Libi akroederi a wet foe Krestes

„Tan tjari den hebi foe makandra, èn doe san a wet foe Krestes e taki na so fasi.” — GALASIASMA 6:2.

1. Foe san ede wi kan taki dati na ini a ten disi a wet foe Krestes na wan boen krakti di tranga srefisrefi?

NA Rwanda, Hoetoe nanga Toetsi Kotoigi foe Jehovah ben tjari den libi kon ini kefar foe gi makandra kibri foe a kiri di sma ben kiri trawan foe ras ede, wan sani di pasa no so langa ete èn di naki a kondre dati krinkrin. Jehovah Kotoigi na Kobe, Japan, di ben lasi osofamiri memre na ini a gronseki di ben tjari pori kon, ben sari troetroe foe a lasi dati. Tokoe den ben doe wan sani wantewante foe jepi tra sma. Ija, eksempre na heri grontapoe di e prisiri sma, e sori taki a wet foe Krestes abi boen bakapisi na ini a ten disi. Na wan boen krakti di tranga srefisrefi.

2. Fa krestenhèit no froestan a wet foe Krestes, èn fa wi kan doe san a wet dati e taki?

² Na a srefi ten, wan bijbel profeititori di e taki foe den „lasti dei” disi di tranga foe pasa, e kon troe. Foeroe sma abi „wan fasi foe a gi di den gi densrefi ini a dini foe Gado” ma den e ’sori taki den no abi a krakti foe dati’ (2 Timoteus 3:1, 5). Spesroetoe na ini krestenhèit, relisi na wan sortoe plekti nofo tron, èn no wan sani di e kon foe na ati. Disi de, foe di a de toemoesi moeilek foe libi akroederi a wet foe Krestes? Nôno. Jesus no ben o gi wi wan wet di wi no ben sa kan hori wisrefi na dati. Krestenhèit no froestan kwetikweti san a wet dati wani taki. A no poti prakseri na tapoe den wortoe disi di Gado meki sma skrifi: „Tan tjari den hebi foe makandra, èn doe san a wet foe Krestes e taki na so fasi” (Galasiasma 6:2). Wi „e doe san a wet foe Krestes e taki”, te wi e tjari den hebi foe makandra, no te wi e doe leki fa den Fariseiman ben doe èn na wan onregtfardiki fasi e poti moro lai na tapoe den brada foe wi.

3. (a) San na wan toe komando di de toe na ini a wet foe Krestes? (b) Foe san ede a ben sa de wan fowtoe sani foe kon na a bosroiti taki a kresten gemeente no ben sa moesoe abi no wan reglementi moro leki den komando foe Krestes srefi?

³ A wet foe Krestes wani taki so srefi ala den komando foe Krestes Jesus — efoe a de a preikiwroko èn a wroko foe gi leri, a hori di wi moesoe hori na ai soifri èn sempel, a doe di wi moesoe doe moeiti foe tan na ini vrede nanga a sma na wi sei, noso a poeroe di wi e poeroe sani di no krin, na ini a gemeente (Mateus 5:27-30; 18:15-17; 28:19, 20; Openbaring 2:14-16). Ija, kresten de froeplekti foe hori ala komando di de na ini bijbel èn di den bakaman foe Krestes kisi. Èn moro de ete. Na organisâsi foe Jehovah, so srefi ibri gemeente moesoe poti reglementi di de fanowdoe èn fasi foe wroko, so taki na orde kan tan (1 Korentesma 14:33, 40). Ija, kresten no ben kan kon makandra srefi efoe den no ben abi reglementi ini a tori foe o ten, o pe, èn o fa foe hori den sortoe konmakandra disi! (Hebrewsma 10:24, 25) A wroko di wi e wroko makandra nanga den wan di kisi a tirimakti na ini na organisâsi foe gi reidelek tirilin, na wan pisi toe foe a doe di wi moesoe doe san a wet foe Krestes e taki. — Hebrewsma 13:17.

