Yu e suku fu kisi a wroko fu wan opziener?
„Efu wan sma e suku fu kisi a wroko fu wan opziener, dan a e angri fu wan tumusi bun wroko.” — 1 TIMOTEYUS 3:1.
1. Na meki kon tru fu sortu marki de a moro prenspari sani gi Yehovah Kotoigi?
YEHOVAH KOTOIGI e abi yoisti marki, di den e seti èn e du na wan fasi pe den e sori frede gi Gado. Disi a no wan fruwondru sani, fu di a Gado fu den abi tumusi moi marki èn ala ten e du den prakseri fu en (Yesaya 55:8-11). Den diniman fu Yehovah no musu de leki den sma dati di no abi wan warti marki èn di e libi wan libi sondro fu broko den ede, ala di den e du pikinso nomo pe tra sma no e nyanbun fu en, boiti den srefi. A moro prenspari sani gi den Kotoigi fu Gado, na fu du a tumusi moi marki fu preiki a Kownukondre boskopu èn fu prati nanga tra sma a sabi fu a wortu fu Gado di e gi libi. — Psalm 119:105; Markus 13:10; Yohanes 17:3.
2. Sortu marki gi kresten man Paulus ben kari na ini 1 Timoteyus 3:1?
2 Tra tumusi moi marki de ete na ini Yehovah organisâsi. Na apostru Paulus ben kari wan fu den di a ben skrifi: „A fruklari dati yu kan bribi. Efu wan sma e suku fu kisi a wroko fu wan opziener, dan a e angri fu wan tumusi bun wroko.” So wan man wani du wan sani di abi wini gi trawan. A e angri fu wan „tumusi bun wroko”, no wan makriki libi nanga biginen. Wan tra vertaling e taki: „A de tru srefisrefi fu taki taki wan man di e poti en ati tapu wan fesimanwroko, abi wan ambisi di de fu prèise.”—1 Timoteyus 3:1, Phillips.
Kofar gi owruman
3, 4. Fu san-ede wan man di e suku fu tron wan opziener musu kibri en ati?
3 Na sortu fasi wan man di e poti en ati a tapu fu tron wan kresten opziener abi wan „ambisi di de fu prèise”? We, ambisi na wan tranga angri fu doro wan spesrutu marki. A de tru taki yu abi bun ambisi èn ambisi di no warti noti. Ma efu nanga sakafasi wan man e suku fu kisi wan wroko fu wan opziener, fu di a wani dini trawan, dan a e du en wroko nanga opregti buweigi fu ati èn a kan abi blesi na yeye fasi leki bakapisi. Ma a musu kibri en ati.—Odo 4:23.
4 Son sma di wani grani e suku barinen. Trawan wani tiri tapu konpe sma. Na angri fu kisi biginen ofu makti de leki wan pori rutu di kan meki wan bon di luku gosontu fadon na gron. Wan kresten ben sa kan broko kindi tu gi so wan ambisi fu wan fowtu buweigi fu ati (Odo 16:18). „Mi skrifi wantu sani gi a gemeente”, na apostru Yohanes ben taki, „ma Diotrefes, di lobi fu teki na fosi presi na den mindri [„di wani de basi fu ala sani”, Phillips], no e teki noti fu unu nanga respeki. Fu dati-ede meki te mi kon, mi sa memre den wroko fu en, di a e tan du, ala di nanga takru wortu a e taki sani fu unu. Èn fu di a no de tevrede nanga dati ete, meki en srefi no e teki den brada nanga respeki, èn den wan di wani teki den, a e pruberi fu tapu den èn fu trowe den go na dorosei fu a gemeente” (3 Yohanes 9, 10). Na ambisi fu Diotrefes no ben de wan krestenwan. Asrantifasi nanga a suku fu grani fu abi makti tapu trawan no fiti a mindri den tru bakaman fu Yeises. — Odo 21:4.
