Brada, du san a yeye wani, èn suku fu kisi frantwortu na ini a gemeente!
„A sma di e du san a yeye wani, sa kisi têgo libi.”—GAL. 6:8.
1, 2. Fa Mateyus 9:37, 38 e kon tru na ini a ten disi, èn san den gemeente abi fanowdu leki bakapisi fu dati?
NA INI a ten disi, yu e si sani di yu no sa frigiti noiti! Wan wroko di Yesus Krestes ben taki fu en, e go na fesi esi-esi. Yesus ben taki: „A kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en” (Mat. 9:37, 38). Yehovah Gado e piki den sortu begi disi na wan tumusi moi fasi. Na ini a dienstyari fu 2009, a nomru fu den gemeente fu Yehovah Kotoigi kren nanga 2031, èn now 105.298 gemeente de. Ala nanga ala, sowan 757 sma teki dopu ibri dei!
2 Fu di moro nanga moro sma e tron anbegiman fu Yehovah, meki lepi brada de fanowdu fu gi leri èn fu teki fesi na ini den gemeente (Ef. 4:11). Na ini den yari di pasa, Yehovah gi lepi man a frantwortu fu sorgu gi den skapu fu en, èn wi abi a dyaranti taki a sa tan du dati. A profeititori di skrifi na Mika 5:5 e gi wi a dyaranti taki na ini den lasti dei, a pipel fu Yehovah o abi „seibi skapuman” nanga „aiti libisma di o tiri leki granman”. Disi e sori taki bun furu lepi brada ben o de di ben o teki fesi na mindri a pipel fu Yehovah.
3. Fruklari san a wani taki fu „du san a yeye wani”.
3 Efu yu na wan dopu Kresten brada, dan fa yu kan kon abi na angri fu kisi frantwortu na ini a gemeente? Wan prenspari sani di yu musu du, na taki yu musu „du san a yeye wani” (Gal. 6:8). Dati wani taki dati yu musu libi na wan fasi di sa gi a santa yeye fu Gado na okasi fu abi krakti na yu tapu. Abi a fasti bosroiti fu no „du san a sondu skin wani”. No de nomonomo fu abi wan switi libi, fu abi furu fri ten, èn fu abi prisiriten, fu di den sani dati e meki yu lasi na angri di yu ben abi fu du moro na ini a diniwroko fu Gado. Ala Kresten musu de sma di e „du san a yeye wani”, èn te fu kaba, den brada di e du dati sa doro den markitiki fu kisi frantwortu na ini a gemeente. Fu di dinari ini a diniwroko nanga owruman de tranga fanowdu na ini a ten disi, meki na artikel disi abi fu du spesrutu nanga Kresten brada. Sobun, wi e gi unu leki brada a deki-ati fu poti prakseri na a artikel disi, èn fu begi Gado fu yepi unu fu fiti den rai na ini.
Suku fu du wan tumusi bun wroko
4, 5. (a) Sortu grani dopu brada musu suku fu kon abi na ini a gemeente? (b) Fa wan brada kan suku fu kisi moro frantwortu?
4 Wan Kresten brada no e tron wan owruman sondro taki a meki muiti fu kisi a grani dati. A musu suku fu du a „tumusi bun wroko” disi (1 Tim. 3:1). Dati wani taki dati a musu dini en Kresten brada nanga sisa, èn a musu broko en ede trutru nanga den. (Leisi Yesaya 32:1, 2.) Te wan brada di e suku fu kisi frantwortu na ini a gemeente, e du dati nanga a yoisti denki, dan a brada dati no e suku fu kisi biginen. Na presi fu dati, a wani yepi trawan sondro fu suku wini gi ensrefi.
5 Wan brada di e suku fu dini leki dinari ini a diniwroko noso leki owruman, musu meki muiti fu doro den markitiki di skrifi na ini Bijbel (1 Tim. 3:1-10, 12, 13; Titus 1:5-9). Efu yu na wan dopu brada, dan aksi yusrefi den sani disi: ’Mi e teki prati fayafaya na a preikiwroko, èn mi e yepi trawan fu du dati tu? Mi e broko mi ede trutru nanga mi Kresten brada nanga sisa, èn mi e gi den deki-ati? Sma sabi mi leki wan brada di e studeri Gado Wortu bun? Mi e meki muiti fu gi moro bun piki na den konmakandra? Mi e meki ala muiti fu tyari den frantwortu di den owruman gi mi?’ (2 Tim. 4:5) A bun fu poti seryusu prakseri na den aksi disi.
