Sikem — A foto na ini a lagipresi

BOEN fara na ini a kondre di Gado ben teki gi a pipel foe en, a foto Sikem ben didon, di kibri na mindri Bergi Ebal nanga Bergi Gerisim. Na djaso a ben de — pikinmoro fo doesoen jari pasa — taki Jehovah ben pramisi Abraham: „Na joe siri mi sa gi a kondre disi.” — Genesis 12:6, 7.

Akroederi a pramisi disi, a granpikin foe Abraham, Jakob, ben de na ini tenti na Sikem èn ben bow wan altari di a ben kari „Gado na a Gado foe Israèl”. Soleki fa a sori dan Jakob ben diki wan peti na ini a kontren disi foe sorgoe gi watra gi en osofamiri èn gi den ipi foe en, wan peti di sma ben sa kon sabi foeroe jarihondro na baka leki „a peti foe Jakob”. — Genesis 33:18-20, foetoewortoe; Johanes 4:5, 6, 12.

Ma a no ala den memre foe Jakob en osofamiri ben abi faja gi a troe anbegi. Dina, en oemapikin, ben soekoe kompe na mindri den Kanan meisje foe Sikem. Dina di ben jongoe ete, ben gowe libi a kibri di a ben abi na den tenti foe en famiri èn a ben bigin fisiti a krosibei foto, foe meki mati drape.

Fa den jongoeman foe a foto ben sa prakseri foe a jongoe njoenwenke disi di ben fisiti a foto foe den doronomo — èn soleki fa a sori, sondro taki sma ben go nanga en? Wan manpikin foe wan edeman „ben kon si en èn ne a ben teki en èn ben didon na en nanga tranga”. Foe san ede Dina ben go soekoe kefar foe di a ben abi demakandra nanga den hoeroedoe Kanansma? A ben de foe di a ben firi taki a ben abi demakandra fanowdoe foe oemapikin di owroe a srefi leki en? A ben tranga-ede èn ben wani teki bosroiti gi ensrefi neleki wan toe foe den brada foe en? Leisi a verslag na ini Genesis, èn proeberi foe froestan a banawtoe èn a sjen di Jakob nanga Lea ben moesoe firi foe den sari bakapisi foe den fisiti di na oemapikin foe den ben fisiti Sikem. — Genesis 34:1-31; 49:5-7; loekoe so srefi De Wachttoren foe 15 juni 1985, bladzijde 31.

Pikinmoro 300 jari na baka, den bakapisi te sma no e poti prakseri na tapoe theokrasia tiri, ben de foe si baka. Na Sikem, Josua ben orga wan foe den moro warti konmakandra foe memre na ini a historia foe Israèl. Prakseri fa a situwâsi ben de na ini a lagipresi. Moro leki wán miljoen sma — mansma, oemasma, nanga pikin-nengre — di de foe siksi foe den lo foe Israèl, e tanapoe na fesi foe Bergi Gerisim. Na abrasei foe a lagipresi pikinmoro a srefi nomroe foe den tra siksi lo e tanapoe na fesi foe Bergi Ebal.a Èn drape na ondro, na sei na ark foe a froebontoe èn na mindri den toe bigi groepoe Israèlsma, den priester nanga Josua e tanapoe. Dati na wan span situwâsi srefisrefi! — Josua 8:30-33.

Hei na tapoe a kefalek bigi groepoe sma disi, den toe bergi e sori wan krinkrin difrenti di de na mindri a moi foe wan sani èn a drei di wan sani drei. A moro hei skoinsi sei foe Gerisim groen èn a gron fatoe, ala di foe Ebal de moro foeroe grijs èn drei. Joe kan firi a span sjoesjoe di de foe jere ala di den Israèlsma e wakti a momenti te Josua sa taki? Ibri geluid e ècho na ini a natuurlijk theater disi.

Na ini den fo te go miti siksi joeroe di Josua e gebroiki foe leisi ’a boekoe foe a wet foe Moses’, a pipel abi wan prati toe (Josua 8:34, 35). Soleki fa a sori, den Israèlsma di ben tanapoe na fesi foe Gerisim e taki Amen! na baka ibri foe den blesi, ala di na Amen! foe den wan na fesi foe Ebal e poti krakti na tapoe den floekoe. Kande a drei di Bergi Ebal e sori drei, e memre a pipel na a takroe bakapisi di sa de te den no sa gi jesi.