4. San na a krakti di e poesoe a soifri anbegi?

⁴ Ma tokoe troe kresten no e meki na anbegi foe den tron wan wet stroektoeroe di no wani taki noti. Den no e dini Jehovah soso foe di wan sma noso organisâsi e taigi den foe doe disi. Na presi foe dati, a krakti di e poesoe den na ini na anbegi foe den, na lobi. Paulus ben skrifi: „A lobi di Krestes abi, e poesoe wi” (2 Korentesma 5:14, foetoewortoe). Jesus ben komanderi den bakaman foe en foe lobi makandra (Johanes 15:12, 13). A lobi di wi lobi foe òfer wisrefi, na a fondamenti foe a wet foe Krestes, èn a e poesoe noso e boeweigi troe kresten na ala presi, na ini na osofamiri èn na ini a gemeente toe. Kon meki wi si fa.

Na ini na osofamiri

5. (a) Fa papa nanga mama kan doe san a wet foe Krestes e taki, na oso? (b) San pikin abi fanowdoe foe a papa nanga mama foe den, èn sortoe problema son papa nanga mama moesoe wini foe gi den disi?

⁵ Na apostel Paulus ben skrifi: „Masra, tan lobi a wefi foe oenoe, neleki fa Krestes ben lobi a gemeente toe èn ben gi ensrefi abra gi en” (Efeisesma 5:25). Te wan masra e doe leki fa Krestes ben doe èn e handri nanga en wefi nanga lobi èn nanga froestan, dan a e doe akroederi wan prenspari pisi foe a wet foe Krestes. Boiti dati, Jesus ben sori krin taki a ben abi firi foe lobi gi jongoe pikin, èn a ben sori a lobi disi foe di a ben brasa den, a ben poti en anoe na den tapoe, èn ben blesi den (Markus 10:16). Papa nanga mama di e doe san a wet foe Krestes e taki, e sori firi foe lobi toe gi den pikin foe den. A troe taki papa nanga mama de di e feni en wan tjalensi foe waka baka na eksempre foe Jesus ini a tori disi. Son wan no man sori den firi foe den makriki. Papa nanga mama, no meki den sortoe prakseri disi hori joe foe sori den pikin foe oenoe a lobi di oenoe e firi gi den! A no boen nomo te oenoe sabi taki oenoe lobi oen pikin. Den moesoe sabi disi toe. Èn den no sa sabi disi boiti te oenoe e feni fasi foe sori oen lobi. — Teki gersi Markus 1:11.

6. (a) A de so taki pikin abi reglementi foe papa nanga mama fanowdoe, èn foe san ede joe e piki so? (b) Sortoe prenspari reide di de gi reglementi foe na osofamiri, pikin moesoe froestan? (c) Gi sortoe kefar sma e wai pasi te a wet foe Krestes de na ini na osofamiri?

⁶ Na a srefi ten, pikin abi tirilin fanowdoe, san wani taki dati den papa nanga mama moesoe poti reglementi gi den èn son tron den moesoe gebroiki tranga leri foe sorgoe taki den reglementi disi doe (Hebrewsma 12:7, 9, 11). Ma tokoe, pikin moesoe kisi jepi safrisafri foe si a prenspari reide gi den reglementi disi: a papa nanga mama foe den lobi den. Èn den moesoe leri taki lobi na a moro boen reide gi den foe gi jesi na a papa nanga mama foe den (Efeisesma 6:1; Kolosesma 3:20; 1 Johanes 5:3). A marki di wan papa nanga mama di abi a koni foe man si sani krin, abi na prakseri, na foe leri jongoewan foe gebroiki a ’krakti foe den denki’, so taki te foe kaba densrefi sa man teki boen bosroiti. (Romesma 12:1; teki gersi 1 Korentesma 13:11.) Na a tra sei, reglementi no moesoe de toemoesi foeroe noso tranga leri no moesoe de toemoesi hebi. Paulus e taki: „Oen papa, no tanteri oen pikin, so taki den no lasti-ati” (Kolosesma 3:21; Efeisesma 6:4). Te a wet foe Krestes de na ini na osofamiri, dan presi no de gi tranga leri di e gi sondro taki sma man dwengi atibron noso gi wortoe di e hati sma. Na ini so wan oso, pikin e firi taki joe e doe den boen èn e bow den, èn den no e firi taki wan hebi poti na den tapoe noso taki den broko-saka. — Teki gersi Psalm 36:7.

