Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • w96 1/11 blz. 12-18
  • Prati a trowstoe di Jehovah e gi

Felem no de na a pisi disi.

Sorry, wan sani no go bun di wi pruberi fu drai a felem.

  • Prati a trowstoe di Jehovah e gi
  • A Waktitoren—A e taki fu Yehovah Kownukondre 1996
  • Edeprakseri
  • A srefi sortu tori
  • „A Gado foe ala trowstoe”
  • Den kisi leri foe de trowstoeman
  • A banawtoe foe Paulus na Asia
  • Disiten eksempre
  • Wan bigi rampoe na Rwanda — Soema de frantiwortoe?
    A Waktitoren—A e taki fu Yehovah Kownukondre 1994
  • „A Gado fu ala trowstu”
    A Waktitoren—A e taki fu Yehovah Kownukondre 2008
  • „Trowstu ala den sma di e sari”
    A Waktitoren—A e taki fu Yehovah Kownukondre 2011
  • Trowstoe di e kon foe „a Gado foe ala trowstoe”
    A Waktitoren—A e taki fu Yehovah Kownukondre 1995
Moro sani
A Waktitoren—A e taki fu Yehovah Kownukondre 1996
w96 1/11 blz. 12-18

Prati a trowstoe di Jehovah e gi

„A howpoe di wi abi gi oenoe no e degedege, foe di wi sabi taki neleki fa oenoe na sma di e kisi pina toe, na so oenoe sa abi prati na a trowstoe toe.” — 2 KORENTESMA 1:7.

1, 2. San foeroe sma di tron kresten na ini a ten disi, ben ondrofeni?

FOEROE sma di e leisi A Waktitoren now ben gro kon bigi sondro sabi foe a waarheid foe Gado. Kande dati de so nanga joe. Efoe dati ben de so, dan memre fa joe ben firi di na ai foe joe froestan ben bigin opo. Foe eksempre, di joe ben kon froestan fositron taki den dedewan no e pina ma taki den no sabi noti, dan joe no ben firi froelekti? Èn di joe ben leri foe a howpoe di de gi den dedewan, taki miljardmiljard sma sa kisi wan opobaka foe libi na ini Gado njoen grontapoe, dan joe no ben feni trowstoe? — Preikiman 9:5, 10; Johanes 5:28, 29.

2 Fa a de nanga a pramisi foe Gado foe tjari wan kaba kon na godelowsoefasi èn foe kenki a grontapoe disi kon tron wan paradijs? Di joe ben leri foe disi, dan a no ben trowstoe joe èn joe no ben kon foeroe nanga fajafaja froewakti? Fa joe ben firi di joe ben leri fositron taki a kan dati sma noiti no sa dede, ma sa pasa kon libilibi na ini a grontapoe Paradijs di e kon? Sondro tweifri joe ben prisiri. Ija, joe ben tron wan sma di ben kisi a boskopoe foe Gado di e gi trowstoe, san Jehovah Kotoigi e preiki na heri grontapoe now. — Psalm 37:9-11, 29; Johanes 11:26; Openbaring 21:3-5.

3. Foe san ede den sma di e prati a boskopoe foe Gado di e gi trowstoe nanga trawan, e pina so srefi foe banawtoe ede?

3 Ma di joe ben proeberi foe prati a bijbel boskopoe nanga trawan, dan joe ben kon froestan toe taki „a no ala sma abi bribi” (2 Tesalonikasma 3:2). Kande wan toe foe joe owroe mati ben spotoe nanga joe, foe di joe ben sori bribi na ini den pramisi foe bijbel. Kande joe kisi froefolgoe srefi, foe di joe ben tan studeri bijbel makandra nanga Jehovah Kotoigi. Kande a gens kon moro foeroe di joe ben bigin kenki joe libi meki a de akroederi bijbel gronprakseri. Joe ben bigin ondrofeni a banawtoe di Satan nanga en grontapoe e tjari kon na tapoe ala sma di e teki a trowstoe foe Gado.

