Meki wi tegoe gi godelowsoefasi
JEHOVAH na wan santa Gado. Na ini owroeten a ben de „a Santawan foe Israèl”, èn foe dati ede a ben wani taki Israèl ben moesoe de krin, sondro flaka (Psalm 89:18). A ben taigi a pipel foe en di a ben froekisi: „Oenoe moesoe sori taki oenoe de santa, bika mi de santa” (Lefitikus 11:45). Iniwan sma di ben wani „kren go na a bergi foe Jehovah” ben moesoe de „sondro fowtoe na ini en anoe èn krin na ini en ati” (Psalm 24:3, 4). Dati ben wani taki moro leki nomo foe no doe sondoe sani. A ben wani taki foe „no wani si ogri na ai”. — Odo 8:13.
Na wan lobi fasi Jehovah ben seti finifini wet so taki a nâsi Israèl ben kan kon sabi san ogri èn no ben sa doe ogri (Romesma 7:7, 12). Den wet disi ben abi so srefi strak tirilin ini a tori foe boen gwenti nanga wet. Soetadoe, homo-seks doe, seks demakandra nanga famiriman, nanga seks na mindri libisma nanga meti, den ben kari den alamala sani di no santa èn di e doti a jejefasi (Lefitikus 18:23; 20:10-17). Den sma di ben doe den lagi morsoe sani disi ben koti poeroe foe a nâsi Israèl.
Di a gemeente foe salfoe kresten ben tron „na Israèl foe Gado”, den srefi sortoe moreel markitiki ben seti gi den (Galasiasma 6:16). So srefi kresten ben moesoe „tegoe gi godelowsoefasi” (Romesma 12:9). Den wortoe foe Jehovah gi Israèl ben de so srefi gi den: „Oenoe moesoe de santa, bika mi de santa” (1 Petrus 1:15, 16). Den sortoe sani disi di no santa, soleki hoeroedoe, soetadoe, homo-seks doe, seks na mindri libisma nanga meti, èn seks demakandra nanga famiriman, no ben moesoe pori a kresten gemeente. Den sma di no wani tapoe foe doe den sortoe sani disi, ben sa poeroe foe Gado Kownoekondre (Romesma 1:26, 27; 2:22; 1 Korentesma 6:9, 10; Hebrewsma 13:4). Na ini den „lasti dei” disi, den srefi markitiki e teri gi den „tra skapoe” (2 Timoteus 3:1; Johanes 10:16). Leki wan bakapisi foe dati, den salfoe kresten nanga den tra skapoe de wan krin èn gosontoe pipel, di man foe tjari a nen foe a Gado foe den leki Jehovah Kotoigi. — Jesaja 43:10.
Hori a gemeente krin
Kontrari foe dati, a grontapoe e tapoe en ai gi ala sortoe sani di de kontrari boen gwenti nanga wet. Ala di troe kresten de heri tra fasi, den no moesoe frigiti taki foeroe sma di e dini Jehovah now, ben de wan leisi na ini grontapoe. Foeroe sma de di, bifo den ben kon sabi wi santa Gado, no ben froestan foe san ede den no moesoe gi densrefi na den lostoe èn den fantasia foe a sondoe skin foe den, èn foe lolo densrefi na ini wan „lagi peti foe jajolibi” (1 Petrus 4:4). Baka di na apostel Paulus ben kari den tegoe sani di den lagi morsoe sma foe den nâsi ben doe, a ben taki: „Dati na san son wan foe oenoe ben de.” Ma tokoe a ben taki moro fara: „Ma oenoe wasi kon krin, ma oenoe kon santa, ma den froeklari oenoe regtfardiki ini a nen foe wi Masra Jesus Krestes èn nanga a jeje foe wi Gado.” — 1 Korentesma 6:11.