6. San na wan prenspari sani di wan brada musu du fu man kisi frantwortu na ini a gemeente?
6 Wan tra fasi fa wan brada kan suku fu kisi frantwortu na ini a gemeente, na te a e ’meki a sma di a de na inisei, kon tranga nanga yepi fu a yeye fu Gado’ (Ef. 3:16). Te wan brada tron wan dinari ini a diniwroko, noso wan owruman na ini a Kresten gemeente, dan dati no wani taki dati na libisma gi en a grani dati. Wan brada kan kisi a grani dati soso te a e kon abi wan bun matifasi nanga Yehovah. Fa yu kan kon abi wan bun matifasi nanga Yehovah? Wan fasi fa yu kan du dati, na te yu e „tan waka nanga a yeye”, èn te yu e kweki den froktu fu a yeye (Gal. 5:16, 22, 23). Te yu e sori taki yu abi den fasi di wan sma abi fanowdu fu man tyari moro frantwortu, èn te yu e fiti den rai di yu kisi, dan ’ala sma sa si taki yu e go na fesi’.—1 Tim. 4:15.
Yu musu de klariklari fu gi yusrefi
7. San a wani taki fu dini trawan?
7 Fu man dini trawan, dan yu musu wroko tranga èn yu musu de klariklari fu gi yusrefi. Fu di Kresten owruman e dini leki skapuman, meki den e broko den ede trutru nanga den problema fu na ipi. Luku fa na apostel Paulus ben e denki fu den frantwortu di a ben abi leki skapuman. A ben taigi den Kresten brada nanga sisa fu en na ini Korente: „Nanga furu banawtu èn nanga bigi sari na ini mi ati mi ben skrifi unu nanga furu watra-ai, ma mi no du disi fu meki unu firi sari, ma fu meki unu kon sabi o tranga mi lobi unu” (2 Kor. 2:4). A de krin taki Paulus ben e du a wroko fu en nanga en heri ati.
8, 9. Taki fu wan tu eksempre na ini Bijbel di e sori fa mansma ben e yepi trawan.
8 Ala ten mansma di dini fu a bun fu den futuboi fu Yehovah, ben de sma di de klariklari fu gi densrefi. Fu eksempre, Noa noiti no ben o taigi en osofamiri: ’Unu sa taigi mi te unu kaba bow na ark, dan mi sa kon na ini.’ Moses no ben taigi den Israelsma di ben de na ini Egepte: ’Mi o miti unu na a Redi Se. Du ala san yu man fu doro drape.’ Yosua noiti no taki: ’Unu sa seni boskopu gi mi te den skotu fu Yerikow fadon.’ Èn Yesaya no ben sori go tapu wan tra sma, fu taki: ’Luku en drape! Na en yu musu seni.’—Yes. 6:8.
9 A moro bun eksempre di wi abi fu wan man di ben meki a yeye fu Gado tiri en, na a di fu Yesus Krestes. A ben de klariklari fu dini leki Frulusuman gi libisma (Yoh. 3:16). A bigi lobi di Yesus sori gi wi, musu gi wi deki-ati fu teki na eksempre fu en, a no so? Wan brada di de owruman wan langa ten kaba, ben sori fa a e firi gi den skapu. A e taki: „Wan sani di ben abi bigi krakti na mi tapu, na den wortu di Yesus ben taigi Petrus. A ben taigi en: ’Luku den pikin skapu fu mi’. Na ini den yari di pasa, mi kon frustan taki te yu e taki na wan switi fasi nanga sma, noso te yu e du wan pikin sani fu yepi den, dan dati nofo kaba fu gi den deki-ati. A frantwortu di mi abi fu luku den skapu, e gi mi prisiri trutru.”—Yoh. 21:16.
10. San kan gi Kresten brada a deki-ati fu dini trawan neleki fa Yesus ben e du dati?
10 Te a abi fu du nanga na ipi fu Gado, dan dopu brada na ini a gemeente musu abi a srefi denki fu Yesus, di ben taki: „Mi sa gi unu krakti baka” (Mat. 11:28). Fu di Kresten brada abi bribi na ini Gado, èn fu di den lobi a gemeente, meki den e suku fu kisi a moi grani fu luku na ipi fu Gado. Den brada disi no e denki taki a wroko sa aksi tumusi furu fu den, noso taki a hebi tumusi. Ma fa a de te wan brada no e suku fu kon abi frantwortu na ini a gemeente? Wan brada kan kon abi na angri fu dini a gemeente?
Kon abi na angri fu dini trawan
11. Fa wan Kresten brada kan kon abi na angri fu dini trawan?
11 Kande yu no e du muiti fu kisi frantwortu na ini a gemeente, fu di yu feni taki yu no bun nofo. Efu dati de so, dan a fiti taki yu e begi Gado fu gi yu en santa yeye (Luk. 11:13). A yeye fu Yehovah sa yepi yu fu no broko yu ede nanga a tori dati. Na Yehovah e yepi wan brada fu kon abi na angri fu dini en, fu di na a yeye fu Yehovah e meki taki brada e suku fu kon abi frantwortu na ini a gemeente. Èn a yeye disi e gi den a krakti tu fu du santa diniwroko (Fil. 2:13; 4:13). Fu dati ede, a fiti taki yu e aksi Yehovah fu yepi yu fu kon abi na angri fu kisi frantwortu na ini a gemeente.—Leisi Psalm 25:4, 5.