4. Na sortoe difrenti fasi, sma di kisi belangstelling no so langa pasa ete, kande e handri na tapoe banawtoe?

4 Na wan sari taki, soleki fa Jesus ben taki na fesi, banawtoe e meki son sma naki foetoe èn den e tapoe foe abi demakandra nanga a kresten gemeente (Mateus 13:5, 6, 20, 21). Trawan e horidoro te den e kisi banawtoe, foe di den e tan hori a prakseri foe den na tapoe den pramisi di e gi trowstoe, di den e leri. Te foe kaba den e gi den libi abra na Jehovah èn den e teki dopoe leki disipel foe en Manpikin, Jesus Krestes. (Mateus 28:19, 20; Markus 8:34). A no de foe taki, dati banawtoe no e tapoe te wan kresten teki dopoe kaba. Foe eksempre, gi wan sma di ben gwenti foe libi na wan immoreel fasi, a kan de wan tranga feti foe tan krin. Trawan moesoe feti nanga gens di den e kisi doronomo foe famiriman di no de na bribi. Ma awansi san a banawtoe de toe, ala sma di e feti getrow na baka wan libi pe den gi densrefi abra na Gado, kan de seiker foe wán sani. Na wan toemoesi persoonlijk fasi den sa ondrofeni a trowstoe èn jepi foe Gado.

„A Gado foe ala trowstoe”

5. San Paulus ben ondrofeni toe, makandra nanga den foeroe tesi di a ben kisi?

5 Wan sma di troetroe ben warderi a trowstoe di Gado e gi, ben de na apostel Paulus. Baka wan ten foe boen foeroe tesi na Asia nanga Masedonia, a ben kisi foeroe froelekti di a ben jere taki a gemeente foe Korente ben handri boen na tapoe a brifi di a ben skrifi foe piri-ai gi den. Disi ben boeweigi en foe skrifi den wan di foe toe brifi, di abi den wortoe foe prèise na ini di e kon now: „Blesi foe a Gado nanga Tata foe wi Masra Jesus Krestes, a Tata foe safoe sari-ati èn a Gado foe ala trowstoe, di e trowstoe wi na ini ala wi banawtoe.” — 2 Korentesma 1:3, 4.

6. San wi e leri foe den wortoe foe Paulus di wi kan feni na 2 Korentesma 1:3, 4?

6 Den wortoe disi di skrifi na ondro a krakti foe santa jeje, e leri wi foeroe. Meki wi go ondrosoekoe den finifini. Te Paulus e prèise Gado noso e taigi en tangi noso e aksi en wan sani na ini den brifi foe en, dan nofo tron wi e si taki a abi dipi warderi toe gi Jesus, na Edeman foe a kresten gemeente (Romesma 1:8; 7:25; Efeisesma 1:3; Hebrewsma 13:20, 21). Foe dati ede, Paulus ben taki den wortoe disi foe prèise na „a Gado nanga Tata foe wi Masra Jesus Krestes”. Dan foe a fosi leisi na ini den brifi foe en, a e gebroiki wan Griki zelfstandig naamwortoe di den vertaal nanga „safoe sari-ati”. A zelfstandig naamwortoe disi e kon foe wan wortoe di den e gebroiki moro foeroe foe sori sari te wan tra sma e pina. Na so Paulus e taki foe den safoe firi di Gado abi gi iniwan foe En getrow foetoeboi di e kisi banawtoe — safoe firi di e boeweigi Gado foe handri na wan sari-ati fasi foe a boen foe den. Te foe kaba, Paulus ben froetrow tapoe Jehovah leki a fonten foe a toemoesi moi eigifasi disi, foe di a ben kari en „a Tata foe safoe sari-ati”.

7. Foe san ede wi kan taki dati Jehovah na „a Gado foe ala trowstoe”?

7 A „safoe sari-ati” foe Gado e tjari froelekti kon gi a sma di e kisi banawtoe. So boen, Paulus e go doro foe taki foe Jehovah leki „a Gado foe ala trowstoe”. Foe dati ede, awansi sortoe trowstoe wi kan kisi toe foe di kompe bribiman abi boen-atifasi gi wi, tokoe wi kan froetrow tapoe Jehovah leki a fonten. No wan troetroe têgo trowstoe de di no e kon foe Gado. Boiti dati, na en meki libisma leki a prenki foe en, èn na so fasi a e meki taki wi man de trowstoeman. Èn na Gado en santa jeje e boeweigi den foetoeboi foe en foe sori safoe sari-ati na den sma di abi trowstoe fanowdoe.