7. Na sortoe fasi Bethel-oso ben sa kan de wan eksempre ini a poti foe reglementi na ini na oso?

⁷ Son sma di fisiti Bethel-oso na heri grontapoe, e taki dati den na boen eksempre foe balansifasi ini reglementi gi wan osofamiri. Ala di Bethel-oso abi soso bigisma, tokoe den sortoe presi dati e wroko neleki osofamiri.a A fasi fa Bethel e wroko, frekti èn boen foeroe reglementi de fanowdoe — seiker moro leki a gemiddelde osofamiri. Ma tokoe, den owroeman di e teki fesi na ini Bethel-oso, kantoro, nanga drukkerij, e doe moeiti foe gebroiki a wet foe Krestes. Den e si disi leki a wroko di den abi foe no orga a wroko nomo, ma so srefi foe meki sma go na fesi na jejefasi èn taki „a prisiri foe Jehovah” de na mindri den kompe wrokoman foe den (Nehemia 8:10). Dati meki, den e doe moeiti foe doe sani na wan boen fasi so taki dati e gi sma deki-ati èn den e proeberi foe de reidelek (Efeisesma 4:31, 32). A no de foe froewondroe taki sma sabi den Bethelfamiri foe a prisiri di den e prisiri!

Na ini a gemeente

8. (a) San ala ten moesoe de wi marki na ini a gemeente? (b) Na ini sortoe situwâsi son sma ben aksi foe poti reglementi noso ben proeberi foe meki den?

⁸ Na ini a gemeente a de wi marki toe foe bow makandra ini wan jeje foe lobi (1 Tesalonikasma 5:11). So boen, ala kresten moesoe loekoe boen taki den no e poti moro hebi na tapoe trawan, foe di den e teki en na den tapoe foe kon nanga den eigi prakseri na ini tori pe wan sma moesoe teki wan persoonlijk bosroiti. Ten na ten, son sma e skrifi a Waktitoren Genootschap foe aksi foe tirilin foe den sortoe tori leki fa den moesoe si son kino, boekoe èn srefi preisani. Tokoe a Genootschap no abi a reti foe go ondrosoekoe den sani disi finifini èn foe kroetoe den. Ini moro foeroe kefal, disi na tori di ibriwan sma persoonlijk noso osofamiri-edeman moesoe teki wan bosroiti, foe di a sma abi lobi gi bijbel gronprakseri. Trawan wani kenki den rai nanga tirilin foe a Genootschap, meki den kon tron wet. Foe eksempre, na ini A Waktitoren foe 1 maart 1996, wan moi artikel ben de di ben gi owroeman deki-ati foe tjari herder fisiti na gemeente memre doronomo. A prakseri ben de foe poti wet gi den? Nôno. Ala di den wan di man waka baka den rai, e feni foeroe boen foe dati, tokoe wan toe owroeman no man doe disi. Na so a de toe taki na artikel „Aksi foe leisiman” na ini A Waktitoren foe 1 april 1995 ben warskow gi a meki di sma meki na okasi foe teki dopoe, lasi en lespekifasi foe di den ben doe toemoesi freimde sani, soleki a hori foe bigi dansi noso na orga foe fesa. Son sma gebroiki a lepi rai disi na wan toemoesi strak fasi, èn ben meki wan wet srefi, taki a no ben sa boen foe gebroiki na okasi disi foe seni wan karta gi wan sma foe bow en!