12. Fa wan sma kan kon abi nofo koni fu tyari den frantwortu di a kisi?
12 Kande wan Kresten brada e si taki a hebi tumusi fu luku den skapu. Fu dati ede, a kan bosroiti fu no suku fu kisi frantwortu na ini a gemeente. Noso kande a feni taki a no koni nofo fu tyari den frantwortu dati. Efu dati de so, dan kande a musu du muiti fu studeri Gado Wortu nanga den Bijbel publikâsi moro fini, so taki a kan kisi moro koni. A ben o bun te a e aksi ensrefi: ’Mi e poti ten na wan sei fu studeri Gado Wortu? Mi e begi Gado fu gi mi koni?’ A disipel Yakobus ben skrifi: „Efu wan fu unu e mankeri koni, meki a tan aksi Gado, bika a e gi ala sma nanga en heri ati èn sondro fu suku fowtu na den; Gado sa gi a sma dati koni” (Yak. 1:5). Yu e bribi den wortu disi di skrifi nanga yepi fu santa yeye? Gado piki a begi fu Salomo, èn a gi en „furu koni nanga frustan”. Dati ben yepi Salomo fu kon sabi san bun èn san ogri te a ben e krutu afersi (1 Kow. 3:7-14). A no de fu taki, dati a tori fu Salomo ben de wan apartiwan. Ma wi kan abi na overtoigi taki Gado sa gi brada di abi frantwortu na ini a gemeente, a koni fu man luku den skapu fu En na a yoisti fasi.—Odo 2:6.
13, 14. (a) Fruklari fa „a lobi fu Krestes” ben abi krakti na tapu Paulus? (b) Sortu krakti „a lobi fu Krestes” musu abi na wi tapu?
13 Wan tra sani di kan yepi wi fu kisi na angri fu dini trawan, na te yu e denki dipi fu ala den sani di Yehovah nanga en Manpikin du gi wi. Fu eksempre, luku san skrifi na 2 Korentesma 5:14, 15. (Leisi en.) Fa „a lobi di Krestes abi, e naki wi ati”? Krestes sori bigi lobi gi wi fu di a dede gi wi soleki fa Gado ben aksi fu en. Dati meki, o moro wi e kon abi warderi gi a lobi dati, o moro wi sa kisi na angri fu teki na eksempre fu en. A lobi fu Krestes ben abi krakti na tapu Paulus. A lobi dati tapu en fu denki ensrefi nomo, èn a yepi en tu fu si en leki wan grani fu dini Gado, en Kresten brada nanga sisa, nanga tra sma.
14 Te wi e denki dipi fu a lobi di Krestes abi gi sma, dan wi e kisi warderi gi san a e du gi wi. Fu dati ede, wi e frustan taki a no ben o fiti te wi e suku wi eigi bun nomo, èn te wi e libi soso fu plisi den lostu fu wi. Dati ben o sori taki wi e „du san a sondu skin wani”. Na presi fu dati, wi e tyari kenki kon na ini wi libi so taki a wroko di Gado gi wi, e tron a moro prenspari sani na ini wi libi. A sani dati e meki taki wi wani dini wi Kresten brada nanga sisa leki „srafu”, fu di wi lobi den. (Leisi Galasiasma 5:13.) Te wi e si wisrefi leki srafu di e wroko nanga sakafasi gi a bun fu den futuboi fu Yehovah, dan wi sa sori lespeki gi den. A no de fu taki, dati wi no wani krutu trawan, neleki fa den sma na ini a grontapu fu Satan e du dati.—Openb. 12:10.
A heri famiri musu du muiti
15, 16. Sortu frantwortu den memre fu wan brada en osofamiri abi efu a brada dati e suku fu dini leki dinari ini a diniwroko, noso leki owruman?
15 Fa a de te wan brada trow èn a abi pikin? Te dati de so, dan den brada na ini a gemeente sa luku fa sani e waka na ini na osofamiri fu en te den musu bosroiti efu a kan dini leki dinari ini a diniwroko, noso leki owruman. A no de fu taki dati efu a brada disi wani kisi den frantwortu dati, dan na osofamiri fu en musu abi wan bun matifasi nanga Gado, èn den musu abi wan bun nen na trawan. A sani disi e sori krin taki wan brada en wefi nanga en pikin musu horibaka gi en te a e pruberi fu kisi a grani fu dini leki dinari ini a diniwroko, noso leki owruman na ini a gemeente.—Leisi 1 Timoteyus 3:4, 5, 12.