5. Nanga sortu fasi fu si sani owruman musu du den wroko fu den?
5 Wan kresten opziener di e du den plekti fu en nanga a yoisti buweigi fu ati, no sa feti baka ambisi pe a e prakseri en srefi wawan. A sa si a tumusi moi kresten wroko disi fu hori-ai a tapu sani leki wan grani di Gado gi en èn ’a no sa wei na ipi fu Gado ondro dwengi’, ma fu di a wani; no nanga lobi gi oneerlijk wini, ma klariklari; no leki wan sma di e basi den wan di de a gudu fu Gado, ma fu di a e tron [wan eksenpre] gi na ipi” (1 Petrus 5:2, 3). Iya, opziener musu tan na ai fu no kon kisi heimemre èn fu no kobroiki makti na wan fowtu fasi.
6. Fu san-ede wan owruman no mag basi a pipri fu Gado?
6 Wan owruman no musu basi tra kresten, bika a de a konpe wrokoman fu den, èn no de ’masra a tapu den bribi’ (2 Korente sma 1:24). Di son apostru ben suku biginen, Yeises ben taki: „Yu sabi taki den tiriman fu den nâsi e basi den èn den bigiman e kobroiki makti na den tapu. Disi no de so na unu mindri; ma a sma di wani kon bigi na unu mindri, musu de unu dinari, èn a sma di wani de a fosiwan na unu mindri, musu de unu srafu. Neleki fa na pikin fu Libisma, no kon fu sma dini en, ma fu dini sma èn fu gi en sili leki frulusu-paiman ini na presi fu furu sma” (Mateyus 20:20-28). Wan owruman a no na Gran-Herder ma soso wan ondro-herder. Efu a e basi na ipi, dan a e sori wan yeye fu heimemre. Ogri ben sa kon spesrutu fu dati efu a ben sa kisi trawan so fara fu yepi en fu meki en bigimemre ambisi kon tru. Wan odo e taki: „Ibriwan sma di abi heimemre ini ati de wan tegu sani gi Yehovah. Awasi den anu fow kon na wan, toku wan sma no sa de fri fu strafu”.—Odo 16:5.
7, 8. (a) Fu san-ede kresten owruman musu de nanga sakafasi? (b) Gi wan eksenpre fu wan sakafasi owruman.
7 Fu dati-ede meki kresten owruman musu ’saka den srefi na ondro a makti anu fu Gado.’ Heimemre e tapu pasi fu den kobroiki wan sma na yeye fasi, fu di soso den sakafasiwan abi na yoisti kondisi fu ati nanga yeye fu du na wani fu Gado. „Gado e kakafutu gi den heimemrewan, ma a e gi no-frudini switifasi na den sakafasiwan” (1 Petrus 5:5, 6). Iya, Yehovah e blesi den wan di abi wan yeye fu sakafasi. A mindri fu den man disi den man di abi koni e komoto èn di den e poti fu dini leki kresten owruman.
8 A disiten historia fu Yehovah Kotoigi e monyo fu eksenpre fu sakafasi dienst, di sma di gi den srefi ini a dini fu Gado ben du. Fu eksenpre, luku a safri-ati man, W. J. Thorn pikinso, di ben de wan dei wan pelgrim brada, ofu wan opziener di ben e waka lontu luku gemeente, èn di ben wroko fu wan langa pisiten na Bethel. Wan kresten ben taki fu en: „Mi no sa frigiti noiti wan sani di brada Thorn ben taki èn di yepi mi te nanga now. Mi e tyari kon a fesi san a ben taki: „Alaten te mi e bigin denki tumusi furu fu mi srefi, dan mi e pusu mi srefi poti na ini wan uku fu taki en so, èn e taki: „Yu pikin pisi stòf. San yu kisi fu abi heimemre?” O fa a de wan sani di de fu prèise efu owruman nanga trawan e sori so wan sortu eigifasi! Prakseri, [taki] „a bakapisi fu sakafasi nanga a frede gi Yehovah wani taki, glori nanga libi”. — Odo 22:4.