9. Foe san ede a de prenspari taki wi no moesoe kroetoe makandra toemoesi?

⁹ Hori na prakseri toe taki efoe „a volmaakti wet di e meki wi kon fri”, moesoe de na wi mindri, dan wi moesoe erken taki a no ala konsensi foe kresten de a srefi (Jakobus 1:25). Wi moesoe atibron efoe sma abi sani di den lobi persoonlijk èn di no de kontrari bijbel gronprakseri? Nôno. Te wi ben sa doe disi dan wi ben sa tjari pratifasi kon (1 Korentesma 1:10). Di Paulus ben warskow wi foe no kroetoe wan kompe kresten, dan a ben taki: „Na fesi foe en eigi basi a e tanapoe noso fadon. Foe troe, den sa tanapoe bika Jehovah kan meki en tanapoe” (Romesma 14:4). Wi kan meki taki Jehovah no e prisiri nanga wi efoe wi e taki kontrari makandra foe tori di wi ben moesoe libi gi a konsensi foe a sma. — Jakobus 4:10-12.

10. Soema kisi a wroko foe loekoe a gemeente, èn fa wi moesoe jepi den?

¹⁰ Meki wi memre toe, taki den owroeman kisi a wroko foe hori ai na tapoe na ipi foe Gado (Tori foe den Apostel 20:28). Den moesoe gi jepi. Wi moesoe firi fri foe go na den foe kisi rai, bika den na studenti foe bijbel èn den sabi san taki na ini den poeblikâsi foe a Waktitoren Genootschap. Te den owroeman e si taki wan sma tjari ensrefi na wan fasi di kande sa abi leki bakapisi taki a e pasa bijbel gronprakseri, dan sondro foe frede, den e gi rai di de fanowdoe (Galasiasma 6:1). Gemeente memre e waka baka a wet foe Krestes te den e wroko makandra nanga den lobi owroeman disi, di e teki fesi na den mindri. — Hebrewsma 13:7.

Owroeman e gebroiki a wet foe Krestes

11. Fa owroeman e gebroiki a wet foe Krestes na ini a gemeente?

¹¹ Na ini a gemeente, owroeman de klariklari foe doe san a wet foe Krestes e taki. Den e teki fesi ini a preiki di a boen njoensoe e preiki, e gi leri na ini bijbel so taki den kan doro na ati foe sma, èn, leki lobi-ati owroeman di abi switifasi, den e taki nanga „sili di broko-saka” (1 Tesalonikasma 5:14). Den e loekoe boen taki den no e tjari densrefi na wan fasi di no fiti wan kresten, soleki fa a de na ini den foeroe relisi foe krestenhèit. A troe, taki a grontapoe disi e go na baka esi-esi, èn neleki Paulus, owroeman kan broko den ede nanga na ipi; ma den e hori den balansi te den e doe wan sani na tapoe den afersi disi. — 2 Korentesma 11:28.

12. San wan owroeman ben kan doe, te wan kresten e kon na en foe aksi jepi?

¹² Foe eksempre, kande wan kresten wani aksi a rai foe wan owroeman foe wan prenspari tori di bijbel poeblikâsi no e taki krin foe dati noso pe a de fanowdoe taki difrenti kresten gronprakseri moesoe tjari kon ini balansi. Kande sma aksi a kresten foe teki wan moro hei wroko na wrokope pe a kan kisi moro moni, ma pe moro frantiwortoe de toe. Noso wan jongoe kresten en papa di no de na bribi, kan aksi sani foe en manpikin di ben kan abi krakti na tapoe a diniwroko foe a manpikin. Na ini den sortoe situwâsi disi na owroeman no e taki fa ensrefi e denki foe a tori. Na presi foe dati, a de moro boen te a e opo bijbel èn jepi a sma foe prakseri go-kon foe den gronprakseri di de ini a tori. A kan gebroiki na Index van Wachttoren-publikaties efoe dati de, foe soekoe san „a getrow èn koni srafoe” taki foe a tori na tapoe den bladzijde foe A Waktitoren nanga tra poeblikâsi (Mateus 24:45). San efoe a kresten e teki wan bosroiti baka dati di no sori so koni ini na ai foe na owroeman? Efoe a bosroiti no e pasa bijbel gronprakseri noso wet troetroe, dan a kresten sa si taki na owroeman e erken a reti di a abi foe teki so wan bosroiti, foe di a sabi taki „ibriwan sma sa tjari en eigi lai”. Ma a kresten moesoe memre, taki „san wan sma e sai, na dati a sa koti toe”. — Galasiasma 6:5, 7.