Den kisi leri foe de trowstoeman

8. Sortoe boen bakapisi kan kon te wi e horidoro na ondro banawtoe, ala di den tesi foe wi no e kon foe Gado?

8 Ala di Jehovah Gado e gi pasi taki foeroe tesi e kon na tapoe den getrow foetoeboi foe en, tokoe noiti den sortoe tesi dati e kon foe en (Jakobus 1:13). Ma a trowstoe di a e gi te wi e horidoro na ondro banawtoe, kan leri wi foe poti moro prakseri na tapoe den sani di trawan abi fanowdoe. Nanga sortoe bakapisi? „So taki wi kan trowstoe den wan di e kisi ala sortoe banawtoe, nanga jepi foe a trowstoe di Gado ben trowstoe wi” (2 Korentesma 1:4). So boen, Jehovah e leri wi foe de sma di na wan boen fasi e prati a trowstoe foe en nanga kompe bribiman èn nanga den wan di wi e miti na ini wi diniwroko, ala di wi e doe soleki fa Krestes e doe èn „e trowstoe ala den sma di e sari”. — Jesaja 61:2; Mateus 5:4.

9. (a) San sa jepi wi foe horidoro na ondro pina? (b) Fa trawan e kisi trowstoe te wi e horidoro getrow na ondro banawtoe?

9 Paulus ben horidoro na ondro den foeroe pina di a ben kisi, tangi foe a bigi trowstoe di a ben kisi foe Gado nanga jepi foe Krestes (2 Korentesma 1:5). Wi so srefi kan kisi boen foeroe trowstoe te wi e prakseri dipi foe den moi pramisi foe Gado, te wi e begi foe kan kisi jepi foe en santa jeje, èn te wi e si den piki di Gado e gi na tapoe den begi foe wi. So boen, wi sa kon tranga foe go doro foe hori a soevereiniteit foe Jehovah hei èn sori taki Didibri na wan leiman (Job 2:4; Odo 27:11). Te wi horidoro getrow na ondro iniwan sortoe banawtoe, dan wi moesoe gi Jehovah tangi neleki Paulus, foe di a trowstoe foe en e meki taki kresten man tan getrow na ondro tesi. Te getrow kresten e horidoro, dan dati abi leki bakapisi taki a heri bradafasi e kisi trowstoe, èn a e meki taki trawan abi a fasti bosroiti foe „horidoro na ondro densrefi pina”. — 2 Korentesma 1:6.

10, 11. (a) San na wan toe sani di ben meki taki a gemeente foe owroeten Korente ben pina? (b) Fa Paulus ben trowstoe a gemeente na Korente, èn foe sortoe howpoe a ben taki?

10 Den Korentesma ben kisi den pina toe di e kon na tapoe ala troe kresten. Boiti dati, den ben abi rai fanowdoe foe sluit wan hoeroeman uit di no ben abi berow (1 Korentesma 5:1, 2, 11, 13). Foe di den no ben doe disi èn no ben tjari wan kaba kon na feti èn na pratifasi, meki den ben tjari sjen kon na tapoe a gemeente. Ma te foe kaba den ben waka baka a rai foe Paulus èn ben sori troetroe berow. Foe dati ede, a ben prèise den na wan waran fasi èn ben taki dati a fasi fa den ben handri na wan toemoesi boen fasi na tapoe a brifi foe en, ben trowstoe en (2 Korentesma 7:8, 10, 11, 13). Soleki fa a sori, dan a sma di den ben sluit uit ben abi berow toe. Dati meki Paulus ben gi den a rai foe ’gi en pardon èn trowstoe en, so taki na wán noso tra fasi, a man disi no ben sa broko saka foe di a e sari pasa marki’. — 2 Korentesma 2:7.

11 Paulus di foe toe brifi troetroe ben moesoe trowstoe a gemeente na Korente. Èn disi ben de wán foe den sani di Paulus ben abi na prakseri. A ben tjari kon na krin: „A howpoe di wi abi gi oenoe no e degedege, foe di wi sabi taki neleki fa oenoe na sma di kisi pina toe, na so oenoe sa abi prati na a trowstoe toe” (2 Korentesma 1:7). Na a kaba foe en brifi, Paulus ben gi tranga: „Tan . . . kisi trowstoe, . . . èn a Gado foe lobi èn foe vrede sa de nanga oenoe.” — 2 Korentesma 13:11.