16 Yehovah lobi te den memre fu Kresten osofamiri e wroko makandra (Ef. 3:14, 15). Wan famiri edeman musu sabi fa fu tyari den frantwortu na ini a gemeente, aladi a e tiri en osofamiri „na wan bun fasi”. Fu dati ede a de tumusi prenspari taki wan owruman, noso wan dinari ini a diniwroko e studeri Bijbel nanga en wefi nanga pikin, so taki den alamala e kisi wini fu na Osofamiri Anbegi ibri wiki. A brada disi musu teki prati doronomo tu na a preikiwroko makandra nanga na osofamiri fu en. A prenspari tu taki den memre fu na osofamiri e wroko makandra nanga na edeman fu na osofamiri.
Yu sa dini baka?
17, 18. (a) Efu wan brada lasi den frantwortu di a ben abi na ini a gemeente, dan san a kan du? (b) Sortu denki wan brada di ben e dini fosi leki owruman noso dinari ini a diniwroko, musu kon abi?
17 Kande yu ben de wan owruman, noso wan dinari ini a diniwroko fosi, ma now yu no abi den frantwortu dati moro. A no de fu taki, dati yu lobi Yehovah, èn yu kan de seiker taki a e broko en ede ete nanga yu (1 Petr. 5:6, 7). Den brada ben taigi yu taki yu musu tyari wan tu kenki kon? De klariklari fu si taki yu musu wroko na wan tu sani, èn begi Gado fu yepi yu. Luku bun taki yu no e kisi bita-ati. Sori taki yu koni, èn abi wan bun denki fu sani. Wan brada di ben dini leki owruman furu yari langa, ma di ben lasi a grani dati, ben taki: „Mi ben abi a fasti bosroiti fu tan go na den konmakandra neleki fa mi ben e du dati di mi ben e dini leki owruman. Mi ben o tan teki prati na a preikiwroko, èn mi ben o tan leisi Bijbel. Mi ben man du ala den sani dati. Mi ben denki taki a ben o teki wán noso tu yari fu kisi den grani baka di mi ben abi fosi, ma a teki pikinmoro seibi yari fosi mi ben kan dini baka leki owruman. A sani dati leri mi fu abi pasensi. Na a ten dati mi ben e kisi a deki-ati fu no kon weri, ma fu tan du muiti. Dati ben de wan bigi yepi gi mi.”
18 Efu yu na wan brada di de na ini wan srefi sortu situwâsi, dan no lasi-ati. Prakseri fa Yehovah e blesi a diniwroko fu yu èn sosrefi yu osofamiri. Yepi yu osofamiri fu kon abi wan tranga bribi, go luku den sikiwan, èn gi den swakiwan deki-ati. Ma san moro prenspari, na taki yu musu warderi a grani di yu abi fu prèise Gado èn fu meki a bun nyunsu fu Gado Kownukondre bekènti leki wan Kotoigi fu Yehovah.a—Ps. 145:1, 2; Yes. 43:10-12.
Poti prakseri baka na a situwâsi fu yu
19, 20. (a) San ala dopu brada musu du? (b) Na sortu sani wi sa poti prakseri na ini a tra artikel?
19 Noiti ete so furu owruman nanga dinari ini a diniwroko ben de fanowdu, leki na ini a ten disi. Fu dati ede wi e gi ala dopu brada deki-ati fu poti prakseri baka na a situwâsi fu den. Den musu aksi densrefi: ’Fu san ede mi no e dini ete leki dinari ini a diniwroko noso leki owruman?’ Meki a yeye fu Gado yepi yu fu kon abi a yoisti denki fu a prenspari tori disi.
20 Ala den memre fu a gemeente e kisi wini fu den Kresten brada nanga sisa di e gi densrefi fu a bun fu trawan. Te wi de klariklari fu du sani gi trawan sondro taki wi e suku wini gi wisrefi, dan wi sa de nanga prisiri fu di wi e du san a yeye wani. Ma wi musu luku bun taki wi no e meki a santa yeye fu Gado sari. Fa wi kan sorgu taki dati no e pasa? Wi sa poti prakseri na a tori dati na ini a tra artikel.
[Futuwortu]
San yu ben sa piki?
• Sortu dyaranti a profeititori na Mika 5:5 e gi wi?
• Fruklari san a wani taki te wan sma de klariklari fu gi ensrefi?
• Fa wan sma kan kon abi na angri fu dini trawan?
• Fu san ede a de prenspari taki wan brada en osofamiri e horibaka gi en efu a brada dati wani dini leki dinari ini a diniwroko noso leki owruman?
[Prenki na tapu bladzijde 25]
Fa yu kan suku fu kon abi frantwortu na ini a gemeente?