi na en?

⁵ Fa so wan pipel ben kan meki a pramisi Siri èn feni boen foe dati? Na presi taki Jehovah ben dwengi den neleki robot, a ben gi den leri foe di a gebroiki a wet (Psalm 119:33-35; Jesaja 48:17). Te joe loekoe en boen, dan a Hebrew wortoe gi „wet”, toh·rahʹ, wani taki „leri”. San a wet ben leri? Moro foeroe a ben leri den Israèlsma taki den ben abi a Mesias fanowdoe, di ben sa froeloesoe den foe a sondoe fasi foe den (Galasiasma 3:24). A Wet ben leri den frede gi Gado toe nanga a gi di wan sma moesoe gi jesi. Akroederi a pramisi di Abraham ben kisi, den Israèlsma ben moesoe de kotoigi foe Jehovah gi ala tra nâsi. So boen, a Wet ben moesoe leri den wan moi, èn toemoesi boen sistema foe tjari densrefi, di ben sa sori krin soema na Jehovah; a ben o jepi Israèl foe tan aparti foe den kroektoe sani di den nâsi na den lontoe ben doe. — Lefitikus 18:24, 25; Jesaja 43:10-12.

6. (a) Wan sani foe omeni wet bosroiti a Wet foe Moses abi, èn foe san ede sma no moesoe si a nomroe dati leki toemoesi foeroe? (Loekoe a foetoewortoe.) (b) Sortoe inzicht wi kan kisi te wi e go ondrosoekoe a Wet foe Moses finifini?

⁶ A no de foe froewondroe foe dati ede, taki a Wet foe Moses abi foeroe wet bosroiti — moro leki 600.a A wet disi, di ben skrifi poti na ini Boekoe, ben tiri den kontren di ben abi foe doe nanga anbegi, tiri, boen gwenti nanga wet, retidoe, èn srefi njanjan nanga dringi èn krin fasi. Ma disi wani taki dati a Wet ben de soso wan heri ipi ordroe di no e hori den firi foe sma na prakseri èn grofoe komando? Kwetikweti! Te wi e ondrosoekoe a Wet sistema disi dan a e gi wi foeroe inzicht foe a lobi-ati sma di Jehovah de. Loekoe wan toe eksempre.

Wan wet pe sari-ati ben de foe si

7, 8. (a) Fa a Wet ben poti krakti na tapoe sari-ati? (b) Fa Jehovah ben gebroiki a Wet na wan sari-atifasi ini a kefal foe David?

⁷ A Wet ben poti krakti na tapoe sari-ati, spesroetoe gi den mofinawan noso den sma di no ben abi jepi. Weduwe nanga pikin di no abi papa nanga mama moro, ben kan kisi kibri (Exodus 22:22-24). A wet ben kibri den meti di den gebroiki foe doe wroko foe sma no doe den ogri. Sma ben moesoe lespeki den fondamenti reti di trawan ben abi tapoe den goedoe foe den (Deuteronomium 24:10; 25:4). Ala di a Wet ben aksi dedestrafoe gi a kiri foe sma, tokoe a ben sorgoe taki wan sma di no ben kiri foe espresi, ben kan kisi sari-ati (Numeri 35:11). A de krin, taki kroetoeman foe Israèl te na wan seiker marki ben de fri foe bosroiti sortoe strafoe wan sma ben moesoe kisi gi son sondoe, èn disi ben anga foe a fasi fa a sma di ben meki a fowtoe, ben handri. — Teki gersi Exodus 22:7 nanga Lefitikus 6:1-7.

⁸ Jehovah ben gi kroetoeman na eksempre, foe di a ben gebroiki a Wet na wan krakti fasi pe dati ben de fanowdoe, ma nanga sari-ati pe dati ben man. A ben sori kownoe David sari-ati, di ben doe soetadoe èn ben kiri wan sma. A no ben de so, taki a no ben kisi strafoe, bika Jehovah no ben kibri gi en den takroe bakapisi di ben kon foe a sondoe foe en. Tokoe, foe a Kownoekondre froebontoe ede èn foe di David ben de wan man nanga sari-atifasi èn a ben abi foeroe berow, meki den no ben kiri en. — 1 Samuèl 24:4-7; 2 Samuèl 7:16; Psalm 51:1-4; Jakobus 2:13.

