San a fri foe anbegi wani taki gi joe?

Ala di sma na Amerkankondre e si a fri foe anbegi leki wan fondamenti reti, tokoe bigi groepoe sma ben soekoe foe doe Jehovah Kotoigi ogri na ini a heri kondre na ini den jari foe 1940

MILJOENMILJOEN sma feti gi en. Son sma dede srefi gi en. A de troetroe wan foe den moro diri goedoe foe a libisma famiri. San na en? Fri! The World Book Encyclopedia e taki foe fri leki „a man di wan sma man bosroiti san a wani èn doe dati”. A e go doro: „Te joe e loekoe a tori akroederi a wet, dan sma fri efoe a libimakandra no e skotoe den na wan onregtfardiki fasi, sondro taki a de fanowdoe, noso na wan fasi di no de reidelek. A libimakandra moesoe kibri den reti foe den toe — dati wani taki den fondamenti fri, a makti foe man doe sani èn den grani foe den.”

A prakseri sori so eenvoudig. Ma troetroe, pikinmoro a gersi leki sma no kan agri nanga makandra pe den moesoe poti den skotoe gi fri. Foe eksempre, son sma e bribi taki wan tiri moesoe meki wet foe kibri a fri foe den borgoe foe en. Ma tra sma sa taki dati den wet disi na den srefi keti di borgoe moesoe kon fri foe den! A de krin, taki fri wani taki difrenti sani gi difrenti sma.

Fa a de nanga a fri foe anbegi?

Kande a fri di sma e haritaki foe dati fajafaja moro leki ala tra sani na a fri foe anbegi, san sma kari „a reti di wan sma abi foe bribi na ini a relisi di a teki èn foe libi akroederi a relisi dati.” Soleki fa na Universeel Froeklari foe den Reti foe Libisma, wan sani di e kon foe den Verenigde Nâsi e taki, dan „ibriwan sma abi a reti foe a fri foe denki, konsensi nanga relisi”. Disi wani taki toe a reti di wan sma abi „foe kenki a relisi noso bribi foe en”, makandra nanga a fri „foe sori a relisi noso bribi foe en na ini a leri di a e gi, na ini san a e doe, na ini en anbegi noso gwenti”. — Artikel 18.

Seiker, wi ben sa froewakti taki iniwan nâsi di troetroe lobi den borgoe foe en e gi den a sortoe fri dati. Na wan sari, taki disi no e pasa ala leisi. „Relisi abi krakti na tapoe den moro dipi firi foe foeroe sma”, na so The World Book Encyclopedia e taki. „Son tiri abi foeroe foe doe nanga wán relisi èn den e si sma di abi wan tra bribi leki wan kefar gi a politiek makti. Wan tiri kan si wan relisi toe leki wan politiek kefar, foe di relisi kan poti getrowfasi na Gado moro hei leki a gi di wan sma e gi jesi na lanti.”

Foe dati ede son tiri e skotoe sma foe den abi wan relisi. Wan toe tiri no wani foe sma abi wan bribi srefisrefi. Ma tra tiri, di e taki dati den e horibaka gi a fri foe anbegi, e hori ai boen na tapoe ala sani di sma e doe na relisi sei.

Loekoe foe eksempre, a situwâsi di ben de na Meksikow foeroe jari. Ala di a Mamawet ben djaranti a fri foe anbegi, tokoe a ben taki: „Kerki di sma e gebroiki gi poebliki anbegi na a goedoe foe Lanti, di a Federaal Tiri e teki presi gi en, èn en sa bosroiti sortoe wan foe den kan tan gebroiki gi dati.” Na ini 1991 den kenki a Mamawet, so taki den ben kan tapoe na ordroe disi. Ma tokoe, na eksempre disi e sori taki sma kan si a fri foe anbegi na difrenti fasi na ini difrenti kondre.

Wan tra sortoe fri foe anbegi

Sma abi a fri foe anbegi na ini a kondre pe joe e libi? Efoe dati de so, dan san den e taki foe en? Joe kan anbegi Gado na a fasi di joe froekisi, noso den e dwengi joe foe tron wan memre foe a relisi foe lanti? Den e gi joe pasi foe leisi èn foe prati relisi boekoe, noso lanti no e gi pasi foe gebroiki den sortoe sani dati di druk? Joe kan taki nanga tra sma foe a bribi foe joe, noso den sma e si disi leki wan fasi foe pasa den relisi reti foe den?

Den piki na tapoe den aksi disi e anga foe pe joe e libi. Ma a de moi foe si, taki wan sortoe relisi fri de di no e anga kwetikweti foe wan presi. Di Jesus ben de na Jerusalem na ini a jari 32 G.T., dan a ben taigi den bakaman foe en: „Efoe oenoe e tan na ini mi wortoe, dan oenoe na troetroe disipel foe mi, èn oenoe sa sabi waarheid, èn waarheid sa meki oenoe kon fri.” — Johanes 8:31, 32.

San Jesus ben wani taki nanga den wortoe disi? Den djoe arkiman foe en ben angri foe kon fri foe a tiri foe Rome. Ma Jesus no ben taki dati den ben o kon fri foe a kwinsi di den ben kisi na politiek sei. Na presi foe dati a ben pramisi den disipel foe en wan sani di ben de moro betre srefi, soleki fa wi sa si na ini na artikel di e kon.