12. San ala kresten abi fanowdoe?

12 Fa wi kan leri wan prenspari sani foe disi! Ala memre foe a kresten gemeente moesoe „abi prati na a trowstoe” di Gado e gi foe di a gebroiki en Wortoe, en santa jeje, nanga en organisâsi na grontapoe. Srefi sma di sluit uit kan abi trowstoe fanowdoe efoe den abi berow èn no e libi wan takroe libi moro. So boen, „a getrow èn koni srafoe” kon nanga wan sari-ati seti foe jepi den. Wan tron wan jari, toe owroeman kan fisiti son sma di sluit uit. Kande den no e sori wan fasi moro foe meki oproeroe noso den no e doe bigi sondoe moro èn kande den abi jepi fanowdoe foe doe san de fanowdoe foe den teki en njoen baka. — Mateus 24:45; Esekièl 34:16.

A banawtoe foe Paulus na Asia

13, 14. (a) San Paulus ben taki foe wan ten foe hebi banawtoe di a ben abi na Asia? (b) Sortoe sani di ben pasa, Paulus ben kan abi na prakseri?

13 Wi no ben kan teki a sortoe pina di a gemeente na Korente ben kisi te nanga now, gersi nanga den foeroe banawtoe di Paulus ben ondrofeni. So boen, a ben kan memre den: „Wi no e wani, taki oenoe no sabi brada, foe a banawtoe di wi ben kisi na ini distrikt Asia, taki wi ben de na ondro foeroe kwinsi, di pasa krakti foe wi, so taki wi no ben de seiker srefisrefi efoe wi ben o tan na libi. Foe taki en leti, na ini wisrefi wi ben abi a firi taki wi ben kisi dedestrafoe. Disi ben de, so taki wi no ben sa froetrow tapoe wisrefi, ma tapoe a Gado di e gi den dedewan wan opobaka. Foe san wan bigi sani leki dede a ben froeloesoe wi èn a sa froeloesoe wi; èn a howpoe foe wi de tapoe en, taki a sa froeloesoe wi moro fara toe.” — 2 Korentesma 1:8-10.

14 Son bijbel sabiman e bribi taki Paulus ben sori go na a oproeroe na Efeise, san ben kan abi leki bakapisi taki Paulus so srefi Gajus nanga Aristarkus, den toe Masedonia kompe di ben teki waka nanga en, ben kan lasi den libi. Nanga tranga, sma ben tjari den toe kresten disi go na ini wan komedi-oso di ben foeroe nanga wan ipi sma di ben atibron troetroe èn di „ben bari so wan toe joeroe langa: ’Artemis [na oemagado] foe den Efeisesma bigi!’” Te foe kaba, wan lantiman foe foto ben man meki taki na ipi tan tiri. A kefar disi di ben de gi a libi foe Gajus nanga Aristarkus ben moesoe sari Paulus troetroe. Foe taki en leti, a ben wani go na inisei èn taki nanga a fajafaja ipi sma dati di ben atibron troetroe, ma den ben tapoe en foe tjari en libi kon na ini kefar na a fasi disi. — Tori foe den Apostel 19:26-41.

15. Foe sortoe toemoesi aparti situwâsi den e taki kande na 1 Korentesma 15:32?

15 Ma kande Paulus ben taki foe wan situwâsi di ben ogri moro leki a sani di ben pasa na fesi. Na ini en fosi brifi gi den Korentesma, Paulus ben aksi: „Efoe mi, neleki sma, feti nanga werdri meti na Efeise, dan sortoe boen a e doe gi mi?” (1 Korentesma 15:32). Kande disi wani taki dati a libi foe Paulus ben kon na ini kefar no wawan foe sma ede di ben de leki meti, ma foe troetroe meti di ben de na ini a stadion foe Efeise. Son tron, sma ben strafoe ogriman foe di den ben dwengi den foe feti nanga werdri meti, ala di na ipi di ben wani si broedoe ben de drape e loekoe. Efoe Paulus ben wani taki dati a ben kisi foe doe nanga troetroe werdri meti, dan na a lasti momenti a ben moesoe kisi kibri na wan wondroe fasi so taki a no ben o dede na wan ogri-atifasi, neleki fa Danièl ben kisi froeloesoe foe no kon ini den mofo foe troetroe lew. — Danièl 6:22.

Disiten eksempre

16. (a) Foe san ede foeroe Kotoigi foe Jehovah kan froestan san na den banawtoe di Paulus ben kisi? (b) Foe san wi kan de seiker ini a tori foe den wan di dede foe a bribi foe den ede? (c) San na den boen bakapisi te kresten ondrofeni taki pikinmoro den lasi den libi?

