Joe e angri foe dini moro foeroe?

„MI BEN atibron nanga Jehovah”, Laura e taki. „Mi ben begi doronomo taki a ben sa jepi wi foe loesoe den moni problema foe wi, so taki mi ben kan tan pionier — ma dati no ben jepi. Te foe kaba, mi ben abi foe stòp nanga a pionierwroko. Mi moesoe erken toe taki mi ben djaroesoe tapoe den wan di ben kan go doro nanga a pionierwroko.”

Loekoe so srefi a kefal foe Michael, wan dinari ini a diniwroko na ini wan gemeente foe Jehovah Kotoigi. A ben soekoe foe kisi a wroko leki opziener (1 Timoteus 3:1). Di na angri foe en no ben kon troe wan toe jari langa, a ben atibron sote taki a no ben wani a grani dati moro. „Mi no ben man tjari a pen foe lasi-ati baka”, a e taki.

Joe ben ondrofeni wan srefi sortoe sani? Joe ben moesoe stòp nanga wan theokrasia grani di joe ben lobi? Foe eksempre, joe ben moesoe stòp foe dini leki wan pionier, wan foeroeten Kownoekondre preikiman? Noso joe e angri gi gemeente frantiwortoe di trawan ben kisi? A kan so srefi taki joe e angri fajafaja foe dini na Bethel noso leki wan zendeling, ma taki den omstandigheid foe joe no e gi pasi gi dati.

„Froewakti di moesoe skoifi poti na wan tra ten, e meki na ati kon siki”, na so a boekoe Odo e erken (Odo 13:12). Disi kan de spesroetoe so te tra sma e kisi den srefi grani di joe howpoe foe kisi. A Wortoe foe Gado e gi inzicht, trowstoe nanga howpoe gi iniwan sma di ben lasi-ati na so wan fasi? Ija. Foe taki leti, Psalm kapitel 84 e sori den firi foe wan foetoeboi foe Jehovah di ben abi den srefi sortoe angri disi di no ben kon troe èn di abi foe doe nanga a wroko gi Jehovah.

A warderi di wan Leifisma ben abi

Den skrifiman foe Psalm 84 ben de den manpikin foe Korak, Leifisma di ben dini na a tempel foe Jehovah èn den ben abi bigi warderi gi den grani di den abi foe dini. Wán foe den ben bari tranga: „O moi joe bigi tabernakel de, o Jehovah foe den legre! Mi sili abi wan tranga lostoe èn a e angri foeroe gi den fesi djari foe Jehovah. Mi eigi ati nanga mi skin srefi e bari nanga prisiri gi a libi Gado.” — Psalm 84:1, 2.

A Leifisma disi ben abi so wan angri foe dini na a tempel foe Jehovah, taki srefi na aladei sani di de foe si na a pasi di e go na Jerusalem, ben switi gi en. „Ala di den e waka pasa a lagipresi foe den boesiboesi foe baka”, a e taki, „den e kenki en tron wan watrafonten srefi” (Psalm 84:6). Ija, wan normaal drei kontren, ben de gi en leki wan kontren di abi foeroe watra.

Foe di a psalm singiman ben de wan Leifisma di no ben de wan priester, meki a ben kan dini na a tempel gi wán wiki nomo na ini ibri siksi moen (1 Kroniki 24:1-19; 2 Kroniki 23:8; Lukas 1:5, 8, 9). A tra pisi foe en ten a ben gebroiki na oso na ini wan foe den foto foe den Leifisma. Foe dati ede a ben singi: „Srefi a fowroe feni wan oso, èn a zwaluw wan nesi gi ensrefi, pe a poti den jongoe pikin foe en — joe bigi altari, o Jehovah foe den legre, mi Kownoe èn mi Gado!” (Psalm 84:3) A Leifisma ben sa breiti srefisrefi efoe a ben de leki den fowroe di ben abi wan moro fasti tanpresi na a tempel!

A ben sa kan de makriki gi a Leifisma foe kisi atibron foe di a no ben man dini moro foeroe leisi na a tempel. Ma a ben breiti foe man dini fa a ben man, èn seiker a ben froestan taki a de wan boen sani foe gi ensrefi nanga en heri ati na Jehovah. San ben jepi a getrow Leifisma disi foe tan de tevrede nanga den grani di a abi foe dini?

Leri foe de tevrede

„Wán dei na ini joe fesi djari moro boen leki doesoen dei na wan tra presi”, na so a Leifisma e taki. „Mi froekisi foe tanapoe na a dromofo ini na oso foe mi Gado, na presi foe waka lontoe na ini den tenti foe godelowsoefasi” (Psalm 84:10). A ben froestan taki foe tan srefi wán dei na a oso foe Jehovah, de wan kefalek bigi grani. Èn a Leifisma ben abi moro foeroe leki wán dei foe dini na a tempel. Foe di a ben de tevrede nanga den grani foe en, meki a ben singi nanga prisiri.