A lostu di Gado gi fu dini
9. Fu san-ede wi kan taki taki a lostu fu dini leki owruman de wan sani di Gado e gi?
9 Na lostu fu dini leki wan opziener de wan sani di Gado e gi? Iya, fu di na Yehovah yeye e gi a buweigi fu ati, a deki-ati nanga a krakti fu du santa diniwroko gi en. San ben psa fu eksenpre di den bakaman fu Yeises ben kisi frufolgu èn ben begi fu preiki fri èn sondro frede? „A presi pe den ben konmakandra [ben seki] èn den alamala ben kon furu nanga santa yeye èn ben taki a wortu fu Gado fri èn sondro frede” (Tori fu den Apostru 4:27-31). Fu di a santa yeye kan meki den sortu bakapisi disi kon, dan a kan buweigi wan sma tu fu suku fu kisi a wroko fu wan opziener.
10. (a) San na wan fu den reide meki kande wan kresten man no e suku a wroko fu wan opziener? (b) Fu sortu sani wi kan de seiker te Gado gi wi wan grani fu dienst?
10 San ben sa kan tapu wan lepi kresten fu suku fu kisi wan opzienerwroko? A kan de wan man di lepi na yeye fasi, ma e firi en srefi leki a no abi nofo koni (1 Korente sma 2: 14, 15). A no de fu taki, taki wi musu abi wan bescheiden luku fu unu srefi, èn sabi den sani san wi man èn san wi no man (Mika 6:8). Na presi fu fruberde taki wi na a wan di abi moro koni gi wan spesrutu frantiwortu, a bun fu memre taki ’koni de na den bescheidenwan’ (Odo 11:2). Ma wi musu frustan so srefi taki efu Gado e gi unu wan grani fu dienst, a sa sorgu so srefi fu a tranga di de fanowdu fu du en. Paulus ben taki fu disi: „Gi ala sani mi abi a tranga nanga yepi fu en di e gi mi krakti.” — Filipi sma 4:13.
11. San wan kresten di no e suku fu kisi a wroko fu wan opziener kan du, fu di a e denki taki a no abi nofo koni fu gi rai?
11 Kande wan kresten no e suku fu kisi a wroko fu wan opziener fu di a e feni taki a no abi nofo koni fu kan gi rai. We, a ben sa kan gro ini koni, fu di a o de wan moro faya stukaman fu a wortu fu Gado èn seiker a musu begi fu kisi koni. Yakobus ben skrifi: „Efu wan fu unu e mankeri koni, dan a musu tan aksi Gado, bika a lobi fu gi ala sma furu èn sondro fu krasi; èn a sa kisi en. Ma a musu tan aksi na ini bribi, sondro fu tweifri kwetikweti, bika a sma di e tweifri, de leki wan skwala fu se di a winti e wai go kon. Te yu luku en bun, a sma dati no musu prakseri taki a o kisi wan sani fu Yehovah; a de wan man di no e teki bosroiti, di no de stanfaste na ini ala den pasi fu en” (Yakobus 1:5-8). Leki piki tapu a begi fu Salomo, Gado ben gi en „wan ati fu koni nanga frustan” di ben yepi en fu ben man meki difrenti a mindri bun nanga ogri te a ben e krutu a pipri (1 Kownu 3:9-14). A kofal fu Salomo ben de wan spesrutuwan, ma nanga fayafaya stuka èn nanga a yepi fu Gado, den man di kisi gemeente frantiwortu kan gi trawan rai na wan regtfardiki fasi. „Yehovah srefi e gi koni; fu en mofo koni nanga a koni fu man fu si fa fu du e komoto.” — Odo 2:6.