Dati na wortoe di e gi trowstoe srefisrefi! Awansi san wan sma ben doe fosi na ini en libi, a e kenki te a glori boen njoensoe foe Krestes abi wan krakti na tapoe en ati. A e sori bribi èn a e gi ensrefi abra na Jehovah Gado. Bigin nanga a ten dati, a e libi wan krin moreel libi, èn a wasi krin na ini na ai foe Gado (Hebrewsma 9:14). A kisi pardon foe den sondoe di a ben doe bifo dati, èn a kan ’langa ensrefi go na den sani di de na en fesi’.a — Filipisma 3:13, 14; Romesma 4:7, 8.
Jehovah ben gi David di ben abi berow, pardon foe a kiri di a ben kiri èn foe a doe di a ben doe soetadoe, èn A ben gi Manase di ben abi berow, pardon foe na anbegi di a ben anbegi kroektoe gado kontrari boen gwenti nanga wet èn foe a trowe di a ben trowe foeroe broedoe (2 Samuèl 12:9, 13; 2 Kroniki 33:2-6, 10-13). Wi kan de nanga tangi srefisrefi taki a de klariklari foe gi wi pardon toe efoe wi abi berow èn e go na en na wan opregti fasi èn nanga sakafasi. Tokoe, ala di Jehovah ben gi David nanga Manase pardon, den toe man disi — èn so srefi Israèl toe — ben moesoe libi nanga den bakapisi foe den sondoe sani di den ben doe (2 Samuèl 12:11, 12; Jeremia 15:3-5). Na a srefi fasi, ala di Jehovah e gi pardon na sondari di abi berow, tokoe bakapisi kan de foe den sani di den ben doe èn di den no man wai pasi gi dati.
Bakapisi di wi no man wai pasi gi
Foe eksempre, wan man di e libi wan hoeroedoe jajolibi èn di tjari AIDS tapoe ensrefi, kan teki a waarheid èn drai en libi te so fara taki a gi en libi abra na Gado èn teki dopoe. Now a de wan kresten di krin na jejefasi èn di abi wan matifasi nanga Gado èn wan toemoesi moi howpoe gi a tamara; ma tokoe a abi AIDS ete. Te foe kaba, a kan taki a e dede foe a siki, èn a de wan sari bakapisi di a no man wai pasi gi, foe a fasi fa a ben tjari ensrefi fosi. Gi son kresten den bakapisi foe takroe hoeroedoe di den ben doe fosi kan tan na tra fasi. Gi foeroe jari na baka a dopoe foe den, kande gi den heri libi langa na ini a seti foe sani disi, den abi foe feti kande nanga den tranga firi na ini a skin foe den foe drai go baka na a hoeroedoe libi di den ben abi fosi. Nanga a jepi foe a jeje foe Jehovah, foeroe foe den ben man kakafoetoe gi dati. Ma den abi foe feti wan doronomo feti. — Galasiasma 5:16, 17.
Den sortoe sma disi no e sondoe so langa leki den man basi den tranga firi foe den. Ma efoe den na mansma na wan koni fasi den kan bosroiti foe no ’soekoe’ foe kisi frantiwortoe na ini a gemeente ala di den abi foe feti ete nanga den tranga firi foe a skin (1 Timoteus 3:1). Foe san ede? Bika den sabi a froetrow di a gemeente abi na ini den owroeman (Jesaja 32:1, 2; Hebrewsma 13:17). Den e froestan taki sma e go aksi rai na den owroeman gi foeroe persoonlijk afersi èn den owroeman e kisi foe doe nanga moeilek situwâsi pe den moesoe loekoe boen fa foe handri. A no ben sa de wan lobi, koni, èn reidelek sani te wan sma e soekoe so wan posisi foe frantiwortoe, ala di a e feti doronomo nanga doti lostoe foe a skin. — Odo 14:16; Johanes 15:12, 13; Romesma 12:1.
