Wan brifi fu a Tiri Skin

Lespeki preikiman fu a bun nyunsu:

Na wan bigi grani taki makandra nanga unu, wi man anbegi a wan-enkri tru Gado, Yehovah! Wi e „wroko makandra” nanga en fu du wan santa wroko di e meki taki sma kan kisi libi. Wi musu preiki a bun nyunsu fu a Kownukondre èn wi musu gi sma leri (1 Kor. 3:9; Mat. 28:19, 20). Ma fu man du a wroko disi na heri grontapu na ini freide nanga wánfasi, wi musu orga bun.​—1 Kor. 14:40.

A buku disi o yepi yu fu frustan fa a Kresten gemeente seti na ini a ten disi. A e taki fu den grani nanga den frantwortu di yu abi fu de wan Kotoigi fu Yehovah. Efu yu e warderi den grani di yu abi èn yu e du a wroko di yu kisi, dan dati o „tranga a bribi” fu yu.​—Tori 16:4, 5; Gal. 6:5.

Dati meki wi e gi yu a deki-ati fu studeri a buku disi bun. Luku fa yu kan gebroiki san yu e leri na ini yu libi. Fu eksempre, efu yu na wan preikiman di no dopu, dan san yu musu du fu dopu èn tron wan Yehovah Kotoigi? Na a tra sei, efu yu dopu kaba, dan san yu kan du fu go na fesi èn fu du moro gi Yehovah? (1 Tim. 4:15) Fa yu kan sorgu taki freide de na ini a gemeente? (2 Kor. 13:11) A buku disi e piki den aksi dati.

Efu yu na wan dopu brada, dan san yu kan du fu tron wan dinari ini a diniwroko èn bakaten wan owruman? Fu di dusundusun sma e tan kon na ini Gado organisâsi, meki lepi brada de fanowdu di kan teki fesi. A buku disi o yepi yu fu si san wan brada musu du fu kisi frantwortu na ini a gemeente.​—1 Tim. 3:1.

Wi e begi taki a buku disi yepi yu fu si san na yu frantwortu na ini a seti fu Yehovah èn fu warderi dati. Wi lobi unu alamala èn wi e tan begi taki unu o de na mindri den wan di o prisiri fu anbegi wi hemel Tata Yehovah fu têgo.​—Ps. 37:10, 11; Yes. 65:21-25.