12. Efu broko-ede e tapu wan man fu suku fu kisi a wroko fu wan opziener, san kan yepi en dan?
12 Wan spesrutu broko-ede kan hori wan man na baka fu suku fu kisi a wroko fu wan opziener. Kande a e prakseri taki a no sa man tyari na hebi frantiwortu fu wan owruman. Paulus srefi ben erken: „Dei fu dei a sorgu gi ala den gemeente e kon nomo na mi tapu” (2 Korente sma 11:28). Ma na apostru ben sabi san a ben musu du te a ben ondrofeni broko-ede, bika a ben skrifi: „No broko yu ede fu noti, ma na ini ala sani nanga yepi fu begi nanga tranga begi makandra nanga taki tangi meki Gado kon sabi den faya begi fu yu; èn a vrede fu Gado, di e psa ala prakseri, sa kibri yu ati nanga yu yeye krakti nanga yepi fu Krestes Yeises” (Filipi sma 4:6, 7). Iya, begi nanga frutrow ini Gado kan yepi fu meki a broko-ede kon moro mendri.
13. Fa wan man ben sa kan begi efu a e draidrai fu suku fu kisi a wroko fu wan opziener?
13 Efu toku pikinso broko-ede de ete, dan wan man di e draidrai fu suku fu kisi a wroko fu wan opziener kan begi neleki fa David ben du: ”Sasi mi, ow Gado, èn sabi mi ati. Ondrosuku mi, èn sabi den ongorostu prakseri fu mi, èn luku efu wan pasi di e gi skin-ati de na ini mi, èn tyari mi tapu a pasi fu ten di no skotu” (Psalm 139:23, 24). San mag de tu na fasi fu wi „ongorostu prakseri” ofu „broko-ede”, toku Gado kan yepi wi fu kakafutu gi den, so taki wi kan go na fesi na yeye fasi. (Luku The New International Version.) Den e taki en heri moi na ini wan tra psalm: „Te mi ben taki: ’Mi futu seiker no sa degedege,’ dan a ben de yu eigi lobi switifasi, ow Yehovah, di ben tan e stotu mi. Te den ongorostu prakseri fu mi ben kon de furu na ini mi, dan a ben de den trowstu fu yu di ben bigin boboi mi sili.” — Psalm 94:18, 19.
Dini nanga prisiri so leki Yehovah wani
14. Fu san-ede wan man di no e suku fu kisi a wroko fu wan opziener musu begi fu kisi a santa yeye fu Gado?
14 Efu broko-ede, wan firi taki a no abi nofo koni gi a wroko, ofu wan mankeri fu a buweigi fu ati e meki wan kresten man no e suku fu kisi a wroko fu wan opziener, dan seiker a ben sa fiti fu begi Gado fu kisi en yeye. Yeises ben taki: „Efu unu . . . aladi unu ogri, sabi fu gi unu pikin bun presenti, omoro furu dan na Tata di de na ini hemel sa gi santa yeye na den wan di e aksi en!” (Lukas 11:13) Fu di vrede nanga a dwengi di yu musu dwengi yu srefi de wan pisi fu den froktu fu a yeye, meki a yeye disi kan yepi wi fu kakafutu gi broko-ede ofu a firi taki wi no abi nofo koni gi a wroko. — Galasia sma 5:22, 23.
15. Sortu fasi fu begi kan yepi den wan di e mankeri a buweigi fu ati fu poti den srefi klariklari gi grani fu dienst?
15 Fa a de nanga a mankeri fu buweigi fu ati? Leki dopu kresten, wi musu begi efu Gado wani meki wi du san e plisi en. David ben begi fayafaya: „Meki mi sabi den pasi fu yu, ow Yehovah, Meki mi waka ini yu waarheid èn leri mi” (Psalm 25:4, 5). So wan begi o yepi wi fu wai komoto gi wan fowtu pasi, èn wi kan begi na wan srefi sortu fasi efu wi e mankeri a buweigi fu ati fu suku fu kisi a wroko fu wan opziener. Wi kan aksi Yehovah fu meki wi abi na lostu fu teki den grani fu dienst. Te yu luku en bun, dan te wi e begi fu kisi Gado yeye èn e saka unu srefi na ondro a tiri fu en, dan sondro degedege wi sa poti wi srefi klariklari te den e gi wi grani fu dienst. Te yu luku ala sani bun, dan den diniman fu Yehovah no ben sa wani kakafutu noiti gi en yeye. — Efeisia sma 4:30.