13. Foe san ede owroeman e jepi trawan foe prakseri go-kon foe tori, na presi taki den e gi piki langalanga na tapoe aksi noso taki den e sori fa densrefi e denki foe a tori?

¹³ Foe san ede na owroeman di abi ondrofeni, e handri na a fasi disi? Foe no moro mendri leki toe reide. Na a fosi presi, Paulus ben taigi wan gemeente taki a no ’ben de a meester tapoe a bribi foe den’ (2 Korentesma 1:24). Te na owroeman e jepi en brada foe prakseri go-kon foe sani nanga jepi foe den Boekoe foe bijbel èn teki en eigi bosroiti tapoe a gron foe sani di a sabi kaba, dan na owroeman e waka baka a fasi foe Paulus. A e erken taki en makti skotoe, neleki fa Jesus ben erken taki en makti skotoe (Lukas 12:13, 14; Judas 9). Na a srefi ten, owroeman de klariklari foe gi boen èn krakti bijbel rai pe dati de fanowdoe. Na a di foe toe presi, a e gi leri na en kompe kresten. Na apostel Paulus ben taki: „Tranga njanjan de gi lepi sma, den sma di foe den gebroiki a koni di den abi foe si sani krin, e leri disi foe si san boen èn san ogri” (Hebrewsma 5:14). Foe dati ede, efoe wi wani kon lepi, dan wi moesoe gebroiki a koni di wi abi foe si sani krin, èn no froetrow ala ten tapoe wan tra sma foe meki en teki bosroiti gi wi. Te na owroeman e sori en kompe kresten foe prakseri go-kon foe sani nanga jepi foe den Boekoe foe bijbel, dan a e jepi en na a fasi disi foe go na fesi.

14. Fa lepi sma kan sori taki den e froetrow tapoe Jehovah?

¹⁴ Wi kan bribi taki Jehovah Gado sa gebroiki en santa jeje foe abi krakti na tapoe na ati foe troe anbegiman. So boen, lepi kresten wani doro na ati foe den kresten brada foe den, e begi den, neleki fa na apostel Paulus ben doe (2 Korentesma 8:8; 10:1; Fileimon 8, 9). Paulus ben sabi taki moro foeroe na den onregtfardikisma, èn no den regtfardikisma di abi finifini wet fanowdoe foe meki den waka na wan joisti fasi (1 Timoteus 1:9). A no ben sori taki a no ben froetrow den brada foe en, ma taki a ben abi bribi na ini den. A ben skrifi wan gemeente: „Wi e froetrow na tapoe Masra ini a tori foe oenoe” (2 Tesalonikasma 3:4). Paulus en bribi nanga froetrow, seiker ben doe foeroe foe boeweigi den kresten dati. Owroeman, nanga opziener di e rèis, abi den srefi marki na prakseri na ini a ten disi. Den getrow man disi e gi kowroe-ati troetroe, foe di den e wei na ipi foe Gado na wan lobi-ati fasi! — Jesaja 32:1, 2.

Libi akroederi a wet foe Krestes

15. San na wan toe aksi di wi kan poti gi wisrefi foe si efoe wi e doe san a wet foe Krestes e taki foe a matifasi di wi abi nanga wi brada?