Fa a de nanga wi? Wi e teri den blesi foe wi, noso wi abi a gwenti foe frigiti sortoe grani wi abi kaba na ini a diniwroko foe Jehovah? Bika a pipel foe Jehovah e gi densrefi na ini a dini foe En, meki Jehovah gi den foeroe difrenti sortoe grani nanga wroko. Disi na so srefi den moro hebi frantiwortoe foe hori ai na tapoe sani, foe doe skapoeman wroko, foe gi leri, èn difrenti fasi foe a foeroeten diniwroko. Ma den abi foe doe so srefi nanga tra warti sani di abi foe doe nanga na anbegi foe Jehovah.

Foe eksempre, loekoe a kresten diniwroko. Na apostel Paulus e teki a grani di wi abi foe preiki a boen njoensoe gersi wan ’goedoe na ini tokotoko patoe’ (2 Korentesma 4:7). Joe e si den sortoe diniwroko dati leki wan goedoe di abi foeroe waarde srefisrefi? Jesus Krestes, di ben teki fesi na ini a Kownoekondre preikiwroko, ben si en na a fasi dati, èn a ben gi na eksempre (Mateus 4:17). „Foe di wi abi a diniwroko disi . . . , wi no e gi abra”, Paulus ben taki. — 2 Korentesma 4:1.

Den kresten konmakandra na so srefi wan santa sani di seti èn di wi no moesoe si leki sani di no de prenspari. Wi e kisi toemoesi prenspari bodoi na den konmakandra foe wi èn wi e njan boen foe kompe demakandra di wi abi fanowdoe. Na den konmakandra wi kan taki na poebliki toe foe a bribi èn a howpoe foe wi te wi e gi komentaar doronomo èn te wi e teki prati na tra fasi na ini a programa (Hebrewsma 10:23-25). Ija, den konmakandra foe wi na wan seti di wi moesoe warderi!

Michael, di wi ben kari kaba na fesi, ben si den blesi disi leki prenspari sani èn ben abi foeroe warderi gi den. Ma a lasi di a ben lasi-ati foe di a no ben man dini leki wan owroeman, ben meki a warderi di a ben abi gi den blesi dati kon moro mendri gi wan pisi ten. Di a ben poti en prakseri baka na den tapoe, a ben man foe kisi en balansi baka èn a ben man wakti nanga pasensi na tapoe Jehovah.

Na presi taki wi no de tevrede foe di wi no abi wan bepaalde grani, a sa boen foe ondrosoekoe agen den fasi fa Jehovah e blesi wi, soleki fa a psalm singiman ben doe.a Efoe wi no e si foeroe blesi, dan wi moesoe loekoe agen, èn wi moesoe aksi Jehovah foe opo wi ai foe man si den grani foe wi èn den fasi fa a e blesi wi èn fa a e gebroiki wi foe prèise en. — Odo 10:22.

A de so srefi prenspari foe froestan taki spesroetoe eigifasi de fanowdoe gi den spesroetoe grani, soleki a wroko foe wan opziener (1 Timoteus 3:1-7; Titus 1:5-9). So boen, wi moesoe ondrosoekoe wisrefi, foe si pe wi moesoe go na fesi èn dan wi moesoe meki serjoesoe moeiti foe go na fesi. — 1 Timoteus 4:12-15.

No lasi-ati

Efoe wi no kisi wan bepaalde grani foe dini, wi no moesoe denki taki Jehovah abi moro foeroe lobi gi den wan di abi a grani, noso taki a e hori boen sani na baka gi wi. Foe troe, wi no moesoe prakseri na wan djaroesoe fasi taki den trawan disi no ben froedini den grani foe den foe di den kisi den na wan partèi fasi, na presi taki den ben poti na wroko na wan theokrasia fasi. Te wi e prakseri toemoesi foeroe foe den sortoe idea disi, dan dati kan tjari djaroesoefasi kon, a de di wi no de tevrede, èn so srefi taki wi kan gi abra toe. — 1 Korentesma 3:3; Jakobus 3:14-16.