Gi wan man di ben de wan sma di ben trobi pikin-nengre foe abi seks nanga den, wan tra bakapisi kan de. Te a e leri sabi a waarheid, dan a e sori berow èn a e drai en libi, èn a no e tjari a takroe sondoe dati kon na ini a gemeente. Kande a e go na fesi heri boen baka dati, èn a wini den takroe tranga firi foe en, èn a wani srefi foe ’soekoe’ wan posisi foe frantiwortoe na ini a gemeente. Ma fa a de te a moesoe krin a nen ete di a ben abi na ini a libimakandra, leki wan sma di ben trobi pikin-nengre foe abi seks nanga den? A ben sa ’de sondro fowtoe, . . . abi wan boen kotoigi foe den sma na dorosei, . . . sondro taki sma kan sori finga na en tapoe’? (1 Timoteus 3:1-7, 10; Titus 1:7) Nôno, a no ben sa de so. Foe dati ede a no ben sa doro den markitiki foe kisi grani na ini a gemeente.
Te wan kresten di gi ensrefi abra na Gado, sondoe
Jehovah e froestan taki wi swaki èn taki srefi na baka te wi dopoe, wi kan fadon na ini sondoe. Na apostel Johanes ben skrifi gi kresten foe en ten: „Mi e skrifi oenoe den sani disi foe oenoe no doe wan sondoe. Èn tokoe, efoe wan sma doe wan sondoe, dan wi abi wan jepiman na a Tata, Jesus Krestes, wan regtfardikiwan. Èn a de wan zoen-ofrandi gi den sondoe foe wi, ma no wawan gi di foe wi, ma so srefi toe gi di foe a heri grontapoe” (1 Johanes 2:1, 2). Ija, tapoe a gron foe na ofrandi foe Jesus, Jehovah sa gi pardon na kresten di teki dopoe èn di fadon na ini sondoe — efoe den abi berow troetroe èn e gowe libi a takroe pasi foe den.
Wan eksempre foe disi ben de foe si na ini a fosi jarihondro gemeente na Korente. Na apostel Paulus ben jere foe wan kefal foe hoeroedoe na mindri famiriman na ini a njoen gemeente dati, èn a ben gi a rai taki a man di ben de ini a tori, ben moesoe sluit uit. Baka ten, a sondari ben abi berow, èn Paulus ben froemane a gemeente foe teki en baka (1 Korentesma 5:1, 13; 2 Korentesma 2:5-9). So boen, nanga a lobi boen-atifasi foe Jehovah di abi a krakti foe dresi sma èn nanga a bigi waarde foe Jesus en froeloesoe-ofrandi, a man ben kon krin foe en sondoe. Den srefi sortoe sani disi kan pasa na ini a ten disi. Ma agen, efoe wan sma di dopoe doe wan serjoesoe sondoe èn abi berow èn kisi pardon na ini na ai foe Jehovah, dan tokoe bakapisi kan de ete foe a sondoe foe en. — Odo 10:16, 17; Galasiasma 6:7.
Foe eksempre, efoe wan meisje di gi ensrefi abra na Gado doe hoeroedoe, a kan abi troetroe dipi sari foe a sani di a doe èn te foe kaba, a kan kon gosontoe baka na jejefasi nanga a jepi foe a gemeente. Ma fa a de te a kisi bere foe a hoeroedoe foe en? Dan en heri libi kenki bika foe a sani di a ben doe èn a no man wai pasi gi dati. Wan man di doe soetadoe kan abi berow èn den no abi foe sluit en uit. Ma a trowpatna foe en di no abi fowtoe, abi reide tapoe gron foe den Boekoe foe bijbel foe broko a trow, èn a kan bosroiti foe doe dati (Mateus 19:9). Efoe na oema e doe dati, dan, ala di Jehovah gi en pardon, tokoe a man sa moesoe libi en heri libi langa nanga a serjoesoe bakapisi disi foe a sondoe foe en. — 1 Johanes 1:9.