¹⁵ Wi alamala moesoe ondrosoekoe wisrefi doronomo foe si efoe wi e libi akroederi a wet foe Krestes èn e horibaka gi disi (2 Korentesma 13:5). Troetroe, wi alamala kan feni boen te wi e aksi: ’Mi e bow noso mi e kroetoe sma? Mi abi balansifasi noso mi e doe sani pasa marki? Mi e hori trawan na prakseri noso mi e denki mi eigi reti nomo?’ Wan kresten no e proeberi foe taigi en brada san a moesoe doe èn san a no moesoe doe ini tori di bijbel no e taki finifini foe den. — Romesma 12:1; 1 Korentesma 4:6.

16. Fa wi kan jepi den wan di abi wan negatief denki foe densrefi, èn na so fasi e doe wan prenspari pisi foe san a wet foe Krestes e taki?

¹⁶ Na ini den tranga ten disi, a de prenspari taki wi e soekoe fasi foe bow makandra. (Hebrewsma 10:24, 25; teki gersi Mateus 7:1-5.) Te wi e loekoe wi brada nanga sisa, a no de so dan taki den boen eigifasi foe den wani taki moro gi wi leki den swakifasi foe den? Gi Jehovah, ibriwan foe wi warti. Ma a de wan sari taki a no ala sma e denki na a fasi dati, srefi no foe densrefi. Foeroe sma e si soso den eigi persoonlijk fowtoe nanga onvolmaaktifasi. Efoe wi wani gi den wan dati — nanga trawan — deki-ati, dan wi ben kan proeberi taki nanga wán noso toe sma na ibri konmakandra, èn meki den kon sabi foe san ede wi e warderi en taki den de drape èn taki wi e warderi a prenspari bijdrage di den e gi na ini a gemeente? A de troetroe wan prisiri foe lekti a hebi foe den na so fasi èn na a fasi disi doe san a wet foe Krestes e taki! — Galasiasma 6:2.

A wet foe Krestes abi boen bakapisi!

17. Na sortoe difrenti fasi joe e si taki a wet foe Krestes abi boen bakapisi na ini joe gemeente?

¹⁷ A wet foe Krestes abi boen bakapisi na ini a kresten gemeente. Wi e si disi ala dei — te kompe Kotoigi e prati a boen njoensoe fajafaja, te den e trowstoe makandra èn e gi makandra deki-ati, te den e doe moeiti foe dini Jehovah awansi den abi den moro moeilek problema, te papa nanga mama e doe moeiti foe kweki den pikin foe den foe lobi Jehovah nanga prisiri-ati, te opziener e leri sma a Wortoe foe Gado nanga lobi èn nanga waran firi, èn e gi na ipi deki-ati foe abi wan tranga faja foe dini Jehovah foe têgo (Mateus 28:19, 20; 1 Tesalonikasma 5:11, 14). Te wisrefi e meki a wet foe Krestes wroko na ini wi libi, dan Jehovah en ati sa prisiri troetroe! (Odo 23:15) Jehovah wani, taki ala den wan di lobi en volmaakti wet, sa libi foe têgo. Na ini a Paradijs di e kon, wi sa si wan ten taki a libisma famiri de volmaakti, wan ten pe no wan sma de di e broko wet, èn wan ten te wi sa man dwengi ibri firi foe wi ati. Dati de troetroe wan toemoesi boen pai di wi kisi foe di wi e libi akroederi a wet foe Krestes!

[Foetoewortoe]

San joe e prakseri?

◻ Foe san ede krestenhèit no froestan san a wet foe Krestes wani taki?

◻ Fa wi kan meki a wet foe Krestes wroko na ini na osofamiri?

◻ San wi moesoe doe èn san wi no moesoe doe, efoe wi wani doe san a wet foe Krestes e taki na ini a gemeente?

◻ Fa owroeman kan gi jesi na a wet foe Krestes te den a handri nanga a gemeente?

[Prenki na tapoe bladzijde 17]

Joe pikin abi foeroe lobi fanowdoe

[Prenki na tapoe bladzijde 18]

Den lobi-ati owroeman foe wi e gi kowroe-ati troetroe!