„Froefroektoe foe a sma di e wisiwasi en papa noso en mama”, Josua e warskow. Leki wán man, moro leki wan miljoen sten e piki: „Amen!” Josua e wakti teleki a kefalek krakti piki disi e dede gowe, bifo a e go doro: „Froefroektoe foe a sma di e skoifi a lanki foe en kompe go na baka.” Ete wan leisi den siksi lo, makandra nanga den foeroe dorosei-sma di e libi nanga den, e bari: „Amen!” (Deuteronomium 27:16, 17). Efoe joe ben de drape, oiti joe ben sa frigiti a konmakandra dati di ben hori na mindri den bergi? A no ben sa de so, taki a de di a de fanowdoe foe gi jesi ben sa poti dipi na ini joe froestan so taki joe no sa frigiti en?

Pikinmoro 20 jari na baka, sjatoe bifo Josua ben dede, a ben kari a nâsi ete wan leisi kon makandra na Sikem so taki den kan poti krakti na tapoe a bosroiti di den ben teki. A ben poti a bosroiti na den fesi di ala sma moesoe teki. „Teki a bosroiti now gi oensrefi soema oenoe sa dini”, a ben taki. „Ma mi nanga mi osofamiri, wi sa dini Jehovah” (Josua 24:1, 15). A de krin taki den kongres disi na Sikem di ben abi krakti na tapoe a bribi, ben naki na ati foe sma srefisrefi. Foeroe jari na baka a dede foe Josua, den Israèlsma ben waka na baka a getrow eksempre foe en. — Josua 24:31.

Pikinmoro 15 jarihondro na baka, di Jesus ben rostoe na ondro a skaduw foe Bergi Gerisim, wan switi takimakandra ben feni presi. Ala di Jesus ben weri foe wan langa waka di a ben teki, a ben sidon na a peti foe Jakob, di wan Samaria oema ben waka miti en nanga wan watrakan. Na oema ben froewondroe srefisrefi di Jesus ben aksi en watra foe dringi, foe di Djoe no ben taki nanga Samariasma, èn kwetikweti den no ben sa dringi foe den watrakan foe den (Johanes 4:5-9). Den wortoe di Jesus ben taki baka dati ben froewondroe en moro srefi.

„Ibriwan sma di e dringi foe a watra disi, watra sa kiri en baka. A sma di e dringi foe a watra di mi sa gi en, watra no sa kiri en noiti moro, ma a watra di mi sa gi en sa tron na ini en wan fonten foe watra di o koekoe kon na tapoe foe gi en têgo libi” (Johanes 4:13, 14). Prakseri a belangstelling di na oema ben abi gi a pramisi dati, bika foe kisi watra na ini a dipi peti disi ben de wan tranga wroko. Jesus ben tjari moro fara kon na krin taki ala di Jerusalem nanga Bergi Gerisim ben prenspari gi a historia, tokoe nowan foe den ben de prenspari relisi kontren foe anbegi Gado. A fasi fa wan sma ati de èn a fasi fa wan sma e tjari ensrefi, no a presi pe den de, na den sani di e teri. „Troe anbegiman sa anbegi a Tata nanga jeje èn nanga waarheid”, a ben taki. „Foe troe, a Tata e soekoe den sortoe sma disi foe anbegi en” (Johanes 4:23). Den wortoe dati ben moesoe gi foeroe trowstoe! Ete wan tron a lagipresi disi ben kon tron wan presi pe sma ben kisi a tranga foe dini Jehovah.

Na ini a ten disi a foto Nabloes e didon na sei den broko pranasi foe Sikem foe owroeten. A Bergi Gerisim nanga Bergi Ebal e teki a moro bigi pisi foe a lagipresi ete, èn den e tanapoe leki tiri kotoigi foe den sani di ben feni presi na ini a ten di pasa. A peti foe Jakob, na a foetoe foe den bergi disi, na wan sani di sma kan fisiti ete. Te wi e prakseri dipi foe den sani di ben feni presi drape, dan a e memre wi o prenspari a de foe hori a troe anbegi hei, neleki fa Josua nanga Jesus ben leri wi foe doe. — Teki gersi Jesaja 2:2, 3.

[Foetoewortoe]

[Sma di abi a reti foe a prenki na tapoe bladzijde 31]

Pictorial Archive (Near Eastern History) Est.