Fundamentalisme — San na dati?

PE A fundamentalisme ben bigin? Na a kaba foe a lasti jarihondro, den theoloog di e denki na wan fri fasi, ben kenki den sani di den e bribi, foe de akroederi den sma di e kroetoe den sani di skrifi na ini bijbel èn foe de akroederi den sani di sabidensi e leri, soleki na evolutie. Leki wan bakapisi foe dati, a froetrow di sma ben abi na ini bijbel, ben kon swaki. Relisi fesiman na Amerkankondre di e tan hori na den fositen gwenti, ben doe wan sani baka na tapoe dati, di den ben e seti a sani di den ben kari den fondamenti foe bribi.a Na ini a bigin foe a di foe twenti jarihondro, den ben tjari wan takimakandra foe den fondamenti disi kon na doro, na ini wan toe volume di abi leki titel The Fundamentals: A Testimony to the Truth. Na foe a titel disi a wortoe „fundamentalisme” teki.

Na ini a fosi afoepisi foe a di foe twenti jarihondro, a fundamentalisme ben kon wawan leisi na ini njoensoe. Foe eksempre, na ini 1925 relisi fundamentalistsma ben tjari wan skoromeester, di nen John Scopes, foe Tennessee, Amerkankondre, go na kroetoebangi, èn a tori ben kon de bekènti leki a Scopes kroetoe-afersi. San ben de na ogri di a ben doe? A ben leri sma na evolutie leri, èn dati ben de kontrari a wet foe a staat. Na ini den dei dati sma ben bribi taki a fundamentalisme no ben sa tan langa. Na ini 1926, Christian Century, wan Protestant tijdschrift, ben taki dati a fundamentalisme „no ben abi troetroe waarde èn na wan sani di libisma srefi ben meki” èn „a no abi no wan eigifasi srefisrefi di e meki sma doe boen sani noso di e tan langa ten”. O fowtoe na idea dati ben de!

Foe sensi den jari 1970, a fundamentalisme de dorodoro na ini njoensoe. Profesor Miroslav Volf, foe Fuller Theological Seminary, na California, Amerkankondre, e taki: „No wawan a fundamentalisme tan na libi, ma a gro toe.” Na ini a ten disi a wortoe „fundamentalisme” no e gebroiki wawan gi Protestant groepoe, ma so srefi gi den wan na ini tra relisi, soleki a katolik bribi, na Islam, djoe bribi, èn a Hindoe bribi.

Wan fasi fa sma e handri tapoe a ten foe wi

Foe san ede a fundamentalisme e kon moro foeroe? Den sma di e ondrosoekoe en, e taki dati gi wan pisi a reide na a seikerfasi di no de na moreel sei èn na relisi sei, na ini a ten foe wi. Na ini den fositen jari, moro foeroe foe den libimakandra ben libi na ini wan situwâsi foe moreel seikerfasi, di abi en gron na tapoe relisi gwenti foe fositen. Now sma e tweifri na den sortoe bribi disi noso den e trowe den. Foeroe koni sma e froeklari taki wan Gado no de èn taki libisma de en wawan na ini wan universum di no e broko-ede nanga den. Foeroe foe den sabidensiman e leri sma dati libisma ben kon wantronso nanga jepi foe evolutie, no foe den sani di wan lobi Mekiman ben doe. A denki di sma abi taki ala sani mag, de na ala sei. A grontapoe e broko en ede nanga a lasi di den moreel waarde e lasi gowe na ala pisi foe a libimakandra. — 2 Timoteus 3:4, 5, 13.

Fundamentalistsma e angri foe den owroeten overtoigi, èn son wan foe den fundamentalistsma e doe moeiti foe tjari den libimakandra èn den nâsi foe den go baka na den sani di den e si leki joisti fondamenti foe moraal èn kerki leri. Den e doe ala sani di den man foe dwengi tra sma foe libi akroederi wan „joisti” moraal èn akroederi wan sistema foe sani di kerki e leri. Wan fundamentalistsma abi a tranga overtoigi taki en e doe san boen èn taki tra sma fowtoe. Profesor James Barr e taki na ini en boekoe Fundamentalism, taki a fundamentalisme „de nofo tron wan ogri èn tegoe wortoe, di e sori na sma di froestan sjatoe, wan fanatieksma, èn sma di e kibri sani gi trawan foe den no kon sabi san de troe”.

