Joe e memre disi ete?

Joe poti prakseri finifini na tapoe den eksemplaar foe A Waktitoren foe no so langa pasa? Efoe dati de so, dan joe sa feni en moi foe memre den sani disi:

◻ Fa foeroe trowpaar waka na baka a toemoesi moi eksempre di Akwila nanga Priskila ben gi?

Akwila nanga Priskila ben dini na ini difrenti gemeente. Neleki den, foeroe kresten na ini a ten disi seti sani so, taki den ben man froisi go pe a nowtoe gi preikiman de moro bigi. Den so srefi ondrofeni a prisiri nanga a satisfaksi di e kon te wan sma e si fa Kownoekondre afersi e gro èn te sma man kweki warti matifasi nanga kresten. — 1/12, bladzijde 31.

◻ San na wan prenspari sani di a bijbelboekoe Hagai e sori?

Ala di a boekoe Hagai abi 38 vers nomo, tokoe a nen foe Gado e gebroiki 35 tron. So wan profeititori e sori leki wan sani di no abi firi, te sma e poti a titel „Masra” ini a presi foe a nen Jehovah. — 1/1, bladzijde 6.

◻ Sortoe lès wi kan leri foe den sondoe foe David nanga Manase?

Ala di Jehovah ben gi David nanga Manase pardon, den man disi — èn so srefi Israèl toe — tokoe ben moesoe libi nanga den bakapisi foe den sondoe sani di den ben doe (2 Samuèl 12:11, 12; Jeremia 15:3-5). Na a srefi fasi, ala di Jehovah e gi pardon na sondari di abi berow na ini a ten disi, tokoe bakapisi kan de foe den sani di den ben doe èn di den no man wai pasi gi dati. — 1/1, bladzijde 27.

◻ Na sortoe fasi ’den foetoe foe den sma di e meki a boen njoensoe’ foe Gado Kownoekondre bekènti, de „switi”? (Jesaja 52:7)

Soleki fa a gwenti de, dan na den foetoe e tjari wan sma te a e go preiki gi trawan. Den foetoe dati troetroe e sori soema a sma de. Foe dati ede, gi den foeroe sma di e jere èn e handri boen na tapoe a boen njoensoe foe a Kownoekondre, den foetoe disi foe den boskopoeman de troetroe wan moi sani foe si. — 15/1, bladzijde 13.

◻ San na a wroko di abi toe sei, di abi foe doe nanga a meki di wi moesoe „meki a boen njoensoe bekenti”? (1 Korentesma 9:16)

Fosi, wi moesoe preiki a boen njoensoe foe a Kownoekondre. A di foe toe sani di de toe na ini a wroko disi na a leri di e gi na den sma di e doe wan sani na tapoe a Kownoekondre bariwroko. — 15/1, bladzijde 23.

◻ Sortoe persoonlijk winimarki de te wi e singi Kownoekondre singi na den gemeente konmakandra?

Singi e gi wi na okasi foe sori san wi e firi gi a Mekiman foe wi (Psalm 149:1, 3). Te wi e singi den gemeente singi nanga wi heri ati na wan joisti fasi, dan dati kan sreka wi jeje nanga wi ati gi a programa di e kon baka dati. A kan poesoe wi foe abi wan moro bigi prati na a anbegi foe Jehovah. — 1/2 bladzijde 28.

◻ Fa wi kan taki dati a dei foe dede betre moro leki a dei te wan sma kon gebore? (Preikiman 7:1)

A dei foe dede kan de moro betre leki a dei te wan sma e kon gebore, efoe na a ten dati a sma bow wan boen nen na Jehovah, di kan opo getrow sma di dede (Johanes 11:25). — 15/2, bladzijde 12.

◻ Foe san ede a boekoe Preikiman kan jepi wi persoonlijk?

A kan jepi ibriwan foe wi foe kisi wan moro betre froewakti foe a libi èn foe si moro betre san na den sani di wi e si leki den moro prenspari sani (Preikiman 7:2; 2 Timoteus 3:16, 17). — 15/2, bladzijde 16.

◻ Jehovah Kotoigi na fundamentalistsma?

Nôno. Ala di den abi tranga relisi overtoigi, tokoe den a no fundamentalistsma na a fasi fa sma e gebroiki a wortoe. Den no e hori demonstrâsi èn no e doe ogri nanga tranga, teige den sma nanga soema den no e agri. Den e waka na baka na eksempre foe a Fesiman foe den, Jesus Krestes. — 1/3, bladzijde 6.

◻ Sortoe krakti a abi na tapoe kresten foe di den no sabi soifri a ten Jesus o kon foe tjari a kroetoe foe Gado kon?

Disi e meki kresten tan na ai èn dati e gi den na okasi ibri dei foe sori taki den e dini Jehovah sondro taki den e prakseri den eigi afersi nomo. — 1/3, bladzijde 13.

◻ San wi moesoe prakseri bifo wi e tjari wan brada di kande bedrigi wi, go na kroetoe?

Wi moesoe loekoe san na den bakapisi di disi kan abi na wi tapoe, na tapoe tra sma di abi foe doe nanga a tori, na tapoe a gemeente, èn na tapoe sma di de na dorosei foe a gemeente (1 Korentesma 6:7). — 15/3, bladzijde 22.

◻ Fa wi kan kisi troetroe kolokoe?

Troetroe kolokoe na wan kondisi foe na ati, di abi en gron tapoe troetroe bribi èn tapoe wan boen matifasi nanga Gado (Mateus 5:3). — 15/3, bladzijde 23.

◻ San wan kresten moesoe doe te a kisi wan kari foe kon doe a wroko foe sidon na ini wan jury?

Ibri kresten di moesoe go doe a wroko foe sidon na ini wan jury, moesoe loekoe san a sa doe, tapoe a fondamenti foe a froestan di a abi foe bijbel, èn tapoe a gron foe en eigi konsensi (Galasiasma 6:5). — 1/4, bladzijde 29.