16. Sortu fasi fu si sani e gi wan tranga buweigi fu ati fu suku fu kisi gemeente frantiwortu?
16 Fu di wi abi „a denki fu Krestes”, meki wi feni prisiri ini a du fu a wani fu Gado (1 Korente sma 2:16). Yeises ben abi na srefi yeye fasi leki di fu a psalmsingiman, di ben taki: „Ini a du fu yu wani, ow mi Gado, mi feni prisiri, èn yu wéti de na ini den inisei pisi fu mi” (Psalm 40:8). Krestes ben taki: „Luku! mi kon fu du yu wani,” èn dati ben go so fara srefi taki a dede na wan pina-udu (Hebrew sma 10:9, 10). Wan angri fu du ala san yu kan na ini a dienst fu Yehovah e gi wan tranga buweigi fu ati fu suku fu kisi gemeente frantiwortu.
Luku go na a tamara
17. (a) Fu san-ede den man di now no e dini dorodoro leki den ben du wan dei, no musu lasi ati? (b) San na a moro prenspari grani fu alamala?
17 Fu den problema fu wan sma gosontu ofu fu tra reide ede, meki sonwan di wan leisi ben abi prenspari gemeente wroko fu du, no abi den sortu grani disi moro na ini a ten disi. Den sma disi no musu firi broko-skin. Wi sabi taki furu kotrow man di no man dini moro langa so dorodoro leki fa den ben du wanten, tanapu steifi ete leki sma di e kibri den soifri retifasi (Psalm 25:21). Iya, sakafasi owruman di e dini bun langa kba kan tan go doro fu poti den ondrofeni fu den fu sma kobroiki fu di den e tan de wan pisi fu a skin fu owruman. Aladi owrudei nanga tra mankeri fu skin e skotu den, toku a no de fanowdu fu den kikbak. Ini a pisiten disi meki ibri Kotoigi fu Yehovah boboi a moro warti grani fu alamala, èn na dati na fu ’kan taki fu a glori fu a kownuwroko fu Gado’ leki sma di e hori en santa nen hei. — Psalm 145:10-13.
18. (a) Efu wan owruman ofu dinari na ini a diniwroko lasi en wroko, dan san kan de fanowdu? (b) Sortu tumusi moi fasi fu si sani wan man di den puru leki owruman ben sori?
18 Efu wan dei yu ben de wan owruman ofu wan dinari na ini a diniwroko, ma no e dini now ini a posisi dati moro, dan yu abi a dyaranti taki Gado e broko-ede nanga yu, èn kande na ini a ten di e kon sa gi yu grani di yu no ben fruwakti (1 Petrus 5:6, 7). Efu yu musu tyari wantu kenki kon, de dan klariklari fu erken wan fowtu èn wroko na en nanga a yepi fu Gado. Sonwan di den ben puru leki owruman, meki wan no-kresten fasi gro na ini den èn wantu fu den ben kon de inaktief ofu fadon komoto fu a waarheid. Ma fa a de wan koni sani fu de leki den wan di sori wan tumusi bun yeye! Fu eksenpre, di den bun puru wan owruman di ben dini yari langa na ini Midden Amerika, a ben taki: „A e hati mi srefisrefi taki mi lasi a grani di mi ben si so langa leki wan diri sani. Ma mi o go wroko tranga na ini sortu fasi den brada wani fu kobroiki mi èn mi sa wroko fu kisi den grani fu mi baka.” Baka wan pisiten, a brada disi ben kisi a grani baka fu dini leki owruman.
