A kon di a fundamentalisme e kon moro foeroe

FUNDAMENTALISME — someni tenti jari di pasa heri esi, disi ben de nomo wan pikin groepoe sma di orga na ini a Protestant bribi. A situwâsi kenki srefisrefi! Bruce B. Lawrence, wan man di e gi komentaar na tapoe relisi afersi, ben skrifi taki 30 jari bifo pikinso sma nomo ben sa kan si na fesi taki na a kaba foe a di foe twenti jarihondro, a fundamentalismea ben sa tron wan thema di ben sa de so prenspari gi a media èn gi universiteit ondrosoekoe èn wan thema di e hari a prakseri foe den pasa marki.

Ma tokoe, na dati na san pasa. Koranti njoensoe di e taki foe ogri demonstrâsi di e hori na strati, kiri, groepoe sma di de teige a poeroe di sma e poeroe bere, relisi groepoe di e poti druk na tapoe a politiek sistema, èn a bron di den e bron na poebliki den boekoe di den e si leki sani di e pori Gado nen, na njoensoe di e memre wi doronomo foe den sani di den fundamentalistsma e doe. Na ibriwiki bisnis tijdschrift Mondo Economico foe Italia, ben taki dati pikinmoro na ala presi a fundamentalisme „e go feti na ini a nen foe Gado”.

Nofo tron sma e si fundamentalistsma leki sma di sa doe ala san den man foe doro den marki foe den èn sma di abi wan don faja, e meki triki plan èn e feti leki terrorist. Sma e skreki foe a fasi fa den groepoe disi e gro, soleki Comunione e Liberazione na ini a Lomsoe kerki, Gush Emunim na ini a djoe bribi, èn a Kresten Coalitie na ini a Protestant relisi na Noord-Amerika. Foe san ede a fundamentalisme e gro? San e meki a e gro? A de kande „a refensi foe Gado”, soleki fa a Fransi socioloog, Gilles Kepel e sori?

[Foetoewortoe]

[Sma di abi a reti foe a prenki na tapoe bladzijde 3]

Nina Berman/Sipa Press