9. Sortoe ròl lobi ben plèi ini a Wet foe Moses?

⁹ Boiti dati, a Wet foe Moses ben poti krakti na tapoe lobi. Tjari kon na joe prakseri, taki wan nâsi na ini a ten disi abi wan wet sistema di troetroe ben aksi sma foe sori lobi! So boen, a Wet foe Moses no ben tapoe sma nomo foe no kiri trawan; a ben komanderi: „Joe moesoe lobi a sma na joe sei leki joesrefi” (Lefitikus 19:18). No wawan a ben tapoe pasi gi sma foe handri na wan onregtfardiki fasi nanga dorosei-sma di ben libi na a kondre; a ben komanderi: „Joe moesoe lobi en leki joesrefi, bika oenoe ben tron dorosei-sma di ben libi na a kondre Egipti” (Lefitikus 19:34). No wawan a wet ben tapoe pasi gi soetadoe; a ben komanderi a masra foe prisiri nanga en eigi wefi! (Deuteronomium 24:5) Na ini a boekoe Deuteronomium wawan, den e gebroiki so wan 20 leisi Hebrew wortoe di e poti prakseri na tapoe na eigifasi lobi. Jehovah ben gi den Israèlsma a djaranti taki a ben lobi den — na ini a ten di ben pasa kaba, na ini a ten dati, èn na ini a tamara (Deuteronomium 4:37; 7:12-14). Troetroe, a moro bigi komando ini a Wet foe Moses ben de: „Joe moesoe lobi Jehovah, joe Gado, nanga joe heri ati nanga joe heri sili nanga ala joe krakti” (Deuteronomium 6:5). Jesus ben taki dati a heri Wet e anga na a komando disi, makandra nanga a komando foe lobi a sma na wi sei (Lefitikus 19:18; Mateus 22:37-40). A no de foe froewondroe taki a psalm singiman ben skrifi: „O, fa mi lobi joe wet! Heri dei mi wani poti prakseri na en tapoe.” — Psalm 119:97.

A gebroiki di den no ben gebroiki a Wet na wan fasi di fiti

10. Fa moro foeroe foe den djoe ben si a Wet foe Moses?

¹⁰ Fa a de wan sari, foe dati ede, taki Israèl moro foeroe no ben abi warderi gi a Wet foe Moses! A pipel no ben gi jesi na a Wet, den no ben poti prakseri na en tapoe, noso ben frigiti en. Den ben pori a soifri anbegi nanga den tegoe relisi tori di tra nâsi ben doe (2 Kownoe 17:16, 17; Psalm 106:13, 35-38). Èn den ben gowe libi a Wet na tra fasi toe.

11, 12. (a) Fa groepoe relisi fesiman ben doe ogri baka den dei foe Esra? (Loekoe a boksoe.) (b) Foe san ede den rabi foe owroeten ben denki taki a ben de fanowdoe foe „meki wan skotoe lontoe a Wet”?

¹¹ Son wan foe den moro ogri sani di ben doe kontrari a Wet, na den srefi sma ben doe, di ben taki dati den ben gi leri ini a Wet èn ben hori densrefi na dati. Disi ben pasa baka den dei foe a getrow skrifiman Esra foe a di foe feifi jarihondro b.G.T. Esra ben feti tranga nanga den pori krakti foe tra nâsi èn a ben poti krakti na tapoe a leisi di sma ben moesoe leisi èn leri a Wet (Esra 7:10; Nehemia 8:5-8). Son wan foe den leriman foe a Wet ben taki dati den ben waka na Esra baka èn den ben meki, san sma ben kari a „Bigi Snoga”. Wan foe den sani di den ben taki, ben de: „Meki wan skotoe lontoe a Wet.” Den leriman disi ben taki dati a Wet ben de leki wan moi djari. Foe sorgoe taki no wan sma no pasa kon na ini a djari disi foe di a sma ben pasa den wet foe en, dan den ben meki moro wet, a „Wet di ben gi abra nanga mofo”, so taki a pipel no ben man kon krosibei foe doe so wan sondoe.