16 Foeroe kresten na ini a ten disi kan froestan san na den banawtoe di Paulus ben kisi (2 Korentesma 11:23-27). Na ini a ten disi toe, kresten kisi „boen foeroe kwinsi pasa a krakti foe [den]”, èn foeroe foe den kisi foe doe nanga situwâsi pe den ’no ben de seiker foe a libi foe den’ (2 Korentesma 1:8). Son wan foe den dede foe di kiriman di e kiri sma na ipi-ipi èn ogri-ati froefolgoeman, kiri den. Wi kan de seiker taki a trowstoe di Gado e gi, ben meki taki den ben man horidoro èn taki den dede ala di den ben poti ala den prakseri na tapoe a kontroe foe a howpoe foe den, awansi dati ben de wan howpoe foe libi na hemel noso wan howpoe foe libi na grontapoe (1 Korentesma 10:13; Filipisma 4:13; Openbaring 2:10). Na tra okasi, Jehovah meki sani waka na wan heri tra fasi, èn den brada foe wi kisi froeloesoe so taki den no dede. Tweifri no de taki den wan di kisi froeloesoe na so wan fasi, kisi moro froetrow „tapoe a Gado di e gi den dedewan wan opobaka” (2 Korentesma 1:9). Baka ten, den ben kan taki nanga moro overtoigi srefi te den ben prati a boskopoe foe Gado di e gi trowstoe, nanga trawan. — Mateus 24:14.

17-19. Sortoe ondrofenitori e sori taki den brada foe wi na Rwanda ben de sma di abi prati na a trowstoe foe Gado?

17 No so langa pasa kaba den lobi brada foe wi na Rwanda ben ondrofeni wan srefi sortoe sani leki san Paulus nanga den kompe foe en ben ondrofeni. Foeroe foe den ben lasi den libi, ma den moeiti di Satan ben meki no ben man meki den lasi a bribi foe den. Na presi foe dati, den brada foe wi na a kondre disi foeroe leisi ondrofeni a trowstoe foe Gado densrefi. Na ini a ten di den ben kiri poeroe a ras foe den Toetsi nanga den Hoetoe di ben libi na Rwanda, joe ben abi Hoetoe di ben tjari a libi foe den kon na ini kefar foe kibri Toetsi èn Toetsi ben tjari a libi foe den kon ini kefar foe di den ben kibri Hoetoe. Extemistsma ben kiri son wan foe den foe di den ben kibri den kompe bribiman foe den. Foe eksempre, den ben kiri wan Hoetoe Kotoigi di ben nen Gahizi, baka di a ben kibri wan Toetsi sisa di ben nen Chantal. Wan Hoetoe sisa di nen Charlotte, ben kibri Chantal en Toetsi masra, Jean, na wan tra presi. Fotenti dei langa Jean nanga wan tra Toetsi brada ben kibri na ini wan bigi schoorsteen, èn foe sjatoe pisi ten nomo den ben kon na dorosei te neti. A heri pisi ten dati, Charlotte ben gi den njanjan èn ben kibri den ala di a ben libi krosibei foe wan Hoetoe legrekampoe. Na tapoe bladzijde 17, joe kan si wan prenki foe Chantal nanga Jean di de nanga makandra baka, èn di de nanga tangi taki den Hoetoe kompe anbegiman foe den ben ’tjari a libi foe den kon na ini kefar’ neleki san Priska nanga Akwila ben doe gi na apostel Paulus. — Romesma 16:3, 4.

18 A koranti Intaremara ben prèise wan tra Hoetoe Kotoigi Rwakabubu, foe di a ben kibri Toetsi kompe bribiman.a A koranti ben taki: „Joe abi Rwakabubu toe, di de wan foe den Kotoigi foe Jehovah, èn di na ala sortoe presi ben tan kibri sma na mindri den brada foe en (na so kompe bribiman e kari makandra). Nofo tron a ben gebroiki heri dei foe tjari njanjan nanga watra kon gi den, ala di a abi astma siki. Ma Gado ben meki en kon tranga na wan aparti fasi.”