19. Sortu rai di fiti den e gi wan brada di den puru leki owruman ofu dinari na ini a diniwroko?
19 Efu den puru yu leki owruman ofu dinari na ini a diniwroko, kibri dan wan yeye fu sakafasi. Kibri yu srefi gi wan bita fasi di ben sa meki den no feni yu bun fu kisi grani na ini a ten di e kon. Wan yeye fu frede Gado e wini respeki. Na presi fu kon lasi-ati, go denki fa Yehovah e blesi yu diniwroko ofu yu osofamiri. Bow yu osofamiri na yeye fasi, fisiti den sikiwan èn gi den swakiwan deki-ati. Èn boiti fu dati, lobi a grani fu yu fu prèise Gado èn fu meki a bun nyunsu bekenti leki wan Kotoigi fu Yehovah. — Psalm 145:1, 2; Yesaya 43:10-12.
20. Fa wan skin fu owruman sa kan yepi wan brada di fositen ben de wan owruman ofu dinari na ini na diniwroko?
20 Wan skin fu owruman musu frustan taki a puru fu wan sma di ben de wan owruman ofu dinari na ini a diniwroko kan tyari spanning kon, srefi efu a libi a grani dati nanga en friwani. Efu a no sluit uit, ma den owruman e si taki a brada de nanga broko-skin, dan den musu gi yepi na yeye fasi na wan lobi fasi (1 Tesalonika sma 5:14). Den musu yepi en fu frustan taki en de fanowdu na ini a gemeente. Srefi efu en de fanowdu fu gi rai, dan kande a no abi fu teki so langa bifo wan sakafasi man di de nanga tangi kisi grani fu dienst baka na ini a gemeente.
21. Suma nanga suma ben wakti fu kisi grani fu dienst, èn sortu rai e gi na den wan di e wakti now na tapu dati?
21 Efu yu e suku fu kisi a wroko fu wan opziener, dan kande yu musu wakti pikinso bifo yu kisi moro grani fu dienst. No lasi pasensi. Moses ben wakti fotenti yari langa bifo Gado ben kobroiki en fu fri den Israèl sma puru fu katibo na ini Egipti (Tori fu den Apostru 7:23-36). Bifo den ben poti Yosuwa leki a sma di ben sa teki Moses presi, a ben dini wan langa pisiten leki Moses dinari (Exodus 33:11; Numeri 27:15-23). David ben musu wakti wan pisiten bifo den ben poti en na tapu a kownusturu fu Israèl (2 Samuwel 2:7; 5:3). Leki fa a sori dan Petrus nanga Yohanes Markus ben frudrage pisiten fu meki den kon soifri (Mateyus 26:69-75; Yohanes 21:15-19; Tori fu den Apostru 13:13; 15:36-41; Kolose sma 4:10). Sobun efu nownow yu no abi wroko fu du na ini a gemeente, dan a kan, taki Yehovah e gi pasi taki sani drai yu poti na en fasi, fu di yu e kisi moro ondrofeni. Awasi fa a no fa, suku a yepi fu Gado aladi yu e suku fu kisi a wroko fu wan opziener èn kande a sa blesi yu nanga moro grani fu dienst. Wroko fayafaya ini a pisiten disi fu doro den marki fu kisi gemeente frantiwortu èn sori a yeye fu David, di ben fruklari: „Mi mofo sa taki fu a prèise fu Yehovah; èn meki ala skin blesi en santa nen te ten di no skotu, iya fu têgo.”—Psalm 145:21.
San yu ben sa piki?
◻ Gi sortu kofar kresten owruman musu de na ai?
◻ San kan yepi den wan di no e suku fu kisi a wroko fu wan opziener, fu di den e broko-ede ofu abi wan firi taki den no abi nofo koni gi a wroko?
◻ San kan buweigi wan sma ati fu poti en srefi klariklari gi gemeente frantiwortu?
◻ Nanga sortu fasi fu denki den sma di fositen ben de owruman ofu dinari na ini a diniwroko musu si a tamara?
[Prenki na tapoe bladzijde 10]
W. J. Thorn ben gi wan moi eksenpre leki wan sakafasi owruman
[Prenki na tapoe bladzijde 12]
Yu de neleki Yeises klariklari fu du ala san yu kan na ini a dienst fu Yehovah?