Wan moro betre fasi

JEHOVAH KOTOIGI e broko den ede nanga a jejefasi di e lasi gowe safrisafri na grontapoe èn foe a hoeroedoe èn a seikerhèit di no de ini relisi, di de na ala sei foe a libimakandra. Foe dati ede, sma e kari den son tron fundamentalistsma. Ma na so a de? Nôno. Ala di den abi tranga relisi overtoigi, tokoe den a no fundamentalistsma na a fasi fa sma e gebroiki a wortoe. Den no e proeberi foe dwengi den politiek fesiman foe horibaka gi wan bepaalde denki foe den, èn den no e hori demonstrâsi èn no e doe ogri nanga tranga, teige den sma nanga soema den no e agri. Den feni wan moro betre fasi. Den e waka na baka na eksempre foe a Fesiman foe den, Jesus Krestes.

Jehovah Kotoigi abi na overtoigi taki relisi waarheid de, èn taki a de foe feni na ini bijbel (Johanes 8:32; 17:17). Ma bijbel e leri kresten foe abi switifasi, foe de boen, foe abi safri-atifasi, èn foe de reidelek — eigifasi di no e gi den pasi foe tjari densrefi na wan fanatiekfasi (Galasiasma 5:22, 23; Filipisma 4:5). Na ini a bijbel boekoe Jakobus, kresten e kisi a deki-ati foe kweki „a koni foe tapoesei”, di den e kari „na a fosi presi soifri, moro fara a lobi vrede, a de reidelek, a de klariklari foe gi jesi, a foeroe nanga sari-atifasi nanga boen froktoe”. Jakobus ben taki moro fara: „A froktoe foe regtfardikifasi abi en siri di sai na ondro vrede situwâsi gi den sma di e meki vrede.” — Jakobus 3:17, 18.

Jehovah Kotoigi e hori na prakseri taki Jesus ben broko en ede foeroe nanga waarheid. A ben taigi Pilatus: „Na foe a sani disi ede mi gebore, èn na foe a sani disi ede mi kon na grontapoe, so taki mi ben sa gi kotoigi foe a waarheid” (Johanes 18:37). Ala di a ben de wan sma di ben horibaka gi waarheid fajafaja èn sondro foe frede, tokoe a no ben proeberi nanga tranga foe meki tra sma teki den overtoigi foe en. Na presi foe dati, a ben wroko na tapoe a froestan èn na ati foe den. A ben sabi taki en hemel Tata, wan „boen èn opregti” Gado, ben sa bosroiti na sortoe fasi èn o ten a ben sa poeroe lei èn kroektoefasi komoto foe a grontapoe (Psalm 25:8). So boen, a no ben proeberi foe kwinsi den sma di no ben agri nanga en. Kontrari foe dati, a ben de den orthodòks relisi fesiman foe en ten, di ben proeberi foe kwinsi Jesus. — Johanes 19:5, 6.

Jehovah Kotoigi abi tranga overtoigi na ini relisi leri, èn den e sori taki den abi boen moreel markitiki. Leki na apostel Paulus den abi na overtoigi taki nomo „wán Masra, wán bribi, wán dopoe” de (Efeisesma 4:5). Den e froestan den wortoe foe Jesus toe: „Smara a doro de èn smara a pasi de di e tjari sma go na libi, èn pikinso sma de di e feni en” (Mateus 7:13, 14). Tokoe den no e proeberi foe dwengi tra sma foe waka na baka a bribi foe den. Na presi foe dati, den e waka na baka na eksempre foe Paulus èn „e begi” ala den sma di wani sote foe „kon boen baka nanga Gado” (2 Korentesma 5:20). Disi na a moro betre fasi. Na a fasi foe Gado.

Relisi fundamentalisme, soleki fa a wortoe e gebroiki na ini a ten disi, na wan heri tra sani. Fundamentalistsma e gebroiki foeroe taktik — so srefi ogri di e doe nanga tranga — foe dwengi sma na ini a libimakandra foe teki den gronprakseri foe den. Foe di den e doe dati, dan den e tron wan prenspari pisi foe a politiek sistema. Ma Jesus ben taki dati den bakaman foe en „no [moesoe] de wan pisi foe grontapoe” (Johanes 15:19; 17:16; Jakobus 4:4). Akroederi den wortoe dati, Jehovah Kotoigi e tan krinkrin neutraal na ini politiek strei. Èn soleki na Italia koranti Fuoripagina ben erken, den „no e dwengi no wan sma foe doe wan sani; ibri sma de fri foe teki noso no teki san den e taki”. A bakapisi? A boskopoe foe den Kotoigi di den e tjari na ini vrede, e hari ala sortoe sma, srefi sma di ben de fundamentalistsma fosi. — Jesaja 2:2, 3.