Fa a de te wan man, na wan fasi di no e sori lobi, e broko a trow nanga en wefi so taki a kan trow nanga wan tra oema? Kande a sa abi berow te foe kaba èn den sa teki en baka na ini a gemeente. Baka wan pisi ten, kande a sa meki go na fesi èn a sa „go moro fara foe kon lepi” (Hebrewsma 6:1). Ma so langa leki en fosi wefi e tan sondro wan trowpatna, dan a man no sa doro den markitiki foe dini na ini wan frantiwortoe posisi na ini a gemeente. A no de „wan masra foe wán wefi” bika a no ben abi reti akroederi den Boekoe foe bijbel foe broko a trow nanga en fosi wefi. — 1 Timoteus 3:2, 12.
Disi a no krakti reide foe san ede wan kresten moesoe kweki wan tegoe gi sani di godelowsoe?
Fa a de nanga wan sma di e trobi pikin-nengre foe abi seks nanga den?
Fa a de te wan dopoe kresten di de wan bigisma, e trobi wan pikin-nengre foe abi seks nanga en? A sondari godelowsoe so kefalek taki noiti Jehovah sa gi en pardon? A no abi foe de so. Jesus ben taki dati wan sma di e taki ’blasfemia teige a santa jeje’ no ben man kisi pardon. Èn Paulus ben taki dati ofrandi gi sondoe no de gi wan sma di abi a gwenti foe doe sondoe foe espresi ala di a sabi a waarheid (Lukas 12:10; Hebrewsma 10:26, 27). Ma na no wan presi bijbel e taki dati wan kresten di de wan bigisma èn di e mesbroiki wan pikin na seks sei — awansi a de wan pikin foe en eigi famiri noso wan tra pikin — no kan kisi pardon. Ija, den sondoe foe en kan wasi krin efoe a abi opregti berow na ini en ati èn e drai baka gi a fasi fa a ben tjari ensrefi fosi. Ma kande a moesoe feti ete nanga den takroe tranga firi foe a skin di a ben kweki (Efeisesma 1:7). Èn bakapisi kan de di a no man wai pasi gi dati.
Akroederi a wet foe a kondre pe a e libi, a man di e trobi pikin-nengre foe abi seks nanga den, kande sa abi foe go na strafoe-oso gi wan pisiten noso a sa kisi tra strafoe foe Lanti. A gemeente no sa kibri en foe disi. Boiti dati, a man sori taki a abi wan serjoesoe swakifasi di sma sa moesoe bigin hori na prakseri. Efoe a sori taki a abi berow, a sa kisi a deki-ati foe gro na jejefasi, foe abi wan prati na ini a velddienst, noso srefi foe abi prati na a theokrasia diniwroko-skoro èn foe kisi wan prati tapoe a diniwroko-konmakandra pe a no abi foe gi leri na a gemeente. Ma disi no wani taki dati a sa doro den markitiki foe dini ini wan frantiwortoe posisi na ini a gemeente. Sortoe reide de gi disi na ini den Boekoe foe bijbel?
Wan foe den reide na taki wan owroeman moesoe man „dwengi ensrefi” (Titus 1:8). A troe taki no wan foe wi man dwengi ensrefi na wan volmaakti fasi (Romesma 7:21-25). Ma wan kresten di de wan bigisma èn di gi ensrefi abra na Gado èn di fadon na ini a sondoe foe mesbroiki pikin-nengre na seks sei, sori taki a abi wan swakifasi na skinfasi di no de kontrari a skin. Ondrofeni sori taki so wan bigisma kan trobi tra pikin-nengre toe foe abi seks nanga den. A troe taki a no ala sma di e trobi pikin-nengre foe abi seks nanga den, sa doe dati baka, ma foeroe foe den e doe dati baka. Èn a gemeente no man ondrosoekoe den ati foe si soema sa man noso no sa man trobi pikin-nengre baka foe abi seks nanga den (Jeremia 17:9). Foe dati ede a rai foe Paulus gi Timoteus fiti spesroetoe na ini a kefal foe bigisma di dopoe èn di trobi pikin-nengre foe abi seks nanga den: „Noiti poti joe anoe toemoesi esi na tapoe wan man; no abi wan prati na den sondoe foe tra sma” (1 Timoteus 5:22). Foe kibri den pikin foe wi, wan man di sma ben sabi leki wan man di trobi pikin-nengre foe abi seks nanga den, no e doro den markitiki foe kisi frantiwortoe posisi na ini a gemeente moro fara, a no kan de wan pionier noso dini na ini tra spesroetoe foeroeten diniwroko. — Teki gersi a gronprakseri na Exodus 21:28, 29.