19 Loekoe so srefi wan Hoetoe paar di ben abi belangstelling èn di ben nen Nikodeme nanga Athanasie. Bifo sma ben bigin kiri ras poeroe, a trowpaar disi ben e studeri bijbel nanga wan Toetsi Kotoigi di ben nen Alphonse. Ala di a libi foe den ben de na ini kefar, tokoe den ben kibri Alphonse na ini na oso foe den. Baka ten den ben kon froestan taki na oso no ben de wan boen presi moro foe gi kibri, foe di den Hoetoe birtisma foe den ben sabi foe a Toetsi mati foe den. Foe dati ede, Nikodeme nanga Athanasie ben kibri Alphonse na ini wan olo na ini a djari foe den. Disi ben de wan boen sani foe doe, foe di den birtisma ben bigin kon soekoe Alphonse pikinmoro ibri dei. Di a ben didon na ini na olo disi 28 dei langa, dan Alphonse ben prakseri dipi foe tori foe bijbel leki a wan foe Rakab, di ben kibri toe Israèlman na tapoe a dak foe en oso na Jerikow (Josua 6:17). Now Alphonse e go doro nanga en diniwroko na Rwanda leki wan preikiman foe a boen njoensoe, èn disi de foe di den Hoetoe bijbel studenti ben tjari den libi kon na ini kefar gi en. Èn fa a ben go nanga Nikodeme nanga Athanasie? Now den de dopoe Kotoigi foe Jehovah èn den e hori moro leki 20 bijbelstudie nanga sma di abi belangstelling.

20. Na sortoe fasi Jehovah ben trowstoe den brada foe wi na Rwanda, ma sortoe sani foeroe foe den abi fanowdoe ete?

20 Na a ten di den ben bigin kiri ras poeroe na Rwanda, joe ben abi 2500 preikiman foe a boen njoensoe ini a kondre. Ala di hondrohondro sma ben lasi den libi noso ben moesoe lowe komoto na a kondre, tokoe a nomroe foe Kotoigi gro pasa 3000. Dati na wan boeweisi taki Gado troetroe ben trowstoe den brada foe wi. San de foe taki foe den foeroe pikin di no abi papa nanga mama èn den weduwe di de na mindri Jehovah Kotoigi? A no de foe taki dati den abi banawtoe ete èn taki doronomo den abi trowstoe fanowdoe (Jakobus 1:27). Den watra-ai foe den sa kon drei dorodoro soso te na opobaka e feni presi na ini Gado njoen grontapoe. Ma tokoe den man kakafoetoe gi sani ini libi, tangi foe a jepi foe den brada foe den èn foe di den na anbegiman foe „a Gado di e gi ala trowstoe”.

21. (a) Pe moro, den brada foe wi ben abi boen foeroe trowstoe foe Gado fanowdoe, èn san na wan fasi fa wi alamala kan jepi? (Loekoe a boksoe „Trowstoe na ini den fo jari foe feti”.) (b) O ten wi no sa abi trowstoe fanowdoe moro?

21 Na foeroe tra presi soleki Eritrea, Singapore, nanga san ben de Joegoslafia fosi, den brada foe wi e tan dini Jehovah getrow ala di den abi banawtoe. Meki wi jepi den sortoe brada disi foe di wi e begi doronomo foe aksi taki den kan kisi trowstoe (2 Korentesma 1:11). Èn meki wi horidoro getrow te leki a ten e kon taki Gado sa gebroiki Jesus Krestes „[foe] poeroe ala watra na [wi] ai” krinkrin. Dan wi sa ondrofeni dorodoro san na a trowstoe di Jehovah sa gi na ini en njoen grontapoe foe regtfardikifasi. — Openbaring 7:17; 21:4; 2 Petrus 3:13.

[Foetoewortoe]

a De Wachttoren foe 1 januari 1995, bladzijde 26, ben froeteri na ondrofeni foe Deborah, na oemapikin foe Rwakabubu, di a begi foe en ben naki na ati foe wan groepoe Hoetoe sroedati èn ben meki taki den no kiri na osofamiri.

Joe sabi disi?

◻ Foe san ede den e kari Jehovah „a Gado foe ala trowstoe”?

◻ Fa wi moesoe si banawtoe?

◻ Nanga soema wi kan prati trowstoe?

◻ Fa a sa pasa taki, wi no sa abi trowstoe fanowdoe moro?

[Prenki na tapoe bladzijde 17]

Ala di Jean nanga Chantal ben de Toetsi Kotoigi, tokoe Hoetoe Kotoigi ben kibri den na a ten di sma ben kiri ras poeroe na Rwanda

[Prenki na tapoe bladzijde 17]

Jehovah Kotoigi e tan prati a boskopoe foe Gado di e gi trowstoe, nanga den sma na den sei foe den na Rwanda

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma