Wi e warderi den grani fu wi!
1 Sensi a bigin di Yehovah meki libisma, a gi en futuboi difrenti sortu grani. A ben gi den difrenti grani awinsi den ben de mansma, umasma, yongusma, owrusma, noso awinsi sortu posisi den ben abi (Luk. 1:41, 42; Tori. 7:46; Fil. 1:29). Sortu grani a e gi wi na ini a ten disi?
2 Wan tu fu den grani di wi abi: Wi abi a grani fu kisi leri fu Yehovah (Mat. 13:11, 15). Wan tra grani di wi abi, na taki wi kan prèise Yehovah te wi e gi piki na den gemeente konmakandra (Ps. 35:18). Te wi e kisi na okasi fu gi piki, dan wi no e draidrai, fu di wi lobi du dati. Na so a de tu nanga den wroko di wi e kisi fu du na ini a gemeente. Te wi e si ala den wroko disi leki wan grani, dan wi sa meki muiti fu du den bun. Wi abi a gwenti fu yepi krin a Kownukondre zaal èn fu yepi meki sani di broko na ini a zaal, kon bun baka?
3 Furu sma e aksi densrefi efu Gado e arki den begi fu den. Ma wi abi a grani taki a moro prenspari Sma fu hemel nanga grontapu, e arki den begi fu wi (Odo 15:29). Yehovah srefi e arki den begi fu den futuboi fu en (1 Petr. 3:12). A no e tapu wi fu begi o furu wi wani. A de wan bigi grani gi wi taki wi kan begi Yehovah „na ibri okasi”!—Ef. 6:18.
4 „Wi e wroko makandra nanga Gado”: Wan fu den moro moi grani di wi abi, na taki wi kan preiki a bun nyunsu fu Gado Kownukondre leki sma di „e wroko makandra nanga Gado” (1 Kor. 3:9). A wroko disi e meki wi firi prisiri, èn a e meki taki wi e kisi krakti baka (Yoh. 4:34). Yehovah no abi fu gebroiki libisma fu du a wroko fu en. Ma a gi wi a wroko disi fu di a lobi wi (Luk. 19:39, 40). Fu dati ede, Yehovah no gi ala sma a grani disi. Den sma di e du a preikiwroko musu doro den markitiki fu En èn den musu tan hori densrefi na den markitiki dati (Yes. 52:11). Wi e sori taki wi e warderi a grani disi, fu di wi e du a preikiwroko ibri wiki?
5 Den grani di Yehovah e gi wi e meki wi koloku (Odo 10:22). Meki noiti wi lasi warderi gi den grani disi! Te wi e sori trutru warderi gi a grani di wi abi fu du diniwroko gi Gado, dan wi e plisi wi hemel Tata, a Sma di e gi wi „ibri bun presenti nanga ibri volmaakti kado”.—Yak. 1:17.