Wan toe sma kan aksi: ’Son sma no doe tra sortoe sondoe èn soleki fa a sori, ben abi berow soso foe doe a sondoe dati agen baka ten?’ Ija, dati feni pasa, ma tra sani de di wi moesoe hori na prakseri. Efoe foe eksempre wan sma e soekoe foe meki wan tra bigisma abi seks nanga en, dan a wan bigisma dati moesoe man foe kakafoetoe gi den sortoe sani dati di a trawan e soekoe foe doe. A moro makriki foe kori pikin-nengre, foe broeja den, noso foe tapoe skreki gi den. Bijbel e taki foe a abi di wan pikin-nengre no abi nofo koni (Odo 22:15; 1 Korentesma 13:11). Jesus ben gebroiki pikin-nengre leki eksempre foe sma di no abi fowtoe na wan sakafasi (Mateus 18:4; Lukas 18:16, 17). A fowtoe di wan pikin-nengre no abi fowtoe, wani taki so srefi taki a no abi ondrofeni. Moro foeroe foe den pikin-nengre de nanga opo-ati, wani plisi tra sma, èn foe dati ede a moro makriki gi wan bigisma di den sabi èn di den e froetrow, foe mesbroiki den foe di a e kori den na wan triki fasi. Dati meki a gemeente abi wan frantiwortoe na fesi Jehovah foe kibri den pikin-nengre di de na ini a gemeente.
Pikin-nengre di e kisi boen leri, e leri foe gi jesi na den papa nanga mama foe den, na den owroeman, èn na tra bigisma (Efeisesma 6:1, 2; 1 Timoteus 5:1, 2; Hebrewsma 13:7). A ben sa de wan kefalek takroe sani, efoe wan foe den prenspari bigisma disi ben sa mesbroiki a froetrow di wan pikin-nengre e froetrow en sondro foe frede, taki a e kori a pikin-nengre noso a e dwengi en foe doe seksdoe nanga en. Den wan di wan sma trobi foe abi seks nanga den na so wan fasi, e feti foeroe tron foeroe jari langa foe wini na emotioneel mankeri di den kisi leki bakapisi. Foe dati ede, wan sma di e trobi wan pikin-nengre foe abi seks nanga en, kan kisi serjoesoe tranga leri foe a gemeente èn den kan tapoe en foe doe sani ini a gemeente. A no a posisi foe frantiwortoe di a abi na ini a gemeente moesoe de prenspari, ma na a krinfasi foe a gemeente di no moesoe kisi flaka, moesoe de a prenspari sani. — 1 Korentesma 5:6; 2 Petrus 3:14.
Efoe wan sma di e trobi pikin-nengre foe abi seks nanga den, abi troetroe berow, dan a sa froestan taki a de wan koni sani foe gebroiki bijbel gronprakseri. Efoe a e leri troetroe foe tegoe gi godelowsoefasi, dan a sa wisiwasi a sani di a ben doe èn a sa feti foe no doe a sondoe dati moro (Odo 8:13; Romesma 12:9). Moro fara, a sa taigi Jehovah tangi troetroe foe a bigi di En lobi bigi, èn di e meki taki wan sondari di abi berow, soleki fa en de, kan anbegi wi santa Gado ete èn kan abi a howpoe foe de na mindri „den opregti sma” di sa libi na grontapoe foe têgo. — Odo 2:21.
[Foetoewortoe]
a Loekoe „Vragen van lezers” na ini De Wachttoren foe 1 mei 1996.
[Prenspari pisi na tapoe bladzijde 28]
Ala di Jehovah e gi pardon na sondari di abi berow, tokoe bakapisi kan de foe den sani di den ben doe èn di den no kan wai pasi gi dati