¹² Son sma ben sa kan taki dati den djoe fesiman ben abi a reti foe denki na a fasi disi. Baka den dei foe Esra, makti foe tra kondre, spesroetoe Grikikondre, ben tiri den djoe. Foe feti nanga a makti di a Griki filosofia nanga koeltoeroe ben abi na den tapoe, dan groepoe relisi fesiman ben opo kon na mindri den djoe. (Loekoe a boksoe, tapoe a bladzijde disi.) Baka wan pisi ten, son wan foe den groepoe disi ben kon strei nanga makandra èn leki leriman foe a Wet den ben kon moro tranga srefi leki a Leifi priesterwroko. (Teki gersi Maleaki 2:7.) Na a ten foe 200 b.G.T., a wet di gi abra nanga mofo, ben bigin abi krakti na tapoe a djoe libi. Fosi, den wet disi no ben de foe sma skrifi den, foe di den ben frede taki sma ben o denki taki den de a srefi leki a Wet di skrifi poti na ini Boekoe. Ma safrisafri, libisma denki ben kon moro prenspari leki a denki foe Gado, so taki te foe kaba a „skotoe” disi troetroe ben pori a srefi „djari” di a ben moesoe kibri.

A pori di a Farisei bribi ben kon pori

13. Fa son djoe relisi fesiman ben sori taki den ben abi a reti foe meki foeroe wet?

¹³ Den rabi ben taki dati foe di a Tora, noso Wet foe Moses, ben de volmaakti, dan a ben moesoe abi wan piki na tapoe ibri aksi di ben sa opo kon. A prakseri disi no ben sori lespeki troetroe. Troetroe a ben gi den rabi pasi foe gebroiki libisma prakseri na wan triki fasi, èn den ben meki en gersi leki Gado Wortoe ben de a fondamenti gi reglementi na tapoe ala sortoe afersi — sonwan ben de persoonlijk, trawan no ben de prenspari srefi.

14. (a) Fa den djoe relisi fesiman ben meki a komando ini den Boekoe foe bijbel di ben abi foe doe nanga a hori di den ben moesoe hori densrefi aparti foe den nâsi, kon tron wan sani di bijbel no ben horibaka gi? (b) San e sori taki den wet foe den rabi no ben kibri a djoe pipel foe meki heiden prakseri abi krakti na den tapoe?

¹⁴ Ibri tron baka den relisi fesiman ben teki bijbel gronprakseri èn ben meki den kon moro foeroe. Foe eksempre, a Wet foe Moses ben gi sma deki-ati foe hori densrefi aparti foe den nâsi, ma den rabi ben gi sma deki-ati foe abi wan sortoe don fasi foe tegoe gi ala sani di no ben abi foe doe nanga djoe. Den ben leri taki wan djoe no moesoe libi en meti na wan tanpresi foe den heiden, bika „sma e denki [foe heiden] taki den abi seks demakandra nanga meti”. Wan djoe oema no ben abi pasi foe jepi wan heiden oema di ben de foe kisi wan pikin, bika nanga dati a djoe oema ben sa „jepi meki wan pikin kon gebore gi na anbegi foe kroektoe gado”. Nanga reti den rabi no ben froetrow den Griki sportskoro, èn dati meki den rabi ben tapoe pasi gi ala sport oefening. Historia e sori taki ala den sani disi no ben doe foeroe foe kibri den djoe gi heiden bribi. Te joe loekoe en boen, dan den Fariseiman srefi ben leri sma a heiden leri foe a dede di a sili no man dede! — Esekièl 18:4.

15. Fa den djoe relisi fesiman ben drai den wet di ben abi foe doe nanga a krin di sma ben moesoe krin densrefi èn na abi di sma no moesoe abi seks demakandra nanga famiriman?

¹⁵ Den Fariseiman ben drai den wet toe di ben abi foe doe nanga a krin di wan sma moesoe krin ensrefi. Sma ben taki dati den Fariseiman ben o krin son srefi efoe den ben abi na okasi. A wet foe den ben taki dati te wan sma ben draidrai „foe go na koemakoisi”, dan dati ben o doti en! A wasi di sma ben moesoe wasi na anoe, ben tron wan frekti gwenti, nanga reglementi di ben abi foe doe nanga sortoe anoe ben moesoe wasi fosi èn fa. Den ben si oemasma leki sma di no ben krin srefisrefi. Tapoe a fondamenti foe a bijbel komando foe no „kon krosibei” foe iniwan famiriman (san troetroe ben de wan wet gi seks demakandra nanga famiriman), meki den rabi ben poti leki reglementi taki wan masra no ben moesoe waka na en wefi baka; èn a no ben moesoe taki nanga en wefi na wowojo. — Lefitikus 18:6.

16, 17. Fa a wet di ben gi abra nanga mofo ben taki moro leki san a komando foe hori na alawiki Sabadei ben taki, èn sortoe bakapisi disi ben abi?

¹⁶ San ala sma ben sabi heri boen na taki a wet di ben gi abra nanga mofo, ben meki a Sabadeiwet tron wan sani foe spotoe. Gado ben gi Israèl wan eenvoudig komando: No doe no wan wroko na a di foe seibi dei foe a wiki (Exodus 20:8-11). Ma a wet di ben gi abra nanga mofo ben poti ete so wan 39 difrenti sortoe wroko di sma no ben mag doe, pe joe ben abi na ini toe a tai noso a loesoe foe wan koendoe, a nai di wan sma e nai toe steek, a skrifi di wan sma e skrifi toe Hebrew letter, èn so moro fara. Dan ibriwan foe den sortoe wroko disi ben abi ete wan lo tra reglementi. Sortoe koendoe sma no ben mag meki èn sortoewan den ben mag meki? A wet di ben gi abra nanga mofo no ben piki den aksi disi nanga fasti wet. A dresi di den ben dresi wan sma, den ben si leki wan wroko di no ben mag doe. Foe eksempe, sma no ben abi pasi foe seti wan broko anoe noso broko foetoe na Sabadei. Wan man nanga tifi-ati ben kan gebroiki asin foe poti dati na ini en njanjan, ma a no ben mag soigi na asin go na ini en tifi. Dati ben sa dresi en tifi!

¹⁷ Foe di a Sabadeiwet ben kon na ondro hondrohondro reglementi di libisma ben meki, dan gi moro foeroe foe den djoe a ben lasi en marki na jejefasi. Te Jesus Krestes, a „Masra foe sabadei”, ben doe kefalek moi wondroe na Sabadei di ben prisiri sma, dan den leriman foe wet nanga den Fariseiman ben de sondro firi. Den ben broko den ede soso nanga a gersi di a ben gersi leki Jesus no ben si den wet foe den na wan ai. — Mateus 12:8, 10-14.

Leri wan sani foe den fowtoe foe den Fariseiman

18. San ben de a bakapisi di den ben poti wet nanga gwenti di ben gi abra nanga mofo, na a Wet foe Moses? Sori disi nanga wan eksempre.

¹⁸ Efoe wi taki en sjatoe, dan wi ben sa kan taki dati den tra wet nanga gwenti disi ben fasi densrefi na a Wet foe Moses neleki fa pikin pakro e fasi densrefi na a skin foe wan sipi. Wan sma di abi wan sipi e teki foeroe ten nanga moeiti foe kraboe den froeferi sani disi poeroe foe en sipi, foe di den e tapoe a sipi foe go moro esi èn e pori a ferfi di de tapoe a sipi so taki a no e froestoe. Na so a de toe, taki den wet di gi abra nanga mofo èn den gwenti, ben hebi a Wet èn ben gi pasi taki sma ben kan gebroiki en na wan fasi di no ben fiti. Ma na presi foe kraboe den sortoe pikinpikin wet disi poeroe di no ben de prenspari, den rabi ben tan poti moro. Na a ten di a Mesias ben kon foe doe san a Wet taki, a „sipi” ben tapoe nanga someni „pikin pakro” taki pikinmoro a no ben man drifi moro! (Teki gersi Odo 16:25.) Na presi taki den relisi fesiman disi kibri a Wet froebontoe, den ben meki a fowtoe foe pasa a wet. Ma foe san ede a „skotoe” foe den nanga reglementi, no ben wroko?