Laura, di wi ben kari na a bigin, no ben gi abra. Te foe kaba a ben kon si den firi foe atibron nanga djaroesoe di a ben abi. Doronomo Laura ben begi Gado foe kisi jepi foe man kakafoetoe gi den negatief fasi fa a ben handri na tapoe a man di a no ben man pionier. A ben soekoe jepi toe foe bekwaam man na ini a gemeente èn a ben kisi a djaranti baka taki Gado lobi en. „Jehovah ben gi mi wan korostoe froestan”, a ben taki. „Ala di mi nanga mi masra no man pionier nownow, wi e warderi a ten di wi ben man doe dati èn wi e kisi krakti foe den ondrofenitori di wi ben abi. Wi e jepi a bigi manpikin foe wi toe na ini en pionierwroko.” Now di Laura de tevrede, a man foe „prisiri nanga sma di e prisiri” na ini den pionierwroko. — Romesma 12:15.

Poti marki di joe kan doro

A de di wi de tevrede nanga njoen grani di wi abi na ini a diniwroko, no wani taki dati wi no moesoe poti theokrasia marki moro. Di Paulus ben taki foe na opobaka foe libi na hemel, a ben taki foe „langa misrefi go na den sani di de na mi fesi”. A ben taki toe: „Na a fasi fa wi go na fesi, meki wi tan waka na wan orde fasi na ini a srefi gwenti disi” (Filipisma 3:13-16). Theokrasia marki kan jepi wi foe langa wisrefi go na fesi. Ma a tjalensi na foe tan si den sani leki fa den de.

Marki di sma man doro, de reidelek èn den man kon troe (Filipisma 4:5). Disi no wani taki dati wan marki di abi wan toe jari foe tranga wroko fanowdoe, na wan marki di wi no man doro. So wan marki di poti gi wan langa pisi ten, wi kan doro safrisafri te wi e poti wan toe tra marki noso stap na mindri. Den kan dini leki markitiki foe gro na jejefasi. Te wi e doro ibri stap safrisafri, dan dati sa gi wi wan firi foe satisfaksi ala di wi e doe dati, na presi foe gi wi lasi-ati.

Wan boen fasi foe denki

Ma a de prenspari foe erken taki, bika foe den omstandigheid foe wi èn foe sani di e hendri, a kan taki wi no man kisi wan toe grani. Te wi e poti den leki wan marki, dan dati e tjari soso lasi-ati nanga broeja kon. Wi moesoe skoifi den sortoe marki disi poti na wan tra ten, kande gi wan pisi ten nomo. A no moeilek foe doe disi te wi e begi Gado foe de tevrede èn te wi e meki a doe di wi moesoe doe a wani foe Jehovah de a moro prenspari sani nanga san wi e broko wi ede. Te wi e soekoe foe doro den grani, dan a glori foe Jehovah — no a firi di wi abi taki wi man doe sani — de prenspari (Psalm 16:5, 6; Mateus 6:33). Na wan joisti fasi bijbel e taigi wi: „Lolo joe wroko na tapoe Jehovah srefi èn den plan foe joe sa poti steifi.” — Odo 16:3.

Te wi e ondrosoekoe Psalm 84, dan wi kan si taki a psalm singiman ben abi so wan fasi foe denki gi den grani di a abi foe dini, èn Jehovah ben blesi en srefisrefi. Boiti dati, a psalm disi e tan abi winimarki gi a pipel foe Jehovah te now ete.

Te joe e froetrow tapoe Jehovah na ini begi, dan joe kan hori na angri di joe abi gi moro grani na ini balansi foe di joe e de tevrede nanga den wan di joe abi now. Noiti no meki na angri di joe abi foe doe moro, poeroe a warderi di joe abi gi den sani di joe abi now èn foe poeroe a prisiri di joe abi foe dini Jehovah foe têgo. Froetrow tapoe Jehovah, bika disi e tjari kolokoe kon, soleki fa den wortoe foe a Leifisma e sori: „O Jehovah foe den legre, kolokoe foe a man di e froetrow tapoe joe.” — Psalm 84:12.

[Foetoewortoe]

[Faki na tapoe bladzijde 11]

Marki di wi ben sa kan poti

Leisi bijbel ibri dei. — Josua 1:8; Mateus 4:4

Meki a koni di wi abi foe si sani krin, kon moro boen, nanga jepi foe den leri foe den Boekoe foe bijbel. — Hebrewsma 5:14

Kweki wan moro krosibei matifasi nanga Gado. — Psalm 73:28

Kweki ibriwan foe den froktoe foe a jeje. — Galasiasma 5:22, 23

Meki den begi foe wi kon moro boen. — Filipisma 4:6, 7

Abi moro boen bakapisi na ini a preikiwroko èn na ini a leriwroko. — 1 Timoteus 4:15, 16

Leisi èn prakseri dipi foe ibri eksemplaar foe a Waktitoren nanga Ontwaakt! tijdschrift. — Psalm 49:3

[Prenki na tapoe bladzijde 9]

Te wi e poti marki gi wisrefi, dan wi moesoe poti a wani foe Gado na tapoe a fosi presi