Wan grontapoe di abi steifi markitiki

Den Kotoigi e erken taki libisma no man loesoe den problema di abi foe doe nanga fundamentalistsma. Joe no kan dwengi wan sma foe bribi na ini Gado noso foe teki den sani na ini san joe e bribi. Foe di sma e denki dati so wan sani kan, meki sma ben doe wan toe foe den moro kefalek takroe sani di pasa na ini historia, soleki den kruistocht, den mindri jarihondro ogri Kroetoebangi, èn a „bekeer” di sma ben bekeer den Amerikan Ingi. Ma efoe joe e froetrow na tapoe Gado, joe sa wani foe libi den tori na ini en anoe.

Soleki fa bijbel e sori, Gado skotoe a ten di a gi taki libisma e pasa den wet foe en èn di e tjari pina nanga pen nanga dati. Pikinmoro, dan a ten dati pasa kaba. Nownowde kaba Jesus e tiri leki Kownoe na ini Gado en hemel Kownoekondre, èn djonsro a Kownoekondre dati sa doe wan sani foe poeroe ala libisma tirimakti èn a sa teki a dei-foe-dei tiri foe libisma abra (Mateus 24:3-14; Openbaring 11:15, 18). A bakapisi sa de wan paradijs na heri grontapoe pe vrede nanga regtfardikifasi sa de pasa marki. Na a ten dati a no sa de so, taki sma no sabi seiker fa foe anbegi a troe Gado. „Na den regtfardiki sma sa abi grontapoe, èn den sa libi na tapoe foe têgo” (Psalm 37:29). Den sortoe sani disi di de ala ten warti sani, soleki lobi boen-atifasi, waarheid, geregtighèit, nanga boenfasi sa de foeroe gi a boen foe a heri libisma famiri di e gi jesi.

A psalm singiman ben skrifi na wan poewema fasi, ala di a ben e loekoe go na a ten dati: „Foe a sei foe lobi boen-atifasi nanga waarheid, den miti makandra; regtfardikifasi nanga vrede — den bosi makandra. Waarheid srefi sa gro komoto na gron srefi, èn regtfardikifasi srefi sa loekoe srefi foe hemel kon na gron. So srefi Jehovah foe en sei, sa gi san boen, èn wi eigi kondre sa gi froktoe. Regtfardikifasi srefi sa waka na en fesi, èn a sa meki wan pasi nanga den foetoestap foe en.” — Psalm 85:10-13.

Ala di wi no kan kenki a grontapoe, ibriwan foe wi kan kweki eigifasi di Gado e si leki warti sani srefi na ini a ten disi. Na so fasi wi kan proeberi foe de den sortoe sma di Gado wani leki en anbegiman na ini a njoen grontapoe dati. Wi sa de dan na mindri den safri-ati sma foe soema na psalm singiman ben skrifi: „Den safri-ati sma sa abi grontapoe, èn foe troe den sa feni switi prisiri na ini vrede pasa marki” (Psalm 37:11). Gado e jepi èn e blesi den sma di e doe en wani, èn a e pramisi toemoesi moi sani gi a tamara foe den. Na apostel Johanes ben taki: „Grontapoe e pasa gowe èn so srefi a lostoe foe en, ma a sma di e doe a wani foe Gado, e tan foe têgo.” — 1 Johanes 2:17.

[Prenki na tapoe bladzijde 7]

Jehovah Kotoigi e gi ala sma wan kari foe kon leri sabi a boen njoensoe foe a Kownoekondre foe Gado

[Sma di abi a reti foe a prenki na tapoe bladzijde 6]

Lampoe na tapoe bladzijde 3, 4, 5, nanga 6: Printer’s Ornaments/by Carol Belanger Grafton/Dover Publications, Inc.