19. (a) Foe san ede a „skotoe lontoe a Wet” no ben wroko? (b) San e sori taki den djoe relisi fesiman no ben abi troetroe bribi?

¹⁹ Den fesiman foe a djoe bribi no ben froestan taki a feti di wan sma e feti nanga a porifasi na ini en skin, na wan sani di e feti na ini na ati èn no foe di sma e meki wan lo wet (Jeremia 4:14). A sroto foe wini a feti, na lobi — lobi gi Jehovah, en wet, nanga en regtfardiki gronprakseri. So wan lobi e meki taki sma no wani si na ai san Jehovah no wani si na ai (Psalm 97:10; 119:104). Den sma di den ati kon foeroe nanga lobi so boen, e tan getrow na den wet foe Jehovah ini a kroektoe grontapoe disi. Den djoe relisi fesiman ben abi a bigi grani foe leri a pipel, so taki den ben kan meki so wan lobi gro èn boeweigi den foe sori dati toe. Foe san ede den no ben doe disi? Soleki fa a sori, dan den no ben abi bribi (Mateus 23:23, foetoewortoe). Efoe den ben abi bribi ini a makti foe Jehovah en jeje taki a kan wroko na tapoe na ati foe getrow libisma, dan den no ben sa feni taki a ben de fanowdoe foe basi a libi foe trawan na so wan strak fasi (Jesaja 59:1; Esekièl 34:4). Foe di den no ben abi bribi, meki den no ben gi sma bribi; den ben poti hebi na tapoe a pipel nanga komando di libisma ben meki. — Mateus 15:3, 9; 23:4.

20, 21. (a) Sortoe krakti, a fasi foe denki foe gwenti nomo ben abi na tapoe a djoe bribi? (b) Sortoe sani wi kan leri foe san ben pasa nanga a djoe bribi?

²⁰ Den djoe fesiman dati no ben meki lobi gro. Den gwenti foe den ben meki wan relisi kon di ben lai nanga soso-sani, èn sma ben gi jesi na a relisi nomo foe tra sma si den — wan boen gron foe meki hoigrifasi kon (Mateus 23:25-28). Den wet foe den ben gi heri ipi reide foe kroetoe trawan. Na so fasi den heimemre Fariseiman di ben lobi foe basi sma, ben denki taki den ben abi a reti foe kroetoe Jesus Krestes srefi. Den ben lasi a moro prenspari marki foe a Wet na ai èn ben drai den baka gi a wan-enkri troe Mesias. A bakapisi ben de taki a ben abi foe taigi a djoe nâsi: „Loekoe! Den e libi oen oso leigi na baka.” — Mateus 23:38; Galasiasma 3:23, 24.

²¹ Sortoe sani wi e leri foe disi? A de krin, taki wan strak fasi foe denki foe gwenti nomo, no e horibaka gi a soifri anbegi foe Jehovah! Ma disi wani taki dati anbegiman foe Jehovah na ini a ten disi no moesoe abi no wan wet kwetikweti, boiti te den e taki finifini foe disi na ini den Santa Boekoe foe bijbel? Nôno. Foe kisi wan moro krin piki, meki wi go loekoe now fa Jesus Krestes ben poti wan njoen wet di ben de moro betre, ini a presi foe a Wet foe Moses.

[Foetoewortoe]

Joe kan tjari disi kon na krin?

◻ Fa a wet foe Gado e tiri ala mekisani?

◻ San ben de a moro prenspari marki foe a Wet foe Moses?

◻ San e sori taki a Wet foe Moses ben poti krakti na tapoe sari-ati?

◻ Foe san ede den djoe relisi fesiman ben poti wan heri ipi tra wet na a Wet foe Moses, èn san ben de a bakapisi?

[Faki na tapoe bladzijde 6]

Den djoe relisi fesiman

Leriman foe Wet: Den ben si densrefi leki den wan di ben moesoe teki Esra presi èn leki den sma di ben tjari a Wet kon na krin. Soleki fa a boekoe A History of the Jews e taki, dan „a no ala den leriman foe Wet ben de sma nanga boen eigifasi, èn te den ben proeberi foe meki a wet wani taki wan heri tra sani, dan nofo tron a takroe bakapisi ben de wan lo soso wortoe nanga don gebod. Den gebod disi ben tron gwenti, èn heri esi den ben kwinsi sma pasa marki.”

Hasidim: A nen wani taki „den wan di fromsoe” noso „den santawan”. A fosi leisi di den ben kari den wan groepoe, ben de na ini 200 b.G.T., èn den ben de sma di ben abi foeroe politiek makti, di ben feti fajafaja foe hori a Wet soifri, so taki na ogri-ati krakti foe den Grikisma no ben kan abi krakti na dati tapoe. Den Hasidim ben prati na dri groepoe: den Fariseiman, den Sadoeseiman, nanga den Eseinesma.

Fariseiman: Son sabiman e denki taki a nen kon foe den wortoe „Den wan di de aparti”, noso „Apartiwan”. Foe troe den ben de fajafaja ini a bigi moeiti di den ben meki foe hori densrefi aparti foe den heiden, ma a ben de so toe, taki den ben si a groepoe foe den leki wan sani di ben hori aparti foe — èn di ben de moro hei leki — a gewoon djoe pipel, di no ben froestan a frektifasi foe a wet di ben gi abra nanga mofo. Wan historia skrifiman ben taki foe den Fariseiman: „Nofo tron den ben handri nanga den sma neleki nanga pikin-nengre, foe di den ben poti wan fasti fasi foe doe sani èn ben bosroiti san ben de den moro finifini pisi foe den gwenti di sma ben moesoe hori densrefi na dati.” Wan tra sabiman ben taki: „A Farisei bribi ben meki wan heri ipi reglementi di ben de foe feni na ini a wet èn di ben handri foe ala sortoe situwâsi, èn sondro misi disi ben abi leki bakapisi taki den ben meki pikinpikin sani sori so bigi, èn prenspari sani den ben frigiti (Mt. 23:23).”

Sadoeseiman: Wan groepoe di ben abi foeroe foe doe nanga den aristokratis sma èn nanga a priesterwroko. Na wan fajafaja fasi den ben gens den leriman foe Wet nanga den Fariseiman, foe di den ben taki dati a wet di ben gi abra nanga mofo no ben warti a srefi leki a Wet di poti skrifi na ini Boekoe. A Misjna srefi e sori taki den lasi a strei disi: „Sma moesoe [hori densrefi] moro soifri na den wortoe foe den leriman foe Wet, leki foe [hori densrefi na] den wortoe foe a Wet [di skrifi poti na ini Boekoe].” A Talmud, di ben abi foeroe foe taki foe a wet di ben gi abra nanga mofo, baka ten ben go so fara foe taki: „Den wortoe foe den leriman foe Wet . . . warti moro leki den wortoe foe a Tora.”

Eseinesma: Wan groepoe asceetsma di ben hari densrefi poeroe foe tra sma foe go libi ini aparti libimakandra. Soleki fa The Interpreter’s Dictionary of the Bible e taki, dan den Eseinesma ben de moro aparti srefi leki den Fariseiman èn „son tron den ben doe sani moro ogri srefi leki san den Fariseiman ben doe”.

[Prenki na tapoe bladzijde 4]

Soleki fa a sori, dan a papa nanga a mama foe Job ben leri en den wet di ben tiri den stari sistema