Foe di no wan sma no lobi en te tra sma e taki dati en na wan sma di froestan sjatoe, wan fanatieksma, meki no ala sma e agri soema na wan fundamentalistsma ofoe no. Ma wan toe penti de di e meki wi kon sabi san na relisi fundamentalisme.

Fa foe sabi soema na wan fundamentalistsma

Relisi fundamentalisme na moro foeroe a proeberi di sma e proeberi foe tan hori den sani di den e si leki den fosi gwenti noso den fosi relisi bribi foe wan koeltoeroe, èn foe gens den sani di den e si leki a jeje foe grontapoe. Dati no wani taki dati den fundamentalistsma de teige ala sani di de njoen. Wan toe foe den e gebroiki heri boen a disiten fasi foe abi komunikâsi foe horibaka gi a fasi fa den e denki. Ma den e feti teige a secularisatie foe a libimakandra.b

Wan toe fundamentalistsma abi a fasti bosroiti foe no abi gi densrefi wawan wan owroe stroektoeroe foe gronprakseri noso foe wan sortoe libi, ma foe dwengi tra sma foe teki dati toe, èn den wani kenki a stroektoeroe foe a libimakandra so taki a kan de akroederi den bribi foe den fundamentalistsma. Foe dati ede, a katolik fundamentalistsma no sa weigri wawan foe poeroe bere. A sa dwengi den man foe en kondre di e meki wet, foe meki wet di de teige a poeroe di sma e poeroe bere. Na Polen, soleki fa a koranti La Repubblica ben skrifi, a Katolik Kerki ben tiri „wan ’feti’ na ini san a ben gebroiki ala en krakti èn makti”, so taki lanti ben kan feni wan wet boen di de teige a poeroe di sma e poeroe bere. Ala di den ben doe dati, den kerki tiriman ben handri srefisrefi leki fundamentalistsma. A Protestantse Christelijke Coalitie na Amerkankondre e feti den srefi sortoe „feti” disi.

Den fundamentalistsma de spesroetoe aparti foe di den abi tranga relisi overtoigi di e didon dipi na ini den. Foe dati ede wan Protestant fundamentalistsma sa de wan sma di e horibaka nanga overtoigi taki sma moesoe froestan bijbel leki fa a skrifi, èn dati abi na ini toe a bribi kande taki grontapoe ben meki na ini siksi dei foe 24 joeroe. Wan katolik fundamentalistsma no e tweifri srefisrefi taki a paus no man meki fowtoe.

Foe dati ede wi kan froestan foe san ede a wortoe „fundamentalisme” e gi a prakseri foe wan sma di de fanatiek sondro foe denki èn foe san ede den sma di no de fundamentalistsma e frede te den e si taki a fundamentalisme e gro. Leki aparti sma, a kan taki wi no e agri nanga den fundamentalistsma èn taki wi e skreki foe den politiek taktik èn foe a fasi fa den e handri son tron nanga tranga. Ija, den fundamentalistsma foe a wan relisi kan skreki foe den sani di den fundamentalistsma foe wan tra relisi e doe! Ma tokoe foeroe sma e broko den ede nanga den sani di e meki a fundamentalisme e gro — a swaki di a moraal e swaki moro nanga moro, a lasi di sma e lasi bribi, èn a trowe di sma e trowe jejefasi na ini a disiten libimakandra.

A fundamentalisme na a wan-enkri fasi fa sma e handri na tapoe den sani disi di de foe si? Efoe a no so, dan sortoe tra fasi de dan?

[Foetoewortoe]

[Prenspari pisi na tapoe bladzijde 5]

Na ini 1926 wan Protestant tijdschrift ben taki foe a fundamentalisme leki wan sani di „no abi troetroe waarde èn na wan sani di libisma srefi meki” èn „a no abi no wan eigifasi srefisrefi di e meki sma doe boen sani noso di e tan langa ten”